Tein mokui keman tikitaj Tein timomachtiaj itech nechikol Tonemilis uan toTanojnotsalis
1-7 METSTI MARZO
TAMACHTILIS TEIN KIPIA BIBLIA | NÚMEROS 7, 8
“Tein techmachtia kemej yetoyaj inintakenkaluan israelitas”
it-1 523 § 7
Nechikol
Ompa Israel, “tayekananij” kiixyekanayaj nochi xolal (Esd 10:14). Yejua ika, akin “kinixyekanayaj uejueyi kalyetouanij” kitemakakej netetayokolilmej keman kichijchiujkej tabernáculo (Nú 7:1-11). Tiopixkamej, levitas uan “akin kiixyekanayaj xolal” itech itonaluan Nehemías no kiixyekankej altepet keman moixtalij ika sello tein kijtojkej ke kichiuaskiaj (Ne 9:38–10:27). Keman israelitas ojtokayaj taluakyan, doscientos cincuenta akin “kiixyekanayaj xolal, akin kinixpejpenkej itech nechikol, takamej ueyichiuanimej” mosentilijkej iniuan Coré, Datán, Abiram uan On porin kinekkej kinixnamikiskej Moisés uan Aarón (Nú 16:1-3). Ijkon kemej Dios kinauatij, Moisés kinixpejpenak 70 tayekananij ompa Israel akin kipaleuiskiaj maj “kiyekpia xolal” porin iselti amo ueliskia kichiuas (Nú 11:16, 17, 24, 25). Itech amatajkuilol Levítico 4:15 ininka motajtoua “akin kiixyekanayaj xolal” uan xa yejuan akin kiixyekanayaj altepet, taixyekananij, tamelauanij uan oksekin akin no kipiayaj tanauatil (Nú 1:4, 16; Jos 23:2; 24:1).
it-2 874 § 1
Rubén
Kampa kintaliayaj inintakenkaluan israelitas, rubenitas kintaliayaj inintakenkaluan kampa ika sur itech tabernáculo uan kinyoualouayaj ikoneuan Simeón uan Gad. Keman israelitas ojtokayaj kinyekanayaj nejin eyi uejueyi kalyetouanij akin kinixyekanaya Rubén, uan kintojtokayaj eyi uejueyi kalyetouanij Judá, Isacar uan Zabulón (Nú 2:10-16; 10:14-20). Ijkon kemej ixyetoyaj, no ijkon kitemakakej netetayokolilmej keman kitamichijchiujkej tabernáculo (Nú 7:1, 2, 10-47).
w04 1/8 25 § 1
Tein moixtajtoltia itech amatajkuilol Números
8:25, 26 . Keman kinxejxelouiliayaj tekit tein kichiuayaj levitas uan keman kiitayaj kanachi xiujmej kipiayaj, takamej akin xiuejkejya amo kichiuayajok tekit tein ixyetoya kichiuaskej. Sayoj ke, uelia motemakayaj kinpaleuiskej okseki levitas. Itech nejin tonalmej nochipa tikteixmatiltiaj iTekiuajyo Dios, sayoj ke, nejin tanauatil techmachtia se taman tein semi moneki. Komo se tokniuj amo ueli kichiua seki taman itech iTekiyo Dios porin xiuejya, ueli tapaleuia itech seki tekimej tein amo kiouijmakas.
Maj tiktemokan tamachtilis ika nejmachkayot
it-2 717 § 3
Konet akin tayekana
Kemej ininkoneuan israelitas akin tayekanayaj taixyekanaskiaj itech sejse kali, kiixnextiayaj nochi altepet. Yejua ika, Jiova kintokaytij nochin israelitas “ikoneuj akin tayekana”, porin katka yekinika ialtepeuj ijkon kemej kiluijka Abrahán ke kichiuaskia (Éx 4:22). Kemej Jiova amo kinmiktij konemej akin tayekanayaj, tanauatij maj kintiochiuanij “nochin ininkoneuan israelitas akin tayekanaj. Uan konet okichpil akin tayekana uan ikoneuj se tapial tein ueuet tein yekinika yoli” (Éx 13:2). Yejua ika, nochin konemej akin tayekanayaj kinmaktilijkej Dios.
