1. ¿Toni kineki Dios maj mochiua nikan taltikpak?

DIOS kipialia se kualtsin tanejnekilis taltikpak: maj pexoni ika taltikpakneminij, maj nemikan ika yolpakilis uan maj amo kokolispeuakan. Biblia techiluia ika “Jiova Dios kichiuak se xochital itech Edén” uan “kichiuak maj moskaltiani [...] koujmej tel kualtsitsin uan itakilo kuali se kimajseuaskia”. Satepan kinchijchiuak yekinika taltikpakneminij Adán uan Eva, uan kintalij itech nejon tel kualtsin xochital uan kiniluij: “Xikinpiakan konemej uan ximomiakilikan uan ximomoyauakan noyampa taltikpak uan xikixyekanakan” (Génesis 1:28; 2:8, 9, 15). Kemej tikitaj, itanejnekilis Dios katka maj taltikpakneminij kinpianij konemej, maj kipatauanij nejon xochital semanauak taltikpak, uan maj kinyekpianij tapialmej.

2. 1) ¿Keyej uelis titakuaujtamatiskej ke yekmelauj mochiuas itanejnekilis Dios nikan taltikpak? 2) Kemej kijtoua Biblia, ¿akonimej nemiskej nochipaya?

² ¿Tikonnemilia tejuatsin ke se tonal yekmelauj tinemiskej itech se xochital nikan taltikpak ijkon kemej Jiova kineki? Yejuatsin motenkauak: “Nikixtalijya uan no ijkon nikchiuas” (Isaías 46:9-11; 55:11). Kemaj, Dios yekmelauj kichiuas ijkon kemej kiixtalijtok. Yejuatsin kijtoua ke taltikpak “amo sayoj nenkaj kichijchiuak, ta kichijchiuak maj ompa nemikan” (Isaías 45:18). ¿Akonimej kinekia Dios maj neminij nikan taltikpak, uan kanachi xiujmej? Biblia tanankilia: “Akin yolmelaujkej ininaxkatis taltikpak, uan ompa nemiskej nochipaya” (Salmo 37:29; Apocalipsis 21:3, 4).

3. ¿Toni tikitaj nikan taltikpak tein tetayokoltij, uan ika nejon, toni netajtanilmej timochiuiliaj?

³ Kemej tikitaj, itanejnekilis Dios ayamo mochiua. Taltikpakneminij kokolispeuaj uan momikiliaj; uan tein okachi amo kuali, miakej moteuiaj uan momijmiktiaj. Moyekita ke amo mochiujtok tein kuali. Tein melauj, Jiova amo keman kinekik maj taltikpak yeto kemej axkan tikitaj. ¿Toni mochiuak? ¿Keyej amo mochiua itanejnekilis Dios? Tanankililmej amo moajsij itech nion se ininamaix taltikpakneminij, ta kuejmol peuak ne iluikak.

NESI SE TAIXNAMIKKEJ

4, 5. 1) ¿Akoni tajtoj iuan Eva itenkopa se kouat? 2) ¿Keniuj aksa uelis yeski yolmelauak uan satepan mochiuas tachtekkej?

⁴ Itech yekinika amaix tein kipia Biblia, techiluia ke itech xochital tein moajsia Edén, nesik se aksa akin kiixnamiki Dios. Maski kitokaytiaj “kouat” amo se okuilij. Amaix tein ika tami Biblia, kijtoua ke “kitokaytijke [...] amokuali, uan no kitokaytijke Satanás, ne ten kinkajkayautinemi nochi in taltikpakuani”. No kitokaytiaj “kouat ten ne achtopa ipa nentiuits” (Génesis 3:1; Apocalipsis 12:9). Kemej tikitaj, yejua se ángel tel chikauak, se espíritu tein kichiuak maj mokaki ke kisaya se tajtolis itech kouat keman kinojnotsak Eva. Amo tiomeyolouaj ke nejon ángel ompa moajsia keman Dios kinchijchiuilij taltikpak, takamej uan siuamej (Job 38:4, 7).

⁵ Kemej tikmatij, nochi tein Jiova kichijchiua tel kuali uan amo teyi kipoloua. Komo ijkon, ¿akoni kichijchiuak akin motokaytia “Amokuali” uan “Satanás”? Uelis tikijtoskej ijkon: se ángel tel chikauak tein Dios kichijchiuak yejua iselti mochiuak Amokuali. ¿Keniuj uelik mochiuak nejon? Ijkon kemej aksa yolmelauak mochiua tachtekkej satepan. ¿Keniuj mochiua nejon? Taltikpaknenkej xa kikaua maj ixua iyolijtik se tanejnekilis tein amo kuali. Komo kisentoka itech tanemilia, nejon tanejnekilis uelis mochiuas tel chikauak. Satepan, keman moajsi kampa uelis kichiuas, ika tami kichiua tein kinemilijtoya (xikonixtajtolti Santiago 1:13-15, TNM).

6. ¿Keniuj se ángel tel chikauak tein Dios kichijchiuak mochiuak Satanás uan Amokuali?

