TAXELOL 1
Dios kintayokolij taltikpakneminij se xochital
Dios kichijchiuak iluikak uan taltikpak. Kichijchiuak se takat uan se siuat yektikej, kintalij itech se xochital uan kinmakak tanauatilmej
“KEMAN peuak nochi, Dios kichijchiuak iluikak uan taltikpak.” (Génesis 1:1.) Moijtoua ke nejin tajtolmej tein ika peujteua Biblia yejua tein okachi moixmati. Ika nejin tanemilil tein amo ouij uan tel kualtsin, Biblia kiteixmatiltia akin okachi ika motajtoua ompa: Jiova, Dios akin nochi ueli kichiua, akin kichijchiuak iluikak uan taltikpak. Ompa, kimelaua ke itech mimiak xiujmej, tein Dios kinotsa tonalmej, kiyektalijtiaj taltikpak uan kichijchiujtiaj nochi tein tikitaj tein semi kualtsin.
Nochi tein Jiova kichijchiuak nikan taltikpak, amo teyi ijkuitik kemej taltikpaknenkej. Yekinika takat kichijchiuak ika talnex. Kichijchiuak ijkon kemej yejuatsin tamati, tein kijtosneki, maj ueli tetasojta kemej yejuatsin, maj tamatkej uan maj kipiani okseki kualneskayomej. Kitokaytij Adán uan kitalij itech se xochital tein motokaytij Edén. Ompa onkaya kualtsitsin kuoujmej tein kitemakaya itakilo.
Se tonal, Dios kiitak ke monekia maj takat kipiani akoni iuan nemis. Yejika, kikuik se ielchikiujomiyo Adán uan ika kichijchiuak yekinika siuat Eva. Ompa, kimaktilij kemej inamik. Adán tel yolpakik uan kijtoj seki tajtolmej tel kualtsitsin. Yejua nejin seki taman tein kijtoj: “Iomiyouan nejua noomiyouan uan inakayo nejua nonakayo”. Nejin mouika iuan tein kijtoua Biblia: “Yejika takat kikauas ipopaj uan imomaj, uan mosentilis iuan inamik, uan omen mochiuaskej sayoj se” (Génesis 2:22-24; 3:20).
Adán uan Eva monekia kitakamatiskej ome itanauatiluan Dios. Yekinika, monekia maj kiyekpianij taltikpak, maj taonkaltianij uan maj momiakilianij. Uan ojpatika, itech nochi xochital, moajsia se kuouit tein amo ueliskiaj kikuaskiaj itakilo. ¿Toni nejin? “Kuouit tein kiixnextia taixmatilis tein kuali uan tein amo kuali.” (Génesis 2:17.) ¿Toni kinpanoskia komo amo tatakamatiskiaj? Momikiliskiaj. Ika nejin tanauatil ueliskiaj kinextiliskiaj Dios ke kiseliayaj itaixyekanalis, kitasojtayaj uan moteltasojkamatiaj. Moyekita ke nejon namikuanij nochi kipiayaj tein kinpaleuiskia maj senkis kitakamatinij Jiova akin kintasojtaya. Amo kipiayaj tajtakol uan nion tepitsin kintilanaya tein amo kuali, ta Biblia kijtoua: “[Dios] kiitak nochi tein kichijchiuak, uan ¡xikita!, tel kuali katka” (Génesis 1:31).
(Motaksaltia itech Génesis capítulos 1 uan 2.)