¿Toni Watch Tower Bible and Tract Society?
Watch Tower Bible and Tract Society of Pennsylvania yejua se corporación tein moixtalij itech xiuit 1884 ijkon kemej kijtoua tanauatilmej tein kiixtalianij tekiuanij ompa Pensilvania (Estados Unidos), uan amo kitemoua kitanis tomin ika tein kichiua. Ika nejin, itaixpantijkauan Jehová uelij kichijchiuaj Biblias uan amatajkuilolmej uan okseki tekit tein mochiua noyampa taltikpak.
Ika Watch Tower, “ueli kipiaj tein moneki itech inintaneltokalis, ueli tamachtiaj uan tapaleuia”. Uan semi kitemouaj “maj moteixmatilti uan maj motamachti de iTaixyekanalis Dios tein yetok imako Jesucristo”. Aksa peua poui itech nejin corporación komo kiyoleuaj, uan amo komo kitemakak miak tomin. Akin pouij itech nejin corporación uan akin taixyekanaj, kichiuaj tekimej tein ika kinpaleuiaj Oloch Taojtokaltianij akin kinixyekanaj iTaixpantijkauan Jehová.
Okseki entidades tein no ijkuiliujtokej ininixpan tekiuanij
Itaixpantijkauan Jehová amo sayoj ijkuiliujtokej ininixpan tekiuanij ika tokayit Watch Tower Bible and Tract Society of Pennsylvania, ta no ika okseki entidades itech tataman países, kemej “Watch Tower”, “Watchtower”.
Desde ke moixtalij nejin, uelini tikchiuanij miak taman. Maj tikitakan seki:
Tikijkuilouaj amatajkuilolmej uan tikamakixtiaj. Tikchijchiuanij kemej 253 millones de Biblias. Amatajkuilolmej tein tikchijchiuaj moajsi itech panoua 1,050 tataman tajtolmej. Itech internet jw.org kampa timoteixmatiltiaj, miakej uelij ompa kilerouaj Biblia tein amo moneki kiixtauaskej itech panoua 300 tataman tajtolmej. Ompa no ueli kiajsij tein kinekij kimatiskej kemej nejin: “¿Toni iTaixyekanalis Dios?”.
Titamachtiaj. Moixtaliani maj motemaka tataman tamachtilismej ika Biblia. Semej yejua Escuela Bíblica de Galaad tein peuak itech xiuit 1943. Nejin tamachtilis kiselianij panoua 10,000 itaixpantijkauan Jehová akin kintitaninij kemej misioneros oso tapaleuitij maj kuali mochiua tekit noyampa taltikpak. Uan no, tel miakej millones akin itaixpantijkauan Jehová uan akin amo, kikakitij tein motamachtia keman mosentiliaj yejuan nochin semanas. No kiixtaliaj kinmachtiskej akin amo taixmatij, uan tikpiaj se amatajkuilol itech 136 tataman tajtolmej para ika tikinpaleuiskej maj talerokan uan maj tajkuilokan.
Titapaleuiaj. Tikinpaleuiaj ika tein semi kinpoloua akin kinijtakoua se tetsauit oso okse taman taixpoloua. Ijkon tikinpaleuijkej akin tajyouijkej ijkuak kinmijmiktijkej ompa Ruanda itech xiuit 1994 uan keman talolinik Haití itech xiuit 2010.
Maski ika nejin entidades uelini tikchiuanij miak taman tein moneki, amo tikchiaj maj sayoj itechkopa mochiua tekit. Sejse akin kichiua kemej Cristo moneki kinixmatiltis uan kinmachtis oksekin tein kijtoua Biblia (Mateo 24:14; 28:19, 20). Senkis tikneltokaj ke Dios kitiochiua nejin tekit uan kisentokas techpaleuis maj mochiua tekit (1 Corintios 3:6, 7).