Keniuj tikajsiskej yolpakilis ika chikauak tekit tein tikchiuaj

1-3. 1) ¿Keniuj miakej kiitaj tekit? 2) ¿Keniuj techmachtia Biblia maj tikitakan tekit uan katiyejua netajtanilmej tikitaskej axkan?

AXKAN miakej nion tepitsin kiuelitaj tekitiskej uan kiitaj kemej se tamamal. Keman mojmostaj kichiuaj se tekit tein nion tepitsin kiuelitaj, okachiok kimachiliaj ke tel uejkaua tonal tekit. Sayoj ke amo onkak keyej nochipa kipiaskej nejon tanemilil. Uelis kiajsiskej tein kinpaleuis maj kiuelitakan tekitiskej uan tein okachi kuali, maj yekmelauj kuali momachilikan.

² Biblia techmachtia maj tikpialikan tekit se kuali tanemilil. Kinextia ke tekit uan tein kuali tein kiualkui, se tatiochiualis. Ijkon kijkuiloj tamatkej Salomón: “Maj nochin takuakan uan maj tatayikan uan maj kiajsikan yolpakilis ika nochi chikauak tekit tein kichiuaj. Yejua inetetayokolil Dios” (Eclesiastés 3:13). Jiova akin techteltasojta uan kineki maj tikselikan tein kuali, kineki maj kuali timomachilikan keman titekitij uan maj techyolpakti tein techualkuilia. Komo timomachtiaj tikitaskej tekit kemej Dios kiita uan timonejnemiltiaj kemej kijtoua principios, uelis tiksentokaskej itech inetasojtalis Dios (xikonixtajtolti Eclesiastés 2:​24; 5:​18).

³ Itech nejin capítulo tikitaskej nejin naui netajtanilmej: ¿Keniuj tein tikchiuaj kemej Cristo uelis tikajsiskej yolpakilis ika nochi chikauak tekit tein tikchiuaj’? ¿Toni taman tekit moneki tikixtopeuaskej? ¿Keniuj uelis ika taixejekolis timotekitiliskej uan tiktekitiliskej Dios? ¿Uan katiyejua tekit tein okachi tayekantok moneki tikchiuaskej? Sayoj ke achto maj ika titajtokan ome okachi kuali tekitinij tein moajsij: Jiova uan Jesucristo.

OKACHI UEYI TEKITIKEJ UAN TEKITIKEJ TEIN IXMACH

4, 5. ¿Keniuj kinextia Biblia ke Jiova se Dios tel tekitikej?

⁴ Jiova yejua okachi Ueyi Tekitikej. Kemaj, ta itech Génesis 1:1 kijtoua: “Keman peuak nochi, Dios kichijchiuak iluikak uan taltikpak”. Satepan, keman tamitachijchiuak nikan taltikpak, kijtoj ke katka “tel kuali” (Génesis 1:31). Tein kijtosneki, ke tel kuali momachiliaya ika nochi tekit tein kichiuak. Senkis tikmatij ke “Dios tein yolpaki”, tel senka kuali momachilij kiitas nochi tein kichijchiuak (1 Timoteo 1:11, NM).

⁵ Jiova tel tekitikej, uan amo keman ijkonisaj yetok. Yejika, tel miak xiujmej satepan keman tamitachijchiuak nikan taltikpak, Cristo kijtoj: “Notajtsin tekititiuits hasta axkan” (Juan 5:17). ¿Toni kichiujtok toTajtsin? Ompa iluikak, kinualyekpixtok taltikpakneminij uan kinixyekantok. Uan no kichiuak maj moajsi se “yankuik tachijchiuj”: tokniuan taixpejpenalmej ika espíritu, tein tekiuajtiskej ne iluikak iuan Jesús (2 Corintios 5:17, NM). Kisentoka tekititok maj mochiua itanejnekilis tein kinpialia taltikpakneminij. ¿Toni nejin? Ke akin kitasojtaj maj nemikan nochipaya itech se xochital (Romanos 6:23). Uan tikneltokaj ke kitelyolpaktia tein kuali tein kiualkui nejon tekit, ta tel miakej kikakij kuali tanauatilmej tein kichiuati iTekiuajyo Dios, motokiaj iuan yejuatsin uan kipataj imin nemilis uan ijkon uelis kisentokaskej itech inetasojtalis (Juan 6:44).

