TONEMILIS KEMEJ ITATOJTOKAKAUAN CRISTO

Se yankuik taman itech nechikol tein tikpiaj itajkotian semana

Itech metsti enero xiuit 2018, itech nechikol tein tikpiaj itajkotian semana, peuas tikitaskej seki notas, taixkopimej uan videos tein kipia Traducción del Nuevo Mundo de las Santas Escrituras (nwtsty) tein ika se momachtia, tein moajsi itech Internet, maski nejin ayamo yetok itech totajtol. Senkis tikmatij ke semi techpaleuis keman timomachtiskej achto ke tiyaskej nechikolmej. Uan tein okachi moneki, okachi techtokis iuan Jiova, toTajtsin akin techtasojta.

NOTAS

Nejin techmatiltiaj keniuj nemiaj, keniuj katkaj xolalmej, talmej uan tajtolmej tein kikuiaj ijkon kemej kijtouaj miak versículos.

Mateo 12:20, TNM

Mecha tein popokatok: Tauiloni tein kikuiaj itech kalmej katkaj tapalkamej tein kintekiliayaj iaceite olivo. Aceite pankisaya itech mecha tein kichiuaya maj xotato. Tajtol griego tein mokepa kemej “mecha tein popokatok” uelis ika tajtos se mecha tein popoka porin kisentoka totonik, maski tit seujtokya oso seuikya. Itech Isaías 42:3 moijtojka ke Jesús yeskia teiknelijkej; yejua amo keman kichiuaskia maj seui tepitsin nechialis tein kipiayaj taltikpakneminij akin yolyemankej uan akin kintajyouiltiayaj.

Mateo 26:13

Yekmelauj: Amén itech tajtol griego, se tajtol tein ualeua itech hebreo, tein kijtosneki “maj ijkon mochiua”. Jesús miakpa kikuia nejin tajtol achto ke kitematiltiskia teisa, se netenkaualis oso tein achto moijtoj ke mochiuaskia. Ijkon kinextiaya ke itajtoluan senkis katkaj melaujkej uan takuaujtamachmej. Moijtoua ke sayoj Jesús kitekitiltij tajtol “yekmelauj” oso “amén” porin amo moajsi itech okseki amatajkuilolmej. Keman ojpa ixnesi tajtol (amén amén), kemej itech amatajkuilol Juan, nejin tein Jesús kijtoj motajtolkepa kemej “yek melau” (Jn 1:51).

TAIXKOPIMEJ UAN VIDEOS

Taixkopimej, videos tein amo kakistij uan videos tein kichijchiuaj itech computadora kinextiaj seki taman tein Biblia ika tajtoua.

Betfagué, Olivojtepet uan Jerusalén

Nejin video kinextia se ojti tein teuika Jerusalén ompa tonalkisayampa, tein ajsi hasta kampa okachi ajko itech Olivojtepet uan peua kampa axkan moajsi et-Tur, tein kijtouaj ke xa katka xolal Betfagué tein ika tajtoua Biblia. Betania moajsi itonalkisayampa Betfagué, itech itakespan Olivojtepet tein moajsi tonalkisayampa. Keman Jesús uan imomachtijkauan yayaj Jerusalén, nochipa kochiaj ompa Betania. Axkan ompa moajsi xolal el-Ázariyeh (El Éizariya), tokayit árabe tein kijtosneki “Kampa nemia Lázaro”. Tikmatij ke Jesús mokauak ichan Marta, María uan Lázaro (Mt 21:17; Mr 11:11; Lu 21:37; Jn 11:1). Keman Jesús kisaya ininchan uan yaya Jerusalén, xa ojtokaya itech se ojti kemej tein moita itech video. Itech tonal 9 metsti nisán xiuit 33, keman Jesús kipanauij Olivojtepet ipanko se asno, xa ojtokak itech nejin ojti tein peua Betfagué.

Ojti tein teuika Betania hasta Betfagué
Betfagué
Olivojtepet
Atauit Cedrón
Kampa yetok Templo

Se kotsko tein kipia se clavo

Nejin se taixkopin tein kikixtilijkej se tamachijchiuj tein kinextia se clavo tein kikoyonij se kotsko, nejin clavo tachijchiuj ika tepos uan ueyak 11.5 centímetros. Omit tein uejkaujkayot itech inintonaluan romanos tein kiajsikej itech xiuit 1968 keman tachkuakej tatemouanij kampa ika norte ompa Jerusalén, kinextia ke xa kikuiaj clavos keman kipilouayaj aksa itech se kouit. Nejin clavo xa katka kemej tein kikuikej tateuianij romanos keman kipilojkej Jesús itech kouit. Omimej kiajsikej itech se kaxon tachijchiuj ika tet kampa kitalijkej iomiyouan aksa satepan ke palanik inakayo. Nejin kinextia ke ijkuak aksa kipilouayaj itech se kouit ueliskiaj kitalpachoskej (Mt 27:35).