Xikchiuakan ijkon kemej kichiujkej tanauatianij: Nahúm
1. ¿Toni techmachtia amatajkuilol Nahúm?
1 Tepamit taxitinil tein moajsi itech uejkauj altepet Nínive kinextia ke, ijkon kemej Nahúm kijtojka achto, Jiova kintatsakuiltia akin kiixnamikij. Nion se akin okachi tamouilil tein kiixnamiki uelis kitanis (Nah. 1:2, 6). Keman timomachtiaj ika nejmachkayot tein achto kijtojka Nahúm tikajsij tein uelis techpaleuis itech tanojnotsalis.
2. ¿Keniuj tapaleuia kuali tanauatilmej tein tikuikaj?
2 Maj tikuikakan yolseuilis uan nechialis. Amatajkuilol Nahúm, uelis moitas ke sayoj ika tajtoua tatsakuiltilis tein kiselij altepet Nínive, tein pouia itech ueyi altepet Asiria tein moajsia ne uejkauj uan kampa nemiaj motelueyinekinij (Nah. 1:1; 3:7). Sayoj ke, tein tanejmachtij Nahúm kinpaleuij akin nemiaj itech ixolal Jiova. Tokayit Nahúm, tein kijtosneki “Teyolseuijkej”, kinyekiluij okseki judíos ke akin kintauelitaya amo uejkaua ixpoliuiskia. Uan no, kinyekiluij ke Jiova “se altepet chikauak tein kiyoualojtok tepamit keman onkak netekipacholis” (Nah. 1:7). Keman titanojnotsaj, no tikuikaj kuali tanauatilmej uan tikinyolchikauaj taltikpakneminij maj kitemokan nepaleuil iuan Jiova (Nah. 1:15).
3. Ijkon kemej Nahúm, ¿keniuj uelis tikuiskej neskayomej itech tanojnotsalis?
3 Maj tikuikan neskayomej. Jiova kichiuak maj Nahúm kikuini ineskayo Tebas (oso No-amón), xolal tein pouia Egipto tein asirios kiixpolojkej, maj ika kinexti tein kipanoskia Nínive (Nah. 3:8-10). Keman tikiniluiskej oksekin ke ixpoliuis tein amo kuali tein mochiujtok, maj tiknextikan keniuj mochiuak seki taman tein achto moijtoj itech Biblia uan ijkon tiknextiskej ke Jiova nochipa kichiua tein kijtoua uan nion se taman kiixpanauia. Kemej neskayot, nochin tateuianij akin kayomej Babilonia uan Media kinteuijkej akin kayomej Nínive itech xiuit 632 achto itech totonaluan. Kiouit chikauak kichiuak maj ueyiat Tigris semi moskalti, uan seki uejueyi tepamit tein kiyoualouaya altepet uetsik. Ijkon moaxkatilijkej Nínive, kemej Jiova achto kijtojka (Nah. 1:8; 2:6).
4. ¿Keniuj uelis titajtoskej kemej amo ouij techajsikamatiskej itech tanojnotsalis?
4 Maj titajtokan kemej amo ouij moajsikamatis. Tein achtook kijtoj Nahúm, kijkuiloj kemej amo ouij moajsikamatis uan kemej teyolpaktis (Nah. 1:14; 3:1). No ijkon, keman titajtoskej moneki amo ouij moajsikamatis (1 Cor. 14:9). Keman yekinika tikalpanoskej aksa, maj tikyekiluikan keyej ompa tiyetokej. Uan maj tikinpaleuikan akin iniuan timomachtiaj ika Biblia maj kichikauakan inintakuaujtamatilis iuan Jiova uan itech iTajtol, uan maj kiajsikamatikan keniuj kinpaleuia tein momachtiaj (Rom. 10:14, TNM).
5. ¿Toni tikyekmatij ke mochiuas keman tikixtajtoltiaj tein kijtoj Nahúm?
5 Nahúm senkis kineltokaya ke tein kijtoua Jiova nochipa mochiua, nejon tikyekitaj itech amatajkuilol itech Biblia tein kiuika itokay. Ijkon kemej moualtokia tonal keman ixpoliuis tein kiixyekantok Satanás, techyolseuia tein Jiova motenkaua: “Netekipacholis amo oksepa nesis ika ojpa” (Nah. 1:9).