6, 7. ¿Keniuj tekiti Jesús, uan toni techmachtia nejon?

⁶ Jesús tel miak xiujmejya moixmati ke tel chikauak tekiti uan tel kuali kichiua. Ika nejon techkauilij se kuali neskayot. Achto ke ualaskia nikan taltikpak, Jiova kikuik Jesús kemej “tekitikej tein ixmach”, keman kichijchiuak “nochi ten ongak nikan taltikpak uan eluiyak” (Proverbios 8:22-31; Colosenses 1:15-17). Uan keman nemia nikan taltikpak, no katka se kuali tekitikej. Keman katka konetok, peuak momachtia tachijchiuas ika kuouit, uan satepan moixmatik kemej se “kuoujxinkej” (Marcos 6:3).a Maj tikelnamikikan ke itech nejon tonalmej amo onkaya miak taman tein ika tekitiskiaj, niono aserradoras uan okseki manamikmej tein tekitij ika electricidad. Nejon tekit monekia kichiuaskej nochi ika imin may, uan monekia chikaualis uan no monekia maueliskej. ¿Ueli timonemiliaj Jesús kitemoti kuouit, kimayoui uan kititilatsa hasta kampa kitekitiltis? ¿Uan ompa kitamachiua, kitejteki uan kitalia vigas itech se kali, kitalilia puertas uan no kichijchiua muebles? Senkis tikneltokaj ke kimati pakilis tein teualkuilia ijkuak kuali se kichiua tekit.

⁷ Jesús no tel chikauak tekitik keman kichiuak itekiyo Dios. Eyi xiuit uan tajko kichiuak nejon tekit tein motelnekia. Kinekia maj tel miakej kiixmatikan kuali tanauatilmej, uan yejika amo tonalpolouaya, ta kualkan meuaya uan motsakuiliaya keman ipa tapoyauiaya (Lucas 21:37, 38; Juan 3:2). “Panotiaya kampa miakkej pueblojmej uan [...] pueblojtsitsin. Uan ompa Jesús tanojnotstinemia uan kintapouiaya in tagayot [...] Tajtoltsin de Dios.” (Lucas 8:1.) Tel miak kilómetros ojtokak, itech ojmej kampa onkaya talnex uan kiniuikiliaya kuali tanauatilmej taltikpakneminij.

8, 9. ¿Keniuj Jesús yolpakik ika nochi chikauak tekit tein kichiuak?

⁸ ¿Kiajsik yolpakilis ika nochi chikauak tekit tein kichiuaya? Kemaj. Yejua kemej eskia kitokak xinach tein kipia ke kiitas ika iTekiuajyo Dios, uan itech talmej taonkayaya uan monekia tapixkaskejya. Itekiyo Dios kiyolchikauaya uan tel senka kichikaualismakaya, ta kemansa hasta niono kiyoltokaya takuas porin kinekia kichiuas nejon tekit (Juan 4:31-38). Keman matamik itekiyo Dios nikan taltikpak, ¡tel yolpakik keman uelik kiiluij iTajtsin: “Nimitsonueyipanchiujtinemik ya nikan taltikpak. Uan [...] niktamichiuak ya in tekit ten Tejuatsin tinechonmaktilij ya maj nikchiuani”! (Juan 17:4.)

⁹ Yekmelauj Jiova uan Jesús techkauiliaj okachi kuali neskayot, ke uelis se ‘kiajsis yolpakilis ika nochi chikauak tekit tein se kichiua’. Netasojtalis tein tikinpialiaj, techolinia maj ‘tikchiuakan kemej’ Dios uan maj ‘tiktojtokakan [Cristo] ika miak nejmachkayot’ (Efesios 5:1, NM; 1 Pedro 2:21, NM). Axkan maj tikitakan keniuj uelis tikajsiskej yolpakilis ika chikauak tekit tein tikchiuaj.

