Tein mokui keman tikitaj Tein timomachtiaj itech nechikol Tonemilis uan toTanojnotsalis
6-12 METSTI ENERO
TAMACHTILIS TEIN KIPIA BIBLIA | GÉNESIS 1, 2
Maj tiktemokan tamachtilis ika nejmachkayot
w15 1/6 pág. 5
Tein tamatinij kiajsinij
¿Kemanian mochijchiuak nochi tein onkak uan taltikpak?
Tamatinij kijtouaj ke taltikpak mochijchiuak kemej cuatro mil millones xiujmejya uan ke nochi tein onkak mochijchiuak kemej trece mil hasta catorce mil millones xiujmejya. Biblia amo kijtoua kemanian mochijchiuak nochi tein onkak. Uan no, amo kijtoua ox taltikpak mochijchiuak tel miak xiujmejya. Yekinika texto itech Biblia sayoj kijtoua: “Keman peuak nochi, Dios kichijchiuak iluikak uan taltikpak” (Génesis 1:1). Nejon tapaleuia maj tamatinij kitemokan kemanian mochijchiuak nochi tein onkak uan no taltikpak ika tanauatilmej tein kiajsinij.
it-2 pág. 80
Jesucristo
Amo katka okse tachijchiujkej. Maski ikonetsin Dios tapaleuij maj mochijchiua nochi tein onkak, amo kijtosneki ke no katka okse tachijchiujkej iuan iTajtsin. Nochi mochijchiuak porin Dios kitemakak iyektikatsin espíritu oso ichikaualis (Gé 1:2; Sl 33:6). Kemej Jiova kichiua maj se yolto, nochin akin kinchijchiuak, akin moitaj uan amo moitaj, nemij porin yejuatsin ijkon kinchijchiuak (Sl 36:9). Jesús amo katka okse tachijchiujkej, ta Jiova kichijchiuak nochi tein onkak itechkopa yejua. Jesús kijtoj ke Dios kichijchiuak nochi tein onkak ijkon kemej Biblia no kijtoua (Mt 19:4-6; no xikonita CREACIÓN).
Tein moixtajtoltia itech Biblia
(GÉNESIS 1:1-19) Keman peuak nochi, Dios kichijchiuak iluikak uan taltikpak. 2 Sayoj ke, taltikpak amo yekchijchiujtoya uan amo teyi kipiaya. Tatayouayan katka aixko itech amej tein uejkatan katkaj, uan ichikaualis Dios tein tekititok mooliniaya nikan uan nepa itech amej. 3 Uan Dios kijtoj: “Maj onka tanex”. Yejua ika peuak onkak tanex. 4 Satepan, Dios kiitak ke tanex kuali katka, uan peuak kixeloua tanex uan tayouayanilot. 5 Dios kitokaytij tanex Tonal, uan tatayouayanilot kitokaytij Youak. Uan peuak moajsi tiotak uan kualkan. Nejon yejua yekinika tonal. 6 Ompa, Dios kijtoj: “Maj takaujto tatajko itech amej, maj moxelokan amej uan amej”. 7 Uan Dios peuak kichiua maj takaui uan kinxeloj amej tein moajsiaj tatampa kampa takaujtoya uan amej tein moajsiaj tapani. Yejua nejon tein mochiuak. 8 Dios kitokaytij kampa takaujtoya Iluikak. Uan peuak moajsi tiotak uan kualkan. Nejon yejua ojpatika tonal. 9 Ompa, Dios kijtoj: “Maj amej tein moajsij itampa iluikak sayoj seko mosentilikan uan maj nesi tal uakik”. Uan ijkon mochiuak. 