TAXELOL 24

Pablo kintitanilij cartas nechikolmej

Pablo kintitanilij cartas itatojtokakauan Cristo tein semi kinyolchikauak

YANKUIK oloch tokniuan tein kichiuayaj kemej Cristo, kichiuaskiaj seki taman tein tapaleuiskia maj mochiua itanejnekilis Jiova. Sayoj ke taixnamikinij kinteltajyouiltiskiaj. Uan itech nechikol no kipanoskiaj ouijkayomej. ¿Toni kinpaleuiskia maj amo kikauanij Dios? Yejua 21 cartas tein kipia Tajkuilolmej Griegas Cristianas tein kinyolmajxitij uan kinyolchikauak.

Pablo kijkuiloj yekinika 14 cartas, tein peua ika Romanos uan tami ika Hebreos. Nochi kipiaya akoni kititaniliaya, iksa se taltikpaknenkej uan iksa se nechikol. Maj tikitakan seki taman tein ika tajtoj tatitanil.

Monekia chipaujkanemiskej uan kuali monejnemiltiskej. Tein mosentekaj tein amo namikuanij, namikuanij tein auilnemij oso kichiuaj okseki uejueyi tajtakolmej uan amo moyolnonotsaj, “amo yetoskej itech itekiuajyo Dios” (Gálatas 5:19-21, NM; 1 Corintios 6:9-11). Itekitikauan Jiova kiniluiaj maj amo mochichikotasojtakan (Romanos 2:11; Efesios 4:1-6). Ika tein kipiaj moneki kinpaleuiskej oksekin itatojtokakauan Cristo (2 Corintios 9:7). Pablo kinyolchikaua maj kiiluikan Jiova itech netataujtil nochi tein kimachiliaj, uan kinyolmajxitia: “Ximotatataujtilikan iuan Dios youali[n]tonal” (1 Tesalonicenses 5:17; 2 Tesalonicenses 3:1; Filipenses 4:6, 7). Sayoj ke moneki kichiuaskej ika takuaujtamatilis, ta sayoj ijkon Dios kinkakilis (Hebreos 11:6).

¿Toni tayolmajxitilis kinmakak kalyetouanij? Tetakauan moneki kintasojtaskej imin namik ijkon kemej yejuan motasojtaj. Uan siuamej moneki kinpoujkaitaskej imin namik ika nochi imin yolo. Uan no, Dios kichia maj konetsitsin kintakamatikan imin tatuan, uan tetatmej maj kinmelauakan imin koneuan ika netasojtalis uan kemej tanauatia Biblia (Efesios 5:22–6:4; Colosenses 3:18-21).

Itech mapa ixnesij altepemej kampa Pablo kintitanilij cartas

Itanejnekilis Dios. Tanauatil tein kiselij Moisés kinpaleuij israelitas maj amo moijtakouanij uan kinyekanak hasta keman ejkok Mesías tein moijtojka ualaskia, sayoj ke itatojtokakauan Cristo amo monekiaok maj kitakamatikan (Gálatas 3:24). Itech carta tein Pablo kintitanilij Hebreos —itatojtokakauan Cristo tein katkaj judíos⁠—, kiyeknextij keyej motemakaka Tanauatil, ijkon kemej tekit tein Cristo kichiuak tein tapaleuia maj mochiua itanejnekilis Dios. Kijtoj ke miak taman tein kijtouaya Tanauatil kinextij tein mochiuaskia satepan. Se neskayot, keman kitemakayaj tapialmej kemej netemaktilmej, kinextiaya nemilis tein Jesús kitemakaskia satepan, uan ika nejon Dios senkis techtapojpoluiskia totajtakoluan (Hebreos 10:1-4). Yejika, keman Jesús kitemakak inemilis, amo monekiaok kitakamatiskej Tanauatil tein kiselij Moisés (Colosenses 2:13-17; Hebreos 8:13).