KENIUJ TIKAJSISKEJ YOLPAKILIS IKA NOCHI CHIKAUAK TEKIT TEIN TIKCHIUAJ

10, 11. ¿Toni techpaleuis maj titekitikan ika se kuali tanemilil?

¹⁰ Tein tikchiuaj kemej Cristo, tikpialiaj se kuali tanemilil tekit uan tikchiuaj ika taixejekolis. Tiknekij maj techyolpakti uan maj kuali timomachilikan nochi tein uelis. Sayoj ke tel ouij techkisas nejon komo amo tikuelitaj tein tikchiuaj. Keman ijkon techpanotos, ¿keniuj uelis ‘tikajsiskej yolpakilis ika nochi chikauak tekit tein tikchiuaj’?

¹¹ Maj tikpiakan se kuali tanemilil. Xa amo nochipa uelis tikpataskej tekit tein tikpiaj, sayoj ke kemaj uelis tikpataskej totanemilil. ¿Keniuj? Se taman, komo tiknemiliaj keniuj kiita Dios tein tikchiuaj. Se neskayot, maski itech tekit tein tikchiuaj amo tiktanij miak tomin sayoj ke techpaleuia maj tikinixpanoltikan tochankauan, maj tikelnamikikan ke Jiova kiyolpaktia tein tikchiujtokej. Kemaj, ta itech iTajtol Dios kijtoua ke akin amo kintekipanoua ichankauan, “kachi ok yejua kimajpeuaskia in Tajtoltsin de Dios, [...] [ke] nekes ten amo taneltokanij” (1 Timoteo 5:8). Keman tikajsikamatij ke tekit tein tikchiuaj techpaleuia maj tikintekipanokan tochankauan kemej Dios technauatia, okachi kuali timomachiliaj uan okachi techolinia maj titekitikan ke oksekin totekitikaikniuan.

12. ¿Keyej tel kuali maj timochiuakan titekitinij uan maj timelaujkej itech tekit?

¹² Maj timochiuakan titekitinij uan maj timelaujkej. Tein tikchiuaj kemej Cristo moneki timochiuaskej titekitinij uan timomachtiskej kuali tikchiuaskej tekit. Tikchiuaskej nejon techualkuilia miak taman tein kuali. ¿Kemej toni? Semej, toteko uelis okachi kiuelitas kemej titekitij (Proverbios 12:24; 22:29). Uan komo timonejnemiltiaj timelaujkej uan amo tikichtekij manamikmej, tomin, niono titonalpolouaj, no techualkuilia tein kuali (Efesios 4:28). Kemej tikitakej itech capítulo 14, totekouan okachi totech takuaujtamatij. Uan maski yejuan amo kiitaskej ke kuali titekitinij, techyolpaktis tikmatiskej ke “amo teyi ongak tenika techteluilia toyolo ika tajtakol” uan tikyolpaktijtokej toDios akin tiktasojtaj (Hebreos 13:18; Colosenses 3:22-24).

13. ¿Toni kiualkui tokuali tachiualis itech tekit?

¹³ Maj tikelnamikikan ke tokuali tachiualis uelis kiueyitalis Dios. Keman kuali timonejnemiltiaj, oksekin niman kiitaj. ¿Toni mochiua ika nejon? “[Ti]kualnextijtiyouej in tanextililismej de Totajtsin Dios Totemakixtijkatsin.” (Tito 2:9, 10.) Kemaj, tokuali tachiualis kichiua maj okachi kiuelitakan taneltokalis tein melauak uan maj kiitakan ke tel kualtsin. ¡Tel kuali eskia maj se totekitikaikniuj kineki momachtis Biblia porin kuali timonejnemiltiaj! Uan maj amo tikelkauakan nejin tein okachi motelneki: ke amo teyi ijkuitik yolpakilis tein techualkuilia tikmatiskej ke tokuali nemilis kiyolpaktia Jiova uan kiueyichiua (xikonixtajtolti Proverbios 27:11; 1 Pedro 2:​12).