10 Dios kitokaytij tal uakik Tal, uan amej kintokaytij Ueyiamej. Uan Dios kiitak ke kuali katka nejin. 11 Ompa, Dios kijtoj: “Maj itech tal moskalti xiuit, tatok tein kitemakaj tatet uan koujmej tein kitemakaj takilot ijkon kemej tatamamej, uan maj kitemakakan takilot uan tatet”. Uan ijkon mochiuak. 12 Itech tal peuak moskaltia xiuit, tatok tein kitemaka tatet uan koujmej tein kitemakaj takilot, ijkon kemej tatamamej. Uan Dios kiitak ke kuali katka nejin. 13 Uan peuak moajsi tiotak uan kualkan. Nejon yejua expatika tonal. 14 Ompa, Dios kijtoj: “Maj onka tauilmej ompa iluikak uan ijkon moxelos tonal uan youak, uan tapaleuiskej maj moxelokan oloch tonalmej, tonalmej uan xiujmej. 15 Yeskij kemej tauilmej ompa iluikak uan tatanextiskej talixko”. Uan ijkon mochiuak. 16 Dios peuak kinchijchiua ome uejueyi tauilmej: tein ueyi tauil maj tatanexti tonayan uan tein tsikitsin maj tatanexti youak. No kinchijchiuak sitalimej. 17 Uan Dios kintalij nochin itech iluikak maj tatanextikan talixko, 18 maj tatanextikan tonayan uan youak, uan maj moxelo tanex uan tatayouayan. Uan Dios kiitak ke kuali katka nejin. 19 Uan peuak moajsi tiotak uan kualkan. Nejon yejua naujpatika tonal.
13-19 METSTI ENERO
TAMACHTILIS TEIN KIPIA BIBLIA | GÉNESIS 3-5
Maj tiktemokan tamachtilis ika nejmachkayot
it-2 pág. 183 § 2
Lamec
Tein Lamec kiniluij inamikuan tein kemej yeskia se nekuikatil kinextia ke itech itonaluan miakej semi tateuiayaj (Gé 4:23, 24). Yejua kijtoj: “Xikakikan notajtol, inamikuan Lamec. Xikakikan notajtoluan: nikmiktij se takat akin nechkokoj, kemaj, se telpoch akin nechteuij. Komo Caín moneki se kimakepas chikojpa, Lamec moneki se kimakepas setenta y siete”. Tein Lamec kijtoj kinextia ke xa kitemoj mopaleuis, uan motajtouij ke amo kinekia kimiktis nejon takat, amo kemej Caín. Kemej nejon takat kiteuij uan kikokoj, Lamec kimiktij uan ijkon mopaleuij. Ika tein kijtoj kitemouaya maj amo akin momakepani iuan porin kimiktij akin kiteuij.
it-1 pág. 359
Tauijuikaltilis
Keman itech itonaluan Enós miakej peuak ‘kijtouaj itokay Jiova’ achto ke mochiuaskia Tetsaujkakiouit, xa amo kuali kikuiaj, porin miak xiujmej achto Abel xa kinotskaya Dios ika itokay (Gé 4:26; Heb 11:4). Seki motelmachtianij kinemiliaj ke keman kijtouayaj itokay Dios, amo kuali kikuiaj itokay Jiova uan ijkon kintokaytiayaj oksekin oso no tiotsitsin, maski amo kinamikia. Uelis moijtos ke kiuijuikaltiayaj Dios (no xikonita ENÓS).
