Maj amo nenkaj chikaujkayot tein tikchiuaskej
1. ¿Keniuj no uelis motekitiltis itech tanojnotsalis tein kijtoua 1 Corintios 9:26?
1 Tatitanil Pablo kijkuiloj: “Kuak nimotajyouiltijtiu uan nimosioutijtiu para Dios, ijkuakon amo nikchiutinemi de nenkajtik san. Uan amo sayo nenka san nimotajyouiltijtiu keme se tagat kuak kineki tateuis uan sayo ejekaixko san panoa nimauan” (1 Cor. 9:26). Nikan ika tajtojtoya chikaujkayot tein kichiuaya kiajsis tekimej tein ika okachi kitekitiliskia Jiova. Sayoj ke nejin tajtolmej kipia se tayolmajxitilis tein no uelis mokuis itech tanojnotsalis, ta tiknekij maj tel tapaleui chikaujkayot tein tikchiuaskej. ¿Toni uelis techpaleuis?
2. ¿Keniuj no ijkon monekis tikchiuaskej kemej Pablo uan oksekin yekinika tanojnotsanij ijkuak tikitaskej kemanian uan kani titanojnotsaskej?
2 Maj tiyakan kampa moajsij taltikpakneminij. Pablo uan oksekin yekinika itatojtokakauan Cristo, tanojnotsayaj kampa kimatiaj ke kinajsiskiaj taltikpakneminij (Hech. 5:42; 16:13; 17:17). Yejua ika, komo kampa titanojnotsaj miakej yetokejya imin chan tiotak, xa ijkuak okachi kuali yeskia maj titanojnotsatij kajkalpan. ¿Okachi moajsij taltikpakneminij kampa ejkoj teposmej kualkan keman youij tekititij uan tiotak keman mokepajya? ¿Toni hora okachi yetokej taltikpakneminij itech tanamakaloyamej tein moajsij kampa titanojnotsaj? Xa ijkuak okachi kuali maj se tanojnotsa itech ojti.
3. ¿Toni techpaleuis maj amo nenkaj chikaujkayot tein tikchiuaskej keman titanojnotsaskej kampa ixyetok tekitis tonechikol?
3 Maj titekitikan ika kuali taixejekolis kampa titanojnotsaj. No moneki tikitaskej maj amo nenkaj chikaujkayot tein tikchiuaskej keman titanojnotsaskej kampa ixyetok tekitis tonechikol. Kemej neskayot, komo timoxejxelouaj uan amo sayoj seko tisenyouij, amo timouejkauaskej uan okachi kuali titekitiskej tinochin. Uan no, komo amo timiakej tiyouij itech tepos keman titanojnotsatij uejka kampa amo miak kalmej onkakej, okachi ijsiujka titamitekitiskej uan uelis titajtoskej imiuan okachi taltikpakneminij. No uelis titajtaniskej maj techmakakan kampa toselti uelis titanojnotsaskej ompakauin kampa tinemij. Ijkon amo monekis uejka tiyaskej.
4. ¿Toni techpaleuis maj tikinajsikan taltikpakneminij kemej se kuali amichkitskijkej kinajsi amichimej?
4 Jesús kijtoj ke tanojnotsanij kintemouaj taltikpakneminij ijkon kemej kichiua se amichkitskijkej (Mar. 1:17). Se kuali amichkitskijkej amo sayoj kineki kitamotas imatauj itech at, ta kitemoua keniuj kinkitskis amichimej. Yejua ika, youi kampa kimati ke okachi onkaskej uan keman okachi uelis kinajsis, uan niman peua tatemoua. Kemaj, kitemoua maj amo nenkaj chikaujkayot tein kichiua. Maj no ijkon timoteltekitiltikan itech tanojnotsalis (Heb. 6:11).