¿Toni Seol uan Hades?

ITECH tajtolmej tein yekinika ika moijkuiloj Biblia, ixnesi panoua 70 tajtol hebreo scheʼóhl uan griego háides, tein kipia ke kiitas ika mikilis. Itech seki Biblias kikepaj kemej “miketekoch”, “miktan”, “taltekoch” uan okseki tamanok. Sayoj ke, itech miak tataman tajtolmej amo kipiaj se tokayit maj kiteajsikamatilti ijkon kemej tajtol hebreo uan griego. Yejua ika, itech Traducción del Nuevo Mundo kikui nejon ome tajtolmej: “Seol” uan “Hades”. Axkan, ¿toni kijtosneki? Maj tikitakan keniuj mokuij itech seki textos tein kipia Biblia.

Eclesiastés 9:10 kimelaua: “Amo onkak tekit nion teisa tein monemilia mochijchiuas nion taixmatilis nion tamatilis itech Miketekoch, kampa tiyouj”. ¿Kijtosneki nejin ke Seol yejua sejse miketekoch kampa mopachoua se tochankauj oso totasojikniuj? Amo. Keman Biblia ika tajtoua sejse miketekoch, amo kikui scheʼóhl nion no háides, ta okseki tajtolmej hebreo uan griego (Génesis 23:7-9; Mateo 28:1). Nion no mokui tajtol “Seol” keman ika motajtoua kampa kinpachouaj miakej mikemej, kemej kampa kinpachouaj seko kalyetouanij oso se ueyi taltekoch kampa kinsenpachouaj miakej mikemej (Génesis 49:30, 31).

Komo amo yejua, ¿toni kijtosneki keman iTajtol Dios ika tajtoua “Seol” oso “Hades”? Kijtosneki kansaika okachi taueyika, amo ijkon kemej se ueyi taltekoch kampa kinsenpachouaj miakej mikemej. Se neskayot, Isaías 5:14 kijtoua ke Seol “taueyika” uan “tel panouaya ueyi kitapojtok itenoj”. Seol, kemej yeskia kinkuajya tel miakej mikemej, uan nochipa kineki okachi (Proverbios 30:15, 16). Amo kemej miketekochmej, ompa sayoj poujtokej akin akij, sayoj ke ‘Seol amo ixui’ (Proverbios 27:20). Kemaj, Seol oso Hades, amo keman pexoni nion no kipia itamilis. Yejua ika amo kijtosneki maj yekmelauj moajsi sayoj seko. Ta kijtosneki kampa youij mikemej, oso ika okseki tajtolmej, sayoj kiixnextia kampa moseuijtokej itech mikilis tel miakej mikemej.

Keman tikmatij tein Biblia tamachtia ika neajokuilis, okachi tikajsikamatij toni Seol oso Hades. Kemej kijtoua iTajtol Dios, mikemej akin ompa moajsij moajokuiskej (Job 14:13; Hechos 2:31; Apocalipsis 20:13).a No kinextia ke ompa moajsij akin kitekitilijkej Jiova uan akin amo kitekitilijkej (Génesis 37:35; Salmo 55:15). Yejua ika Biblia kiyekijtoua ke moajokuiskej “amo sayo in yolkualime. Ta, no nekes ten amo yolkualime” (Hechos 24:15).