Tein mokui keman tikitaj Tein timomachtiaj itech nechikol Tonemilis uan toTanojnotsalis
5-11 METSTI JUNIO
TAMACHTILIS TEIN KIPIA BIBLIA | JEREMÍAS 51, 52
Tein moixtajtoltia itech Biblia
(Jeremías 51:1-11) Yejua nejin tein kijtoua Jiova: “Nikan niktitaniliti se ejekat tein taixpoloua Babilonia uan akin nemij Leb-qamai. 2 Nikintitaniti Babilonia akin taajkotamotaj uan kiajkotamotaskej uan kichiuaskej maj mokaua taseltijkan; yejuan kampa yeski kiixnamikiskej itech tonal keman onkas tajyouilis. 3 ”Akin kikui arco maj amo kitilana. Uan maj amo akin motalili ikoton tachijchiuj ika tepos.” Amo xikiniknelikan itelpochuan. Senkis xikinixpolokan nochin itateuijkauan. 4 Uan yejuan mikiskej itech inintal caldeos, uan uetstoskej itech iojuan. 5 ”Porin Israel uan Judá amo momikiliani ininnamik Dios, Jiova akin kinixyekana tateuianij. Porin ininaltepeuj kipia miak tajtakol iixpan akin Yektik itech Israel. 6 ”Xikaujteuakan Babilonia, uan ximomakixtikan. Amo ximomikilikan ika itajtakol. Porin ajsik tonal keman Jiova momakepas. Yejua kitaxtauijtok ika tein kichiuani. 7 Babilonia mochiuani kemej se copa tachijchiuj ika oro itech imako Jiova; kichiua maj nochi taltikpak mouinti. Altepemej tayinij itayil tein teuintij. Yejua ika altepemej kuatapolouanij. 8 Niman uetsini Babilonia uan postekini. Xiktayokoltsajtsilikan. Xikuikan bálsamo tein kipaleuis maj amo kikoko. Xa uelis kipajtis”. 9 “Tiktemojkej tikpajtiskej Babilonia, sayoj ke amo pajtini. Xikauakan uan maj tisejsemej tiyakan kampa tikayomej. Porin itatsakuiltilis ajsini hasta iluikak; ajsini hasta kampa moajsi mixti. 10 Jiova techpaleuiani ika melaujkayot. Xiualakan, uan maj tiktematiltikan ompa Sión tein kichiuani Jiova toDios.” 11 “Xiktentikan flechas. Xikuikan nanmoescudos tein youaltikej. Jiova kinyololiniani tekiuanij medos, porin kinemilijtok kichiuas maj Babilonia ixpoliui. Porin ika nejin Jiova momakepati, momakepati ika tein kichiuilijkej itemplo.
12-18 METSTI JUNIO
TAMACHTILIS TEIN KIPIA BIBLIA | LAMENTACIONES 1-5
Tein moixtajtoltia itech Biblia
(Lamentaciones 2:20–3:12) Xikita, Jiova, xikita akin chikauak tiktatsakuiltiani. ¿Monekiskia maj siuamej kisentokakan kinkuakan ininkoneuan, ininkoneuan akin yolkej ika nion se kokolis? ¿Oso monekiskia maj kimiktikan tiopixkat uan tanauatijkej itech itemplo Jiova? 21 Telpoch uan akin xiuejya kinmiktianij uan uetstokej itech ojti. Noichpochuan akin amo kiixmatij takat uan notelpochuan kinmiktianij ika espada. Tikinmiktiani itech tonal keman semi tikualanik, titemiktiani uan amo tikinikneliani. 22 Kemej tonal keman mochiua se iluit, kampa yeski tiknotsak maj uiki tein temojmoujtia. Itech tonal keman Jiova kikixtij ikualanyo, amo akin choloj nion momakixtij; nokoneuan akin nikinpiak uan nikiniskaltij, akin nechtauelita kinixpoloj.
