¿Toni kuali tanauatilmej onkak ika tein mochiuas satepan?

1. ¿Toni kuali tanauatilmej techmaka Dios?

Dios kineki maj tinochin tiyolpakikan itech tonemilis. Yejuatsin kichijchiuak taltikpak uan nochi tein onkak nikan porin kintasojta taltikpakneminij. Amo uejkaua kitamis tein techtajyouiltia uan ijkon nochin taltikpakneminij satepan kipiaskej se kuali nemilis. Xikonixtajtolti Jeremías 29:11.

Nion se tekiuajyot ueli kipolouani tateuilis, kokolis nion mikilis. Sayoj ke onkak kuali tanauatilmej. Amo uejkaua, Dios kinixpolos tekiuajyomej tein moajsij nikan taltikpak uan sayoj yejuatsin taixyekanas. Akin kinixyekanas kipiaskej yolseuilis uan amo kokolispeuaskej. Xikonixtajtolti Daniel 2:44 uan Apocalipsis (Revelación) 21:3, 4.

2. ¿Keyej axkan motelnekij nejin kuali tanauatilmej?

Tajyouilis tamis keman Dios kinixpolos taltikpakneminij akin amo yolkualmej (Sofonías 2:3). ¿Kemanian kichiuas nejon? Itech iTajtol Dios moijtoj tein mochiuaskia axkan uan kintajyouiltiskia taltikpakneminij. Nochi tein amo kuali tein mochiujtok itech taltikpak kinextia ke Dios amo uejkaua peuas tayektalis. Xikonixtajtolti 2 Timoteo 3:1-5.

3. ¿Toni moneki tikchiuaskej?

Moneki tikixmatiskej Dios itech iTajtol, Biblia, ta nejin kemej se amat tein se tepopaj tetasojtakej kinijkuilouilia ikoneuan. Nejin techiluia keniuj tikpiaskej axkan okachi kuali nemilis uan keniuj tikpiaskej nemilis nochipaya satepan nikan taltikpak. Tein melauj, sekin amo kiuelitaskej xionmomachti Biblia. Sayoj ke amo xikonkaua maj nejon mitsontsakuili, ta tein Dios motenkaua techmakas yekmelauj kipia ipatiuj. Xikonixtajtolti Proverbios 29:25 uan Apocalipsis 14:6, 7.