8-14 METSTI MARZO
TAMACHTILIS TEIN KIPIA BIBLIA | NÚMEROS 9, 10
“Keniuj Jiova kinixyekana itekitikauan”
it-1 403 § 6
Kampa yetoyaj takenkalmej
Keman kinajchiujtinemiaj inintakenkaluan (itech Números 33 Moisés kijtoua ke 40 miakpa moajchiujtinenkej) no kinextia keniuj kuali ixyetoya kemej moajsiaj. Keman mixti kipantsakuaya tabernáculo amo akin kiajchiuaya itakenkal uan keman mixti moajchiuaya nochin monekia yaskej, “Jiova kinnauatiaya keman mokauaskiaj itech takenkal uan Jiova kinnauatiaya keman kisaskiaj” (Nú 9:15-23). Ome trompetas tein chijchiujtoyaj ika plata tein kinchijchiujkaj ika martillo, ika kinnauatiayaj israelitas tein Jiova kijtouaya (Nú 10:2, 5, 6). Keman kipapatayaj kemej kipitsayaj trompeta, kimatiaj ke monekia yaskej. Yekinika mochiuak itech “ojpatika xiuit [1512 achto ke ualaskia Jesús], ojpatika metsti, itech tonal veinte”. Arca tein kiixnextia netenkaualis kiuikayaj taixpan. Eyi uejueyi kalyetouanij akin kinyekanaya Judá no yayaj taixpan uan kintojtokayaj Isacar uan Zabulón. Satepan yayaj guersonitas uan meraritas akin kiuikayaj tein mokuia itech tabernáculo. Ompa, yayaj eyi uejueyi kalyetouanij akin kinyekanaya Rubén uan kintojtokayaj Simeón uan Gad. Satepan yayaj cohatitas akin kiuikayaj tabernáculo. Ompa, yayaj eyi uejueyi kalyetouanij akin kinyekanaya Efraín uan kitojtokayaj Manasés uan Benjamín. Uan hasta taikampa yayaj eyi uejueyi kalyetouanij akin kinyekanaya Dan uan kitojtokayaj Aser uan Neftalí. Akin yayaj taixpan uan taikampa, katkaj okachi chikaujkej uan okachi miakej (Nú 10:11-28).
w11 15/4 4 § 4, 5
¿Tikseliaj tein Dios ika techixyekana?
¿Keniuj uelis tiknextiskej ke tiktasojkamatij kemej Jiova techixyekana? Tatitanil Pablo kijtoua keniuj: “Xikintakamatiyakan namotayekankauan [...] uan ximotekauilikan ma namechyekanakan” (Heb. 13:17). Sayoj ke, kemansa ouij techkisa. Xikonnemili ke tejuatsin tionmoajsi iniuan israelitas itech itonaluan Moisés. Miak tonalmejya tionojtokatok itech taluakyan uan tikontojtoka mixti. Sayoj ke, sepasaj moketsa uan tikonnemilia “¿Kanachi tonalmej tiuejkauaskej? ¿Se tonal? ¿Se semana? ¿Miak metsti?” Uan tikonnemilia ox moneki tikonkixtis nochi tein tikonuika. Yejua ika, sayoj tikonkixtia tein moneki. Uan ijkon kemej panouaj tonalmej amo tikonnekiok tikontemos tein tikonneki, yejua ika tikonkixtia nochi tein tikonuika uan keman tionmatamitiya mixti moajokui. ¡Oksepa moneki tikoneuas nochi! ¡Semi tesioujtij! Sayoj ke, moneki niman tionyas iniuan oksekin (Núm. 9:17-22).
¿Toni tikchiuaj keman Dios techiluia maj tikchiuakan seki taman? ¿Niman tiktakamatij oso tiksentokaj tikchiuaj tein ipa timomattokej? ¿Tikchiujtokej tein yankuixtok techiluianij keniuj titamachtiskej, titanojnotsaskej, tikinnojnotsaskej akin okseko kayomej, titaueyichiuaskej kemej kalyetouanij? ¿Tiktakamatij tein techiluiaj keman tikpiaj toueyi nechikol uan keniuj titapaleuiskej iniuan Tayekananij akin Tetajtouiaj itech Tapajtiloyamej? Komo tiktakamatij tein Dios technauatia tiknextiaj ke tiktasojkamatij kemej techixyekana. Yejua ika, amo toselti tikixpejpenaj tein tikchiuaskej, ta tiktemouaj maj Jiova techpaleui uan inechikol. Ijkon kemej se konetsin mopaleuiti iuan itatuan keman tetsaujkaejeka, tejuan no timopaleuiaj itech nechikol keman mochiua tein amo kuali.
