Tanojnots 45
Kipanauijkej ueyiat Jordán
¡XIKITA! ¡Israelitas kipanauijtokej ueyiat Jordán! Sayoj ika, ¿kani mokauak at? Tepitsin achto tel ueyi katka at, porin itech nejon tonalmej kiouataj katka. ¡Sayoj ika axkan amo teyi at! ¡Uan israelitas kipanauijtokej itech tal uakik kemej kichiujkej itech ueyiat Chichiltik! ¿Kani yajki nochi at? Maj tikitakan.
Tepitsin achto keman israelitas kipanauiskiaj ueyiat Jordán, yejua nejin tein Jiova kichiuak maj Josué kiniluiani israelitas: ‘Tiopixkamej moneki kimamaskej kaxon tein kixnextia netenkaualis, uan techyekanaskej. Keman yejuan mometskalakiskej itech ueyiat Jordán, at motsakuilis’.
Yejika tiopixkamej kikuiteujkej kaxon tein kixnextia netenkaualis, uan kiniyekankej israelitas. Keman ajsikej itech ueyiat, tiopixkamej mometskalakijkej itech at. ¡Uan nimasaj keman mometskalakijkej, at peuak motsakuilia maski motalojtoya uan katka uejkatan! ¡Se mouiskatekit! Jiova kichiuak maj motsakuiliani at. ¡Uakik ueyiat!
Tiopixkamej tein kimamajtiayaj kaxon tein kixnextia netenkaualis, panokej tatajko ueyiat itech tal uakik. ¿Ueli tikinita itech taixkopin? ¡Keman ompa yetoyaj, nochin israelitas peuak kipanauiaj ueyiat Jordán itech tal uakik!
Keman nochin panokej, Jiova kichiuak maj Josué kiniluiani 12 takamej chikaujkej: ‘Xiyakan itech ueyiat kampa tiopixkamej kipixtokej kaxon tein kixnextia netenkaualis. Uan ompa xikololokan 12 temej uan xiksalokan kampa namokauaskej nejin youak. Ijkon, miak xiujmej satepan keman namokoneuan namechtajtaniskej toni kijtosneki nejin temej, moneki nankiniluiskej ika Jiova kichiuak maj motsakuili at, keman tiopixkamej kipanoltijkej kaxon tein kixnextia netenkaualis itech ueyiat Jordán. ¡Temej namechelnamiktis nejin mouiskatekit!’ Josué no kisaloj 12 temej itech ueyiat kampa yetoyaj tiopixkamej.
Keman kichiujkej nochi nejin, Josué kiniluij tiopixkamej tein kiuikayaj kaxon tein kixnextia netenkaualis: ‘Xikisakan itech ueyiat’. Keman kiskej, ueyiat oksepa peuak motaloua.