Tein ika tami

1, 2. ¿Keyej moneki ijsiujka tikpiaskej takuaujtamatilis? Xikonmelaua ika se neskayot.

TAKUAUJTAMATILIS. ¡Se tel kualtsin kualneskayot! Keman tiknemiliaj nejin tajtol, kuali yeskia maj no titanemilikan itech okse tajtol: ijsiujkayot. ¿Keyej? Porin komo amo tikpiaj takuaujtamatilis moneki ijsiujka tikpiaskej. Uan komo tikpiajya, moneki ijsiujka tikyekpiaskej uan tikchikauaskej. ¿Keyej moneki timoijsiuiliskej?

² Xionmonemili ke tionnejnentok itech se ueyi taluakyan. Tejuatsin tiontelamiki, yejua ika, keman tikonajsi se ameyal, tikonsentilia itech teisa uan tikonchiua nochi tein tionueli uan ijkon tonaltsin maj amo kiuatsa. Sayoj ke no tikonchiua okse taman: tikonsentilijtiuj okachi at hasta tionajsis kampa tionyoui. Axkan tinemij itech se taltikpak kampa amo kinekij kiueyichiuaskej Jiova, uan yekmelauj takuaujtamatilis, ijkon kemej at, tasojti uan uelis poliuis ijsiujka komo amo se kiyekpia uan se kichikaua. Yejua ika moneki timoijsiuiliskej: ijkon kemej uelis tikpoloskej tonemilis komo amo titayij at, tokuali uikalis iuan Jiova uelis tikpoloskej komo amo tikpiaj takuaujtamatilis (Rom. 1:​17).

3. ¿Toni nepaleuil techmakak Jiova uan ijkon tikpiaskej takuaujtamatilis, uan toni ome taman moneki tikchiuaskej?

³ Jiova kimati ke moneki tikpiaskej takuaujtamatilis, uan no kimati ke ouij techkisa tikiskaltiskej uan tiksentokaskej tikpiaskej itech nejin tonalmej. Yejua ika, itech iTajtoltsin techkauilij neskayomej tein uelis tiktojtokaskej. Ika tein kijkuiloj tatitanil Pablo, Dios techyolmajxitia: “Xikinnejneuililtilikan de keniu ne oksekin taneltokani chipaukanentinemij. Porin yejuan takuautamatinemij uan kiyolikaxikojtinemij nochi tataman tajyouilis para ijkon kiselijtiyoue nochi tatiochiualisme tenika Dios moyektenkauka” (Heb. 6:12). Yejua ika, itech inechikol Jiova techyolchikauaj maj tiktojtokakan ininneskayo takamej uan siuamej yolmelaujkej akin nenkej ne uejkauj kemej tein tikitakej itech nejin amatajkuilol. ¿Toni moneki tikchiuaskej axkan? Yekinika, moneki tiksentokaskej tikchikaujtoskej totakuaujtamatilis, uan ojpatika, moneki nochipa tikelnamiktoskej nechialis tein tikpiaj.

4. ¿Keniuj kinextiani Satanás ke amo kineki maj titakuaujtamatikan, sayoj ke keyej moneki amo timouiskej?

⁴ Maj tiksentokakan tikchikaujtokan totakuaujtamatilis. Satanás, akin taixyekana itech nejin taltikpak, amo kineki maj tikpiakan nejin kualneskayot. Yejua kichiujtok maj itech nejin taltikpak semi ouij techkisa maj tiksentokakan tikpiakan takuaujtamatilis. Melauak ke yejua okachi kipia chikaualis ke tejuan. Sayoj ke ¿moneki tikmouiliskej maj amo ueli tikiskaltikan uan maj tikchikauakan totakuaujtamatilis? Amo, maj tikelnamikikan ke Jiova kinita kemej itasojikniuan nochin akin kinekij kipiaskej yekmelauj takuaujtamatilis. Tein melauj, techyekiluia ke kemej yejuatsin techpaleuia, uelis tikixnamikiskej Amokuali uan hasta tikchiuaskej maj techkaua (Sant. 4:7). Sayoj uelis panos nejon komo mojmostaj tikchikauaj totakuaujtamatilis iuan Dios. ¿Keniuj uelis tikchiuaskej?

