¿Keniuj techpaleuiaj tanauatilmej tein kipia Biblia?

1. ¿Keyej moneki maj techixyekanakan?

ToTajtsin Jiova, Akin techchijchiuak, okachi tamattok ke tejuan. Uan kemej techtasojta toka motekipachoua. Amo techchijchiuak maj toselti timoyekanakan (Jeremías 10:23). Ijkon kemej konetsitsin moneki maj inintatuan kinixyekanakan, tejuan moneki maj Dios techixyekana (Isaías 48:17, 18). Itanauatiluan Dios techixyekanaj uan nejon se netetayokolil tein yejuatsin kitemaka. Xikonixtajtolti 2 Timoteo 3:16.

Itanauatiluan Dios techmachtiaj keniuj okachi kuali timonejnemiltiskej, uan technextiliaj keniuj uelis tikpiaskej satepan tatiochiualismej nochipaya. Kemej Dios techchijchiuak, mochia maj tikselikan itaixyekanalis ika miak pakilis. Xikonixtajtolti Salmo 19:7, 11 uan Apocalipsis 4:11.

2. ¿Keniuj techixyekana iTajtol Dios?

Seki tamachtilismej tein kipia Biblia tein motelnekij, technextiliaj tein Dios kineki maj tikchiuakan itech tataman tachiualismej itech tonemilis. Okseki tanauatilmej techiluia senkis tein moneki tikchiuaskej itech se taman (Deuteronomio 22:8). Moneki tiktekitiltiskej totanemililis, uan ijkon tikajsikamatiskej keniuj tein tamachtia Biblia techpaleuia maj tikchiuakan se taman (Proverbios 2:10-12). Kemej neskayot, Biblia tamachtia ke tonemilis se inetetayokolil Dios. Tanemilil tein tayekantok techpaleuia maj tikmatikan timoyekpiaskej maj amo tikchiuakan teisa tein uelis techijtakos. Xikonixtajtolti Hechos 17:28.

3. ¿Katiyejua ome tanauatilmej okachi tayekantokej?

Jesús ika tajtoj ome tanauatilmej tein okachi tayekantokej. Tein yekinika kinextia keyej tinemij: ijkon tikixmatiskej Dios, tiktasojtaskej uan tiktekitiliskej ika melaujkayot. Moneki tikelnamikiskej nejin tanauatil itech nochi tein tikixejekoskej (Proverbios 3:6). Akin ijkon monejnemiltiskej kuali mouikaskej iuan Dios, yekmelauj yolpakiskej uan kipiaskej nemilis nochipaya. Xikonixtajtolti Mateo 22:36-38.

Ojpatika tanauatil techpaleuia maj kuali timouikakan iniuan oksekin (1 Corintios 13:4-7). Ijkuak tiktakamatij, tikchiujtokej ijkon kemej Dios kichiua iniuan taltikpakneminij. Xikonixtajtolti Mateo 7:12 uan 22:39, 40.

4. ¿Keniuj techpaleuiaj tanauatilmej tein kipia Biblia?

Itanauatiluan Dios kinmachtia kalyetouanij keniuj senyetoskej ika netasojtalis (Efesios 4:32; Colosenses 3:12, 14). ITajtol Dios no kinpaleuia kalyetouanij keman kinmachtia se taman tein tayekantok: nenamiktilis moneki uejkauas nochipaya. Xikonixtajtolti Marcos 10:7-9.

Keman tikchiuaj tein techmachtia Biblia no techpaleuia maj amo titajyouikan ika tein timoixpanoltiskej uan techpaleuia maj tiyolseujtokan. Kemej neskayot, itech seki tekimej, kinekij kintakeuaskej akin monejnemiltiaj kemej tamachtia Biblia, akin melaujkej uan kuali tekitij (Proverbios 10:4, 26; Hebreos 13:18). ITajtol Dios no techmachtia maj tiyolpaktokan maski tikpiaskej sayoj tein moneki, uan maj tikitakan ke okachi kipia ipatiuj toyekuikalis iuan Dios uan amo okseki taman tein uelis tikpiaskej. Xikonixtajtolti Mateo 6:24, 25 uan 1 Timoteo 6:8-10.

Ijkuak timonejnemiltiaj kemej Dios technauatia techpaleuia maj amo tikpiakan miak kokolismej (Proverbios 14:30; 22:24, 25). Kemej neskayot, ijkuak tiktakamatij itanauatil Dios tein kijtoua maj amo se tauana, techpaleuia maj amo tikokolispeuakan uan maj amo techpano teisa tein ika uelis tikpoloskej tonemilis (Proverbios 23:20). Jiova techkaua maj titayikan tayil tein teuintia, sayoj ke moneki maj taixejekol (Salmo 104:15; 1 Corintios 6:10). Itanauatiluan Dios techpaleuiaj maj tikyekpiakan tein tikchiuaj uan no tein tiknemiliaj (Salmo 119:97-100). Akin yekmelauj kichiuaj kemej Cristo kitakamatij itanauatiluan Dios amo sayoj porin kinpaleuia, ta porin ijkon kiueyichiuaj toTajtsin, Jiova. Xikonixtajtolti Mateo 5:14-16.