3 Nejua takat akin kiitani tajyouilis tein kitemaka itopil tein kipia ikualanyo. 2 Nechkixtiani uan kichiuani maj ninejnemi tayouayan, uan amo itech tauil. 3 Tein melauj, miakpa itech tonal ika imay nechmaa. 4 Kichiuani maj nonakayo uan nokuetaxyo patikan. Kipostekini noomiyouan. 5 Nechyoualouani ika tepamit, nechyoualouani ika tein pajyoj uan tein tetajyouiltia. 6 Nechchikaujkauiani maj nimotali kampa tayouayan, ijkon kemej takamej akin momikilijkejya ne uejkauj. 7 Nechojtsakuani, uan ijkon amo uelis nicholos. Kichiuani maj etik teposmej tachijchiujmej ika cobre tein ika nechilpiaj. 8 Uan keman nitsajtsi porin nikteltemouaya nepaleuil, yejua kiixtopeua nonetataujtil. 9 Nechojtsakuani ika tet taalaxol. Noojuan kichijkolouani. 10 Kemej oso kichixtok nechichtakauis, kemej tekuani tein motatijtok. 11 Noojuan kiuejuelouani, uan kichiuani maj nimoajsi kemej tal tein ixtajtapantok. Kichiuani maj nimoajsi kemej kampa taseltijkan. 12 Yejua kitilana iarco, uan nechtalia kemej kampa kineki maj uetsiti flecha.
19-25 METSTI JUNIO
TAMACHTILIS TEIN KIPIA BIBLIA | EZEQUIEL 1-5
Tein moixtajtoltia itech Biblia
(Ezequiel 1:1-14) Itech xiuit treinta, itech tonal makuil itech naujpatika metsti, keman nimoajsia iuan xolal akin kinuikakaj ompakauin ueyiat Kebar, iluikak motapoj uan Dios kichiuak maj nikita seki taman. 2 Itech tonal makuil itech metsti, tein kijtosneki, itech xiuit makuil keman tekiuaj Joaquín kiuikakaj, 3 Jiova kinojnotsak Ezequiel ikoneuj Buzí akin tiopixkat ompakauin itech ueyiat Kebar, itech inintal caldeos. Ompa imay Jiova moajsik itech. 4 Uan keman nitachixtoya, nikitak se chikauak ejekat tein ualeuaya kampa ika norte, uan se ueyi mixti uan tit tein pepetania kiyoualouaya se tanex, uan tatajkoyampa tit moajsia teisa tein petani kemej oro uan plata tamanelol. 5 Tatajkoyampa moajsiaj tein tamatiaj kemej nauin tein yoltoyaj, uan sejse tamatia kemej taltikpaknenkej. 6 Sejse kipiaya naui iixko uan naui iajtapaluan. 7 Ininmetsuan katkaj melatstikej, uan ininmetstampa tamatia kemej imetstampa se kuakouejkonet; uan petaniaj kemej petani cobre tein kialaxouaj. 8 Kipiayaj ininmauan kemej taltikpaknenkej naujkampa itech ininajtapaltampa, uan nochin nauin kipiayaj ininixko uan ininajtapaluan. 9 Ininajtapaluan monamikiaj se iuan okse. Yejuan amo mokepayaj keman yayaj; sejse yaya taixpan. 10 Uan ininixko nauin tamatia kemej: iixko se takat uan ininyekmakopaka kipiayaj iixko se tekuani, uan ininopochmakopaka kipiayaj iixko se kuakouej, uan nauin no kipiayaj iixko se águila. 11 Ijkon katka ininixko. Ininajtapaluan moajkotapouayaj. Sejse kipiaya ome ajtapalmej tein monamikiaj, uan ome tein ika kitsakuayaj ininnakayo. 12 Sejse yaya taixpan, kampa espíritu kiniluiaya maj yakan. Amo momalakachouayaj keman yayaj. 13 Uan nejon tein yoltoyaj tamatiaj kemej tekol tein xotatok. Uan teisa kemej tein chichinaujtok mooliniaya taikampa uan taixpan kampa moajsiaj nejon tein yoltoyaj, uan itech tit kisaya tapetanilot. 14 Uan nejon tein yoltoyaj kisayaj uan mokepayaj, keman mooliniayaj tamatiaj kemej tapetanilot.
