Israelitas tajtankej se tekiuaj

SATEPAN ke Sansón momikilij, itech Israel nemik se takat tein motokaytij Samuel. Yejua katka tamelaujkej uan tanauatijkej. Kemej israelitas kitelnekiaj mochiuaskej kemej okseki altepemej, kitajtanijkej se tekiuaj. Maski Jiova amo kiuelitak nejon, kiiluij Samuel maj kitaliani Saúl kemej tekiuaj. Yejua katka yolyemanik, sayoj ke satepan moueyinekik uan amo kitakamatikok Jiova. Yejika yejuatsin kiixtopeuak uan kiiluij Samuel maj ki­ixpejpenani kemej ixpatka se telpoch tein motokaytij David. Sayoj ke kiseliskia tekiuajyot seki xiujmej satepan.

Se tonal, David yajki kinitato ikniuan tein teuantitoyaj imiuan itateuijkauan Saúl uan yetoyaj itech se neteuilis. Keman kinajsito tateuianij kinitak ke moujkauiuiyokatoyaj. ¿Toni panotoya? Se ueyi tateuijkej filisteo tein motokaytij Goliat, kinueyipinaujtijtoya tateuianij israelitas uan Dios. David nion tepitsin kiuelitak nejon, yejika kinekik moteuis iuan maski katka se telpoch. David kikuik sayoj se iateuitats uan se ome eyi tet, uan yajki kinamikito nejon takat uejkapantik tein ajsitoyaya eyi metro. Goliat kiueuetskilij David, sayoj ke yejua kinejmachtij ke kitaniskia porin moteuiaya itokaykopa Jiova. David kimiktij Goliat sayoj ika se tet. Ompa kikuilij iespada uan kikechkotonak. Keman oksekin tateuianij filisteos kiitakej nejon, moujkacholojkej.

Tekiuaj Saúl kitelmoujkaitak yolchikaualis tein David kipiaya, yejika kitalij maj kinixyekana itateuijkauan. Sayoj ke ijkuak Saúl kiitaya ke David tatania itech neteuilis, kitelnexikoluiaya uan kiyejyekoj kimiktis. David monekik cholos. Uan maski miak xiujmej cholojtinemia, amo keman kinemilij momakepas iuan tekiuaj. ¿Keyej? Porin kimatia ke Jiova kitalijka Saúl maj tekiuajti. Seki xiujmej satepan, Saúl kimiktijkej itech se neteuilis. Ompa, David mochiuak tekiuaj, ijkon kemej Jiova motenkaujka.

David kinekia kichijchiuas itemplo Jiova. Sayoj ke yejuatsin kiiluij ke tekit kichiuaskia semej ikoneuan. Uan nejin motokaytij Salomón. Maski ijkon, Jiova kimakak se okachi ueyi tatiochiualis. ¿Toni nejin? Jiova motenkauak iuan David ke yejua eskia yekinika tekiuaj itech tekiuajyot kampa sayoj tein itech ualeujtoskiaj kiixpatatiaskiaj itech taixyekanalis. Uan ompa kisaskia Tekoneuj oso Temakixtijkej tein Dios kijtojka Edén ke ualaskia. Nejon takat eskia Mesías tein kijtosneki Taixpejpenal, akin Jiova kiixtaliskia maj mochiua Tekiuaj itech iTekiuajyo tein uejkauaskia nochipaya.

Kemej David moteltasojkamatia, kisentilij miak taman tein ika kichijchiuaskiaj templo ijkon kemej miak plata, oro uan okseki tamanok. Uan no, ika ichikaualis Dios kijkuiloj miak salmos, oso nekuikatilmej tein ika kiueyichiuayaj Jiova. Keman David yaya momikilitia, kijtoj ke nochi kichiuak ika inepaleuil Dios. Yejua kijtoj: “Iespíritu Jiova kichiuak maj nitajto, uan itajtol yetoya itech nonenepil” (2 Samuel 23:2).

​(Motaksaltia itech 1 uan 2 Samuel, 1 Crónicas, Isaías 9:7, Mateo 21:9, Lucas 1:​32 uan Juan 7:​42.)

12. 1117 a.i.t. Saúl mochiuak tekiuaj