XIKSENTOKAKAN XIKTEMOKAN NANKIAJSIKAMATISKEJ

Julio: Yekmelauj nechtelyolpaktia tein titajtouanij ika Biblia, Ernesto.a ¿Tikonelnamiki ke okse tonal keman niualaj tinechontajtanij se taman ika iTekiuajyo Dios? Tinechoniluij ke tikonnekia tikonmatis keyej tiitaixpantijkauan Jiova titamachtiaj ke peuak taixyekana itech xiuit 1914.

Ernesto: Kemaj, yejua nejon tein nikixtajtoltij itech semej nanmoamaixuan, ke iTekiuajyo Dios peuak taixyekana itech xiuit 1914, uan nikneki nikmatis se teisa. Namejuan nankijtouaj ke nochi tein nankineltokaj moajsi itech Biblia.

Julio: Kemaj, nochi.

Ernesto: Sayoj ke nikixtajtoltiani nochi Biblia uan nion seko nikitani maj ika tajto nejon xiuit. Yejua ika niktemoj itech Internet “1914” itech se Biblia itech tepos, uan amo nesik nion teyi.

Julio: Nikneki nimitsoniluis ke kuali tikonchiuak ome taman. Yekinika, porin tikonixtajtoltiani nochi Biblia. Moita ke tikonpoujkaita.

Ernesto: Kemaj, niknemilia ke amo onkak okse amaix kemej nejon.

Julio: Kemaj, no ijkon niknemilia. Uan ojpatika, porin ompa tikontemoua tikonajsis itanankililuan netajtanilmej tein tikonpia. Tikonchiuak tein Biblia kijtoua maj tikchiuakan: maj tiksentokakan tiktemokan tikajsikamatiskej.b ¡Kuali tein tikonchiua!

Ernesto: Tasojkamatik, Julio. Tein melauj nikneki niksentokas nimomachtis. Yejua ika niktemoj okachi tepitsin itech amaix tein tikixtajtoltijtokej uan nikajsik teisa ika xiuit 1914. Tajtoua ika se ueyi kouit tein kimayoujkej uan satepan oksepa moskaltij... Oso teisa ijkon.

Julio: Aa, kemaj. Nejon moajsi itech Daniel capítulo 4. Ika tajtoua se takochitalis tein kipiak Nabucodonosor, akin tekiuajtia itech altepet Babilonia.

Ernesto: Kemaj, yejua. Nikixtajtoltij miakpa, sayoj ke tein melauj kisentoka amo nikajsikamati keniuj nejon mouika iuan iTekiuajyo Dios oso iuan xiuit 1914.

Julio: Amo xionmotekipacho. Nion Daniel, akin Dios kinauatij maj kijkuilo nejon tajtolmej, kiajsikamatik tein kijtosnekia.

Ernesto: ¿Yekmelauj?

Julio: Kemaj. Xikonita tein kijkuiloj nikan itech Daniel 12:8: “Nikakik, sayoj ke amo uelik nikajsikamatik”.

Ernesto: Nikita ke amo sayoj nejua. Nejon nechyolseuia.

Julio: ¿Uan tikonmati keyej Daniel kipanok nejon? Porin ayamo ejkoya tonal keman Dios kiixtalijka maj moajsikamati nejon tajtolmej. Sayoj ke nejon mopatakya. Axkan ueli tikajsikamatij tein kijkuiloj Daniel.

Ernesto: ¿Kemaj?

Julio: Kemaj, tajkuilol tein moajsi taixpan kimelaua, versículo 9. Xikonita tein kijtoua: “Tajtolmej moeuaj uan motsakuaj hasta itech tonalmej keman ejkos tamilis”. Kemej ueli tikonita, nejin tajtolmej sayoj ueliskia moajsikamatis itech “tonalmej keman ejkos tamilis”. Uan nochi kinextia ke tinentokej itech nejon tonalmej. Tikitaskej satepan itech amaix tein tikixtajtoltijtokej.c

Ernesto: ¿Uelis tinechonmelauilis nejon tajtolmej?

Julio: Kemaj, tikitatij.

TEIN KIKOCHITAK NABUCODONOSOR

Julio: Achto, maj tepitsin tikitakan tein kikochitak tekiuaj Nabucodonosor, uan satepan tikitaskej tein kijtosneki. ¿Keniuj tikonita?