⁶ Yejua nejon tein kipanok Satanás. Xa kitenkakik Jiova keman kiniluij Adán uan Eva, maj kinpianij konemej uan maj kipexontianij taltikpak (Génesis 1:27, 28). Uan xa kinemilij nejin: “¡Nochin ueliskia nechueyichiuaskej nejua uan amo Dios!”. Nejon tanejnekilis tein amo kuali, ixuak iyolijtik uan satepan, kichiualtij maj kitakajkayauili Dios uan yejua nejon kiluij Eva (xikonixtajtolti Génesis 3:1-5). Ijkon, nejon ángel mochiuak “Diablo” oso Amokuali, tokayit tein kijtosneki “Tetakajkayauilijkej ika tein tel amo kuali”. Uan no mochiuak “Satanás”, tokayit tein kijtosneki “Taixnamikkej”.

7. 1) ¿Keyej momikilijkej Adán uan Eva? 2) ¿Keyej tiueuejtij uan timomikiliaj tinochin tiikoneuan Adán?

⁷ Satanás achtook kuali kinemilij keniuj takajkayauas, uan ika nejon uelik kinchiualtij Adán uan Eva maj amo kitakamatinij Dios (Génesis 2:17; 3:6). Uan ika tamik, nochin omen momikilijkej, ijkon kemej Dios kinnejmachtijka (Génesis 3:17-19). Kemej Adán mochiuak tajtakojkej keman amo tatakamatikok, nochin ikoneuan kinpanoltilij tajtakol (xikonixtajtolti Romanos 5:12). Mochiuak kemej se molde tein ika kichijchiuaj koyotaxkal tein kitelojkej uan tekochtiak. ¿Keniuj kisas koyotaxkal tein itech kichijchiuaskej? Amo kualtsin kisas, no tekochtik yeski. No ijkon tejuan, tinochin tiyolij kemej yeskia “titekochtikej” ika itajtakol Adán. Yejua ika tiueuejtij uan timomikiliaj (Romanos 3:23).

8, 9. 1) Kemej kinextia tein mochiuak, ¿toni taixnamikilis kitalij Satanás? 2) ¿Keyej Dios amo niman kinixpoloj taixnamikinij?

⁸ Keman Satanás kichiuak maj Adán uan Eva tajtakouanij iixpan Dios, tein melauj yejua taixyekanak maj kinekepilikan Dios. Kiixnamikik Jiova, ta kijijtoj kemej tekiuajti. Kemej yeskia kijtoskia: “Yejua se tekiuaj amo yolkuali tein kinkajkayaua akin kinixyekana, uan kintsakuiltilia miak taman tein kuali. Taltikpakneminij amo moneki maj yejua kinixyekana, ta yejuan ininselti uelis moitiliskej tein kuali uan tein amo kuali. Tein melauj, okachi kuali kiyas komo nejua nechtakamatij”. ¿Toni kichiuaskia Dios ika nejin tapantilis tein tel amo kuali? Sekin kinemiliaj ke monekia kinmiktis taixnamikinij. Axkan, ¿kinextiskia nejon ke Satanás takajkayauak? ¿Moitaskia ke kemej tekiuajti Dios yejua tein okachi kuali?

⁹ Jiova amo keman mopoloua ijkuak kitekitiltia melaujkayot. Yejua ika, amo uelik niman kinixpoloj taixnamikinij. Ta, kiixejekoj monekia maj panouani xiujmej, uan ijkon moitaskia ox melauak katka tein kijtouaya Satanás uan kinextiskia ke yejua se takajkayaujkej. Yejua ika, Dios kiixtalij maj panouani seki xiujmej maj taltikpakneminij moixyekananij ininselti, uan maj moajsinij imaixko Satanás. Itech capítulo 11 itech nejin amaix, kimelaua keyej ijkon kichiuak uan keyej kikaua maj pano tel miak xiujmej uan ijkon kimelauas nejon kuejmolmej. Kemej tikmatij, Satanás amo kinmakatoya nion teyi Adán uan Eva. Yejua ika xionmotajtani, ¿onkaya keyej maj kineltokilianij? Uan Jiova kemaj kinmakatoya nochi tein kipiayaj. Yejua ika, ¿kuali tein kichiujkej keman kinemilijkej ke katka se takajkayaujkej uan amo teiknelijkej? ¿Toni tikonchiuaskia tejuatsin?

10. ¿Keniuj uelis tionyetos itechkopa Jiova uan ijkon yejuatsin uelis kinankilis itaixnamikilis Satanás?

¹⁰ Semi kuali maj titanemilikan itech nejin netajtanilmej, ta tisejsemej no moneki tikpejpenaskej akoni tiktajtolkakiskej. Kemaj, tejuatsin uelis tionyetos itechkopa Jiova uan ijkon yejuatsin uelis kinankilis itaixnamikilis Satanás. Uelis tikonselis Dios kemej moTekiuaj uan ijkon moitas ke Amokuali se takajkayaujkej (Salmo 73:28; xikonixtajtolti Proverbios 27:11). Maski nikan taltikpak nemij tel miakej millones, semi tetayokoltij maj sayoj se ome eyi kichiuakan nejon. Uan yejua ika techuika maj timochiuilikan se netajtanil tein motelneki: ¿yekmelauj tamachtia Biblia ke Satanás taixyekantok nikan taltikpak?

¿AKONI TAIXYEKANTOK NIKAN TALTIKPAK?

11, 12. 1) Keman Amokuali kitalilij Jesús se tayejyekolis, ¿keniuj kinextia ke yejua taixyekantok nikan taltikpak? 2) ¿Toni okseki tajtolmej kinextia ke Satanás taixyekantok nikan taltikpak?