Maj tiktemokan tamachtilis ika nejmachkayot
it-1 226 § 4
Ueyi nechikol
Semi moneki maj timonechikokan. Pascua tein mochiuaya xijxiujtika, kinextia ke semi moneki maj timonechikokan porin Jiova ijkon kinmachtia itekitikauan. Komo se takat maski moajsia chipauak amo kichiuaya Pascua porin amo kinekia maski yetoya, monekia mikis (Nú 9:9-14). Keman tekiuaj Ezequías kinsentilij ompa Jerusalén akin kayomej Judá uan Israel uan kichiuaskiaj Pascua, kiniluij nejin: “Akin nannemij Israel, ximokepakan iuan Jiova [...]. Amo xikchiuakan kemej namouejkaujtatuan akin amo takakiaj. Xiktakamatikan Jiova uan xiualakan itech itemplo tein yejuatsin kichiuak maj nochipa chipauak uan xiktekitilikan Jiova namoDios, ijkon amo kualanisok namouan. [...] Jiova namoDios semi teiknelia uan amo namechixtopeuas komo iuan namokepaj” (2Cr 30:6-9). Akin amo tatakamatia kinextiaya ke kiixtopeuaya Dios. Maski axkan amo tikchiuaj iluimej kemej Pascua, Pablo techiluia maj nochipa timonechikokan keman kijtoj: “Moneki ma tiktemolijtiyakan de keniu [...] timotasojtatiyaske se uan okse uan de keniu tikchiutiyaske in kuali tachiualisme. Uan sekin tokniuan amo mosentilijtinemij para kimouistiliske Dios pero ma amo ijkon ma tikchiutinemikan tejuan. Ta, ma timosenpanyolmajxitijtiyakan se uan okse [...] porin tikitaj ke kachi motokijtiuits ya ne tonal kuak moualuikas Totekotsin Jesús” (Heb 10:24, 25; xikonita CONGREGACIÓN).
15-21 METSTI MARZO
TAMACHTILIS TEIN KIPIA BIBLIA | NÚMEROS 11, 12
“¿Keyej amo kuali yetok maj nochipa tikijtojtokan tein amo tikuelitaj?”
w01 15/6 17 § 20
Maj amo tikelkauakan tein tikakij
20 Miakej tokniuan amo keman auilnemij. Sayoj ke tinochin moneki timoyekpiaskej maj amo titeijijtokan porin nejon uelis kichiuas maj Dios techixtopeua. Pablo techiluia nejin: “Amo xikchiutinemikan ten amokuali chiualisme sayo para nankitaske kox melau Dios namechtatsakuiltis. Porin ne touejkautatuan ijkon kiyolnemiliayaj. lka ya nojon Totajtsin Dios kintatsakuiltij ika nijin taman tatsakuiltilis kuak kintepiniayaj kouame. Uan [...] amo xikijitokan Totajtsin Dios de keniu techpaleuijtiu. Porin sekin de ne touejkautatuan ijkon kichiuke. Ika ya nojon in ángel de Dios kinmijmiktiko ika ichikaualis” (1 Corintios 10:9, 10). Israelitas kinijijtojkej Moisés uan Aarón uan hasta no kijijtojkej Dios, kualaniaj porin sayoj kipiayaj maná tein kinmakatoya (Números 16:41; 21:5). ¿Toni okachi kiyolkokoj Jiova? ¿Maj auilneminij oso maj taijijtouanij? Biblia kijtoua ke miakej mikkej keman kintipinijkej kouamej porin taijijtojkej (Números 21:6). Achtoya mikkaj 14,700 porin teijijtojkej uan taixnamikkej (Números 16:49). Yejua ika, maj amo tikualantikaj Jiova, ta maj tiktasojkamatikan tein techmaka.
w06 15/7 15 § 7
Maj amo titeijijtokan keman tikchiuaskej teisa
7 ¡Semi mopatak kemej tanemiliayaj israelitas! Keman kiskej Egipto uan kipanauijkej ueyiat Chichiltik semi motasojkamatkej uan hasta mokuikatijkej iixpan Jiova (Éxodo 15:1-21). Sayoj ke, kemej amo kuali momachiliayaj itech taluakyan uan kinmouiliayaj akin nemiaj Canaán, amo motasojkamatkejok uan peuak kualanij. Kemej Dios kinmakixtijka monekia kitasojkamatiliskej, sayoj ke kitajtakoltijkej porin kinemiliayaj ke amo kinkauaya maj kichiuakan tein kinekiaj. Kemej peuak kijijtouaj Jiova, kinextiayaj ke amo kitasojkamatiliayaj tein kinmakatoya. Yejua ika kijtoj: “¿Hasta kemanian kisentokas nouan kualantos nejin xolal amo yolkuali?” (Números 14:27; 21:5).