5. ¿Keniuj uelik kipiakej takuaujtamatilis takamej uan siuamej yolmelaujkej akin ininka motajtoua itech Biblia?

⁵ Kemej tikitakejya, itekitikauan Dios akin ininka motajtoua itech Biblia amo takuaujtamatiajya keman yolkej. Ininnemilis kinextia ke nejin kualneskayot kitemaka iespíritu Dios (Gál. 5:​22, 23). Yejuan kitataujtiayaj Jiova maj kinpaleui, uan yejuatsin kinnankiliaya keman kichikauaya inintakuaujtamatilis. Maj no ijkon tikchiuakan: maj amo keman tikelkauakan ke Jiova techmakas iespíritu ika pakilis komo tiktajtaniaj uan tikchiuaj ijkon kemej titajtanij itech tonetataujtiluan (Luc. 11:​13). Sayoj ke ¿onkak teisaok tein uelis tikchiuaskej?

6. ¿Keniuj uelis okachi techpaleuis ininneskayo taltikpakneminij akin ininka motajtoua itech Biblia?

⁶ Itech nejin amatajkuilol tikitakej sayoj seki tel kuali neskayomej ika takuaujtamatilis. Sayoj ke onkakok miakej (xikonixtajtolti Hebreos 11:​32). Keman timomachtiskej toselti, maj tikitakan ika nejmachkayot uan ika nochi toyolo. ¡Tel miak taman uelis timomachtiskej ika sejse neskayot! Komo sayoj tikixtajtoltiaj ijsiujka, amo uelis tikpiaskej chikauak totakuaujtamatilis. Semi techpaleuis komo itech titanemiliaj uan tiktemouaj tikmatiskej keniuj moajsiaj uan okseki taman tein kipanotoyaj akin ininka motajtoua. Okachi tikitaskej ke yoltokej komo nochipa tikelnamikij ke katkaj takamej uan siuamej akin “kipiaya[j] nemilis keme tejuan” (Sant. 5:​17). Komo tikmachiliaj tein yejuan kipanouayaj, uelis tikmatiskej keniuj momachilijkej keman kipanokej kuejmolmej kemej tein tikpiaj axkan.

7-9. 1) ¿Toni kichiuaskiaj itekitikauan Dios akin nenkej ne uejkauj komo ueliskiaj kiueyichiuaskej Jiova kemej axkan? 2) ¿Keyej moneki tikchikauaskej totakuaujtamatilis ika totachiualisuan?

⁷ No tikchikauaskej totakuaujtamatilis komo tikchiuaj tein Jiova technauatia, ta ‘se itakuaujtamatilis amo teyi ipatiuj komo amo se kinextijtinemi takuaujtamatilis ika ne kuali tatakamatilis’ (Sant. 2:​26). Maj tiknemilikan keniuj kintelyolpaktiskia itekitikauan Dios akin nenkej ne uejkauj komo ueliskia kichiuaskej tekit tein Jiova technauatijtok maj tikchiuakan axkan.

⁸ Kemej neskayot, maj tiknemilikan toni kichiuaskia Abrahán komo kiiluiskiaj ke amo moneki kiueyichiuas Jiova ika altares tachijchiuj ika tet kampa amo teyi onkak, ta iniuan tokniuan akin mosentiliaj itech se kualtsin kali uan itech uejueyi nechikolmej. ¡Kitelyolpaktiskia kikakis keniuj tel kualtsin momelauaj netenkaualismej tein yejua kichixtoya! (Xikonixtajtolti Hebreos 11:​13.) Oso maj tiknemilikan toni kichiuaskia Elías komo kiiluiskiaj maj kichiua se tekit kampa amo monekiskia kinixpolos tanauatianij akin kiueyichiuaj Baal oso ke amo kitekitilis Dios kampa moajsi se tekiuaj amo yolkuali uan kinekepilij Dios, ta ke uelis kinkalpanos ika yolseuilis taltikpakneminij uan kinmatiltis ke moajsi se kualtsin tanauatil tein kitemaka yolseuilis uan nechialis. Takamej uan siuamej yolmelaujkej akin ininka motajtoua itech Biblia xa niman kinekiskiaj kiueyichiuaskej Jiova kemej axkan tikueyichiuaj.

