NETAJTANIL 7
¿Toni nikchiuas komo aksa nechteliluia maj iuan nimoteka?
¿TEJUA TONI TIKCHIUASKIA?
Xiknemili nejin: Heather uan Mike ome metstiya mochiujkej novios, sayoj ke Heather kiita kemej yeskia uejkaujya moixmatij. Nochi tonal motajkuilouiliaj uan monojnotsaj ika teléfono, uan hasta kimatij toni kijtoti okse achto ke kitamiijtos. Sayoj ke, axkan Mike kineki kichiuas okse taman.
Hasta axkan, Mike uan Heather sayoj momakitskianij uan kemansa mopitsouanij oso motennamikinij. Heather amo kineki maj kichiuakan okse taman, sayoj ke amo no kineki maj Mike kikaua. Amo akin kichiua maj kimachili ke tel kuakualtsin uan ke amo moajsi okse kemej yejua. Heather kinemilia: “Tein melauj, Mike uan nejua timotasojtaj”.
Komo tikpia xiujmej keman uelisya timoixmatis iuan aksa uan tikpanotoskia tein Heather kipanotok, ¿toni tikchiuaskia?
XIMOTSAKUILI UAN XITANEMILI
Dios kinmaka sayoj namikuanij se kualtsin netetayokolil: maj uelikan mosentekakan. Komo timoteka iuan aksa achto ke timonamiktis tiknextijtoskia ke amo tiktasojkamati nejon netetayokolil. Kemej yeskia aksa mitsmakaskia se taken tel kualtsin uan ika titachipauaskia
Komo timoajsi itech se kouit uan timopankajkaua porin tikneki tipatanis kemej se totot, timokokos. No ijkon mitspanos komo tiktapanauilia itanauatiluan Dios, kemej nejin tein kijtoua: “Amo [xi]auilnentinemikan” (1 Tesalonicenses 4:3).
¿Toni panoua keman amo se kitakamati nejin tanauatil? Biblia kijtoua: “Kuak se tagat motajtakolmaka iuan se siuaauilnenke, ijkuakon in tagat moijtakouilia [...] itakayo” (1 Corintios 6:18). ¿Toni kijtosneki nejin?
Itech netajtanilmej tein kinchiuilianij telpochmej moitani ke miakej akin motekkej iuan aksa achto ke monamiktiskej, miakpa kijyouiaj seki taman kemej nejin:
KINKUEJMOLOUA ININTANEMILIL. Miakej telpochmej uan ichpochmej akin motekkej iuan aksa achto ke monamiktiskej kijtouaj ke satepan kinemilijkej maj amo kichiuanij.
OMEYOLOUAJ. Satepan ke mosentekkej, sekin motajtaniaj akoni xa no iuan motekak ininnovio oso ininnovia.
AMO YEJUA TEIN KICHIAYAJ. Tein melauj, miakej ichpochmej okachi kiuelitaskiaj yetoskej iuan aksa akin kinmatampauis uan amo iuan aksa akin sayoj kitemoua itanejnekilis. Uan miakej telpochmej amo kinuelitajok ichpochmej akin ijsiujka motemakakej maj mosentekakan.
Tamachtilis: Komo timotekaskia iuan aksa achto ke timonamiktis, tiknextijtoskia ke amo timopatiuita (Romanos 1:24). Monakayo kitelpia ipatiuj. ¡Amo xitetayokoli!
Xiknexti ke tikpia chikaualis tein mitspaleuia amo ximoteka iuan aksa achto ke timonamiktis (1 Tesalonicenses 4:3). Komo se tonal timonamiktia, uelis timotekas iuan monamik. Uan ijkuak uelis tikchiuas ika yolpakilis, amo tiomeyolouas, amo timotekipachos nion mitskuejmolos motanemilil, tein miakpa kimachiliaj akin motekaj iuan aksa achto ke monamiktiskej (Proverbios 7:22, 23; 1 Corintios 7:3).
¿KENIUJ TIKITA?
Komo aksa mitstasojta, ¿melauj ke kinekiskia kuali xiyeto uan kuali ximomachili?
Uan komo aksa yekmelauj kineki kuali xiyeto, ¿mitstajtaniskia xikchiua teisa tein ueliskia kijtakos mokuali uikalis iuan Dios? (Hebreos 13:4.)