Tayolmajxitilis tein techpaleuia itech tonemilis

TIKSELISKEJ tein kuali komo tikseliaj Jiova kemej toUeyi Tekiuaj? Tein techpaleuis maj tikmatikan, moneki tikitaskej tayolmajxitilis tein techmaka Biblia. ¿Yekmelauj techualkuilia tein kuali? ¿Techpaleuia maj tikpiakan se kuali nemilis? Itech amaix Proverbios, tekiuaj Salomón kijkuiloj tel miak tayolmajxitilis tein techpaleuia itech miak taman tein tikchiuaj. Maj tikitakan seki.

Itech toyekuikalis iuan Dios. Komo tiknekij timoyekuikaskej iuan Dios, moneki maj iuan titakuaujtamatikan. Salomón kijtoj: “Xitakuaujtamati iuan Jiova ika nochi moyolo, uan amo ximopaleui itech moajsikamatilis. Itech nochi tein tikchiuas xiktemo Dios uan yejuatsin mitspaleuis ximelaujkanemi” (Proverbios 3:​5, 6). ¿Keniuj tiknextiaj ke titakuaujtamatij iuan Dios? Keman timokauaj maj yejuatsin techyekana uan tiktakamatij itanauatiluan. Ika nejin, tikchiuaj tein okachi tayekantok. ¿Toni nejin? Tikyolpaktiskej toTajtsin uan tiknextiskej ke Amokuali se taixnamikkej tein takajkayaua (Proverbios 27:​11).

Itech tochankauan uan imiuan totasojikniuan. Axkan kalyetouanij okachi moneki maj Dios kinyekana. Yejuatsin kiyolmajxitia takat namikej: “Xiyolpaki iuan monamik tein iuan timonamiktij keman katka titelpoch”, tein kijtosneki maj amo keman kikajkayaua inamik iuan okse (Proverbios 5:​18-​20). Itech Proverbios capítulo 31, kiiluia siuat namikej toni moneki kichiuas tein kipaleuis maj inamik uan ikoneuan okachi kipoujkaitakan uan maj kitasojtakan. Uan no, konemej kiniluia maj kintakamatikan imin tatuan (Proverbios 6:​20). Nejin amaix no kijtoua ke tel kuali maj se kinpia tasojiknimej, uan technejmachtia ke komo amo timouikaj imiuan oksekin, tiktemouaj sayoj totanejnekilis (Proverbios 18:1). Maski semi kuali maj tikinpiakan totasojikniuan, moneki tikinixpejpenaskej uan amo timouikaskej imiuan tein uelis techijtakoskej (Proverbios 13:​20; 17:​17).

Itech tonemilis. Amaix Proverbios kipia tel kuali tayolmajxitilis tein techpaleuia maj kuali tiyetokan, maj timokixtilikan tanemililmej tein teijtakoua, maj amo timotelpanoltikan ika tayil tein teiuintij, maj tikpiakan se tanemilil tein techyolchikaua uan maj timochiuakan kuali tekitinij (Proverbios 6:6; 14:​30; 20:1). Uan no, technejmachtia ke titeltajyouiskej komo amo timokauaj maj techyekana itanauatiluan Dios (Proverbios 14:​12). No techyolmajxitia maj tikyekpiakan toyolo, tein kijtosneki maj amo tikauakan maj kalaki toyolijtik pitsotik tanemililmej, ta “ompa ualeujtok nemilis” (Proverbios 4:​23).

Nejin tayolmajxitilis kinpaleuijtok tel miakej taltikpakneminij. Yejika kiitaj ke okachi kuali maj tikselikan Jiova kemej toUeyi Tekiuaj.

​(Motaksaltia itech amaix Proverbios.)

18. kemej itech 717 a.i.t. Motamiijkuiloj Proverbios