⁹ Yejua ika, maj tiksentokakan tikchikaujtokan totakuaujtamatilis ika totachiualisuan. Ijkon tikchiujtoskej tein timomachtijkej ika ininneskayo itekitikauan Dios akin ininka motajtoua itech iTajtol tein moijkuiloj ika inepaleuil. Uan ijkon kemej moijtoj kampa peua nejin amatajkuilol, tikmachiliskej ke yejuan kemej yeskia mochiuaj totasojikniuan. Uan amo uejkaua, yekmelauj yeskij totasojikniuan.

10. ¿Toni yolpakilis tikpiaskej itech Xochital?

¹⁰ Maj nochipa tikelnamiktokan nechialis tein tikpiaj. Akin amo keman kikaujkej Dios ne uejkauj nochipa moyolchikaujkej ika nechialis tein yejuatsin kinmakaya. ¿Uan tejuan? Maj tiknemilikan keniuj tel kualtsin yeski keman tikinseliskej nejin takamej uan siuamej ijkuak moajokuiskej akin yolmelaujkej (xikonixtajtolti Hechos 24:​15). ¿Tikonnemilianiya toni tikonuelitaskia tikontajtanis?

11, 12. ¿Toni tikonuelitaskia tikontajtanis itech yankuik taltikpak nejin itekitikauan Dios? 1) Abel. 2) Noé. 3) Abrahán. 4) Rut. 5) Abigail. 6) Ester.

¹¹ Kemej neskayot, ¿toni tikontajtaniskia Abel? Xa tikonuelitaskia tikonmatis keniuj katkaj itatuan oso ox kemansa iniuan tajtoj querubines akin kiyekpiayaj ikalakyan xochital tein moajsia Edén. ¿Uan toni tikonuelitaskia tikontajtanis Noé? Xa ox kinmouiliaya nefilim oso keniuj kichiuak uan ijkon uelik kinyekpiak se xiuit tel miakej tapialmej tein yetoyaj itech arca. ¿Uan toni tikontajtaniskia Abrahán? Xa tikonnekiskia tikontajtanis ox ouij kikisak kikauas xolal Ur oso ox yejua Sem akin kimachtij akoni Jiova.

¹² Uan xa no tikonnemilia tikonchiuilis seki netajtanilmej siuamej yolmelaujkej akin nenkej ne uejkauj. Kemej neskayot, xa tikonneki tikonmatis toni kiolinij Rut maj kitekitili Jiova, ox Abigail mouia kiiluis Nabal ke yajka kiitato David oso toni kinpanok Ester uan Mardoqueo satepan ke panok tein moijtoua itech Biblia.

13. 1) ¿Toni xa techtajtaniskej akin moajokuiskej? 2) ¿Keniuj tionmomachilia keman tikonmati ke uelis tikonixmatis takamej uan siuamej yolmelaujkej akin nenkej ne uejkauj?

¹³ Uan nejin takamej uan siuamej yolmelaujkej xa techchiuiliskej miak netajtanilmej. Semi kinyolpaktis kikakiskej toni panok itech itamian tonalmej uan keniuj Jiova kintelpaleuij itekitikauan keman kipanotoyaj ouijkayomej. Xa semi kinyololinis kimatiskej keniuj Dios kichiuak nochi tein motenkaujka. Okse taman, tel kualtsin yeski maj amo tiknemilikanok keniuj katkaj taltikpakneminij akin ininka motajtoua itech Biblia, ta touan yetoskej itech Xochital. Sayoj ke, kemej tikchiaj maj ejko nejon tel kualtsin tonal, maj tikinitakan kemej yeskia yekmelauj yoltokej. Maj tiktojtokakan ininkuali neskayot ika takuaujtamatilis uan uelis tiktekitiliskej Jiova iniuan totasojikniuan nochipaya.