Amo xiyolmoui
1. ¿Itech toni moneki se kipias yolchikaualis uan keyej?
1 ¿Kemansa amo tiktematiltiani iTajtol Dios itech kaltamachtiloyan porin tikmouilij maj mitspinaujtianij? Yekmelauj moneki yolchikaualis se tanojnotsas uan okachiok komo timopinaujmati titajtos. Maj tikitakan toni uelis mitspaleuis.
2. Keman tiktematiltis iTajtol Dios itech kaltamachtiloyan, ¿keniuj tiknextis kuali taixejekolis?
2 Xiktekitilti kuali taixejekolis. Maski itech kaltamachtiloyan uelis moselti tiktematiltis iTajtol Dios, xikelnamiki ke amo moneki nochipa titajtos imiuan nochin kemej ijkuak tiyouj titanojnotsati kajkalpan. Kuali xikixejeko kemanian uelis titanojnotsas (Ecl. 3:1, 7). Keman motemakas se tamachtilis, mitskauiliskej se tekit oso keman se akin iuan timomachtia mitstajtania keyej amo tikchiua seki taman, uelis tiktematiltis tein tikneltoka. Sekin tokniuan, ijkuak peuaj okse xiuit itech kaltamachtiloyan, moteixmatiltiaj iuan tamachtijkej kemej itaixpantijkauan Jiova uan kinmakaj amaixmej kampa kimelaua tein kineltokaj. Oksekin kikauaj amaixmej kampa tajkuilouaj porin kinekij maj oksekin momachtianij kiitakan uan maj kinchiuilikan netajtanilmej.
3. ¿Keniuj uelis timomachtis tein tikijtos keman titanojnotsas itech kaltamachtiloyan?
3 Ximomachti tein tikijtos. Komo achto timomachtia tein tikijtos, okachi kuali timomachilis keman titajtos (1 Ped. 3:15). Yejua ika, xiknemili netajtanilmej tein uelis mitschiuiliskej uan xiktemo keniuj titanankiliskia (Pro. 15:28). Komo ueli, xikuikatinemi moBiblia, seki amaixmej kemej Los jóvenes preguntan oso Razonamiento uan seki amaixmej tein ika tajtouaj itachijchiualis Dios, ijkon uelis tiktekitiltis keman monekis. Uan no, xikinilui motatuan maj no moixtali nanmomamachtiskej keman nantaueyichiuaj kemej kalyetouanij.
4. ¿Keyej moneki tiksentokas titanojnotsas itech kaltamachtiloyan?
4 Xitanemili kemej moneki. Amo xiknemili ke tein imiuan timomachtia nochipa mitspinaujtiskej keman ika titajtos tein tamachtia Biblia. Sekin xa kimoujkaitaskej moyolchikaualis uan hasta uelis mitskakiskej. Sayoj ke amo ximoyolkoko komo amo akin kineki mitskakis, porin Jiova kiitas chikaujkayot tein tikchiuas uan kiyolpaktis (Heb. 13:15, 16). Xiksentoka xiktajtani inepaleuil uan ijkon ‘amo tiyolmouis’ tiktetapouis iTajtol (Hech. 4:29; 2 Tim. 1:7, 8). Ximonemili keniuj titelyolpakis keman aksa mitskakis. Satepan nejon taltikpaknenkej no uelis mochiuas itekitikauj Jiova.