Akin momikilijkejya oksepa nemiskej. ¿Keyej tikmatij ke yekmelauj mochiuas?

Sekin uelis kinemiliskej ke kinkajkayauanij akin kineltokaj ke mikemej oksepa nemiskej. Pablo akin kitojtokaya Jesús amo ijkon tanemiliaya, yejua kijtoj: “Takan totakuautamatilis iuan Cristo kualtias sayo para nijin tonemilispan de nikan taltikpak, ijkuakon moneki tejuan ma techyoliknelikan kachi ok uan ke nochi in oksekin taltikpakuani. [...] Pero namechilia ke ueyi melau ke in Cristo Temakixtijke, Yejuatsin pankisak ya yoltok [...] keme in tayekanke de nochi itaneltokakauan” (1 Corintios 15:19, 20). Kemej tikitaj, Pablo senkis kineltokaya ke akin momikilijkejya oksepa nemiskej. ¿Keniuj kiyekmatia ke katka melauak nejon? Kimatis ke Jesús oksepa kipiaya nemilis kipaleuiaya maj senkis kineltoka (Hechos 17:31). Yejua ika Pablo kijtoj ke Jesús katka “in tayekanke”, porin yejua katka akin yekinika oksepa kipiak nemilis uan ijkon nochipaya nemiskia. Nejon techajsikamatiltia ke komo Jesús yekinika oksepa kipiak nemilis, oksekin no oksepa kipiaskiaj nemilis.

Moajsi okse taman tein techpaleuia maj senkis tikneltokakan ke akin momikilijkejya oksepa nemiskej: Jiova, Dios akin nochipa kijtoua tein melauak, “amo tekajkayaua” (Tito 1:2). Yejuatsin amo keman takajkayauani uan amo keman kichiuas. Yejua ika, komo Dios motenkaua ke oksepa kinmakas nemilis akin momikilijkejya uan kinextia ke ueli kichiua, ¿melauj ke amo yeskia taixejekol maj techkajkayaua?

Jiova techtasojta, yejua ika kiixtaliani oksepa kinmakas nemilis akin momikilijkejya. Job tajtanik: “Komo se takat momikilia, ¿uelis oksepa nemis?”. Ompa kijtoj: “Tejua titanotsas, uan nejua nimitsnankilis. Tejua tiktelnejnekis tein momauan kichijchiujkej” (Job 14:14, 15). Job senkis kimatia ke iTajtsin Dios kinejnekiskia oksepa kimakas nemilis. ¿Kisentoka Dios kinejneki kichiuas nejon? Biblia kiyekijtoua: “Nejua niJiova; amo nimopatani” (Malaquías 3:6). Kemej tikitaj, Dios kisentoka kinejneki oksepa kimakas nemilis akin momikilijkejya uan ijkon uelis yolpakiskej. Yejua nejon tein kinejneki se tepopaj akin kipolouani se ikonetsin. Semi kuali maj Dios amo sayoj kinejneki, ta no maj kipia chikaualis tein ika kichiuas (Salmo 135:6).

Jiova kimakas chikaualis iKonetsin uan ijkon uelis oksepa kinmakas nemilis akin momikilijkejya tein semi kinyolpaktis akin tajyouianij porin momikiliani se akin kitasojtaj. Uan no, Jesús semi kiyolpaktis kichiuas nejon. ¿Keyej tikmatij? Porin achto ke oksepa kimakaskia nemilis Lázaro akin kuali iuan mouikaya, “Jesús no ompa peuak mochojchoktia” keman kiitak keniuj tajyouiayaj iikniuan Lázaro uan akin kuali iniuan mouikaya (Juan 11:35). Okse tonal, keman kiitak se siuat akin inamik momikilijkaya uan ikonetsin tein sayoj yejua katka, “kiyoliknelij uan kilij ijkuin: -Amo ximochokti ok”. Ompa, oksepa kimakak nemilis ikonetsin (Lucas 7:13). Nejin ome tajkuilolmej techmachtia ke Jesús kiyolkokoua kiitas keman aksa tajyouia porin momikilia se akin kitasojta. Yejua ika, ¡semi yolpakis keman kichiuas maj yolpaki akin tayokoxtok ijkuak oksepa kinmakas nemilis akin momikilijkejya!

¿Momikiliani aksa akin tejuatsin tikontasojta? Xa tikonnemilia ke mikilis yejua se taman tein amo keman tamis. Sayoj ke kemaj ueli: Dios oksepa kinmakas nemilis akin momikilijkejya uan kiixtalij iKonetsin maj ijkon kichiua. Xikonelnamiki ke Dios kineki ompa xionyeto tejuatsin uan ijkon uelis tikonselis akin tikontasojta. Xionmonemili keman iniuan tionyetos, tikonixtalijtos iniuan tein nankichiuaskej satepan ika se nemilis nochipaya ijkuak amo keman nanmokauaskej.

Lionel, akin ika titajtojkej itech yekinika tamachtilis, kijtoua: “Keman nechiluijkej ke mikemej oksepa nemiskej, nechouijmakak nikneltokas uan niknemilij ke nechkajkayaujtoyaj. Sayoj ke satepan nikitak itech Biblia ke katka melauak. ¡Semi nikyolnejneki oksepa nikitas noueyitat!”.

¿Tikonuelitaskia tikonmatis okachi? Itaixpantijkauan Jiova ika miak pakilis mitsonnextiliskej itech Biblia toni kichiua maj senkis kineltokakan ke oksepa nemiskej akin momikilijkejya.a