MONEKI TIKITASKEJ OX KUALI OSO AMO TEKIT TEIN TIKIXPEJPENAJ

14-16. ¿Katiyejua ome netajtanilmej tein motelneki maj timochiuilikan keman tikixpejpenaskej se tekit?

¹⁴ Biblia amo techiluia toni tekit uelis tikchiuaskej uan toni amo. Sayoj ke amo kijtosneki ke uelis tikseliskej tein yeski tekit, maski kipias tein amo kuali. Biblia techpaleuia maj tikixpejpenakan se tekit tein kuali uan tein techpaleuis, uan tein okachi tayekantok, tein amo kikualantia Dios (Proverbios 2:6). ¿Keniuj uelis tikmatiskej toni taman tekit uelis kikualantis Dios? Komo timochiuiliaj ome netajtanilmej tein motelneki.

¹⁵ ¿Nikchiujtoskia teisa itech nejon tekit tein Biblia kijtoua ke amo kuali? Biblia senkis techiluia ke amo kuali maj titachtekikan, titakajkayauakan uan maj tikchijchiuakan tiotsitsin (Éxodo 20:4; Hechos 15:29; Efesios 4:28; Apocalipsis 21:8). Yejika tikixtopeuaj nochi taman tekit kampa techtajtaniskej maj tikchiuakan teisa kemej nejon. Netasojtalis tein tikpialiaj Jiova techpaleuia maj amo tikselikan se tekit tein techuikas maj tiktapanauilikan itanauatiluan (xikonixtajtolti 1 Juan 5:3).

¹⁶ ¿Niteuantitoskia oso nitapaleuijtoskia maj mochiua tein amo kuali? Maj tiknemilikan ke techmakaj tekit kemej tachipauanij. Nejin tekit amo kijtosneki ke amo kuali. Axkan maj tiknemilikan ke techiluiaj ke titachipauaskej itech se kali kampa auilnemij. Maski semi melauak ke amo tikchiujtoskiaj nejon tachiualis tein pitsotik. Sayoj ke komo ompa titekitij mojmostaj, ¿melauj ke tikpaleuijtoskiaj tachiualismej tein Biblia senkis kijtoua ke amo kuali? (1 Corintios 6:9.) Yejika, kemej tiktasojtaj Jiova, amo tiknekij timonelojtoskej itech nion se tachiualis tein Biblia senkis kijtoua ke amo kuali.

17. 1) ¿Toni moneki tikitaskej uan ijkon uelis tikixpejpenaskej se tekit tein kuali? (Xikonita recuadro “¿Kuali maj nikseli nejin tekit?”.) 2) ¿Keniuj uelis tikchiuaskej maj totanemilil techpaleui maj tikixpejpenakan teisa tein kiyolpaktis Dios?

¹⁷ Tein techpaleuis maj tikixpejpenakan se tekit tein kuali, itech miakkan sayoj moneki tikitaskej ika nejmachkayot netajtanilmej tein moajsij itech párrafos 15 uan 16. Sayoj ke no moneki tikitaskej okseki taman ika miak nejmachkayot.b Amo uelis tikchiaskej maj takeual takuaujtamach uan tamatkej nochi techilui toni tekit tikseliskej uan toni amo. Tejuan moneki timomachtiskej tikitaskej ox kuali oso amo se tekit. Tikitakejya itech capítulo 2 ke moneki tikmachtiskej totanemilil. ¿Keniuj? Timomachtiskej Biblia uan tikitaskej keniuj tikuiskej itech tonemilis. Komo ijkon tikchiuaj, “kuali ueli[s] ya [ti]kixejekojtiyaskej de toni kuali tamachilis uan de toni amokuali tamachilis”, uan totanemilil techpaleuis maj tikixpejpenakan teisa tein kiyolpaktis Dios uan maj tiksentokakan itech inetasojtalis (Hebreos 5:14).