Tein moixtajtoltia itech Biblia
(GÉNESIS 4:17–5:5) Ompa, Caín motekak iuan inamik, uan siuat yaya kipiati se konet uan kiyolitij Enoc. Satepan Caín peuak kichijchiua se xolal uan kitokaytij kemej ikoneuj Enoc. 18 Satepan, Enoc mochiuak itat Irad; Irad mochiuak itat Mehujael; Mehujael mochiuak itat Metusael, uan Metusael mochiuak itat Lamec. 19 Lamec monamiktij iniuan ome siuamej. Yekinika motokaytiaya Adá, uan ojpatika motokaytiaya Zilá. 20 Adá kiyolitij Jabal. Yejua yekinika akin peuak nemi itech takenkalmej uan akin kinpiayaj tapialmej. 21 Iikniuj motokaytiaya Jubal. Yejua akin yekinika kitsotsonaya arpa uan flauta. 22 Uan Zilá kiyolitij Tubal-Caín, akin kichijchiuaya nochi tataman manamikmej ika cobre uan hierro. Uan siuat akin katka iikniuj Tubal-Caín motokaytiaya Naamá. 23 Ompa, Lamec kiniluij nejin tajtolmej tein kemej yeskia se nekuikatil inamikuan Adá uan Zilá: “Xikakikan notajtol, inamikuan Lamec. Xikakikan notajtoluan: nikmiktij se takat akin nechkokoj, kemaj, se telpoch akin nechteuij. 24 Komo Caín moneki se kimakepas chikojpa, Lamec moneki se kimakepas setenta y siete”. 25 Adán oksepa motekak iuan inamik, uan siuat kiyolitij se konet. Yejua kitokaytij Set, porin kijtoj: “Dios nechmakak okse konet akin kiixpatas Abel, porin Caín kimiktij”. 26 Set no kipiak se konet, uan kitokaytij Enós. Itech nejon tonalmej, taltikpakneminij peujkej kijtouaj itokay Jiova.
5 Nejin yejua amatajkuilol kampa ika motajtoua tein kipanok Adán. Tonal keman Dios kichijchiuak Adán, kichijchiuak kemej yejua katka. 2 Takat uan siuat kinchijchiuak. Itech tonal keman kinchijchiujkej, yejuatsin kintiochiuak uan kintokaytij Takat. 3 Keman Adán kipiaya 130 xiujmej, kipiak se konet kemej yejua katka, uan kitokaytij Set. 4 Satepan ke kipiak Set, Adán nemik 800 xiujmej okachiok. Uan mochiuak inintat telpochmej uan ichpochmej. 5 Adán nemik 930 xiujmej sennochia. Ompa, momikilij.
20-26 METSTI ENERO
TAMACHTILIS TEIN KIPIA BIBLIA | GÉNESIS 6-8
Maj tiktemokan tamachtilis ika nejmachkayot
w04 1/1 pág. 29 § 7
Tein moixtajtoltia itech amatajkuilol Génesis (taxelol 1)
7:2. ¿Keniuj xa kinixpejpenayaj tapialmej tein katkaj chipaujkej uan tein amo? Nesi ke kinixpejpenayaj tapialmej chipaujkej porin kintemakayaj kemej netemaktilmej keman taueyichiuayaj, uan amo kinixpejpenayaj ika tein ueliskia kikuaskej oso amo. Achto ke mochiuaskia Tetsaujkakiouit, taltikpakneminij amo motamakayaj ika ininnakayo tapialmej. Itech Tanauatil tein kiselij Moisés yekinika mokuik tajtolmej “chipauak” uan “amo chipauak” keman ika motajtouaya takual, uan nejon tamik keman Tanauatil ixpoliuik (Hechos 10:9-16; Efesios 2:15). Nesi ke Noé kimatia katiyejua tapial ueliskia kitemakas kemej nemaktil keman kiueyichiuaya Jiova. Keman kisak itech arca, “kichijchiuilij Jiova se altar uan ompa kitemakak seki tapialmej chipaujkej uan seki tapialmej tein patanij tein chipaujkej kemej nemaktil tachichinol” (Génesis 8:20).
w04 1/1 pág. 29 § 8
Tein moixtajtoltia itech amatajkuilol Génesis (taxelol 1)
7:11. ¿Kani ualeuak at keman tetsaujkakiouik itech nochi taltikpak? Itech ojpatika “tonal”, Dios kichiuak maj ‘takaui’ ejekaixko. Ijkuak, onkayaj “amej tein moajsiaj tatampa kampa takaujtoya” uan “amej tein moajsiaj tapani” (Génesis 1:6, 7). Amej tein moajsiaj “tatampa” ipa yetoyajya itech taltikpak. Amej tein moajsiaj “tapani” katka tel miak mixti tein moajsia ejekaixko, uan katka kemej “ueyi amej”. Nejon at uetsik itech taltikpak itech itonaluan Noé.