it-2 855 § 2
Motajtolteuiaj
Keman nochipa se kijtojtok tein amo se kiuelita. Komo ijkon se kichiua se teyolkokoua uan semi taijtakoua. Israelitas niman kijijtojkej Jiova tepitsin satepan ke kiskej Egipto, kijijtojkej keniuj kinixyekanaya inintechkopa Moisés uan Aarón (Éx 16:2, 7). Tein kichiujkej, semi kiyolkokoj Moisés hasta tajtanik maj miki (Nú 11:13-15). Akin teijijtoua uelis momikilis, keman israelitas kijijtojkej Moisés, Jiova kiitak ke kiixnamiktoyaj kemej kinixyekanaya (Nú 14:26-30). Miakej momikilijkej porin taixnamikkej.
Maj tiktemokan tamachtilis ika nejmachkayot
it-2 288
Maná
Kemej chijchiujtoya. Maná katka istak kemej iteyo cilantro uan kemej ichokilo kouit, yojyoualtik kemej perla. Moyekouaya kemej pan patachtik tein kipiaya nekti oso kemej pan tein tsopek uan tein chiauak, kikuechouayaj ika molino oso ika mortero uan kimolontiayaj, ompa kichijchiuayaj pan uan kiokxitiayaj (Éx 16:23, 31; Nú 11:7, 8).
22-28 METSTI MARZO
TAMACHTILIS TEIN KIPIA BIBLIA | NÚMEROS 13, 14
“Titakuaujtamatiskej iuan Dios kichiua maj tiyolchikaujkej”
w06 1/10 17 § 5, 6
Titakuaujtamatiskej iuan Dios uan tikmoujkatokaskej kichiua maj tiyolchikaujkej
5 Josué uan Caleb no katkaj ome tapijpianij uan yejuan kinekiajya kalakiskej itech Tal tein Dios kiniluijka ke kinmakaskia, yejua ika kijtojkej: “Niman tikintaniskej [cananeos]. Amo teyi kinpaleuiaok uan Jiova yetok touan. Amo xikinmouilikan” (Números 14:9). ¿Amo kinemiliayaj tein ueliskia kinpanos? Amo. Ijkon kemej oksekin, yejuan kiitakaj keniuj Jiova kinpinaujtijka ika majtakti chauismej akin tekiuajtia Egipto uan inintiotsitsin, yejuan kiitakaj keniuj kinmiktij iuan nochi itateuijkauan itech ueyiat Chichiltik (Salmo 136:15). Yejua ika majtakti tapijpianij uan oksekin amo onkaya keyej mouiskej. Jiova kiyolkokoj porin momoujtijkej, yejua ika kijtoj: “¿Hasta kemanian nechpoujkaitas nejin xolal, hasta kemanian nouan takuaujtamatiskej maski kiitanijya tein nikchiuani?” (Números 14:11).
6 Jiova kijtoj keyej moujkej, moujkej porin amo takuaujtamatiaj. Takuaujtamatilis uan yolchikaualis semi monekij. Yejua ika, tatitanil Juan ininka tajtoj tokniuan uan kijtoj keniuj mochikauayaj kuali mouikaskej iuan Dios: “Ika totakuautamatilis tiktanilijtiyoue ya ne tajtakolnemilis” (1 Juan 5:4). Axkan miakej tiitaixpantijkauan Jiova miakpa tiknextianij ke titakuaujtamatij kemej Josué uan Caleb, porin tikteixmatiltiaj iTekiuajyo Dios maski titelpochmej oso tixiuejkejya, tiyeskij tichikaujkej oso amo. Maski miakej techixnamikinij amo akin uelini techtsakuiliani porin semi timiakej uan tiyolchikaujkej (Romanos 8:31).
Maj tiktemokan tamachtilis ika nejmachkayot
it-1 740
Tal tein Dios kinmakak israelitas
Tal tein Dios kinmakak israelitas semi kuali katka. Keman Moisés kintitanik tapijpianij maj kiitatij Tal tein Dios kijtojka ke kinmakaskia uan maj kikuitij tein ompa onkaya, kiuikakej higos, granadas uan miak uvas, yejua ika monekik kiuikaskej ome takamej. Uan maski moujkej porin amo takuaujtamatkej, kijtojkej ke itech nejon tal mextoya leche uan nekti (Nú 13:23, 27).
