• Kimatik ke kiyolpaktij Dios
    Tanejmachtijkej (tein tiktemakaj itech tanojnotsalis)—2017 | Tapoual 1

    • KIJTOJ TEIN KINPANOSKIA AKIN NEMIAJ ITECH ITONALUAN

      Kemej Enoc takuaujtamatia iuan Dios, xa momachiliaya iselti porin akin nemiaj itech itonaluan senkis amo kiueyichiuayaj yejuatsin. Sayoj ke ¿kiitak Jiova tein kipanotoya? Kemaj. Se tonal, Jiova kiluij Enoc itekitikauj akin amo kikauaya, maj kinmatilti se taman akin nemiaj itech itonaluan. Ika nejon tekit, Enoc mochiuak itanauatijkauj Dios oso akin kitematiltia tein yejuatsin kichiuati. Enoc yejua yekinika tanauatijkej tein itech Biblia ijkuiliujtok tein Dios kiluij maj kitematilti. Tikmatij porin miak xiujmej satepan, Judas, itakpaikniuj Jesús, Dios kichiuak maj kijkuilo tajtolmej tein achto kijtojka Enoc.a

      ¿Toni kitematiltij Enoc? Kijtoj: “Nikitak ualajtok ya in Totekotsin iuan tel miakke itekitikauan ten yolchipauke, para ijkon nochi kinixkomakas [...] taltikpakuani ten kimouispoloaj Yejuatsin. Uan no Yejuatsin kintatsakuiltijkiu nochi nojon tajtakolejke ten amo kixmatij Dios ika por ninauilnemilis uan ninpitsotiknemilis” (Judas 14, 15). Xa tein yekinika mitsonyolnotsas yejua ke Enoc tajtoj kemej yeskia panokaya, kemej yeskia Dios kichiujkaya tein moijtojka achto. Miakej tanauatianij no ijkon tajtojkej. Keman ijkon tajtouayaj, kiteajsikamatiltiayaj ke nejon tajtolmej senkis mochiuaskiaj uan yejua ika kijtouayaj kemej yeskia mochiujkaya (Isaías 46:10).

      Enoc kinmatiltia iTajtol Dios akin amo yolkualmej

      Ika yolchikaualis Enoc kinmatiltij akin semi tateuiayaj tein Dios yaya kichiuati

      Xa Enoc monekik kinmatiltis nochin nejon tanejmachtilis. ¿Toni ouijkayomej kiixnamikiskia? Xikonita tein kitematiltij. Miakpa kijtoj “tajtakolejke”, ika nejin tajtol kinextij ke akin amo kipoujkaitayaj Dios kichiuayaj tein tel amo kuali uan ke amo kuali monejnemiltiayaj. Nejin tein achto moijtojka kiyeknextiaya ke satepan keman Adán tajtakoj, taltikpakneminij senkis kichiuayaj tein amo kuali uan ixpoliuiskiaj. Jiova ika “tel miakke itekitikauan [ángeles] ten yolchipauke”, kinixpoloskiaj. Enoc tanejmachtij ika yolchikaualis uan iselti kichiuak. Yejua ika, amo tikmoujkaitaskiaj maj telpoch Lamec kiitani ika poujkaitalis iueyitat akin katka yolchikauak.

      Titanemiliskej itech itakuaujtamatilis Enoc, kichiua maj timotajtanikan ox tikitaj tein mochiujtok itech taltikpak ijkon kemej Dios kiita. Tein Enoc kitematiltij kisentoka hasta axkan uan moneki moteixmatiltis ijkon kemej mochiuak itech itonaluan. Tein tanejmachtij mochiuak keman Jiova kiualkuik tetsaujkakiouit uan kitamij nochi tein amo kuali itech itonaluan Noé. Nejon tein panok kiixnextia se okachi ueyi ixpoliuilis tein amo uejkaua mochiuas (Mateo 24:38, 39; 2 Pedro 2:4-6). Itech totonaluan, Dios kiixtalijya tein moneki uan ijkon ika tel miakej iángeluan kiixpolos nochi tein amo kuali tein mochiujtok itech taltikpak. Maj tiknejmachkakikan tein kijtoj Enoc uan maj tikinmatiltikan oksekin. Xa kemansa uelis timomachiliskej toselti porin amo techpaleuiaj tochankauan uan akin kuali iniuan timouikaj. Sayoj ke Jiova amo keman kikauak Enoc uan amo keman kinkauas akin kitekitiliaj ika nochi ininyolo.

  • Kimatik ke kiyolpaktij Dios
    Tanejmachtijkej (tein tiktemakaj itech tanojnotsalis)—2017 | Tapoual 1

    • a Sekin akin motelmachtiaj tein kipia Biblia senkis kijtouaj ke Judas ika tajtoj se amatajkuilol tein amo kipia itanemililuan Dios tein itokay Libro de Enoc. Nejin amatajkuilol kipia miak tetapouilis uan amo momati akoni kijkuiloj, maski sekin kineltokaj ke Enoc kijkuiloj, nejon amo melauak. Tein melauj, ompa ajsitok ijkuiliujtok tein achto kijtojka Enoc, sayoj ke akin kijkuiloj nejon xa aksa kitapouij oso kikixtij itech se taman amatajkuilol, tein amo moajsiok itech totonaluan. Judas xa no kiitak nejon amatajkuilol oso Jesús kitapouij akoni katka Enoc, porin kiualpanitak ompa iluikak nejin tanauatijkej.