Tein moixtajtoltia itech Biblia
(GÉNESIS 6:1-12) Ompa, keman taltikpakneminij peuak momiakiliaj itech nochi taltikpak uan kinpiakej ichpochmej, 2 ikoneuan Dios akin melauak peuak kiitaj ke ininichpochuan taltikpakneminij kuakualtsitsin katkaj. Yejua ika peuak monamiktiaj iniuan nochin akin yejuan kinekkej. 3 Uan Jiova kijtoj: “Nejua amo nochipaya nikxikos taltikpaknenkej, porin yejua sayoj nakat. Yejua ika, itonaluan yeski 120 xiujmej”. 4 Nefilim moajsiajya itech taltikpak itech nejon tonalmej, uan no satepan. Itech nejon tonalmej, ikoneuan Dios akin melauak motekayaj iniuan ininichpochuan taltikpakneminij uan siuamej kinpiayaj konemej. Yejuan katkaj takamej akin semi chikaujkej uan akin semi moixmatiaj ne uejkauj. 5 Yejua ika Jiova kiitak ke taltikpakneminij okachi kichiuayaj tein amo kuali itech taltikpak uan nochi tein kiyolnemiliayaj nochipa katka tein amo kuali. 6 Uan Jiova motayokoltij porin kichijchiuak taltikpaknenkej itech taltikpak; semi motayokoltij. 7 Yejua ika, Jiova kijtoj: “Nikinixpoloti itech nochi taltikpak taltikpakneminij akin nikinchijchiuak, yejuan uan no tapialmej tein kinyekpiaj, tapialmej tein moxoxolatsaj uan tapialmej tein patanij iluikak, porin nechtayokoltia porin nikinchijchiuak”. 8 Sayoj ke Noé kipiak itatiochiualis Jiova. 9 Yejua nejin tein kipanok Noé. Noé katka yolmelauak. Amo motajtakolmakak kemej akin nemiaj itech itonaluan. Noé nentinemik iuan Dios akin melauak. 10 Satepan, Noé kinpiak eyi konemej: Sem, Cam uan Jafet. 11 Ompa, Dios akin melauak kiitak ke itech taltikpak semi tauejueliujtoya uan semi onkaya tateuilis. 12 Kemaj, Dios kiitak taltikpak, uan semi tauejueliujtoya. Nochin akin nemiaj itech taltikpak kichiuayaj tein amo kuali.
27 METSTI ENERO HASTA 2 METSTI FEBRERO
TAMACHTILIS TEIN KIPIA BIBLIA | GÉNESIS 9-11
Maj tiktemokan tamachtilis ika nejmachkayot
it-1 pág. 397 § 7
Cam
Xa Canaán no ompa moajsia, uan Cam, akin katka ipopaj, amo kimelauak. Oso xa Noé kijtoj tein Dios kimatiltij. Yejua kijtoj ke tein amo kuali tein kichiuaya Cam, tein xa no kichiujtoyaya ikoneuj Canaán, no ijkon kichiuaskiaj ikoneuan Canaán. Tein Noé ika kitejtelchiuak, yekinika mochiuak keman israelitas, akin ualeuayaj itech ichankauan Sem, kinpiakej akin kayomej Canaán kemej inintakeualuan. Akin amo kinmiktijkej kinpiakej kemej inintakeualuan ompa Israel, kemej neskayot akin katkaj kayomej Gabaón (Jos 9). Ojpatika, mochiuak miak xiujmej satepan keman ikoneuan Canaán, akin katka ikoneuj Cam, moajsikej ininmako uejueyi taltikpaktekiuajyomej Medo-Persia, Grecia uan Roma, akin ualeuayaj itech ichankauan Jafet.
