¿Katka taixejekol maj David kineltokani ke Dios ika motekipachouaya? ¿Moka motekipachoua Dios? Miakej kintelouijmaka kineltokaskej ke Dios, akin nochi ueli kichiua, ininka motekipachoua. ¿Keyej?

Se taman, porin kijtouaj ke Dios okachi ueyichiujkej ke taltikpakneminij. Yejuatsin semi ueyichiujkej, yejua ika iixpan “altepemej tamatij kemej sentachalan at itech se atakuiloni; uan kemej kanauak talnex itech balanza” (Isaías 40:15). Yejua ika, se tajkuilojkej akin amo kineltoka ke Dios nemi senkis kijtoj: “Se kinextijtoskia ke se motelueyineki komo se kineltoka ke moajsi se dios akin kitekipachoua tein tikchiuaj”.

Uan no, sekin kimachiliaj ke ika tein kichiuaj amo kinnamiki maj Dios kinpaleui. Kemej neskayot, se takat akin monotsa Jim kijtoua: “Nochipa niktajtaniaya Dios maj nechpaleuiskia maj niktsakuiliskia nokualanyo, sayoj ke satepan oksepa niman nitelkualania. Yejua ika niknemilij ke tel amo niyolkuali katka uan nion Dios ueliskia nechpaleuis”.

¿Tel uejka moajsi Dios uan amo ueli techita? ¿Keniuj kinita taltikpakneminij tajtakouanij? Ika inepaleuil Dios uelis tikajsiskej tanankililmej. Itech Biblia, iTajtol Dios tein moijkuiloj ika ichikaualis, yejuatsin techyekiluia ke amo uejka moajsi uan ke toka motekipachoua. Hechos 17:27 kijtoua: “[Dios] amo uejka yetika de cada senme de tejuan”. Itech nejin naui tamachtilismej, tikitaskej toni tamachtia Biblia ika nejin taman uan keniuj Dios kinextia ke ininka motekipachoua taltikpakneminij, tein no kijtosneki ke moka motekipachoua.

KEYEJ SEKIN OMEYOLOUAJ: Kemej kinextia tein yankuixtok kiitakej, galaxia kampa moajsi taltikpak kipia kemej cien mil millones planetas. Sayoj ke, kemej tein onkak itech iluikak okachi ueyi ke nejon, miakej motajtaniaj: “¿Ueliskia Dios kiitas tein kichiuaj taltikpakneminij akin iixpan amo ueyichiuanimej, akin nemij itech se taltikpak tein tel tsikitsin?”.

TONI TAMACHTIA BIBLIA: Jiova amo sayoj techmakak Biblia uan satepan techelkauak. Yejuatsin kijtoua: “Yekmelauj nimitsitstos uan ijkon nimitsyolmajxitis” (Salmo 32:8).

Maj tikitakan tein kipanok Agar, se siuat akin katka kayot Egipto, akin nemik kemej itech xiuit 1900 achto itech totonaluan. Se tonal, Agar amo kipoujkaitak Sarai, siuat akin katka iteko, yejua ika Sarai kipinaujtij, uan Agar choloj taluakyan. Kemej Agar mopolojka, ¿Dios amo ika motekipachoskiaok? Biblia kijtoua ke “iángel Jiova kiajsik” uan kiyolchikauak ika nejin tajtolmej: “Jiova kikakik motayokol”. Uan Agar kiluij Jiova: “Tejua se Dios akin nechita” (Génesis 16:4-13, nota).

Dios no mitsonita tejuatsin. ¿Keniuj? Nejin neskayot techpaleuis maj tikajsikamatikan. Se temomaj kinyekpia ika netasojtalis nochin ikoneuan, sayoj ke okachi kinita akin nojnelmejok porin okachi uelis kinpanos tein amo kuali uan moneki okachi kinyekpiaskej. No ijkon, Jiova okachi techita keman amo tichikaujkej uan uelis techpanos tein amo kuali. Jiova kijtoua: “Ninemi uejkapan uan kampa yektik, sayoj ke no iniuan akin yolkuetaujtokej uan akin yolnejmachmej, uan ijkon nikinyolchikauas akin yolyemankej uan nikchiuas maj moyolchikauakan akin yolkuetaujtokej” (Isaías 57:15).