Ernesto: Kuali yetok.

Julio: Nabucodonosor kikochitak se kouit tel ueyi tein ajsia hasta iluikak. Ompa kikakik se ángel akin tanauatij maj kimayouikan kouit. Sayoj mokauak inaluayo uan ikoujtsontet. Satepan panok “chikome xiuit” uan kouit oksepa moskaltij.d Nejin tajtolmej yekinika mochiuak iuan Nabucodonosor. Yejua katka se tekiuaj akin kipiaya ueyi tanauatil; katka kemej nejon kouit tein ajsia hasta iluikak. Sayoj ke uelis tikijtoskej ke yejua no kimayoujkej uan kikaujkej ijkon “chikome xiuit”. ¿Tikonelnamiki toni kijtosneki nejon?

Ernesto: Mmm... Amo, amo nikelnamiki.

Julio: Biblia kijtoua ke kuatapoloj, uan nesi ke ijkon yetoya chikome xiuit. Nejon kichiuak maj amo ueli tekitiok kemej tekiuaj. Sayoj ke, keman panokej nejon xiujmej, pajtik uan oksepa peuak tekiti kemej tekiuaj.e

Ernesto: Kuali, nikajsikamattok. Sayoj ke ¿keniuj mouika nochi nejon iuan iTekiuajyo Dios uan xiuit 1914?

Julio: Kuali, kemej tikitakejya, nejin tajtolmej ojpa mochiuakya. Yekinika keman kitakotonaltijkej itaixyekanalis Nabucodonosor. Uan ojpatika keman kitakotonaltijkej itaixyekanalis Dios. Nejon tein ojpatika mochiuak yejua tein mouika iuan iTekiuajyo Dios.

Ernesto: ¿Uan keniuj tikonmati ke ojpa mochiuak?

Julio: Porin nejon tajkuilol techpaleuia maj tikmatikan. Daniel 4:17 kijtoua ke motematiltij nejon tajtolmej porin ijkon nochin kimatiskiaj “ke akin Ueyichiujkej yejua Taixyekankej itech tekiuajyot tein kipiaj taltikpakneminij, uan ke akin yejua kineki kimakas kimaka”. ¿Tikonitak tajtolmej “tekiuajyot tein kipiaj taltikpakneminij”?

Ernesto: Kemaj, nikan kijtoua ke “akin Ueyichiujkej yejua Taixyekankej itech tekiuajyot tein kipiaj taltikpakneminij”.

Julio: ¿Uan akoni tikonnemilia ke yejua “Ueyichiujkej”?

Ernesto: Yejua Dios, ¿amo?

Julio: Kemaj. Nejon tajtolmej kinextiaj ke tein achto moijtoj amo sayoj mouika iuan Nabucodonosor. No mouika iuan “tekiuajyot tein kipiaj taltikpakneminij”, tein kijtosneki, tanauatil tein Dios kipia nikan taltikpak. Komo tikitaj okseki tajkuilolmej achto uan taixpan, mitsonpaleuis okachi xikonajsikamati.

Ernesto: Kuali, nimitsonkaki.

TEIN OKACHI IKA TAJTOUA AMATAJKUILOL DANIEL

Julio: Amatajkuilol Daniel miakpa ika tajtoua se taman: keman peuas tekitis iTekiuajyo Dios iuan Jesucristo kemej taixyekankej. Maj tikitakan se neskayot. Nejin moajsi ome capítulos achto, itech Daniel 2:44. ¿Uelis tikonixtajtoltis?

Ernesto: Kemaj. Kijtoua: “Itech inintonaluan nejon tekiuanij, Dios akin nemi iluikak kitalis se tekiuajyot tein amo keman ixpoliuis. Uan nejin tekiuajyot amo panos imako okse xolal. Kikuechos uan kitalis itamilis nochi nejin tekiuajyomej, uan yejua uejkauas nochipaya”.

Julio: Kuali. ¿Tikonijtoskia ke nejin tajkuilol tajtojtok ika iTekiuajyo Dios?

Ernesto: Mmm... Amo nikyekmati.

