NETAJTANIL 6
¿Keniuj uelis amo nikauas maj oksekin nechchiualtikan tein kinekij?
¿TEJUA TONI TIKCHIUASKIA?
Xiknemili nejin: Brian yoltitikuika keman kinita moualtokiaj ome telpochmej. Nejin semana ojpaya kiluiaj maj tachichina. Uan ika nejin expaya yeski.
Semej kiluia:
“¿Oksepa moselti? Xikui nejin uan amo titasematis”.
Kikixtia teisa ikesko, kijkopilia Brian uan kimaka maj kikui.
Brian kiita cigarro tein telpoch maktok uan okachi yoltitikuika.
“Amo, tasojkamatik, nimitsiluijya ke nejua amo...”.
Okse telpoch kitakotonaltia: “¡Amo ximoujkat!”.
“Amo nimoujkat”, kijtoua Brian ika moujkayot.
Ompa, telpoch kipannaua uan kiyemankailuia: “Sayoj se cigarro”.
Yekinika telpoch kitentokilia cigarro uan kiichtakailuia: “Amo akin tikiluiskej. Amo keman akin kimatis”.
Komo tiyeskia tiBrian, ¿toni tikchiuaskia?
XIMOTSAKUILI UAN XITANEMILI
¿Tiknemilia ke nejon telpochmej akin iniuan momachtia Brian kiajsikamatij tein kichiujtokej? ¿Tiknemilia ke yejuan kiixpejpenkej kichiuaskej nejon? Xa amo. Uelis yeski ke kichiuaj tein kiitaj ke oksekin kichiuaj. Kinekij iniuan mouikaskej uan yejua ika kikauaj maj oksekin kiniluikan toni kichiuaskej.
Komo tikpanoskia nejon, ¿tikuelitaskia tikchiuas okse taman uan amo tikauas maj mitschiualtikan tein yejuan kinekij?
XIKNEMILI TEIN UELIS PANOS
Biblia kijtoua: “Tamatkej kiita ouijkayot uan motatia, sayoj ke akin amo kipiaj tamatilis kisentokaj taixpan uan kijyouiaj tein amo kuali” (Proverbios 22:3).
Miakpa, niman ueli se kimati keman uelis onkas kuejmolmej. Xiknemili ke tinejnentok uan tikinita seki telpochmej tachichintokej. Komo tikmati toni uelis panos, uelis tikmatis toni tikchiuas.
XITANEMILI
Biblia kijtoua: “Xichipaukanemikan” (1 Pedro 3:16).
Ximotajtani: “¿Keniuj nimomachilis komo nikchiua tein nochin kichiuaj?”. Akin iniuan timomachtia xa kuali mouan mouikaskej, maski sayoj seki tonalmej. Sayoj ke ¿keniuj timomachilis satepan? ¿Tikauas maj kipatakan kemej titanemilia sayoj porin tikneki kuali timouikas iniuan? (Éxodo 23:2.)
XITAIXPEJPENA
Biblia kijtoua: “Tamatkej taixejekoua uan kitalkauia tein amo kuali” (Proverbios 14:16).
Tinochin se tonal monekis titaixpejpenaskej uan tinemiskej ika tein tikixpejpenaskej. Biblia ininka tajtoua takamej akin kuali taixpejpenkej, kemej José, Job uan Jesús, sayoj ke no ininka tajtoua oksekin akin amo kuali taixpejpenkej, kemej Caín, Esaú uan Judas. ¿Toni tikchiuas tejua?
Biblia kijtoua ke nochi moneki tikchiuaskej ika “melaujkayot” (Salmo 37:3). Komo tiknemilijya toni uelis panos ika tein tikchiuas uan titaixpejpenakya, uelis amo mitsouijmakas tikijtos tein tiknemilia. Uan no, amo nenkaj yeski.
Amo ximotekipacho, amo moneki uejkaua tikinmelauilijtos akin iniuan timomachtia. Sayoj xikinilui ke amo. No uelis tikinyekiluis ke amo tikpatas kemej titanemilia ika nejin tajtolmej:
“Nion xiknemili oksepa tinechiluis”.
“Nejua amo nikchiua nejon”.
“Tikmattokya toni niknemilia”.
Okachi tapaleuia komo niman titanankilia uan amo tikpata tein tikijtoua. Ijkon, xa tikmoujkaitas keniuj amo kitemouajok mitschiualtiskej teisa.
¿TONI NIKCHIUAS KOMO NECHKEJKELOUAJ?
Komo tikinkaki akin iniuan timomachtia, mitschiualtiskej tein yejuan kinekiskej
Xa akin iniuan timomachtia mitspinaujtiskej. Xa mitsiluiskej: “¿Toni mitspanoua? ¡Amo ximoujkat!”. Nejin tajtolmej ipa teiluiaj keman kinekij techiualtiskej teisa. ¿Toni uelis tikchiuas? Uelis tikchiuas ome taman:
Xikinilui ke melauak tein kijtouaj. Uelis tikijtos: “Kemaj, nimoui”. Satepan, ika amo miak tajtolmej xikijto keyej.
Xikpata tein panotok. Xikmelaua keyej tejua amo tikchiua uan ompa xikijto: “Se akin tamattok kemej tejua amo tachichinaskia”.
Komo kisentokaj mitsiluiaj, xikinkaujteua. Xikelnamiki: komo okachi uejkaua timokaua ompa, okachi mitschikaujkauiskej. Komo tikinkaujteua, tiknextis ke tejua moselti ueli titaixpejpena.
Tein melauj, amo keman uelis tikchiuas maj amo kitemokan mitschiualtiskej teisa. Sayoj ke kemaj uelis tikixpejpenas toni tikchiuas, tikyekijtos toni tiknemilia uan amo tikauas maj mitschiualtikan tein kinekij. Tejua moneki tikixejekos tein okachi kuali (Josué 24:15).