Maj okachi kuali titanojnotsakan: itech tanamakaloyamej

Keyej motelneki. Kemej miakej tekitij nochi tonal, okachi kuali maj tikinnojnotsakan ika iTekiuajyo Dios kampa tekitij. Se tanojnotsas itech tanamakaloyamej teyolpaktia uan tapaleuia, porin nochipa tikinajsij taltikpakneminij uan no akin ompa tekitij kuali kinseliaj akin kinitaj ke xa uelis takouaskej. Moneki maj tanojnotsanij kuali taixejekokan uan maj kuali motakentikan porin tapaleuis maj kuali kisa nejon taman tanojnotsalis (2 Cor. 6:3). Akin kiixyekana tanojnotsalis itech nechikol moneki kiitas ika nejmachkayot kanachpa motanojnotsa itech tanamakaloyamej uan akoni kichiua.

Keniuj tikchiuaskej:

Xionmomachti tein ika tionpeuas tiontajtos. Komo uejkaua tiontajtojtok iuan se tekitikej, xa okse tonal amo kinekisok mouan tajtos.
Xiontanojnotsa kampa tanamakaj keman amo moajsiskej miakej takouanij, kemej neskayot, ijkuak peua tekit.
Xikontemo tiontajtos achto iuan akin taixyekana uan xionkualtakat. Uelis tikonijtos: “Tikinkalpanojtokej taltikpakneminij kampa tekitij porin ijkon okachi amo ouij titajtoskej iniuan”. Itech seki minutos, xikontemaka se tratado, se revista oso okse amaix. Okachi kuali amo xikonijto keniuj moixtaua tekit tein tikchiuaj porin amo tiknekij maj techitakan kemej tanamakanij, sayoj xikonijto komo tajtanij.
Komo akin taixyekana kualtakat, xikonilui ox uelis tiontajtos tepitsin iniuan okseki tekitinij. Itech seki tanamakaloyamej, xa kuali yeskia maj titajtanikan ox uelis tikauaskej seki amaixmej kampa uelis kikuiskej.
Kuali xiontaixejeko uan xikonpata tein moneki. Kemej neskayot, komo tekitikej tajtojtok iuan se takoujkej oso kichiujtok okse taman, okachi kuali maj timochiakan hasta keman uelis iuan titajtoskej.

Xikonchiua nejin itech metsti:

Itech youak keman nantaueyichiuaskej kemej kalyetouanij, xionmomamachti tein ika peuas tiontajtos komo tiontanojnotsa itech tanamakaloyamej.