¹¹ Jesús amo keman omeyolouak ke Satanás yejua taixyekantok nikan taltikpak. Se tonal, Amokuali kinextilij ika se mouiskatekit “kampa tayekanaj ueyi chiuanime de nikan taltikpak. Uan no kinextilij nochi ninueyipanchiualisme”, uan motenkauak: “Takan timotankuaketsas uan timotentokas noixpan uan takan tinechmouistilis, ijkuakon nochi nijin ten tikitstok nimitsmaktilis” (Mateo 4:8, 9; Lucas 4:5, 6). Xiontanemili itech nejin. Komo Satanás amo iaxka yeskia nejon tekiuajyomej, ¿yekmelauj kitaliskia Jesús itech tayejyekolis ika tein kinextilij? Jesús amo keman kijtoj ke nejon tekiuajyomej amo iaxka Amokuali. Senkis tikmatij, komo amo moajsiskia imaixko, Jesús kiluiskia.

¹² Kemej tikyekmatij, Jiova yejua Dios tein kipia nochi uelilis, akin kichijchiuak nochi tein onkak uan se kimoujkaita (Apocalipsis 4:11). Sayoj ke, itech Biblia nion seko kijtoua ke Jiova uan Jesucristo taixyekantokej nikan taltikpak. Tein melauj, Jesús kitokaytij yejua Amokuali “naken takitskijtok [oso taixyekantok] axkan taltikpak” (Juan 12:31; 14:30; 16:11). Uan Biblia no kiyekijtoua ke nejon taixnamikkej, oso Satanás, yejua “ueyi chiuke in amokuali ten tayekantinemi nikan taltikpak” (2 Corintios 4:3, 4). Tatitanil Juan ika tajtoj yejua keman kijkuiloj: “Nochi in taltikpakuani kinyekana ok yejua in amokuali Satanás” (1 Juan 5:19).

SATANÁS AMO TAIXYEKANTOSOK NIKAN TALTIKPAK

13. ¿Keyej moneki maj sayoj nemikan akin yolmelaujkej nikan taltikpak?

¹³ Ijkon kemej panotiuj xiujmej, kampa tinemij okachi mochiua tamouililpan. Noyampa moteuijtokej itech uejueyi neteuilismej, moajsij temiktianij, tekiuanij tein kichiuaj tein amo kuali ika tomin, uan tayekananij itech taneltokalis ixkepmej. Nochin nejin akin amo yolkualmej, amo mopataskejok. Kemej kinextia Biblia, amo uejkaua Dios kinixpolos itech neteuilis tein itokay Armagedón, uan satepan sayoj moajsiskej akin yolmelaujkej (Apocalipsis 16:14-16).

14. ¿Akoni kiixpejpenak Dios kemej Tekiuaj itech iTekiuajyo tein moajsi iluikak, uan toni tanauatil achtook moijtojka ke kiseliskia?

¹⁴ Jiova kiixpejpenak Jesucristo, kemej Tekiuaj itech iTekiuajyo Dios tein moajsi iluikak. Ne uejkauj, Biblia achtook kijtojka: “Se konet yolik, se konet techmakakej, uan itayekanalis tein kiselis moajsis iajkoltipan, uan motokaytis [...] Tayekankej tein kiualkui Yolseuilis. Itayekanalis kipatauas uan yekyetolis amo kipias itamilis” (Isaías 9:6, 7). Jesús kinnextilij imomachtijkauan maj no tajtaninij itech ininnetataujtiluan, keman kiniluij: “Maj uiki motekiuajyo. Maj mochiua motanejnekilis, kemej iluikak, no ijkon nikan taltikpak” (Mateo 6:10, TNM). Kemej tikitaskej satepan, amo uejkaua iTekiuajyo Dios kintamis nochin taltikpaktekiuajyomej uan sayoj yejua moajsis (xikonixtajtolti Daniel 2:44). Uan satepan kichiuas se xochital nikan taltikpak.

¡AMO UEJKAUA UALATI SE YANKUIK TALTIKPAK!

15. ¿Toni “yankuik taltikpak”?

¹⁵ Biblia techyekiluia ke moajsi “se yankuik eluiyak uan ne yankuik taltikpak, kampa mochiutos sayo ten kualtsin chipaukanemilis ijkon keme yejuatsin motenkauak ya de kichiuas” (2 Pedro 3:13; Isaías 65:17). Keman Biblia ika tajtoua “taltikpak”, kemansa kijtosneki akin ompa nemij (Génesis 11:1). Yejua ika, “yankuik taltikpak” kampa onkas melaujkayot, kijtosneki se oloch taltikpakneminij akin kiseliaj ipoujkaitalis Dios.

16. ¿Toni tel ueyi uan kualtsin netetayokolil kinmakas Dios akin kinmaka ipoujkaitalis, uan toni moneki tikchiuaskej uan ijkon uelis tikseliskej?

¹⁶ Jesús motenkauak keman ejkos yankuik taltikpak, Dios kinmakas se tel ueyi uan kualtsin netetayokolil akin kinmaka ipoujkaitalis: se “nemilis ten amo keman tamis” (Marcos 10:30). Xikontemo itech moBiblia Juan 3:16 uan 17:3, uan tikonixtajtoltis tein kijtoj Jesús tein moneki tikchiuaskej, uan ijkon uelis tikseliskej nemilis nochipaya. Axkan maj tikitakan itech Biblia tatiochiualismej tein kipiaskej itech Xochital akin kiseliskej ipoujkaitalis Dios.