MAJ TITEKITIKAN IKA TAIXEJEKOLIS

18. ¿Keyej tel ouij techkisa titekitiskej ika taixejekolis?

¹⁸ Itech nejin “takuitapan [“itamian”, NM] tonalmej” kampa onkak “ueyi tajyouilis” uan semi ouij timonejnemiltiskej, tel ouij techkisa titekitiskej ika taixejekolis (2 Timoteo 3:1). Tikmatij ke semi ouij tikajsiskej se tekit uan tiksentokaskej tikpiaskej. Uan tikmatij ke moneki tikintekipanoskej tochankauan. Sayoj ke komo amo timoyekpiaj, uelis no tiknemiliskej ke moneki titeltekitiskej uan tiktelnekiskej timotomintiskej kemej oksekin. Uan nejon techtsakuilis maj tiktekitilikan Dios (1 Timoteo 6:9, 10). Maj tikitakan toni techpaleuis maj titekitikan ika taixejekolis uan maj tikyekitakan toni “ten kuali” oso tein tayekantok (Filipenses 1:10).

19. ¿Keyej kinamiki maj senkis titakuaujtamatikan iuan Jiova, uan toni amo tikauaskej maj techpano komo tikneltokaj ke techyekpias?

¹⁹ Maj titakuaujtamatikan iuan Jiova ika nochi toyolo (xikonixtajtolti Proverbios 3:​5, 6). ¿Melauj ke kinamiki maj senkis itech titakuaujtamatikan? Kemaj, ta yejuatsin techtasojta uan techyekpia (1 Pedro 5:7). Okachi kuali kimati ke tejuan tein techpoloua, uan amo keman techsenkaua (Salmo 37:25). Yejika, semi kuali maj tikelnamiktokan nejin tajtolmej tein techiluia Biblia: “Amo [...] xiktasojtatinemikan kachi ok in tomin. Ta, ximoyolpaktijtinemikan sayoj ika ten nankipiaj ya. Porin Totajtsin Dios techilia ijkuin: ‘Amo keman nimitssekokauas uan nion no nimitssenkauas moselti’” (Hebreos 13:5). Miakej tokniuan tein tekitij kemej precursores oso okse tekit ijkuitik, senkis uelij kijtouaj ke Dios nochipa temaka tein ika se moixpanoltis. Komo senkis tikneltokaj ke Jiova techmakas toixpanolis, amo tel senka timotekipachoskej keniuj tikintekipanoskej tochankauan (Mateo 6:25-32). Amo keman tikauaskej maj totekiuj techtsakuili titanojnotsaskej, tiyaskej nechikolmej uan tikchiuaskej okseki taman itekiyo Dios (Mateo 24:14; Hebreos 10:24, 25).

20. ¿Toni kijtosneki tikpiaskej toixtololo tein yektekiti, uan keniuj uelis tikpiaskej nejon?

²⁰ Maj tikpiakan toixtololo tein yektekiti (xikonixtajtolti Mateo 6:​22, 23). Ika okseki tajtolmej kijtosneki maj tinemikan ika amo miak taman. Se itatojtokakauj Cristo tein kipia iixtololo tein yektekiti, kiita sayoj se taman. ¿Toni nejin? Kichiuas itanejnekilis Dios. Komo ijkon tikpiaj totachialis, amo ika timotaliskej tiktemoskej se tekit kampa tiktaniskej miak tomin, niono tiktemoskej yekpanolis. Amo no ika timotaliskej tiktemoskej teisa tein okachi yankuik tein tetanejnektianij kinextiaj ke yejua teualkuilis yolpakilis. ¿Toni techpaleuis maj tikpiakan toixtololo tein yektekiti? Komo amo timotauikaltiaj ika tein amo moneki. Amo tiktemoskej miak taman tein techtonalpololtis uan tein techuikas maj sayoj itech titanemilijtokan. Kemej kijtoua Biblia, komo tikpiaj ‘totakualis uan totaken’ timotasojkamatiskej ika nejon (1 Timoteo 6:8). Kemaj, moneki maj tikpiakan se nemilis kemej uelisaj.

