Xiksentoka ximochiujto xiitasojikniuj Dios nochipaya

Tikpiaskej se totasojikniuj uan maj kisentoka mochiujto, moneki yolchikaualis. Komo timochikauaj timochiuaskej tiitasojikniuan Dios uan tikpiaj inetasojtalis techualkuilis miak tatiochiualismej. Jesús kiniluij tein takuaujtamatiaj itech: «Ne yekmelauj Tajtoltsin, yejua ne namechtojtomatiuj» (Juan 8:32). ¿Toni kijtosnekik?

Uelis tiyolpakis tikpias netojtomalis axkan tonalmej. Uelis timoajchiuilis tamachtilismej tein amo melauak uan takajkayaualis tein Satanás kimoyaujtok. Uelis tikisas itech nejon tanemilil ika amo tej nechialis tein kuali, uan nejin tanemilil kipexontia imin nemilis tel miakej taltikpakneminij tein amo kixmatij Jiova (Romanos 8:22). Itasojikniuan Dios niono kimouiliajok ika «momikilitiuij sen nochipa» (Hebreos 2:14, 15).

Uelis tiyolpakis tikpias netojtomalis itech yankuik nemilis tein Dios kiualkuiti. ¡Tel kualtsin eski monemilis tein tikpias amo uejkaua! Keman Taltikpak eski se xochital, amo onkas neteuilis, kokolismej niono tein amo kuali tachiualismej. Amo onkasok tatasojtilis niono mayan. Mitsijkuaniliskej ueuentsiyot uan mikilis, ijkon kemej nemojmoujtilis, tajyouilis uan tachichikouilis. Biblia kijtoua tein Dios kichiuati: «Tiktapojtok momay uan tikinchiuilijtok imin tanejnekilis tein kuali nochin tein yoltokej» (Salmo 145:16, NM).

Itasojikniuan Dios nemiskej nochipaya. Nemilis nochipaya se netetayokolil tel kualtsin tein Dios kinimakati nochin tein mochiuaj itasojikniuan (Romanos 6:23). Sayoj ximonemili, toni uelis kijtosnekis xinemi nochipaya.

Tikemantis tikchiuas miak tachiualismej. Acha tiknekis timomachtis tiktsotsonas se manamik, oso tiknekis tikchijchiuas taixkopimej uan tikintapaluis oso no timomachtis tikuoujxijximas. Acha no tiknekis okachi tikinixmatis okuilimej oso tatokmej. Acha no tikuelitaskia tinemitiuj uan tiixmatitiuj okseki uejueyi altepemej uan tikinixmatitiuj tein ompa nemij. Kemej tikpias nemilis nochipaya uelis tikchiuas nochi nejin tachiualismej.

Tikemantis tikinpias miakej motasojikniuan. Kemej tinemis nochipaya, uelis tikinixmatis oksekin miakej itasojikniuan Dios. Tikmatis toni tekit uelij kichiuaj uan imin kualneskayouan, uan no timochiuas tiimintasojikniuj. Tikintasojtas uan yejuan no mitstasojtaskej (1 Corintios 13:8). Kemej tikpias nemilis tein amo kipia itamilis, uelis timochiuas tiimintasojikniuj nochin taltikpakneminij. Tein okachi kuali, monetasojtalis iuan Jiova kisentokas mochikaujtos ijkon kemej panotias xiujmej. ¡Maj timochiuakan tiitasojikniuan Dios nochipaya!