17, 18. ¿Keyej uelis titakuaujtamatiskej ke onkas yekyetolis semanauak taltikpak uan amo akin moujkanemis?

¹⁷ Amo onkasok tein amo kuali, neteuilismej, eliuisyot uan amo akin kitapanauilis tanauatilmej. “Akin amo yolkuali amo nemisok [...]. Sayoj ke akin yolnejmachmej ininaxkatis taltikpak.” (Salmo 37:10, 11.) Onkas yekyetolis, ta Dios ‘kitamis neteuilismej itech nochi semanauak taltikpak’ (Salmo 46:9; Isaías 2:4). Keman ejkos nejon tonal, sayoj “moajsis akin yolmelauak” uan onkas “ueyi yekyetolis uan uejkauas keman ajsis itamilis metsti”, tein kijtosneki, nochipaya (Salmo 72:7).

¹⁸ Itekitikauan Jiova amo moujkanemiskej. Ne uejkauj, keman israelitas kitakamatiaj Dios, amo moujkanemiaj (Levítico 25:18, 19). No ijkon itech Xochital amo timoujkanemiskej. ¡Tel kualtsin yeski! (Xikonixtajtolti Isaías 32:18; Miqueas 4:4.)

19. ¿Keniuj tikyekmatij ke Dios kichiuas maj onka tel miak takual itech yankuik taltikpak?

¹⁹ Amo tasojtis tein se kikuas. Akin kijkuiloj Salmo mokuikatij: “Onkas tel miak tatet nikan taltikpak; uan ininkuapan tepemej onkas okachi miak” (Salmo 72:16). Jiova Dios kintatiochiuis akin kitakamatij, uan “itech taltikpak moteltachiuas” (Salmo 67:6).

20. ¿Keyej uelis titakuaujtamatiskej ke semanauak taltikpak mochiuas se xochital?

²⁰ Semanauak taltikpak mochiuas se xochital. Moajsiskej kualtsitsin kalmej uan takualtsinkan yeski, itech talmej tein axkan kijtakojtokej akin amo yolkualmej (xikonixtajtolti Isaías 65:21-24; Apocalipsis 11:18). Ijkon kemej panotiyas xiujmej, xochital mopataujtiyas, uan ika tamis, semanauak taltikpak yeski tel takualtsinkan uan tel tatakis kemej xochital itech Edén. Dios nochipaya ‘kitapojtos imay uan kinchiuilijtos inintanejnekilis nochin tein yoltoskej’ (Salmo 145:16).

21. ¿Toni kinextia ke taltikpakneminij sennemiskej iniuan okuilimej?

²¹ Sennemiskej taltikpakneminij iniuan okuilimej. Koujtaj okuilimej uan tapialmej sentakuaskej. Nion se konetsin kinmouilis okuilimej tein axkan tamouililmej (xikonixtajtolti Isaías 11:6-9; 65:25).

22. ¿Toni mochiuas ika kokolismej?

²² Amo onkasok kokolis. Jesús, kemej Tekiuaj itech iTekiuajyo Dios tein moajsi iluikak, okachi miakej kinpajtis, amo kemej ijkuak moajsia nikan taltikpak (Mateo 9:35; Marcos 1:40-42; Juan 5:5-9). “Nion se taltikpaknenkej kijtos: ‘Nimokokoua’.” (Isaías 33:24; 35:5, 6.)

23. ¿Keyej techtelyolpaktis neajokuilis?

²³ Tochankauan uan totasojikniuan akin momikilijkej moajokuiskej, uan komo kichiuaj tein Dios tajtani amo momikiliskejok. Moajokuiskej nochin mikemej akin yetokej itech italnamikilis Dios. Kemaj, “Dios kinpankixtis yoltokke nochi in animajme [oso mikemej], amo sayo in yolkualime. Ta, no nekes ten amo yolkualime” (Hechos 24:15; xikonixtajtolti Juan 5:28, 29).

24. ¿Tikonuelitaskia tionnemis itech se Xochital nikan taltikpak?

²⁴ Akin kinekiskej okachi kiixmatiskej toUeyi Tachijchiujkej Jiova, uan kiixtaliskej kitekitiliskej, kipiaskej se tel kualtsin nemilis. Uan no, motelneki maj okachi tikixmatikan Jesucristo, ta nochi nejin tatiochiualismej mochiuas yejua itechkopa.

1. ¿Katiyejua netataujtil tein motelixmati tikitatij?

TEL miakej akin nemij itech semanauak, kiixmatij netataujtil tein nochin kitokaytiaj padrenuestro. Nejin se netataujtil tein yejua Jesucristo kitemakak kemej se neskayot, uan motelneki tein kijtoua. Maj tikitakan eyi taman tein yekinika tajtanik, uan ijkon okachi tikajsikamatiskej tein yekmelauj tamachtia Biblia.

