Ejkok Mesías

KINPALEUISKIA Jiova taltikpakneminij maj kimatikan akoni eskia Mesías? Kemaj. Maj tikitakan toni kichiuak. Nejin panok 400 xiujmej satepan ke motamiijkuiloj Tajkuilolmej Hebreas. Se ángel tein motokaytij Gabriel kimonextilij María, se ichpoch tein nemia Galilea itech altepet Nazaret tein moajsia norte. Gabriel kiiluij María ke yaya kipiati se konetsin. ¿Keniuj mochiuaskia nejon ta amo kiixmatia takat? Dios ika ichikaualis tein tekititok, kichiuaskia maj nejon ichpoch mokokoxkataliani. Nejin konetsin yejua eskia Tekiuaj tein moijtojka ualaskia tein taixyekanaskia nochipaya. Nejin eskia itayekankaKonetsin Dios tein yejuatsin kikuiskia inemilis ne iluikak uan kipanoltiskia iijtik María.

Ika yolyemanilis, María kinekik maj itech mochiuani itanejnekilis Dios. José tein katka kuoujxijxinkej, monamiktij iuan María ijkon kemej kiixtalijtoyaj satepan ke Dios kititanik se ángel maj kimatiltiani tein mochiujtoya. Moneki tikelnamikiskej ke moijtojka ke Mesías nemiskia Belén uan amo Nazaret (Miqueas 5:2). Komo ijkon, ¿keniuj mochiuaskia tein moijtojka, ta Belén moajsia kemej 140 kilómetros ika uejka?

Tepitsin satepan, se tekiuaj romano tanauatij maj nochin taltikpakneminij moijkuilotij kampa yolkej. Kemej nesi, imin chankauan José uan María kayomej katkaj Belén. Yejika José kiuikak inamik tein amo uejkaua yaya kipiati konetsin (Lucas 2:3). Jesús yolik kampa kineuayaj tapialmej uan monekik kitekaskej kampa kintamakayaj tapialmej. Ompa, itech se ixtauat tein amo uejka moajsia, tel miakej ángeles kinmonextilijkej seki ichkatajpianij uan kiniluijkej ke yolkaya Mesías oso Cristo tein moijtojka ualaskia.

No moajsiskiaj oksekin tein kitematiltiskiaj ke Jesús yejuaya Mesías tein moijtojka ualaskia. Tanauatijkej Isaías kijtojka ke aksa kichiuaskia seki taman tein tapaleuiskia maj Cristo uelini kichiuani tekit tein motelnekia (Isaías 40:3). Uan nejon takat katka Juan Taauijkej. Se tonal, keman kiitak Jesús, kijtoj chikauak: “Xikitakan san, ne uitsa ya [...] ten Dios kualtitanik ten tamati kemej ichkatsin [...] [tein] kinajchiuilis nintajtakoluan de nochi taltikpakuanij”. Miakej itatojtokakauan Juan niman mochiujkej imomachtijkauan Jesús. Uan se kiyekijtoj: “Tikajsikej ya ne Mesías” (Juan 1:​29, 36, 41).

Sayoj ke amo uejkaua senkis yaya kiteixmatiltitij ke yejuaya katka Mesías. ¿Akoni kichiuaskia? Yejua Jiova, uan nejon mochiuak keman Juan kiauij Jesús uan Jiova ika iespíritu kiixpejpenak kemej Mesías uan kijtoj: “Yejuatsin nijin Notasojkonetsin tenika semi nimoyolpakiltia” (Mateo 3:​16, 17). Satepan ke panok miak xiujmej, ¡ejkok Mesías tein moijtojka ualaskia!

¿Kemanian mochiuak nejon? Itech xiuit 29 itech totonaluan, keman ajsik 483 xiujmej tein Daniel kijtojka. Tein melauj, nejin sayoj seki taman tein kinextia ke Jesús yejua Mesías. Axkan, ¿toni ika tajtoskia itech tonalmej keman yetoskiaok nikan taltikpak?

​(Motaksaltia itech Mateo capítulos 1 a 3, Marcos capítulo 1, Lucas capítulo 2 uan Juan capítulo 1.)