Sayoj ke, xa tionmotajtania: “¿Keniuj nechita Dios? ¿Nechita sayoj tapani, oso kiita tein nikpia itech noyolo uan nechajsikamati?”.

KEYEJ SEKIN OMEYOLOUAJ: Miakej kinemiliaj ke Dios sayoj kinita taltikpakneminij kemej tajtakouanij akin amo kinnamiki maj ininka motekipacho. Kendra, akin kipiaya se kokolis tein kichiuaya maj semi motayokoltiani, tel amo kuali momachiliaya porin amo uelia senkis kitakamatia itanauatiluan Dios. Yejua kijtoua: “Yejua ika amo nikchiuayaok netataujtil”.

TONI TAMACHTIA BIBLIA: Jiova amo sayoj kiita tonepololuan uan tel kuali techajsikamati. Biblia kijtoua: “Yejuatsin kuali techixmati keniuj tichijchiujtokej, uan kielnamiki ke tichijchiujtokej ika talnex”. Yejua ika, yejuatsin amo techmaka tein technamikia tikseliskej ika tajtakolmej tein tikchiuaj, ta techiknelia uan techtapojpoluia komo timoyolnonotsaj (Salmo 103:10, 14).

Maj titanemilikan itech ineskayo tekiuaj David, akin ika titajtojkej itech yekinika tamachtilis. Yejua kiluij Dios: “Moixtololouan nechitakej keman nikatka se embrión, uan nochi tein kipia itech moamaix ijkuiliujtoya”. Uan no kijtoj: “Xinechita, noDios, uan xikixmati noyolo” (Salmo 139:16, 23). Maski David tajtakojka, seki tein kichiuak tel amo kuali katka, kiyekmatia ke Jiova kiitaskia itech iyolo ke moyolnonotsak.

Uelis tikonyekmatis ke Jiova okachi kuali mitsonajsikamati kemej amo akin ueli kichiua. Biblia kijtoua: “Taltikpaknenkej kiita tein nesi tapani, sayoj ke Jiova kiita iyolo aksa” (1 Samuel 16:7). Yejuatsin kimati keyej tikchiuaj seki taman. Kimati keniuj tein tikixtijkej itech tochankauan, kemej timoskaltijkej, tein techyoualoua, uan kemej titamatij techuika maj ijkon timonejnemiltikan. Uan no kiita uan kipatiuita maj timochikauakan okachi kuali timonejnemiltiskej, maski kemansa timopolouaj.

Kemej Dios yekmelauj mitsonixmati, ¿keniuj uelis mitsonyolseuis ika nejon?

KEYEJ SEKIN OMEYOLOUAJ: Miakej kitelnektokej maj kinyolseuikan, sayoj ke kinemiliaj ke komo kitajtaniaj Dios maj kinpaleui maj kiixnamikikan kuejmolmej tein kipiaj, kinextijtoskiaj ke kitayekanaltiaj inintanejnekilis. Se siuat akin monotsa Raquel, kijtoua: “Keman niknemilia ke tel miakej moajsij noyampa taltikpak uan ke kipiaj uejueyi kuejmolmej, nikita ke kuejmolmej tein nejua nikpia amo semi uejueykej uan nejon kichiua maj amo niktajtani Dios maj nechpaleui”.

TONI TAMACHTIA BIBLIA: Dios kichiuak se taman tein kitelpia ipatiuj tein ika kinpaleuia uan kinyolseuia taltikpakneminij. Tinochin tiyolij ika tajtakol, tein kemej yeskia se “kokolis tein nochipa ika tinemij”. Yejua ika amo ueli senkis tiktakamatij itanauatiluan Dios. Sayoj ke, Dios “techtasojtak tejuan. Uan Yejuatsin techualtitanilij Nikonetsin yojtsin [Jesucristo] para ma [...] technekixtiltiki ka in mikilis den totajtakoluan” (1 Juan 4:10). Ika inemilis Jesús tein kitemakak, Dios ueli techtapojpoluia totajtakoluan, ueli tikpiaj se tanemilil chipauak uan uelis tinemiskej nochipaya nikan taltikpak kampa Dios tayektalis uan kampa onkas yolseuilis.a Sayoj ke ika inemilis Jesús tein kitemakak ¿kinextia Dios ke ininka motekipachoua senolochmej taltikpakneminij, oso sejsemej?