2. Xikonijto eyi taman tein Jesús kinmachtij imomachtijkauan maj tajtanikan itech netataujtil.

² Ipeujyan nejon netataujtil kemej neskayot, Jesús kiniluij akin kikaktoyaj: “Namejuan moneki nankichiuaskej netataujtil ijkon: ‘ToTajtsin akin tiyetok iluikak, maj moueyitali motokay. Maj uiki motekiuajyo. Maj mochiua motanejnekilis, kemej iluikak, no ijkon nikan taltikpak’” (Mateo 6:9-13, TNM). ¿Toni kijtosneki nejin eyi taman tein motajtanik?

3. ¿Kemej toni moneki maj tikmatikan ika iTekiuajyo Dios?

³ Tel ika timomachtijkejya itokay Dios, Jiova. Uan no ika titajtojkejya itanejnekilis, ijkon kemej tein kichiuakya uan tein toka kichiuatiok. Axkan, ¿toni kijtosnekia Jesús keman tajtanik “Maj uiki motekiuajyo”? ¿Toni iTekiuajyo Dios? ¿Keniuj iualalis kiueyitalis itokay Dios? ¿Uan keniuj mouikaj nejin ome tachiualismej, maj uiki iTekiuajyo Dios uan maj mochiua itanejnekilis?

¿TONI ITEKIUAJYO DIOS?

4. ¿Toni iTekiuajyo Dios, uan akoni iTekiuaj?

⁴ ITekiuajyo Dios se tayekanalis tein Jiova kiixtalij. Uan yejuatsin kiixpejpenak Tekiuaj itech nejon tekiuajyot. ¿Akoni nejon Ueyi Tekiuaj? Jesucristo. Yejua okachi ueyi, amo ijkon kemej taltikpak tekiuanij; yejua ika moijtoua “Yejuatsin in kachi ueyi Tayekanke inpan nochi in oksekin tayekanani. Uan Yejuatsin in kachi ueyi Tekotsin ipan nochi in tekome” (Apocalipsis 19:16). Jesús kipia uelilis tein ika kichiuas okachi miak taman tein kuali, kemej nion se taltikpak tekiuaj ueli kichiua, nion no akin okachi kuali tekiuaj.

5. ¿Kani ualtekiuajtitos iTekiuajyo Dios, uan kani kitekitiltis iuelilis?

⁵ ¿Kani ualtekiuajtitos iTekiuajyo Dios? ¿Kani yetok Jesús? Ijkon kemej tikitakejya, tepitsin satepan keman kimiktijkej itech tajyouilis kouit uan satepan keman moajokuik, yajki iluikak (Hechos 2:33). Yejua ika uelis tikijtoskej ke iTekiuajyo Dios yetok iluikak (2 Timoteo 4:18). Uan maski yetok ne iluikak, iuelilis kitekitiltis ipan taltikpak (xikonixtajtolti Apocalipsis 11:15).

6, 7. ¿Keyej amo onkak nion se tekiuaj kemej Jesús?

⁶ Amo moajsi nion se Ueyi Tekiuaj kemej Jesús. ¿Keyej ijkon tikijtouaj? Yekinika, porin amo keman momikilis. Biblia kijtoua ke Jesús amo kemej oksekin taltikpak tekiuanij, ta sayoj “Yejuatsin amo keman kipias tamilis” (Romanos 6:9). Nejin kijtosneki ke nochi tein kichiuas amo keman tamis. Uan tikyekmatij ke kichiuas miak taman tein kuali.

⁷ Xikonita tein Biblia achtook kijtojka ke mochiuas itech Jesús: “Ipan yejua moneki yetos iespíritu Jiova, espíritu ika tamatilis uan ajsikamatilis, espíritu ika tayolmajxitilis uan uelilis, espíritu ika taixmatilis uan tamoujkatokalis iuan Jiova, uan yejua kiuelitas kimoujkatokas Jiova, amo taixkomakas sayoj ika tein kiitas tapani nion no kintatsakuiltis sayoj ika tein kikakis. Ika melaujkayot moneki kinixkomakas akin yolyemankej uan ika melaujkayot moneki kinmelauas akin nejmachmej” (Isaías 11:2-4). Nejin tajtolmej kinextia ke Jesús taixyekanas ika melaujkayot uan teiknelilis. ¿Tikonuelitaskia tikonpias se tekiuaj ijkon?

8. ¿Akonimej tekiuajtiskej iuan Jesús?

⁸ Maj tikitakan okse taman tein kipias iTekiuajyo Dios: Jesús amo iselti tekiuajtiti, ta iniuan okseki tekiuanij. Se neskayot, tatitanil Pablo kiluij Timoteo: ‘Komo tikijyouijtiyouej in ouijkayomej, ijkuakon se tonal titayekanatiuej iuan Cristo’ (2 Timoteo 2:12). Kemaj, Pablo, Timoteo uan oksekin akin yolmelaujkej tein kinixpejpenak Dios, tekiuajtiskej iuan Jesús itech iluikak Tekiuajyot. ¿Kanachimej kipiaskej nejon tatiochiualis?

9. ¿Kanachimej tekiuajtiskej iuan Jesús, uan kemanian peuak kinixpejpena Dios?

