Nikan taltikpak oksepa mochiuas se xochital

AMAIX tein ika tami Biblia —Apocalipsis oso Revelación⁠—, kiniluia taltikpakneminij ke onkak tein kuali tein uelis kichiaskej. Nejin amaix tein kijkuiloj tatitanil Juan, kijtoua nochi taman tein Dios kiitaltij keniuj motamichiuas itanejnekilis Dios amo uejkaua.

Itech yekinika taman tein Juan kiitaltijkej, moitak ke Jesús akin oksepa yoltoyaya, kinyolchikaujtoya uan kinmelaujtoya itatojtokakauan itech seki nechikolmej. Itech ojpatika, moijtoua toni moitak kampa Dios taixyekana ne iluikak uan nesik iluikakneminij kiueyichiujtoyaj Jiova.

Tepitsin achto ke motamichiuas itanejnekilis Dios, Ichkakonet oso Jesucristo kiselia se amatatetekuinol ika chikome sellos. Keman kitapoua yekinika naui, monextiaj naui takamej ika caballos. Yekinika yejua Jesús, akin kipia tanauatil kemej Tekiuaj, uan youi ipanko se istak caballo. Uan oksekin eyi takamej tein youij ika tataman caballos, kijtosneki uejueyi neteuilis, mayan uan kokolismej tein temaua. Nejin tein tikitaj axkan, amo uejkaua tamis. Keman motapoj chikometika sello, mokakik kipitskej chikome trompetas, tein kijtosneki, tataman tatsakuiltilis tein motetapouia ke Dios kiualkuis. Nejin kiualkuik okseki chikome chauismej, tein kijtosneki ke Jiova kinextis ke kikualantijtokej.

Ompa, Juan kiitak ke yolik se konetsin, nejin kijtosnekik ijkuak Dios kitaliskia iTekiuajyo ne iluikak. Nimasaj mochiuak se neteuilis, uan Satanás uan iamokuali ejekauan, kinkixtijkej ne iluikak uan kinualpantamotkej nikan taltikpak. Uan ompa mokakik aksa kijtoj: “Semi nanteikneltianij namejuan ten nankalyetokkej tech in taltikpak”. ¿Keyej? Porin Amokuali kimati ke amo kipiaok miak tonalmej uan yejika tel kualantok (Apocalipsis 12:​12).

Axkan Jesús moita ne iluikak kemej se ichkakonet, uan moajsi imiuan 144,000 taltikpakneminij taixpejpenalmej tein “tayekantinemiskej iuan”. Amaix Apocalipsis techmatiltia ke ojpatika tekoneuan tein itech ualeujtoskiaj Abrahán, eskiaj 144,000 taltikpakneminij (Apocalipsis 14:1; 20:6).

Satepan, nesi ke taltikpak tekiuanij mosentiliaj itech Armagedón oso “guerra iuan Dios tech ne ueyi tonal [...,] porin sayoj Yejuatsin kipixtinemi nochi chikaualis”, uan kiixnamikij Jesús akin ipanko youi istak caballo uan itateuijkauan tein moajsij iluikak. Itech nejon neteuilis, ixpoliuij taltikpak tekiuajyomej uan kitsakuaj Satanás. Jesús uan 144,000 ualtaixyekanaj nikan taltikpak se mil xiujtika, uan satepan Satanás no ixpoliui (Apocalipsis 16:​14; 20:4).

Keman Cristo Tekiuajtitos se Mil Xiujtika, ¿toni kinualkuilis akin kitakamatij Dios? Juan kijkuiloj: “[Jiova] kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya” (Apocalipsis 21:4). Kemej tikitaj, ¡taltikpak oksepa mochiuas se xochital!

Ijkon amaix Apocalipsis techtamimatiltia tein ika tajtoua Biblia. ¿Toni nejin? Ika Tekiuaj Mesías, Jiova kichipauas itokay uan senkis kiyeknextis ke sayoj yejuatsin kinamiki maj taixyekana.

​(Motaksaltia itech amaix Apocalipsis.)

39. kemej itech 96 i.t. Juan kijkuiloj amaix Apocalipsis

40. kemej itech 100 i.t. Momikilij tatitanil Juan tein sayojya mokauaya