AKIN YOUI IPANKO ISTAK CABALLO

Biblia peua kijtoua nejin: “Nikitak ke ualkisak se istak caballo. Uan ne naken ipan motaliaya, yejuatsin ne maaktoya se [...] arco. Uan no kikuatalilijke se kualtsin corona [...] uan kitanito in amokuali taltikpakyetoni, uan kisentoka kachi ok tatantiu” (Apocalipsis [Revelación] 6:2).

¿Akoni youi ipanko istak caballo? Amatajkuilol Apocalipsis kinextia akoni. Seki capítulos taixpan kijtoua ke kitokaytiaj “Tajtoltsin de Dios” (Apocalipsis 19:11-13). Tokayit, “Tajtoltsin”, kiixnextia Jesucristo porin yejua akin tajtoua itenkopa Dios (Juan 1:1, 14). No kitokaytiaj “Tayekanke inpan nochi in oksekin tayekanani” uan moijtoua ke “Yolmelauaktsin porin Yejuatsin kichiuas ijkon keme moyektenkauak ya” (Apocalipsis 19:11, 16). Kemej tikitaj, Jesús kipia tanauatil maj tateui kemej se tekiuaj uan no, kichiua tein melauak uan kuali kitekitiltia tanauatil tein kipia. Sayoj ke moajsij okseki netajtanilmej.

¿Akoni kimaka Jesús nejon tanauatil tein ika youi tataniti? (Apocalipsis 6:2.) Daniel akin kitematiltiaya tein Dios tanauatiaya kiitak ika inepaleuil Dios ke Mesías, akin tamatia kemej “se ikonetsin taltikpaknenkej”, kiseliaya “taixyekanalis uan poujkaitalis uan tekiuajyot”. Nejon tanauatil kimakaya “Akin xiuejya itech Tonalmej”, Jiova Diosa (Daniel 7:13, 14). Ijkon, Dios akin kipia nochi chikaualis kimaka Jesús tanauatil tein ika taixyekanas uan tamelauas. Itech Biblia tapal istak kuali kiixnextia melaujkayot, yejua ika istak caballo kiixnextia neteuilis tein iKonetsin Dios kichiua ika melaujkayot (Apocalipsis 3:4; 7:9, 13, 14).

Sayoj ke, ¿kemanian peujkej motalouaj nauin akin youij ipanko caballos? Akin yekinika peuak motaloua yejua Jesús keman kiselij taixyekanalis (Apocalipsis 6:2). ¿Uan kemanian kiixtalijkej kemej Tekiuaj ompa iluikak? Nejon amo panok ijkuak mokepak iluikak satepan ke momikilij porin Biblia kinextia ke ijkuak peuak mochia (Hebreos 10:12, 13). Jesús kinmelauilij itatojtokakauan keniuj ueliskia kimatiskej ke yejua peujkaya taixyekana ompa iluikak. Kijtoj ke ijkuak peuaskia taixyekanas, okachi motaouijkantaliskia itech taltikpak. Onkaskia neteuilismej, mayan uan kokolismej (Mateo 24:3, 7; Lucas 21:10, 11). Tepitsin satepan keman peuak Yekinika Neteuilis tein Mochiuak itech Nochi Taltikpak itech xiuit 1914, moyeknextij ke ejkokaya nejon tonal uan ke peuak tinemij itech tein Biblia kitokaytia “itamian tonalmej” (2 Timoteo 3:1-5, TNM).

Sayoj ke, ¿keyej okachi motaouijkantaliani nikan taltikpak ijkuak Jesús peuak taixyekana itech xiuit 1914? Porin itech nejon xiuit, Jesús peuak taixyekana ompa iluikak uan amo itech taltikpak. Ompa iluikak mochiuak se neteuilis uan Tekiuaj akin yekin kiixtalijkaj, akin no motokaytia Miguel, amo kikauak maj Satanás uan iamokuali ejekauan moajsikanok iluikak uan kinkixtij (Apocalipsis 12:7-9, 12). Ijkuak, Satanás kiualpantamotkej nikan taltikpak uan hasta axkan kisentoka tel kualantok porin amo miak tonalmej kipiaok. Tein melauj, amo miak tonalmej poliui uan Dios kichiuas tein kiixtalijtok kichiuilis Satanás nikan taltikpak (Mateo 6:10, TNM). Axkan maj tikitakan keniuj oksekin eyin akin youij ipanko caballos kinextiaj ke tinemij itech “itamian tonalmej” tein semi ouijkej. Akin yekinika youi ipanko caballo senkis kiixnextia aksa, sayoj ke oksekin eyin kiixnextiaj tein mochiujtok semanauak taltikpak tein semi taijtakoua.