⁹ Kemej kinextij nejin amaix itech capítulo 7, tatitanil Juan kiitak itech se tajtachialis “ichkatsin [Jesucristo] [...,] metsijkatok ipan ne tepetsin ten kiliaj Sión [kampa tekiti kemej Tekiuaj ne iluikak]. Uan ompa iuan Yejuatsin yetoyaj se ciento uan omepoal uan naui mil taneltokani de Dios. Uan nochi yejuan ijkuiliutok tech inixkuako in tokayit de Cristo uan in tokaytsin de Dios”. ¿Akonimej nejon 144,000? Yejua Juan kijtoua: ‘Yejuan nojonkes kitoktiliayaj Cristo ten tamati kemej ichkatsin uan kiseuikayaj kampa yeski yaya Cristo. Yejuan nojonkes Dios kinkouak, uan yejuan mochiuakoj kemej ne takilot ten achtopa motakiltij de Totajtsin Dios, uan den Cristo ten tamati kemej ichkatsin’ (Apocalipsis 14:1, 4). Yejuan itatojtokakauan Jesucristo akin amo kikaujkej akin kinixpejpenkej maj iuan tekiuajtitij ne iluikak. Satepan keman momikiliskej uan moajokuiskej ne iluikak, ‘kinyekantinemiskej in taltikpakuanij’ iuan Jesús (Apocalipsis 5:10). Itech inintonaluan tatitanilmej, ijkuak Dios peuak kinixpejpena akin kichiuaj kemej Cristo akin yolmelaujkej, uan ijkon maj momajxiti tapoual 144,000.

10. ¿Keyej Jiova kinextij netasojtalis keman kinemilij maj Jesús iniuan 144,000 taixyekanakan?

¹⁰ Jiova kinextij netasojtalis keman kinemilij maj taixyekanakan Jesús iniuan 144,000. ¿Keyej? Yekinika, Jesús katka taltikpaknenkej uan yejua ika kiixmati tajyouilismej tein tikpanouaj. Pablo kijtoj ke Jesús “techyoliknelijtiyas porin Yejuatsin moajsikamatiltijtiyas ke tejuan kuali uelis tikuetautiuetsiske [...;] porin Yejuatsin kixijxikojtiuala ya nochi tataman tajyouilisme [...] ijkon keme tejuan [...], pero amo keman motajtakolmakak” (Hebreos 4:15; 5:8). Akin iuan tekiuajtiskej no kixikouaj tajyouilismej kemej tein tikpanouaj. Mochikauaj kiixtopeuaskej tein kinchiualtisneki tajtakol, uan no kokolispeuaj. Tikyekmatij ke kiajsikamatiskej ouijkayomej tein tikpanouaj.

¿TONI KICHIUAS ITEKIUAJYO DIOS?

11. ¿Keyej kijtoj Jesús ke imomachtijkauan monekia kitajtaniskej Dios maj mochiua itanejnekilis ne iluikak?

¹¹ Jesús amo sayoj kiniluij imomachtijkauan maj tajtanikan itech netataujtil maj uiki iTekiuajyo Dios; ta no kiniluij ke monekia maj tajtanikan maj mochiua itanejnekilis Jiova “kemej iluikak, no ijkon nikan taltikpak”. Ne iluikak, kampa yetok Dios, ángeles yolmelaujkej nochipa kichiuaj itanejnekilis. Sayoj ke itech capítulo 3, timomachtijkej ke se ángel akin amo yolkuali amo kichiuakok itanejnekilis Dios, uan kichiuak maj tajtakouanij Adán uan Eva. Itech capítulo 10, okachi timomachtiskej tein Biblia tamachtia ika nejon ángel, tein kiselij tokayit Satanás. Dios kikauak Satanás uan espíritus akin kinemilijkej kitojtokaskej, tein motokaytiaj amokuali ejekamej, maj yetonij ne iluikak seki xiujmej. Yejua ika itech itonaluan Jesús, amo nochin akin yetoyaj iluikak kichiujtoyaj itanejnekilis Dios. Sayoj ke nejon mopataskia keman Jesucristo peuaskia tekiuajtiskia itech iTekiuajyo Dios, uan keman moteuiskia iuan Satanás (xikonixtajtolti Apocalipsis 12:7-9).

12. ¿Toni ome taman tachiualismej tein motelneki moijtoua itech Apocalipsis 12:10?

¹² Nejin tajtolmej tein achtook moijtojka kinextia tein mochiuaskia: “Nikayik se chikaukatajtolis nepa eluiyaktsinko ten kijtoaya ijkuin: ‘Totajtsin Dios kitamichiuako ya ne nemakixtilis uan kinextiko iueyichikaualis. Uan axkan Totajtsin Dios tayekantinemi nouiyampa porin kiaxkatilij ya Cristo nochi uelilis para ika tayekantinemis. Uan Totajtsin Dios kitamikalantamotak ya ne Satanás ten [...] kinteluilijtinemia tokniuan taneltokani youalitonal iixpantsinko Totajtsin Dios’” (Apocalipsis 12:10). ¿Tikonitakya ke itech nejin texto moijtoua ome taman tein motelneki? Yekinika, iTekiuajyo Dios tein moajsi imako Jesucristo, peua taixyekana. Ojpatika, Satanás kikixtijkej ne iluikak uan kipantamotkej nikan taltikpak.