29 METSTI MARZO HASTA 4 METSTI ABRIL
TAMACHTILIS TEIN KIPIA BIBLIA | NÚMEROS 15, 16
“Maj amo timoueyinekikan nion maj totech titakuaujtamatikan”
w11 15/9 27 § 12
¿Nechixmati Jiova?
12 Keman ojtokatoyajok uan ayamo ajsiaj itech Tal tein Dios kiniluijka ke kinmakas, Coré kinemilij ke amo kuali moixyekantoya inechikol Jiova. Yejua ika, iniuan 250 takamej akin kipiayaj tanauatil, kinekik kipatas seki taman uan kinemilijkej ke Dios kinpaleuijtoya, yejua ika kiixnamikkej kemej taixyekanaya Moisés. Uan hasta kiniluijkej Moisés uan iikniuj Aarón: “¡Nantechkualantijkejya! Nochi xolal yektik, uan Jiova iniuan yetok” (Núm. 16:1-3). ¡Kinextijkej ke semi moueyinekiaj! Moisés sayoj kinnankilij: “Jiova kitematiltis akoni iuan poui” (xikonixtajtolti Números 16:5). Mostika tiotak Coré uan akin taixnamikkaj ipa mikkajya (Núm. 16:31-35).
w11 15/9 27 § 11
¿Nechixmati Jiova?
11 Moisés uan Coré katkaj ome takamej akin Jiova kinitaya ke tatamamej katkaj, porin tataman kemej kiitayaj tanauatilmej tein Jiova kinmakaka uan tein kiixtalijka kemej kinixyekanaskia. Coré uelia kichiuaya miak taman, yejua katka levita semej ichankauan Cohat. Yejua xa kiitak keman Jiova kimakixtij ixolal itech ueyiat Chichiltik, no kintatsakuiltij akin taixnamikiaj itech tepet Sinaí uan no tapaleuij keman kiuikayaj arca tein kiixnextia netenkaualis (Éxo. 32:26-29; Núm. 3:30, 31). Miak xiujmej kitekitilij Jiova, yejua ika israelitas kipoujkaitayaj.
Maj tiktemokan tamachtilis ika nejmachkayot
w98 1/9 20 § 1, 2
Xikonchiua tein okachi moneki
Jiova kiitak ke semi moneki nejin taman. Yejua ika, “Jiova kiluij Moisés: ‘Nejon takat moneki mikis’” (Números 15:35). ¿Keyej Jiova kiitak ke katka ueyi tajtakol tein kichiuak nejon takat?
Itech chikuasen tonal israelitas monekia kojkouiskej, kitemoskej tein kikuaskej uan tein motaliliskej. Itech chikometika tonal monekia momachtiskej uan motokiskej iuan Dios. Maski amo tajtakol katka kojkouiskej nejon tonal, monekia sayoj kiueyichiuaskej Jiova. Axkan amo tiktakamatijok Tanauatil tein kiselij Moisés, sayoj ke techmachtia ke moneki tikchiuaskej tein okachi moneki (Filipenses 1:10).
5-11 METSTI ABRIL
TAMACHTILIS TEIN KIPIA BIBLIA | NÚMEROS 17-19
“Nejua [...] nimitsmakas tein mitspolos”
w11 15/9 13 § 9
¿Tikauaj maj Jiova techmaka tein techpoloua?
9 Maj tiknemilikan tein kichiuayaj levitas. Yejuan amo kiselijkej talmej, sayoj ke kemej yejuan sayoj kitekitiliayaj Jiova, yejuatsin kinyekpiaya uan hasta kiniluij: “Nejua nimitsyekpias uan nimitsmakas tein mitspolos” (Núm. 18:20). Maski axkan amo tikchiuajok tekit tein kichiuayaj levitas uan tiopixkamej, semi kuali komo titakuaujtamatij ke Jiova techmakas tein techpolos. Kemej amo uejkaua ixpoliuis tein amo kuali, okachi moneki maj titakuaujtamatikan (Rev. 13:17).