it-2 pág. 481
Nemrod
Yekinika, Nemrod taixyekanak Babel, Erec, Akkad uan Calné, ompa Sinar (Gé 10:10). Yejua ika, xa yejua kipeualtij xolal Babel uan uejkapan kali. Judíos no ijkon kijtouaj. Josefo kijkuiloj: “[Nebrodes (Nemrod)] yolik peuak senkis taixyekana, kiitak ke sayoj ueliskia kichiuas maj taltikpakneminij amo kiueyichiuanij Dios [...] komo yejua kinixyekanaya. Kijtoj ke komo Dios oksepa kinaeltsimiaya taltikpakneminij, kitechijchiualtiskia se kali tein semi uejkapan uan at amo ueliskia kiajsis, uan no momakepaskia iuan Dios porin kinixpolojka iuejkaujtatuan. Miakej kitakamatkej tein kijtouaya Nebrodes [Nemrod] uan kiitayaj ke amo katkaj yolchikaujkej komo mokauayaj maj Dios kinixyekana. Uan okachi ijsiujka kichijchiujkej uejkapan kali [...] ke tein mochiaya” (Antigüedades Judías, libro I, cap. IV, secs. 2, 3).
Tein moixtajtoltia itech Biblia
(GÉNESIS 10:6-25) Ikoneuan Cam katkaj Cus, Mizraim, Put uan Canaán. 7 Ikoneuan Cus katkaj Sebá, Havilá, Sabtá, Raamá uan Sabtecá. Ikoneuan Raamá katkaj Seba uan Dedán. 8 Cus no katka ipopaj Nemrod, yekinika takat akin mochiuak ueyichiujkej itech taltikpak. 9 Nemrod katka se ueyi tatokakej akin kiixnamikik Jiova. Yejua ika moijtoua: “Yejua kemej Nemrod, se ueyi tatokakej akin kiixnamikik Jiova”. 10 Yekinika xolalmej kampa taixyekanak katkaj Babel, Erec, Akkad uan Calné, ompa Sinar. 11 Ompa kisak uan yajki Asiria uan kichijchiuak Nínive, Rehobot-Ir, Cálah, 12 uan Resen, tein moajsi itech Nínive uan Cálah. Nejin yejua ueyi xolal. 13 Mizraim katka ininpopaj Ludim, Anamim, Lehabim, Naftuhim, 14 Patrusim, Casluhim —akin itech ualeuaj filisteos— uan Caftorim. 15 Canaán katka ipopaj Sidón, yekinika ikoneuj. No katka ipopaj Het, 16 uan no jebuseos, amorreos, guirgaseos, 17 heveos, arqueos, sineos, 18 arvadeos, zemareos uan hamateos. Satepan, ichankauan Canaán yajkej seseko. 19 Yejua ika tal kampa nemiaj ichankauan Canaán peuaya Sidón hasta Guerar, kampa ika moajsi Gaza, uan hasta Sodoma, Gomorra, Admá uan Zeboyim, kampa ika moajsi Lasa. 20 Yejua nejin ikoneuan Cam. Nesij iniuan ininkalyetouanij uan inintajtoluan, uan inintaluan uan ininaltepemej. 21 Sem no kinpiak konemej. Yejua ininuejkaujtat nochin ikoneuan Éber uan katka iikniuj Jafet, akin tayekana. 22 Ikoneuan Sem katkaj Elam, Asur, Arpaksad, Lud uan Aram. 23 Ikoneuan Aram katkaj Uz, Hul, Guéter uan Mas. 24 Arpaksad katka ipopaj Selá, uan Selá katka ipopaj Éber. 25 Éber kinpiak ome konemej. Yekinika motokaytij Péleg, porin itech itonaluan moxelojkej akin nemiaj itech taltikpak, uan iikniuj motokaytiaya Joctán.