13. Kemej Satanás kikalankixtijkej ne iluikak, ¿toni mochiujtok ompa?

¹³ Kemej tikitaskej okachi satepan, nejin ome tachiualismej mochiujkejya. ¿Toni mochiuak keman panok nejin? Maj tikixtajtoltikan tein mochiuak ne iluikak: “Ika ya nojon nochi namejuan ten nankalyetoni de eluiyaktsinko, ximoueyiyolpaktijtinemikan” (Apocalipsis 12:12). Kemaj, ángeles akin yolmelaujkej moyolpaktiaj, porin kemej kikixtijkej Satanás uan iamokuali ejekauan ne iluikak, nochin akin ompa mokaujkej amo kikauaj Jiova Dios, uan ompa kipiaj yekyetolis uan netasojtalis ajsitok. Yejua ika ne iluikak mochiujtokya itanejnekilis Dios.

14. Kemej Satanás kiualpantamotkej, ¿toni mochiujtok nikan taltikpak?

¹⁴ ¿Toni uelis tikijtoskej ika taltikpak? Biblia kijtoua: “Semi nanteikneltiani namejuan ten nankalyetokke tech in taltikpak uan apanian, porin ne amokuali Satanás ualpantemok ya para tekititinemis [...] ika ueyi yolkualanyot [...,] porin kuali kimati ke amo kipia ok miak tonalme” (Apocalipsis 12:12). Satanás tel kualantok porin kikalankixtijkej ne iluikak uan amo miak tonalmejok kipia. Kemej tel kualantok, kitemoua kiixualtis kuejmolmej nikan taltikpak. Itech capítulo 9 okachi ika timomachtiskej nejon tajyouilismej. Axkan, ika tein tikitakejya, mochiua nejin netajtanil: ¿keniuj kichiuas Tekiuajyot maj mochiua itanejnekilis Dios nikan taltikpak?

15. ¿Toni tanejnekilis kipialia Dios taltikpak?

¹⁵ Axkan, xikonelnamiki toni tanejnekilis kipialia Dios taltikpak. Ijkon kemej tionmomachtijya itech capítulo 3, Jiova kinextij itech xochital tein moajsia Edén, ke kineki maj mochiua se xochital nejin taltikpak, uan maj pexoni ika taltikpakneminij yolmelaujkej uan maj amo keman momikilikan. Keman Satanás kichiuak maj Adán uan Eva tajtakouanij, moijtakoj tein Dios kinekia maj mochiua nikan taltikpak, sayoj ke nejon tanejnekilis amo mopata. Jiova kisentoka kineki maj mochiua nejin tajtolmej: “Dios kintayokolis se yankuik taltikpak nemilis” (Mateo 5:5). Uan iTekiuajyo Dios kichiuas nejon. ¿Keniuj?

16, 17. ¿Toni techiluia Daniel 2:44 tein kichiuas iTekiuajyo Dios?

¹⁶ Itech Daniel 2:44 tikajsij nejin tajtolmej tein mochiuas satepan: “Uan itech inintonaluan nejon tekiuanij, Dios akin nemi iluikak kitalis se tekiuajyot tein amo keman ixpoliuis. Uan nejin tekiuajyot amo panos imako okse xolal. Kikuechos uan kitalis itamilis nochi nejin tekiuajyomej, uan yejua uejkauas nochipaya”. Nejin tajtolmej tein achtook moijtojka, ¿toni techiluia ke kichiuaskia iTekiuajyo Dios?

¹⁷ Yekinika, kijtoua ke nejon tekiuajyot motaliskia “itech inintonaluan nejon tekiuanij”, oso keman yetoskiajok oksekin tekiuajyomej. Ojpatika, kijtoua ke Tekiuajyot uejkauas nochipaya. Nion se taltikpak tekiuajyot kitanis nion no kiixpatas. Expatika, kijtoua ke iTekiuajyo Dios kipias se neteuilis iniuan taltikpak tekiuajyomej, uan iTekiuajyo Dios yejua tatanis. Ika tamis, sayoj yejua yeski tekiuajyot tein tikpiaskej, uan yejua yeski tein okachi kuali tekiuajyot kemej amo keman ijkon tikpixtoyaj.

18. ¿Keniuj motokaytia neteuilis tein iTekiuajyo Dios kipias iniuan taltikpak tekiuajyomej?

¹⁸ Biblia tel ika technojnotsa nejon neteuilis tein iTekiuajyo Dios kipias iniuan taltikpak tekiuajyomej. Se neskayot, kinextia ke kemej motokijtiyas poliuilis, amokuali ejekamej kimoyauaskej takajkayaualis, uan ijkon kinkajkayauaskej “tayekanani ten kinyekantinemi in taltikpakuani nochi senmanauak”. ¿Keyej ijkon kichiuaskej? “Para moteuiske ika guerra iuan Dios tech ne ueyi tonal [...]. Porin sayo Yejuatsin kipixtinemi nochi chikaualis.” Tekiuanij kinsentiliskej kampa motatokaytia “ika hebreojtajtol Armagedón” (Apocalipsis 16:14, 16). Kemej kijtouaj nejin tajtolmej, nejon taixnamikilis tein taltikpak tekiuajyomej kipiaskej iuan iTekiuajyo Dios kiselia tokayit Armagedón.

19, 20. ¿Toni kitsakuilia maj itanejnekilis Dios amo mochiujto axkan nikan taltikpak?