26 METSTI JUNIO HASTA 2 METSTI JULIO
TAMACHTILIS TEIN KIPIA BIBLIA | EZEQUIEL 6-10
Tein moixtajtoltia itech Biblia
(Ezequiel 8:1-12) Itech xiuit chikuasen, itech chikuasen metsti, itech tonal makuil itech metsti, keman nitokotsyetoya nochan uan akin tayekanaj ompa Judá tokotsyetoyaj noixpan, imay Jiova akin okachi Ueyi Taixyekankej nechmatokak. 2 Uan nikitak, se taman tein nesia kemej tit, onkaya tit kampa moitaya ke moajsia itajkoyan uan hasta tani uan itech itajkoyan uan hasta ajko semi petania, kemej petani oro uan plata tamanelol. 3 Satepan kimelauak teisa tein tamatia kemej se mayit uan kikitskij sentamatsol notson uan se espíritu nechuikak tatajkoyampa iluikak uan taltikpak hasta Jerusalén, ijkon Dios kichiuak maj nikita nejon, kampa ikalakyan puerta tein moajsi kalijtik kampa ika norte, kampa moajsi tiotsin tein kiueyichiuaj tein amo se kiitstani. 4 Uan, ¡xikita!, iueyiyo iDios Israel ompa moajsia, ijkon kemej tein nikitak ompa tal tamanis.5 Ompa nechiluij: “Ikoneuj taltikpaknenkej, ximoixajokui kampa ika norte”. Ompa nimoixajokuik kampa ika norte, uan ompa itech puerta tein moajsi kampa ika norte kampa yetok altar, moajsia tiotsin tein amo se kiitstani. 6 Uan nechiluij: “Ikoneuj taltikpaknenkej, ¿tikita tein tel amo kuali, tein nion tepitsin se kiitstani tein kichiujtok ichan Israel nikan, tein ika kichiuaj maj nikaua notemplo? Sayoj ke tikitasok okachi uejueyi taman tein amo se kiitstani”. 7 Satepan nechuikak ikalakyan patio, uan nikitak se tekoyok itech tepamit. 8 Uan nechiluij: “Ikoneuj taltikpaknenkej, xinaltachia, kampa koyoktik”. Uan ninaltachiak kampa tepamit koyoktik uan nikitak kampa se kalaki. 9 Uan nechiluij: “Xikalaki uan xikita tein tel amo kuali tein amo se kiitstani tein kichiujtokej ompa”. 10 Yejua ika, nikalakik uan nikitak taixkopimej kampa ixnesiaj miak okuilimej tein moxoxolatsaj, uan tapialmej tein tetajyaltijkej, uan nochi tiotsitsin tein tetajyaltijkej tein kipia ichan Israel, tein kinchijchiujkej itech tepamit tein kiyoualouaya. 11 Uan setenta akin tayekanayaj ichan Israel ijkatoyaj ininixpan, iuan Jaazanías ikoneuj Safán akin tatajko ijkatoya. Sejse kipiaya imako itekolkaxit uan popoch tein kualtsin ajuiyak pankisaya. 12 Uan nechiluij: “Ikoneuj taltikpaknenkej, ¿tikitani tein kichiuaj tayekananij kampa tayouayan, sejse itech cuartos tein kipiaj ininkalijtik kampa kinnextiaj inintiotsitsin? Porin yejuan kijtojtokej: ‘Jiova amo techita. Jiova kikauani taltikpak’”.