Julio: Tajkuilol kijtoua ke nejin tekiuajyot “uejkauas nochipaya”; ika okseki tajtolmej, amo keman ixpoliuis. ¿Akoni okse ijkon kemej Dios ueliskia kipias se tekiuajyot tein uejkauas nochipaya?

Ernesto: Amo akin.

Julio: Melauak. Maj tiktemokan okse tajkuilol tein no ika tajtoua iTekiuajyo Dios. Moajsi itech Daniel 7:13, 14 uan ika tajtoua aksa akin mochiuaskia tekiuaj. Xikonita tein kijtoua: “Yejua kimaktilijkej taixyekanalis uan poujkaitalis uan tekiuajyot, uan ijkon xolalmej, altepemej uan tajtolmej nochin kitekitiliskiaj sayoj yejua. Itaixyekanalis yejua se taixyekanalis tein uejkauas nochipaya uan amo keman panos, uan itekiuajyo se tein amo keman kiixpoloskej”. Itech nejin tajkuilol moajsi se taman tein ika titajtojkejya achto.

Ernesto: Kemaj, oksepa ika tajtoua se tekiuajyot.

Julio: Kemaj. Uan amo tein yeski tekiuajyot. Komo tikonita, kijtoua ke kipia tanauatil itech nochi “xolalmej, altepemej uan tajtolmej”. Nejin kijtosneki ke taixyekana semanauak taltikpak.

Ernesto: Amo nikitstoya, sayoj ke melauak ijkon kijtoua.

Julio: Uan oksepa xikonita tein kijtoua nikan: “Itaixyekanalis yejua se taixyekanalis tein uejkauas nochipaya uan amo keman panos, uan itekiuajyo se tein amo keman kiixpoloskej”. ¿Melauj ke nejin tajkuilol kipia tajtolmej kemej tein moajsi itech Daniel 2:44, tein yekin tikixtajtoltijkej?

Ernesto: Kemaj.

Julio: Kuali, maj tikelnamikikan tepitsin tein tikitakejya. Tajkuilol tein moajsi itech Daniel capítulo 4 kitemoua kiteixmatiltis ke “Ueyichiujkej yejua Taixyekankej itech tekiuajyot tein kipiaj taltikpakneminij”. Nejin kinextia ke tein achto moijtoj mochiua iuan akin okachi ueyichiujkej ke Nabucodonosor. Uan no, itech nochi amatajkuilol Daniel tikajsij tajkuilolmej tein tajtouaj ika nejon: keman iTekiuajyo Dios peuas tekitis iuan Jesucristo kemej taixyekankej. Nochi nejin kinextia ke tein kijtoua Daniel capítulo 4 ika tajtoua iTekiuajyo Dios.

Ernesto: Kemaj, melauj. Sayoj ke kisentoka amo nikajsikamati keniuj mouika iuan xiuit 1914.

PANOUA CHIKOME XIUIT

Julio: Kuali, maj oksepa tikitakan tein kipanok Nabucodonosor. Tikijtojkej ke keman yekinika mochiuak tein achto moijtoj, yejua katka kouit. Itaixyekanalis kitakotonaltijkej keman kimayoujkej kouit uan panok chikome xiuit. Nabucodonosor kuatapoloj, sayoj ke keman panokej nejon xiujmej pajtik uan oksepa kipiak tanauatil. Keman ojpatika mochiuak, itaixyekanalis Dios kitakotonaltijkej, sayoj ke amo porin Dios kichiujka se taman tein amo kuali.

Ernesto: ¿Keniuj? Amo nikajsikamati.

Julio: Xikonita, ne uejkauj moijtouaya ke akin tekiuajtiaj ompa Israel motaliayaj itech “trono tein iaxka Jiova”.f Nejon kijtosneki ke yejuan kiixnextiayaj Dios. Inintaixyekanalis kiixnextiaya itaixyekanalis Dios. Sayoj ke, ijkon kemej panokej tonalmej kikaujkej uan nochi xolal no kiixnamikkej kemej yejuan. Yejua ika, Dios kikauak maj Babilonia moaxkatiliani Israel itech xiuit 607 achto itech totonaluan. Itech nejon xiuit nion se tekiuaj kiixnextiskiaok Jiova ompa Jerusalén. Nejon kichiuak maj kitakotonaltikan itaixyekanalis Dios. ¿Tikonajsikamati?

