• Tekiuanij tein yolkualmej uan tein amo yolkualmej
    Biblia, ¿toni ika tajtoua?
    • Se israelita akin telpoch tekiuajti

      TAXELOL 13

      Tekiuanij tein yolkualmej uan tein amo yolkualmej

      Israel moxeloj uan kisak ome tekiuajyomej. Miakej akin taixekanayaj kikaujkej Jiova. Babilonios kiixpolojkej Jerusalén

      NIMANSAJ keman Salomón kikauak Jiova, Israel moxeloj uan kisak ome tekiuajyomej, ijkon kemej Jiova kijtojka. Rehoboam akin kiixpatak Salomón, kinteltajyouiltiaya israelitas. Yejika moxelojkej majtakti uejueyi kalyetouanij tein moajsiaj norte. Okseki ome uejueyi kalyetouanij kisentokakej itech tekiuajyot tein itech ualeujtoya David ompa Jerusalén. Yejuan teuantitoyaj itech tekiuajyot tein moixmatia kemej Judá tein moajsia sur.

      Nochi ome tekiuajyomej amo kipiakej kuali nemilis uan yolseuilis porin amo tatakamatiaj niono takuaujtamatiaj. Sayoj ke tekiuajyot tein moixmatia kemej Israel tein moajsia norte, okachiok amo kuali kipanokej porin tekiuanij niman peuak taoliniaj maj kinueyichiuakan tiotsitsin. Uan maski Dios kintitanilij tanauatianij kemej Elías uan Eliseo —tein hasta kinajokkej seki mikemej⁠—, amo kinkakkej. Ika tamik, Dios kinkauak asirios maj kinteuianij israelitas uan maj moajsinij imin mako.

      Tepitsin satepan ke panok 100 xiujmej, Dios no kitatsakuiltij tekiuajyot Judá tein moajsia sur. Maski Dios kintitanik itanauatijkauan maj kinnejmachtitij tekiuanij, sayoj se ome eyi kintajtolkakkej uan kitemojkej keniuj kinmelauaskej israelitas. Se neskayot, tekiuaj Josías kiixtalij kiixpolos taueyichiualis tein amo melauak uan kiyekchijchiuak itemplo Jiova. Keman tekititoyaj, kiajsikej se tajkuilol tein kipiaya Tanauatil tein kijkuilojka Moisés. Ika ueyi tanejnekilis, okachiok ijsiujka kitamij taueyichiualis tein amo melauak.

      Tetayokoltij tikmatiskej ke tekiuanij tein kiixpatatiajkej Josías amo ijkon kichiujkej. Yejika Jiova kinkauak babilonios maj kalakikan Judá uan maj kiixpolokan Jerusalén uan itemplo. Tein mopaleuijkej, kinuikakej Babilonia uan ompa moajsikej temako. Dios kijtoj ke 70 xiujmej satepan mokepaskiaj itech imin tal. Itech nejon xiujmej, nochi Judá mokauaskia taseltijkan.

      Nion akinok tein itech ualeujtoskia David tekiuajtiskia, ta hasta keman ejkoskia Tekiuaj oso Mesías tein moijtojka ualaskia. Tein melauj, miakej tekiuanij tein itech ualeujtoyaj David, kinextijkej ika imin tachiualis ke Dios amo kinchijchiuak taltikpakneminij maj taixyekanakan. Sayoj Mesías kemaj uelis kichiuas. Yejika Jiova kiiluij tekiuaj tein ika tamitoya: “Corona [oso taixyekanalis] [...] amo akin iaxka eski hasta maj ejko akin senkis kinamiki, uan yejua moneki nikmaktilis” (Ezequiel 21:​26, 27).

      ​(Motaksaltia itech 1 uan 2 Reyes, 2 Crónicas capítulos 10 a 36 uan Jeremías 25:​8-​11.)