w11 15/9 7 § 4
Jiova techmaka tein techpoloua
4 Tikitakejya ke levitas amo kiselijkej nion se tal, ta yejuan “kiselijkej tekit kitekitiliskej Jiova kemej tiopixkamej” (Jos. 18:7). Yejua ika kiniluij itech Números 18:20: “Nejua nimitsyekpias”. Yejua ika, ¿nochipa kipanoskiaj tatasojtilis levitas porin amo kipiayaj inintaluan? Amo (xikonixtajtolti Números 18:19, 21, 24). Ika tekit tein kichiuayaj levitas, israelitas kintayokoliayaj tepitsin tein kitekiaj inintalpan uan no kinmakayaj seki tapialmej tein yoliaj, uan levitas kixelouayaj tein okachi kuali tein kiseliayaj uan kinmakayaj tiopixkamej (Núm. 18:25-29). Tiopixkamej no kiseliayaj netetayokolilmej tein israelitas kiuikayaj itech tabernáculo. Yejua ika, senkis takuaujtamatiaj ke Jiova kinmakaskia tein kinpoloskia.
Maj tiktemokan tamachtilis ika nejmachkayot
g02 8/6 14 § 2
Istat, se taman tein kipia ipatiuj
Ne uejkauj, istat kiixnextiaya se taman tein uejkauaya. Yejua ika, Biblia kijtoua ke katka se “netenkaualis ika istat” keman moiluiayaj ke kichiuaskiaj se taman tein uejkauaya, uan kinextiayaj keman sentakuayaj uan kipoyeliayaj inintapalol (Números 18:19). Tanauatil tein kiselij Moisés kijtouaya ke netetayokolilmej tein motemakayaj itech altar monekia yeski tapoyelil, nejon xa kinextiaya ke chipauak katka uan amo uejueliujtoya.
12-18 METSTI ABRIL
TAMACHTILIS TEIN KIPIA BIBLIA | NÚMEROS 20, 21
“Maj tiyolnejmachmej keman kinekiskej techchiualtiskej teisa”
Maj tiyolnejmachmej uan maj tikyolpaktikan Jiova
19 Porin ijkon amo semi timopoloskej. Maj oksepa titanemilikan itech Moisés. Miak xiujmej kinextij ke katka yolnejmach uan kiyolpaktij Jiova. Sayoj ke, cuarenta xiujmej satepan keman israelitas ojtokakej taluakyan, amo kinextijok nejon. Iikniuj Míriam, akin xa kipaleuijka maj momakixti ompa Egipto, yekin momikilijka uan kitokkaj ompa Qadés. Ompa, israelitas oksepa peujkej kijtouaj ke amo kipiayaj miak taman. Biblia kijtoua ke “xolal peuak kiixnamiki Moisés” porin amo kipiayaj at. Maski Jiova kichiujka miak mouiskatekimej itechkopa Moisés uan miak xiujmej kuali taixyekanak, israelitas kisentokayaj taixnamikiaj. Uan no kijijtouayaj Moisés kemej yeskia itajtakol maj amo onkani at (Núm. 20:1-5, 9-11).
Maj tiyolnejmachmej uan maj tikyolpaktikan Jiova
20 Nejon ouijkayomej kichiujkej maj Moisés kualani. Moisés amo kinojnotsak tepejxit kemej Jiova kinauatijka, ta kintauelnojnotsak israelitas uan kijtoj ke yejua yaya kichiuati se mouiskatekit. Ompa, ojpa kiuitekik tepejxit uan peuak kisa miak at. Kemej moueyinekik uan kualanik kichiuak maj tajtako iixpan Jiova (Sal. 106:32, 33). Kemej nejon tonal amo kinextij yolnejmachkayot, Jiova amo kikauak maj kalaki itech tal tein motenkaujka kinmakas israelitas (Núm. 20:12).
21 ¿Toni techmachtia tein kipanok Moisés? Yekinika, moneki tiksentokaskej timochikauaskej tiyeskij tiyolnejmachmej. Komo amo timoyekpiaj, timoueyinekiskej uan uelis tikijtoskej oso tikchiuaskej teisa tein amo taixejekol. Ojpatika, komo semi timotekipachojtokej amo uelis tikixnamikiskej ouijkayomej, yejua ika maj timochikauakan tiyeskij tiyolnejmachmej hasta keman semi timotekipachojtoskej.
w09 1/9 19 § 5
Se tamelaujkej akin kitakamati itanauatiluan tein ixyetokejya
Yekinika, Dios amo kiluij Moisés maj kinnojnotsani israelitas nion maj kiniluiani ke amo tatakamatiaj. Ojpatika, Moisés uan Aarón amo kiueyitalijkej Jiova, yejua ika kinmelauak (versículo 12). Keman kijtojkej “tamechkixtiliskej at” kiteajsikamatiltijtoyaj ke yejua uan Aarón kichiuaskiaj uan amo Dios. Expatika, ijkon kintatsakuiltij oksekin akin kiixnamikkaj uan amo no kinkauak maj kalakikan itech tal Canaán (Números 14:22, 23). Uan naujpatika, kemej yejuan katkaj akin kinixyekanayaj israelitas, Dios kinekia maj kichiuanij tein kinnauatiaya (Lucas 12:48).