Maj tikitakan ineskayo tatitanil Pablo. Yejua semi kitasojkamatia inemilis Jesús tein kitemakak, yejua ika kijkuiloj: “IKonetsin Dios [...] nechtasojtak uan noka momikilij” (Gálatas 2:20, TNM). Maski Jesús momikilij achto ke Pablo mochiuaskia itatojtokakauj, Pablo kiitaya ke ijkuak kitemakak inemilis katka kemej se netetayokolil tein Dios kimakaka yejua.

Inemilis Jesús tein kitemakak no se netetayokolil tein Dios mitsonmakani tejuatsin uan ijkon mitsonnextilia ke semi mitsonpatiuita. Nejin netetayokolil uelis mitsonmakas “yolseuilis ten amo keman tamis. Uan [...] se kuali takuautamatilis” uan mitsonmakas chikaualis tein tapaleuia maj se ‘kijtojtinemi uan kichiutinemi nochi ten kuali’ (2 Tesalonicenses 2:16, 17).

Sayoj ke, Jesús kitemakak inemilis kemej ome mil xiujmej achto. ¿Keniuj tikmatij ke Dios kisentoka toka motekipachoua axkan?

KEYEJ SEKIN OMEYOLOUAJ: Miakej takuaujtamatij iuan Dios, sayoj ke kinemiliaj ke tel uejka moajsi. Christina, se siuat akin kayot Irlanda akin nochi semanas yaya tiopan, kijtoua: “Nikmatia ke Dios kichijchiuak nochi tein onkak, sayoj ke amo nikixmatia. Amo keman nikmachilij ke iuan nimotokiaya”.

TONI TAMACHTIA BIBLIA: Xa uejka timomachiliaj iuan Dios, sayoj ke yejuatsin amo keman techkaua. Jesús kinextij keniuj Dios techyekpia ika nejin neskayot: “Se tagat kipiaya makuilpoal ichkame uan senme de ne poliu. ¿Kox amo in tapixke kinkaua ne kuouta in oksekin nauipoal uan kaxtolo naui ichkame uan youi kitemoti in ichkatsin ten poliuik ya?”. ¿Toni techmachtia nejin? Jesús kimelauak: “Toueyitajtsin Dios ten yetika ne eluiyaktsinko amo no kimonekiltia de ke ma xiixpoliuikan senme de namejuan ten nanpouij iuantsinko” (Mateo 18:12-14).

Dios techpatiuita nochi ‘senme de tejuan’. ¿Keniuj yejuatsin kitemoua “ichkatsin ten poliuik”? Kemej kijtoua texto tein takuapan moajsi, ‘kiualkui’ iuan.

Dios kiixtalia tein kinpaleuis taltikpakneminij akin yolmelaujkej maj uelikan iuan motokikan. Itech yekinika siglo, kititanik Felipe, akin katka itatojtokakauj Cristo, maj kiajsiti se tayekankej etíope uan maj kimelauiliskia toni kijtosnekia tajkuilol tein kiixtajtoltijtoya tein kinextiaya toni panoskia satepan (Hechos 8:26-39). Okse tonal, kiyekanak tatitanil Pedro hasta ichan se tayekankej romano akin monotsaya Cornelio, akin kitataujtijtoya Dios uan mochikaujtoya kiueyichiuas (Hechos 10:1-48). Dios no kiyekanak tatitanil Pablo uan akin iuan yayaj hasta se ueyiat tein moajsia ikalakyan xolal Filipos. Ompa kiixmatkej se siuat akin monotsaya Lidia akin kiueyichiuaya Dios. Uan Jiova “kiyoltapoj para uelis kajsikamatis uan kitakamatis tenika in Pablo kinojnotsaya” (Hechos 16:9-15).

Itech nochi nejin neskayomej, Jiova kiyekitak maj taltikpakneminij akin kitemojtoyaj ueliskiaj kiixmatiskiaj. Uan itech nejin tonalmej, ¿akonimej youij ininchan taltikpakneminij oso kinnojnotsaj ojti uan kinmatiltiaj tein Biblia tamachtia keniuj tamati Dios? Itaixpantijkauan Jiova. Sayoj ke, xionmotajtani: “¿Xe yejuan akin Dios kinkui uan ijkon nechpaleuia maj iuan nimotoki?”. Xikontataujti Dios maj mitsonpaleui xionmotoki iuan ijkon kemej yejuatsin mitsonyoleua.a