Akin pouij itech yekinika nechikolmej kampa kichiuaj kemej Cristo kikakij ijkuak moixtajtoltia carta tein Pablo kintitanilia

Taixyekanalis itech nechikol. Takamej tein kinmakaj seki tekit itech nechikol, moneki kikauaskej se kuali neskayot ika chipaujkanemilis uan moneki kichiujtoskej kemej motajtani itech iTajtol Dios (1 Timoteo 3:1-10, 12, 13; Tito 1:5-9). Uan no, motelneki maj nochin itekitikauan Dios monechikokan nochipaya uan ijkon kikakiskej tel kuali tamachtilis tein kitemaka Dios uan moyolchikauaskej se iuan okse (1 Corintios 14:26, 31; Hebreos 10:24, 25).

Keman Pablo kijkuiloj ojpatika carta tein kititanilij Timoteo, se amatajkuilol tein sayojya eskia, yejua oksepa kitsaktoyaj Roma, uan mochixtoya maj tekiuanij kiitanij tein ika kiteluiliayaj. Sayoj sekin itatojtokakauan Cristo tein yolchikaujkej kikalpanotoj Pablo maski ueliskiaj kipoloskiaj imin nemilis. Kemej yejua kimatia ke amo miak tonalmejok nemiskia, kijkuiloj: “Ijkon kemej in soldado moteuijtinemi ika nochi nichikaualis, no ijkon [...] nikchiujtinemik uan nikintaneltoktijtinemik aksamej iuan Cristo. Uan in tekit [...] niktamichiuak ya. Uan nejua nachipa nitatakamatinemik ika takuaujtamatilis” (2 Timoteo 4:7). Pane tatitanil Pablo kimiktijkej tepitsin satepan. Sayoj ke cartas tein kijkuiloj, kisentokak kinpaleuij yekmelauj itatojtokakauan Cristo maj amo kikauanij Dios, uan axkan kisentoka tapaleuia.

(Motaksaltia itech Romanos, 1 uan 2 Corintios, Gálatas, Efesios, Filipenses, Colosenses, 1 uan 2 Tesalonicenses, 1 uan 2 Timoteo, Tito, Filemón uan Hebreos.)

AKONI TEKONEUJ TEIN MOIJTOJKA UALASKIA?

Satepan ke Adán uan Eva tajtakojkej, Dios kiiluij kouat tein mochiuaskia: “Uan nikchiuas ximotauelitakan tejua uan siuat, uan mokonetsin iuan yejua ikonetsin. Yejua mitskuaxamanis uan tejua tikotsxamanis” (Génesis 3:15). Apocalipsis 12:9 kinextia ke “kouat ten ne achtopa ipa nentiuits” yejua Amokuali Satanás. Sayoj ke amo momatia akoni eskia Tekoneuj tein kikuaxamaniskia Amokuali, uan Biblia yolik kitematiltijtiaj ijkon kemej panotiaj miak xiujmej.

Kemej 2,000 xiujmej satepan ke Adán uan Eva tajtakojkej, Jiova kinextij ke Temakixtijkej tein moijtojka ualaskia eskia se tekoneuj tein itech ualeujtoskia Abrahán (Génesis 22:17, 18). Tel miak xiujmej satepan, tatitanil Pablo kinextij ke yejua Mesías oso Jesucristo akin mochiuako kemej yekinika tekoneuj (Gálatas 3:16). Uan keman Jesús kimiktijkej kemej eskia sayoj ‘kikotsxamanijkej’ ijkon kemej moijtoj itech Génesis 3:15. Sayoj ke Dios oksepa kimakak nemilis Jesús “kemej espíritu” (1 Pedro 3:18, NM ).

Uan no, Dios kijtoj ke 144,000 taltikpakneminij mochiuaskiaj kemej ojpatika tekoneuan tein no kiseliskiaj iTekiuajyo Dios (Gálatas 3:29; Apocalipsis 14:1). Keman momikiliskiaj moajokuiskiaj ne iluikak kemej espíritus, uan tekiuajtiskiaj iuan Cristo (Romanos 8:16, 17).

Jesús tein moajsi kemej Tekiuaj ne iluikak, amo uejkaua kinixpolos Amokuali uan ikoneuan, tein kijtosneki amokuali ejekamej uan nochin tein amo yolkualmej (Juan 8:44; Efesios 6:12). Itaixyekanalis kinualkuilis yolseuilis uan yolpakilis akin amo kikauaj Dios. Ompa, Jesús ‘kikuaxamanis’ oso kiixpolos kouat (Hebreos 2:14).