Xikonueyichiua Jiova iniuan mokalyetouanij

Kemej tikonitak itech nejin amaix, Biblia kipia miak tayolmajxitilis tein mitsonpaleuis tejuatsin uan mokalyetouanij. Jiova kineki xiyolpakikan. Uan no, komo nankitayekanaltiaj itekiyo Dios, yejuatsin motenkaua ke “nankiseliske nochi ten monekis” (Mateo 6:33). Dios kineki kipias se kuali uikalis mouan. Yejua ika xikonchiua nochi tein tionuelis uan ijkon tikonchikauas mokuali uikalis iuan Jiova, porin nejon yejua okachi ueyi tatiochiualis tein uelis tikonpias (Mateo 22:37, 38).

1 XIKONCHIKAUA MOKUALI UIKALIS IUAN JIOVA

TEIN BIBLIA KIJTOUA: “Nejuatsin niyeski ninamotat uan namejuan nanmochiuaske nannotelpokauan uan nannochpochuan”, kijtoua Jiova (2 Corintios 6:18). Dios kineki kuali mouikas mouan, uan netataujtil mitsonpaleuis iuan xionmotoki. Jiova techyoleua: “Ximotatatautilikan iuan Dios youalitonal” (1 Tesalonicenses 5:17). Yejuatsin kipaktia xikontapoui tein mitsontekipachoua uan tein tikonpia moyolijtik (Filipenses 4:6). Komo tikonchiua netataujtil iniuan mokalyetouanij, yejuan kiitaskej ke tikonita Dios kemej akin yekmelauj nemi.

Amo sayoj moneki tiontajtos iuan Dios, ta no moneki tikonkakis. ¿Keniuj? Xionmomachti iTajtol uan okseki amaixmej tein mokixtiaj itech Biblia (Salmo 1:1, 2). Xiontanemili ika nejmachkayot itech tein tionmomachtia (Salmo 77:11, 12). Semi moneki tionyas nechikolmej, ijkon no tikonkakis Dios (Hebreos 10:24, 25).

Okse taman kemej uelis tikonchikauas mokuali uikalis iuan Jiova yejua keman ika tiontajtos. Ijkon kemej okachi tikonchiuas, okachi iuan tionmotokis (Mateo 28:19, 20).

TEIN UELIS TIKONCHIUAS:

• Xikontemo tikonchiuas netataujtil uan tikonixtajtoltis Biblia mojmostaj

• Xikonpaleui mokalyetouanij maj kitayekanaltikan itekiyo Dios uan amo neixpetanilis

2 IKA PAKILIS XIKONUEYICHIUA DIOS INIUAN MOKALYETOUANIJ

TEIN BIBLIA KIJTOUA: “Ximotokikan iuan Dios uan Yejuatsin no motokis namouan” (Santiago 4:8). Xikonixtali se tonal uan se hora keman nanmomachtiskej Biblia kemej kalyetouanij (Génesis 18:19). Sayoj ke onkak okse taman: xikonita tein kinemilia Dios itech nochi tein tikonchiua mojmostaj uan xikonchikaua kuali uikalis tein kipiaj mokalyetouanij iuan Jiova. Biblia kijtoua: “Moneki [...] ika titajtos [Jiova] keman titokotsyetos mokalijtik uan keman tiojtokatos uan keman timotekas uan keman timeuas” (Deuteronomio 6:6, 7). Xikonixtali tikonchiuas kemej Josué, akin kijtoj: “Nejua uan nochankauan, tejuan tiktekitiliskej Jiova” (Josué 24:15).

TEIN UELIS TIKONCHIUAS:

• Xikonixtali toni uan kemanian nanmomachtiskej ijkon kemej kipaleuis sejse mokalyetouanij