Ernesto: Kemaj, nikajsikamattok.

Julio: “Chikome xiuit” peuak mopoua itech xiuit 607 achto itech totonaluan. Itech nejon xiujmej kitakotonaltijkej itaixyekanalis Dios. Uan keman panokej nejon xiujmej, Dios kitalij se yankuik tekiuaj akin kiixnextiskia, sayoj ke axkan ne iluikak. Okseki tajkuilolmej tein achto tikixtajtoltijkej itech amatajkuilol Daniel no mochiuak itamian “chikome xiuit”. Sayoj ke ¿kemanian tamik “chikome xiuit”? Tanankilil techpaleuis maj tikmatikan kemanian peuak taixyekana iTekiuajyo Dios.

Ernesto: Nejon panok itech xiuit 1914, ¿melauj?

Julio: Kemaj, Ernesto.

Ernesto: Sayoj ke ¿keniuj momati ke panok itech nejon xiuit?

Julio: Keman Jesús ualaj nikan taltikpak, kijtoj ke “chikome xiuit” ayamo tamia.g Yejua ika titajtojtokej ke monekia panos tel miak xiujmej. “Chikome xiuit” peuak miak xiujmej achto ke Jesús ualaskia nikan taltikpak uan kisentokak miak xiujmej satepan keman yejua mokepak iluikak. Uan no, xikonelnamiki ke tikijtojkej ke tein kijkuiloj Daniel amo moajsikamatiskia hasta itech “tonalmej keman ejkos tamilis”.h Sayoj ke ijkuak ajsitoyaya xiuit 1900, seki oloch momachtianij ika Biblia senkis kitemojkej toni kijtosnekia nejon tein achto moijtoj itech Daniel uan okseki tajkuilolmej. Ijkon kemej panouayaj tonalmej kiajsikamattiyayaj ke “chikome xiuit” tamiskia itech xiuit 1914. Tein mochiuani itech taltikpak ijkuak uan hasta axkan kiyeknextia ke itech nejon xiuit peuak taixyekana ompa iluikak iTekiuajyo Dios uan ke peuak tein moixmati kemej tonalmej keman ejkos tamilis, oso itamian tonalmej nejin taltikpak. Nejin tel miak tamachtilis, amo uelis se kiitas nochi axkan, Ernesto.

Ernesto: ¡Melauj! Monekis maj oksepa nikita uan ijkon kuali nikajsikamatis.

Julio: Kemaj. Nejua nechuikilij miak tonalmej nikajsikamatis. Sayoj ke nikchia ke tein ika titajtojkej maj mitsonpaleui xikonita ke tein tikijtouaj tiitaixpantijkauan Jiova ika iTekiuajyo Dios tikixtiaj itech Biblia.

Ernesto: Kemaj. Nochipa nikmoujkaitani ueyi takuaujtamatilis tein nankipiaj itech Biblia.

Julio: Uan nikita ke tejuatsin no tikonuelitaskia tikonpias nejon takuaujtamatilis. Kemej nimitsoniluia, nejin tel miak tamachtilis, amo uelis se kiitas nochi axkan uan nikyekmati ke tikonpia netajtanilmej. Kemej neskayot, tikijtojkej ke “chikome xiuit” peuak itech xiuit 607 achto itech totonaluan uan ke senkis mouika iuan iTekiuajyo Dios. Sayoj ke ¿keyej tikijtouaj ke tamik itech xiuit 1914?i

Ernesto: Kemaj, yejua tein okachi nikneki nikmatis.

Julio: Biblia techpaleuia maj tikixejekokan kanachi xiujmej yekmelauj uejkaua “chikome xiuit”. ¿Tikonuelitaskia maj ika titajtokan keman oksepa niualas?

Ernesto: Kuali yetok. Nimitsonchia.

MAJ OKSEPA TIKELNAMIKIKAN TEIN KIKOCHITAK NABUCODONOSOR

Julio: Ernesto, nechmaka pakilis oksepa nimitsonitas. Niyolpaki nochipa keman nitajtoki ika Biblia mouan sejse semana.a ¿Keniuj tionyetok?

Ernesto: Kuali, tasojkamatik.