Maj tiktemokan tamachtilis ika nejmachkayot
¿Tikinitaj akin amo chikaujkej kemej Jiova kinita?
12 Jiova ueliskia niman kitatsakuiltis Aarón keman kichiuak nochi nejon. Sayoj ke kiajsikamatik ke maski mopolojka, amo kijtosnekia ke amo yolkuali katka. Moita ke Aarón kichiuak nejon porin moajsia itech ouijkayot oso porin kintajtolkakik oksekin. Sayoj ke niman kijtoj ke mopoloj uan kiselij tein Dios kiixpejpenak maj mochiua (Éx. 32:26; Núm. 12:11; 20:23-27). Jiova kiitak ke Aarón takuaujtamatia uan ke moyolnonotsaya. Miak xiujmej satepan, yejua uan ichankauan kinelnamikiajok porin katkaj itekitikauan Jiova akin kimoujkatokakej (Sal. 115:10-12; 135:19, 20).
19-25 METSTI ABRIL
TAMACHTILIS TEIN KIPIA BIBLIA | NÚMEROS 22-24
“Jiova kipata tein amo kuali ika se tatiochiualis”
bt 53 § 5
“Kiajsijkamatiltij den yankuik tajtol de Jesús”
5 Ijkon kemej itech yekinika siglo, axkan miakej akin techixnamikij amo ueli kitsakuiliaj maj amo motanojnotsaok. Miakpa keman tokniuan kinuikaj okseko oso kintsakuaj, okachi moteixmatiltia iTekiuajyo Dios. Ijkon panok keman mochiuak Ojpatika Ueyi Neteuilis itech nochi taltikpak, keman nazis kintsaktoyaj tokniuan tapaleuij maj oksekin kiitakan ke tein momachtiaj yejua tein melauak. Se judío akin peuak momachtia Biblia kijtoj: “Nikitas ke itaixpantijkauan Jiova akin tsaktoyaj katkaj yolchikaujkej, nechpaleuij maj nikita ke tein kineltokaj moajsi itech Biblia, yejua ika no nimochiuak itaixpantijkauj Jiova”.
it-2 250
Amo tamati
Amo se tamati komo se kiixnamiki Jiova. Tanauatijkej Balaam kinekia kinijtouilis tein amo kuali israelitas porin kinekia maj kimaka tomin tekiuaj Balac. Sayoj ke, Jiova amo kikauak maj ijkon kichiua, tatitanil Pedro kijkuiloj ke “iburrito de Balaam ten amo uelia tajtoa, yejua ne tajtoj ika tajtolis de se tagat. Uan ne burrito kixnamikik Balaam”. Keman tatitanil kijtoj ke Balaam amo tamatia, kikuik tajtol griego pa·ra·fro·ní·a, tein kijtosneki ke “amo kuatamati” (2Pe 2:15, 16; Nú 22:26-31).
Maj tiktemokan tamachtilis ika nejmachkayot
w04 1/8 27 § 2
Tein moixtajtoltia itech amatajkuilol Números
22:20-22. ¿Keyej semi kualanik Jiova iuan Balaam? Jiova kiluij tanauatijkej Balaam maj amo kinijtouilij israelitas maj kinpano tein amo kuali (Números 22:12). Sayoj ke, Balaam senkis kiixtalij amo kitakamatis Jiova uan kinemilij kinuikas itakeualuan tekiuaj Balac, porin kinekia maj kitaxtaui (2 Pedro 2:15, 16; Judas 11). Balaam kiniluij israelitas maj kinpano tein kuali maski amo kinekia, sayoj ke kemej kinekia maj tekiuaj kuali kiita, kiluij maj seki siuamej akin kiueyichiuayaj Baal maj kintanejnektianij israelitas uan maj iniuan auilneminij (Números 31:15, 16). Yejua ika, Jiova semi kualanik iuan Balaam porin katka nexikol.
