Salomón, se tekiuaj tamatkej

KOMO nochin tein pouij itech se tekiuajyot ijkon kemej tekiuaj, kiitaskiaj Jiova kemej imin Ueyi Tekiuaj uan kitakamatiskiaj itanauatiluan, ¿keniuj nemiskiaj? Itaixyekanalis Salomón tein uejkauak 40 xiujmej kitemaka tanankilil.

Keman David yaya momikilitia, kiix­pejpenak ikonetsin, Salomón kemej iixpatka. Se tonal, Dios kimonextilij Salomón itech se takochitalis uan kiiluij ke kimakaskia tein kitajtaniskia. Nejon tekiuaj tein katka telpoch, tajtanik tamatilis uan taixmatilis tein kipaleuiskia maj kimelaua kuejmolmej ika melaujkayot. Jiova kiyolpaktij tein kitajtanij uan kimakak. No kiiluij ke komo kisentokaya kitakamatia, kimakaskia miak taman tein pajpatiyoj, ijkon kemej ueyitilis uan nemiskia miak xiujmej.

Tel miakej kiixmatiaj Salomón ke katka tel tamatkej. Se tonal, ome siuamej mokuikuiliayaj se konetsin. ¿Toni kichiuak Salomón? ¡Tanauatij maj kitajkotekinij konetsin! Yekinika siuat kijtoj ke kuali yetok, sayoj ke ojpatika siuat niman kitataujtij maj kimakanij konetsin yekinika siuat. Ika nejin, Salomón kimatik ke ojpatika siuat katka yekmelauj temomaj. Keman nochin akin kinixyekanaya Salomón kikakkej nejin, kiajsikamatkej ke Dios kimakatoya tamatilis.

Se taman tein okachi ueyi uan kualtsin tein kichijchiuak Salomón yejua itemplo Jiova ompa Jerusalén, kampa israelitas kiueyichiuaskiaj Dios tein melauak. Keman kitemaktijkej nejon ueyi kali, Salomón kichiuak se netataujtil kampa kijtoj: “¡Xikita! Komo itech iluikak, kemaj, itech nochi iluikak amo aki moueiyo; ¡keniuj uelis akis moueiyo itech nejin kali tein nikchijchiuak!” (1 Reyes 8:​27).

Hasta itech uejuejka altepemej kemej Seba (oso Saba) tein poui Arabia, tel ika tajtouayaj Salomón. Siuat akin tekiuajtia itech nejon altepet, yajki Israel kiitato iueiyo Salomón uan nochi taman tein kipiaya uan kikakito kani ajsia iueyi tamatilis. Yejua kitelmoujkaitak nochi, uan kiolinij maj kiueyichiua Jiova porin kiix­pejpenak se tekiuaj tel tamatkej. Ika inepaleuil Dios, keman Salomón tekiuajtik, israelitas kipiakej se tel kuali nemilis uan yolseuilis kemej amo keman ijkon kipixtoyaj ompa Israel.

Tetayokoltij, sayoj ke Salomón amo no­chipa mokauak maj kiyekana itamatilis Jiova. Se neskayot, yejua amo kitakamatik itanauatil Dios uan monamiktij imiuan tel miakej siuamej maski sekin kinueyichiuayaj tiotsitsin. Yejuan yolik kiuejkatilijkej iuan Jiova uan kichiujkej maj kinueyichiuani tiotsitsin. Yejika Dios kiiluij ke moxeloskia itekiuajyo. Amo kipoloj nochi itekiuajyo sayoj porin Dios kichiujka se netenkaualis iuan David. Kemej tikitaj, maski Salomón kinekepilij Jiova, yejuatsin kichiuak ijkon kemej motenkaujka iuan David.

​(Motaksaltia itech 1 Reyes capítulos 1 a 11, 2 Crónicas capítulos 1 a 9 uan Deuteronomio 17:​17.)

13. 1070 a.i.t. Dios motenkauak iuan David ika Tekiuajyot

14. 1037 a.i.t. Salomón peuak tekiuajti

15. 1027 a.i.t. Motamichijchiuak templo ompa Jerusalén

16. kemej itech 1020 a.i.t. Moijkuiloj El Cantar de los Cantares