Julio: ¡Nechmaka pakilis! Keman nimitsonkalpanoj ika titajtojkej keyej tiitaixpantijkauan Jiova tikijtouaj ke iTekiuajyo Dios peuak taixyekana itech xiuit 1914.b Tikitakej ke Daniel capítulo 4 techpaleuia maj tikmatikan ke itech nejon xiuit peuak taixyekana. ¿Tikonelnamiki toni ika tajtoua?

Ernesto: Kemaj, ika tajtoua tein kikochitak tekiuaj Nabucodonosor.

Julio: Kemaj. Yejua kikochitak se ueyi kouit tein ajsia hasta iluikak. Itech nejon takochitalis kikakik ke se ángel tanauatij maj kitekikan kouit. Sayoj mokauak inaluayo uan ikoujtsontet. Ompa panok “chikome xiuit” uan kouit oksepa peuak moskaltij.c No tikitakej ke nejon tajkuilol ojpa mochiuak. ¿Tikonelnamiki katiyejua yekinika?

Ernesto: Yejua tein kipanok Nabucodonosor, ¿amo? Kuatapoloj uan ijkon yetoya chikome xiuit.

Julio: Kemaj. Kuatapoloj uan amo kisentokakok kemej tekiuaj. Keman ika ojpa mochiuak yejua keman kitakotonaltijkej “chikome xiuit” itaixyekanalis Dios nikan taltikpak. Nejon peuak keman kiixpolojkej Jerusalén itech xiuit 607 achto itech totonaluan. Ijkuak, amo moajsiajok tekiuanij akin kiixnextiskiaj Jiova nikan taltikpak. Keman tamiskia nejon xiujmej, Dios kiixtaliskia se yankuik tekiuaj, sayoj ke axkan ne iluikak. Ika okseki tajtolmej, keman tamiskia “chikome xiuit” peuaskia taixyekanaskia iTekiuajyo Dios tein moajsi iluikak. Tikitakejya kemanian peuak “chikome xiuit”. Axkan moneki tikitaskej kanachi yekmelauj uejkauak uan ijkon tikmatiskej itech toni xiuit peuak taixyekana iTekiuajyo Dios. ¿Tikonajsikamati?

Ernesto: Kemaj, nikelnamiktokya tein ika titajtojkej achto.

Julio: Kuali. Maj tikitakan kanachi yekmelauj uejkauak “chikome xiuit”. Monekik oksepa nimomachtis achto ke niualas. Nikchiuati nochi tein niuelis maj amo ouij xikonajsikamati tein nimitsonmelauiliti.

Ernesto: Kuali yetok.

TAMI “CHIKOME XIUIT”, PEUA ITAMIAN TONALMEJ

Julio: Keman yekinika mochiuak, iuan Nabucodonosor, “chikome xiuit” yekmelauj uejkauak chikome xiuit. Sayoj ke keman ika ojpa mochiuak, iuan iTekiuajyo Dios, okachi uejkauak.

Ernesto: ¿Uan keniuj tikonmati?

Julio: Maj tikitakan. “Chikome xiuit” peuak itech xiuit 607 achto itech totonaluan, keman kiixpolojkej Jerusalén. Komo itech nejon xiuit peua tikpouaj chikome xiuit, tiajsitij itech xiuit 600 achto itech totonaluan uan itech nejon xiuit amo teyi mochiuak tein mouika ika iTekiuajyo Dios. Uan no, kemej tikitakejya, keman Jesús ualaj nikan taltikpak miak xiujmej satepan, kijtoj ke “chikome xiuit” ayamo tamia.

Ernesto: Kemaj, kemaj, nikelnamikikya.

Julio: Yejua ika axkan, “chikome xiuit” amo yekmelauj chikome xiuit, ta okachi uejkaua.

Ernesto: ¿Okachi uejkaua? ¿Kanachi?

Julio: Itech amatajkuilol Apocalipsis, oso Revelación, moajsi se tajkuilol tein iuan mouika tein kijtoua Daniel uan techpaleuis maj tikmatikan kanachi uejkaua “chikome xiuit”. Itech nejon tajkuilol moijtoua ke “eyi xiuit uan tajko” kijtosneki 1,260 tonalmej.d Keman tiktaliaj okse achiok, mochiua “chikome xiuit” uan ajsi 2,520 tonalmej. ¿Kuali tikonajsikamati hasta nikan?

