Jesús kijtoj toni mochiuaskia satepan tein ajsiskia itech totonaluan

KEMAN Jesús yetoya iselti itech Olivojtepet, kampa ueliaj kipanitayaj Jerusalén uan itemplo, naui itatitaniluan kiiluitoj maj kinmelauiliani seki taman tein achto kijtojka. Kikakilijkaj ke templo ixpoliuiskia. Uan itech seki tonalmej achto, kijtoj ke mochiuaskia seki taman itech “itamiampa nochi tein mochiujtok itech taltikpak” (Mateo 13:​40, 49, NM). Yejika kitajtanijkej: “¿Kemanian mochiuas nochi nejin, uan toni neskayot tikitaskej itech moyetolis uan itamiampa nochi tein mochiujtok itech taltikpak?” (Mateo 24:3, NM).

Keman Jesús kinnankilij, kinyekiluij toni mochiuaskia achto ke Jerusalén uan itemplo ixpoliuiskiaj. Sayoj ke amo ijkuaksaj panoskia, ta miak xiujmej satepan mochiuaskia itech nochi taltikpak. Jesús kijtoj seki taman tein mosenchiuaskia nikan taltikpak uan senochia eskia se neskayot oso kinextiskia ke Jesús yetoskiaya itech iTekiuajyo Dios ne iluikak. Ika okseki tajtolmej, nejon kinextiskia ke Jiova kimakakya Jesús tanauatil kemej Tekiuaj itech Tekiuajyot tein moajsiskia imako Mesías, uan amo uejkaua kiixpoloskia nochi tein amo kuali uan kiualkuiskia yolseuilis semanauak taltikpak. Keman mochiuaskia nochi tein Jesús kijtoj, kijtosnekiskia ke amo uejkaua tamiskia nochi tein mochiujtoskia itech taltikpak —tein iuantia nochi tein kipia ke kiitas iuan política, taneltokalis uan kemej monejnemiltiaj taltikpakneminij⁠— uan peuas mochiuas se xochital.

Jesús kijtoj ke ijkuak peuaskia tekiuajtiskia ne iluikak, semanauak taltikpak onkaskia uejueyi neteuilismej, mayan, talolinilis uan kokolismej tein temaua. Okachi momiakiliskia tein amo kuali. Uan yekmelauj imomachtijkauan noyampa kitetapouiskiaj kuali tanauatilmej ika iTekiuajyo Dios. Nochi tein Jesús kijtoj ke eskia neskayot, tamis keman ualas “kachi ueyi tajyouilis” tein amo keman ijkon panotoya (Mateo 24:​21).

¿Uan keniuj itatojtokakauan Cristo kimatiskiaj ke motokijtokya nejon ueyi tajyouilis? Jesús kiniluij imomachtijkauan: “Ximoyekajsikamatiltikan de nijin nexkuitil den higoskuouit” (Mateo 24:​32). ­Keman se higuera peuaya maxiujyoua, ­kinextia ke peuatia verano. No ijkon, keman mosenchiujtoskiaya nochi tein Jesús kijtojka, momatiskia ke amo uejkaua tamiti nochi tein amo kuali. Sayoj ke Jesús kijtoj ke nion akin kimatiskia toni tonal uan hora peuaskia ueyi tajyouilis ta sayoj Jiova. Yejika tanejmachtij: “Xiixpetantokan” (Marcos 13:33).

​(Motaksaltia itech Mateo capítulos 24 uan 25, Marcos capítulo 13 uan Lucas capítulo 21.)

28. tonal 14 metsti nisán xiuit 33 i.t. Jesús kimiktijkej itech kuouit

29. tonal 16 metsti nisán xiuit 33 i.t. Dios oksepa kimakak nemilis Jesús