Carta tein kijkuilojkej Oloch Taojtokaltianij 2017

Tokniuantsitsin:

Kemej dos mil seiscientos xiujmej achto, Jiova kichiuak maj tanauatijkej Ezequiel kiitani se taman tein se kimoujkaita: se ueyi carro tein kinejnemiltia Jiova akin taixyekana iluikak uan taltikpak. Tein okachi se kimoujkaita yejua keniuj tsikuinia nejon carro. Ijsiujka yaya kemej se tapetanilot uan amo monekia tamalakachos nion kitemoltilis kemej tsikuintoya keman monekia yas oksekopa (Ezeq. 1:​4, 9, 12, 14, 16-​27).

¿Toni techelnamiktia tein kiitak Ezequiel? Ke inechikol Jiova ompa iluikak amo keman motsakuilia. ¿Uan akin pouij itech inechikol nikan taltikpak? Tein mochiuak itech xiujtekit tein tiualpanokej kinextia ke Jiova kinpaleuijtok akin pouij itech inechikol nikan taltikpak maj no ijkon tekitikan.

Ompa Estados Unidos, miakej akin pouij itech kali Betel tein moajsi Brooklyn, mokalpatatokej kampa mochijchiuak yankuik kali kampa kinixyekanaj itaixpantijkauan Jiova, ompa Warwick, (Nueva York), uan itech okseki kalmej tein iaxka Betel. Uan oksekin kiselianij se yankuik tekit itech tanojnotsalis. Itech okseki altepemej, akin pouij Betel tekitinij chikauak keman kichijchiuaj, kiyekchijchiuaj uan keman monekini kipanoltiskej tekit itech okse sucursal oso monekini yaskej okseko. Maski namejuan amo monekini namokalpataskej, tikyekmatij ke semi nantekititokej itech miak taman.

Oloch Taojtokaltianij kinyololinia uan kinyolchikaua kiitaskej keniuj tokniuan noyampa taltikpak senkis kichiujtokej tekit tein kiixtalia inechikol Jiova. Tikmattokej ke miakej yanij kampa okachi monekij tanojnotsanij. Oksekin kiixtalianij tanojnotsaskej itech okse taman tajtol oso tapaleuiskej itech okse taman tanojnotsalis tein amo keman kichiujtoyaj. Uan oksekin okachi kitekitiliaj Jiova itech okseki taman. Uan no, nochin akin kichiuaj kemej Cristo akin amo kikauaj Jiova, hasta akin xiuejkejya oso mokokouaj kisentokaj itech ojti tein teuika itech nemilis nochipaya, kichiujtokej itekiyo Jiova uan kiixtaliaj kinextiskej ke Satanás se takajkayaujkej (1 Cor. 9:​24).

Uelis senkis nankimatiskej ke Jiova kiita nochi tein nankichiuaj (Heb. 6:​10). Namejuan nankichiuaj kemej Abrahán uan Sara. Keman Abrahán kipiaya panoua 70 xiujmej, ika miak pakilis kikauak xolal Ur, uan iniuan ichankauan yajki Canaán se tal tein moajsia tel uejka. Ompa nemik kemej cien xiujmej itech takenkalmej hasta ijkuak momikilij. ¡Yejua uan Sara senkis motemakakej kitekitiliskej Jiova! (Gén. 11:​31; Hech. 7:​2, 3).

¿No ijkon tiktekitilijtokej Jiova? Nochin akin amo kikauaj Dios itech nejin itamian tonalmej kichiuaj tein Jesús kijtoj maj tikchiuakan. Yejua technauatij: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan. Uan xikinauijtinemikan ika itokaytsin de Toueyitajtsin Dios uan de Ikonetsin Dios uan de in Yektikatsin Espíritu” (Mat. 28:19).

Keman Jesús kijtoj “xiyakan” kiteajsikamatiltij ke moneki tikchiujtoskej itekiyo Dios. ¡Uan semi techyolpaktia tikitaskej nochi tekit tein kichiujkej itatojtokakauan Cristo itech xiujtekit tein tiualpanokej! Senkis tikitaj ke Dios kitiochiujtok tanojnotsalis uan tapaleuijtok maj motematilti kuali tanauatilmej ika iTekiuajyo Dios noyampa taltikpak (Mar. 13:​10).

Miakej kiselijtokej kuali tanauatilmej. Xiuit tein tiualpanokej ajsikej 8,340,847 tanojnotsanij uan mejmetstika motemakak kemej 10,115,264 nemachtilmej ika Biblia. Moyekita ke icarro Jiova amo motsakuilia, ¡uan namejuan amo no! Yejua ika xiksentokakan xikchiujtokan nejin kuali tekit achto ke Jiova kitsakuas puerta tein teuika itech nemilis nochipaya.

Semi kuali tein techelnamiktia tajkuilol tein moixpejpenak mokuis itech xiuit 2017. Kijtoua: “Xitakuaujtamati iuan Jiova uan xikchiua tein kuali” (Sal. 37:3). Keman tiktakamatij tein kijtoua nejin tajkuilol uan tikchiuaj tein kuali ijkuak tiktekitiliaj Jiova, tiknextiaj ke iuan titakuaujtamatij. Maj nochipa tikelnamikikan ke amo tiyetokej toselti. Nejin tajtolmej tein kijtoj Jesús senkis mochiuaskej: “¡Xikitakan!, niyetok namouan nochi tonalmej hasta itamiampa nochi tein mochiujtok itech taltikpak” (Mat. 28:​20, TNM).

Maj tikelnamikikan: Jiova kisentokas kitiochiuas tekit tein tikchiuaj itech itekiyo. Tikchiuaskej miak oso tepitsin, yejuatsin kipatiuita tekit tein tikchiuaj ika nochi toyolo uan ika se kuali tanemilil. Keman ijkon tikchiuaj tikyolpaktiaj Jiova (2 Cor. 9:​6, 7). Yejua ika, maj tiksentokakan tiktataujtikan toTajtsin Jiova, maj timomachtikan iTajtol uan maj titanojnotsakan ika yolpakilis. Ijkon okachi mochikauas tokuali uikalis iuan.

Satanás kimati “ke amo kipia ok miak tonalme”. Yejua ika, senkis kitemoua ika miak taman maj tikauakan Jiova uan maj amo tiktakamatikan (Apoc. 12:​12). Sayoj ke komo tiksentokaj timoajsij iuan Jiova, Amokuali amo keman uelis kichiuas nejon (Sal. 16:⁠8). Amo xikelkauakan ke semi tamechtasojtaj uan tamechtasojkamatiliaj nochi tein nankichiuaj tein ika nantapaleuiaj itech itekiyo Dios itech nejin itamian tonalmej.

Nanmokniuan,

Oloch Taojtokaltianij akin kinixyekanaj iTaixpantijkauan Jiova