Ernesto: Kemaj, sayoj ke ayamo nikyekajsikamati keyej namejuan nankineltokaj ke iTekiuajyo Dios peuak taixyekana itech xiuit 1914.

Julio: Kuali yetok, maj tikitakan. Itech seki tajkuilolmej kampa moijtoua tein mochiuas satepan, se tonal kijtosneki se xiuit.e Komo no ijkon tikchiuaj ika “chikome xiuit”, 2,520 tonalmej yeskiaj 2,520 xiujmej. Uan komo itech xiuit 607 peua tikpouaj 2,520 xiujmej, porin ijkuak peuak mopoua “chikome xiuit”, tiajsij itech xiuit 1914.f Yejua ika ueli tikijtouaj ke itech nejon xiuit tamik “chikome xiuit” uan ke Jesús peuak tekiti kemej Tekiuaj itech iTekiuajyo Dios. Uan no, itech xiuit 1914 peuak mochiua tein itech Biblia moijtojka ke panoskia itech itamian tonalmej.

Ernesto: ¿Kemej toni?

Julio: Itech Mateo 24:7, Jesús kijtoj tein mochiuaskia keman peuaskia taixyekanas ne iluikak: “Moteuiske se uan okse pueblojuani, uan in tagayot den se país moajokuiske uan moteuiske se uan okse tagayot. Uan onkas miak kokolis uan miak mayanti uan talolinilis”. Xikonita, Jesús kijtoj ke onkaskia mayan uan taloliniskia. ¿Amo yejua nejon tein itech nejon xiuit peuak mochiua noyampa taltikpak?

Ernesto: Kemaj, melauak.

Julio: Jesús no kijtoj ke onkaskia neteuilismej. Uan amatajkuilol Apocalipsis kijtoua ke amo sayoj yeskia itech se xolal, ta nejon neteuilismej mochiuaskiaj semanauak taltikpak.g ¿Tikonelnamiki kemanian peuak Yekinika Neteuilis tein Mochiuak itech Nochi Taltikpak?

Ernesto: Itech xiuit 1914. Kemaj, itech xiuit keman namejuan nankijtouaj ke Jesús peuak taixyekana. Komo amo akin nechiluiskia amo keman nikitaskia nejon.

Julio: Keman tikajsikamatij tajkuilolmej tein ika tajtouaj “chikome xiuit” uan tajkuilolmej tein ika tajtouaj itamian tonalmej, nochi mouika. Tiitaixpantijkauan Jiova senkis tikneltokaj ke itech xiuit 1914 Jesús peuak taixyekana uan ke itech nejon xiuit peuak tinemij itech itamian tonalmej.h

Ernesto: Ayamo senkis nikajsikamati nochi nejin.

Julio: Nejua amo no nikajsikamatik keman yekinika nechmelauilijkej. Sayoj ke nikchia maj tajkuilolmej tein ika titajtojkej mitsonpaleui okachi xikonita ke maski itech Biblia amo ixnesi xiuit 1914, tiitaixpantijkauan Jiova tikpiaj keyej tikneltokaskej ke Jesús peuak taixyekana itech nejon xiuit. No nikchia maj mitsonpaleui tikonitas ke nochi tein tikneltokaj moajsi itech Biblia.

Ernesto: Kemaj, yejua nejon tein ipa nikmoujkaitani. Tejuatsin nochi tinechonmelauilia ika Biblia. Tein yeski tein nimitsontajtanis, amo keman tikonijtoua “Nejua niknemilia”. Nochipa tikonkui Biblia. Sayoj ke ¿keyej semi ouij tikajsikamatiskej Biblia? ¿Keyej Dios amo kiyeknextij ke Jesús yeskia tekiuaj itech xiuit 1914?

Julio: Kuali netajtanil, Ernesto. Moajsi miak taman itech Biblia tein amo momelaua. ¿Keyej Dios ijkon kichijchiuak? Nikijtosneki, ¿keyej moneki timotelmachtiskej uan ijkon tikajsikamatiskej? ¿Tikonuelitaskia maj ika titajtokan nejon okse semana?

Ernesto: Kemaj, nikuelitaskia. Nimitsonchia.