21. ¿Keyej moneki tikitaskej toni okachi tayekantok, uan toni moneki tiktayekanaltiskej?

²¹ Maj tiktayekanaltikan itekiyo Dios. Kemej amo ueli tiktamichiuaj nochi itech tonemilis, moneki tikitaskej toni tein okachi tayekantok. Komo amo, totonaluan tikuiskej itech okseki taman tein amo tayekantok uan tikauaskej tein okachi motelneki. ¿Uan toni tayekantok? Maski miakej kiteltayekanaltiaj kipiaskej se ueyi nemachtil uan se tekit kampa kitaniskej miak tomin, Jesús kiniluij imomachtijkauan maj kitemokan “achto iTekiuajyo Dios” (Mateo 6:33, NM). Tein tikchiuaj kemej Cristo tiktayekanaltiaj iTekiuajyo Dios. Kemej timonejnemiltiaj —tein tikixpejpenaj tikchiuaskej, tekimej tein tiknekij tikajsiskej uan tein mojmostaj tikchiuaj—, tiknextiaj ke iTekiuajyo Dios uan tikchiuaskej itanejnekilis, okachi tayekantok ke tikpiaskej miak taman tein onkak nikan taltikpak.

MAJ TITEKITIKAN CHIKAUAK ITECH TANOJNOTSALIS

22, 23. 1) ¿Katiyejua tekit tein tayekantok tikchiuaj, uan keniuj tiknextiaj ke tayekantok? (Xikonita recuadro “Nechyolpaktia tein nikixpejpenak nikchiuas”.) 2) ¿Keniuj moneki tikitaskej totekiuj?

²² Itekitikauan Dios kimatij ke amo uejkaua ejkos tamilis. Yejika kitayekanaltiaj se tekit tein kiselijtokej. ¿Toni nejin? Kiteixmatiltiskej iTekiuajyo Dios uan kinchiuaskej imomachtijkauan Jesús (Mateo 24:14; 28:19, 20). Senkis teuantij itech nejin tekit tein uelis kinimakixtis miakej, ijkon kemej Jesucristo kinkauilij neskayot. ¿Keniuj kitayekanaltiaj? Tel miakej teuantij ika ueyi tanejnekilis itech nejin tekit kemej tanojnotsanij. Oksekin mochiuaj precursores uan misioneros. Uan miakej tetatmej kinpaleuiaj imin koneuan maj kiixpejpenakan mochiuaskej precursores oso okse tekit ijkuitik, porin kimatij ke ijkon kijtoua Biblia. Kemej nochin tein yekmelauj kichiuaj kemej Cristo tanojnotsaj ika ueyi tanejnekilis, ¿uelis tikijtoskej ke kiaksij “yolpakilis ika nochi chikauak tekit tein kichiuaj”? Kemaj. Ta tiktekitiliskej Jiova ika nochi toyolo yejua tein okachi techualkuilia ueyi yolpakilis, tel kuali timomachiliaj uan tikseliaj miak tatiochiualismej (xikonixtajtolti Proverbios 10:22).

²³ Timiakej moneki titekitiskej miak horas itech se tonal uan ijkon uelis tikinixpanoltiskej tochankauan. Maski ijkon, uelis tikajsiskej yolpakilis ika nochi chikauak tekit tein tikchiuaj, ijkon kemej Jiova kineki. Komo tikitaj teisa kemej yejuatsin kiita uan tikchiuaj kemej kijtoua principios, uelis tiyolpakiskej ika totekiuj. Uan no, moneki amo tikauaskej maj nion teyi techtsakuili tikchiuaskej tekit tein okachi tayekantok. ¿Toni nejin? Tikteixmatiltiskej kuali tanauatilmej tein kichiuati iTekiuajyo Dios. Ijkon tiknextiskej ke tiktasojtaj Jiova uan tiknekij tiksentokaskej itech inetasojtalis.