¹⁹ ¿Toni kichiuas iTekiuajyo Dios keman kiualkuis Armagedón? Maj oksepa titanemilikan itech tanejnekilis tein Dios kipialia taltikpak: maj mochiua se xochital uan maj pexoni ika taltikpakneminij yolmelaujkej uan maj amo tajtakolejkej, akin sayoj yejuatsin kitekitiliskej. ¿Toni kitsakuilia maj amo mochiujto axkan nejon tanejnekilis? Yekinika kuejmol, porin titajtakouanij, yejua ika tikokolispeuaj uan timomikiliaj. Sayoj ke, itech capítulo 5 timomachtijkej ke Jesús toka momikilij uan ijkon ueliskia tikpiaskiaj se nemilis nochipaya. Xa tikonelnamiki itajtoluan iEvangelio Juan: “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, [...] ma amo ixpoliuikan. Ta, ma kipiakan ne yek nemilis nachipa” (Juan 3:16).

²⁰ Okse kuejmol, porin yetokej miakej akin kichiuaj tein amo kuali. Takajkayauaj, uan auilnemij. Amo kinekij kichiuaskej itanejnekilis Dios. Akin kichiuaj tein amo kuali ixpoliuiskej itech Armagedón, ineteuilis Dios (xikonixtajtolti Salmo 37:10). Okse taman keyej amo mochiujtok itanejnekilis Dios nikan taltikpak, porin tekiuanij amo kinyolchikauaj taltikpakneminij maj kichiuakan. Miakej tekiuanij amo moixeuiaj kiniluiskej, uan sekin tel amo yolkualmej oso kichiuaj tein amo kuali ika tomin. Biblia kiyekijtoua: “Taltikpaknenkej kiixyekanani taltikpaknenkej uan ijkon kitajyouiltia” (Eclesiastés 8:9).

21. ¿Keniuj kichiuas Tekiuajyot maj mochiua itanejnekilis Dios nikan taltikpak?

²¹ Satepan keman panos Armagedón, tikpiaskej sayoj se tekiuajyot, iTekiuajyo Dios. Nejon Tekiuajyot kichiuas itanejnekilis Dios uan kiualkuis uejueyi uan kualtsitsin tatiochiualismej. Se neskayot, kinixpolos Satanás uan iamokuali ejekauan (Apocalipsis 20:1-3). Kichiuas maj motekitilti ipatiuj inemilis Jesús tein kitemakak, uan ijkon, akin amo kikauaj Dios amo kokolispeuaskejok nion no momikiliskejok, ta uelis nemiskej nochipaya (xikonixtajtolti Apocalipsis 22:1-3). Uan no, kichiuas taltikpak se xochital. Ijkon Tekiuajyot kichiuas itanejnekilis Dios nikan taltikpak uan kiueyitalis itokay Dios. ¿Toni kijtosneki nejin? Kijtosneki ijkon kemej panotiyas xiujmej, tinochin tikpoujkaitaskej uan tikueyichiuaskej itokay Jiova keman yetos iTekiuajyo Dios.

¿KEMANIAN TEKITIS ITEKIUAJYO DIOS?

22. ¿Keniuj tikmatij ke iTekiuajyo Dios amo ualaj keman Jesús yetoya nikan taltikpak nion no satepan keman moajokuik?

²² Keman Jesús kiniluij imomachtijkauan maj kitajtanianij Dios “Maj uiki motekiuajyo”, moyekmatia ika ijkuak nejon ayamo ualaya Tekiuajyot. ¿Ualaj keman Jesús yajki iluikak? Nion no, ta kemej Pedro uan Pablo kinextijkej ke satepan keman Jesús moajokuik, itech mochiuak tein kijtoua Hechos 2:34, 35: “Totajtsin Dios kiluij Notekotsin ijkuin: ‘Ximoseuijtsino noyekmakopaka, hasta ne tonal kuak nejua nimitstayekankaketsas ipan nochi nekes ten mitstauelitaj’” (Salmo 110:1; Hebreos 10:12, 13). Jesucristo monekia mochias seki xiujmej.

23. 1) ¿Kemanian peuak tekiuajti iTekiuajyo Dios? 2) ¿Toni ika motajtos itech okse capítulo?

²³ ¿Kanachi xiujmej monekia mochias? Kemej itech xiuit 1875, se oloch momachtianij ika Biblia akin yolmelaujkej, kiixejekojkej ke nejon xiujmej tein monekia mochias tamiskia itech xiuit 1914. (Komo tikonneki tikonmatis okachi ika nejin xiuit, xikonita nejin amaix itech tamachtilis “1914: se xiuit ijkuak mochiuak miak taman tein achtook kijtojka Biblia”.) Tachiualismej tein panotok semanauak taltikpak tein peuak itech xiuit 1914, kinextia ke inintaixejekolis nejon momachtianij ika Biblia melauak katka. Tein achtook kijtojka Biblia tein mochiuaskia, kinextij ke itech xiuit 1914 Jiova kichiuak Ueyi Tekiuaj Jesucristo uan iTekiuajyo Dios ne iluikak peuak taixyekana. Yejua ika axkan tinentokej itech tonalmej keman Satanás “amo kipia ok miak tonalme” (Apocalipsis 12:12; Salmo 110:2). No uelis tikijtoskej ke iTekiuajyo Dios amo uejkaua peuas tekitis uan ijkon mochiuas itanejnekilis Dios nikan taltikpak. ¿Tikonita kemej se kuali tanauatil? ¿Tikonnemilia melauak mochiuas? Itech okse capítulo mitsonnextilis tein yekmelauj tamachtia Biblia ika nejin tamachtilis.