26 METSTI ABRIL HASTA 2 METSTI MAYO
TAMACHTILIS TEIN KIPIA BIBLIA | NÚMEROS 25, 26
“¿Uelis aksa amo yeski kemej oksekin?”
‘Xikcholuikan auilnemilis’
AMICHIJKITSKIJKEJ youi kampa kimati ke moajsi seki taman amichimej tein kineki kinkitskis. Kiyekixpejpena takual uan kitamota hilo aijtik. Satepan, keman kiita ke hilo moixtilana uan kuouit mokelpachoua, kitetekuinoua hilo uan kikixtia tein motsikoj. Tel yolpaki porin kiixpejpenak se kuali takual.
2 No ijkon, itech xiuit 1473 achtopa itech itonaluan Jesús, moajsik se takat tein kiyekixpejpenak kemej eskia se kuali takual, sayoj ke amo tein ika kintilanaskia amichimej ta israelitas. Motokaytiaya Balaam. Yejua kinekia kinuetsiltis itech tajtakol itekitikauan Dios, akin kipiayaj imin kaltaken itech tal tein pouia Moab, amo uejka itech Tal tein Dios motenkaujka kinimakas. Maski kijtouaya ke katka itanauatijkauj Jiova, amo melauak katka. Ta katka se xijxikui uan ixkep tein kitakeujkaj maj kinijtako israelitas. Nejon takat tel kualanik amo sayoj porin Jiova amo kikauak maj kinijtakouani israelitas, ta kichiualtij maj kintatiochiuiani. Kemej yejua kinekia itomin, amo ijkon mokauak. Kinemilij ke komo kinchiualtiaya israelitas maj tajtakokan, Dios kintatsakuiltiskia. ¿Toni tein kemej eskia takual kikuiskia? Kinkuik kualtsitsin ichpochmej tein nemiaj Moab (Números 22:1-7; 31:15, 16; Apocalipsis 2:14).
‘Xikcholuikan auilnemilis’
4 ¿Toni kiniuikak maj kinpanouani nejon tein tel amo kuali? Yejuan kikaujkej maj ixuani itech imin yolo tanemililmej porin yolik mouejkatilijtoyaj iuan Jiova. Yejuan kielkaujkej ke yejuatsin kinkixtijka Egipto, kintamakak itech taluakyan uan kualtsin kinajxitijtoya itech Tal tein motenkaujka kinimakas (Hebreos 3:12). Tatitanil Pablo kielnamiktoya nejon tatsakuiltilis keman kijkuiloj: “Maj amo se auilnentinemi [...] kemej kichiujtinenkej ne touejkaujtatuan. Uan ika porin ninauilnemilis Dios kintatsakuiltij. Uan yejuan momikilijkej sempoal uan eyi mil tagayot tech se tonal san” (1 Corintios 10:8).
Maj tiktemokan tamachtilis ika nejmachkayot
it-2 238 § 1, 2
Kampa tami
Keman kinxejxelouiliayaj tal kiitayaj ome taman, kichiuayaj maj moita akoni iaxkatis tal uan kiitayaj kanachimej katkaj itech sejse uejueyi kalyetouanij. Nejon kinpaleuiaya maj kimatikan kani nemiskiaj sejse uejueyi kalyetouanij, kampa ika norte, sur, tonalkisayampa oso tonalkalakyampa, kampa tamanis, inakastan ueyiat oso kampa tepeyoj (Pr 16:33). Keman kiitayaj kani nemiskej, yejuan amo motajtolteuiayaj nion motataniaj porin Jiova kiixtaliaya uan kinpaleuiaya maj kimatinij, ijkon mochiuaskia kemej kijtojka Jacob achto ke momikiliskia itech Génesis 49:1-33.
Satepan ke kimatiaj kani nemiskej uan kanachimej nemiaj itech sejse uejueyi kalyetouanij, monekia kinextiskej kani tami inintal: “Moneki moitas akoni iaxkatis tal uan ijkon nankinxejxelouiliskej namochankauan. Akin okachi miakej moneki nankinmakaskej tal kampa okachi taueyika uan akin amo miakej kampa amo taueyika. Nochin kiseliskej inintal kemej moixtalis” (Nú 33:54). Keman kiitayaj kani ininaxkatis tal uan komo amo kiseliayaj kemej monekia, monekia kiitaskej ox miakej oso amo itech sejse uejueyi kalyetouanij. Yejua ika, kemej kalyetouanij Judá taueyika kampa kinmakakej monekik kinkuiliskej uan kinmakaskej kalyetouanij Simeón (Jos 19:9).