TEIN TAJTANIJ AKIN TAIXTAJTOLTIAJ

¿Onkak tein kinextia ke xolal Jericó moaxkatilijkej itech amo miak tonalmej?

Josué 6:10-15, 20 kimelaua keniuj tateuianij israelitas moaxkatilijkej xolal Jericó. Kiyoualouayaj xolal sepa itech tonal, uan ijkon kichiujkej chikuasen tonalmej. Itech chikometika tonal, chikojpa kiyoualojkej xolal. Jiova kichiuak maj xitinikan uejueyi tepamit tein kiyoualouayaj Jericó, uan ompa, israelitas moaxkatilijkej xolal. ¿Onkak tein kinextia ke melauak nejin tein kijtoua Biblia?

Ne uejkauj, keman tateuianij kinekiaj moaxkatiliskej se xolal, kemansa kiyoualouayaj nochi xolal uan ijkon amo akin ueliskia cholos. Komo tateuianij miak tonalmej kiyoualojtoyaj xolal, takual ueliskia tamis. Keman tateuianij kalakiaj itech xolal, kiuikayaj nochi tein kinekiaj, hasta takual. Yejua ika, tatemouanij kiajsinij semi tepitsin takual oso nion teyi kampa moajsiaj xolalmej ompa Palestina tein ijkon moinaxkatilijkej. Sayoj ke kampa moajsia Jericó semi taman. Se amaix kijtoua ke tatemouanij kiajsinij miak tatet uan tapalkamej. Nejon amaix kimelaua ke amo semi moitani maj kiajsikan miak tatet itech xolalmej tein ijkon moinaxkatilijkej.

Biblia kijtoua ke tateuianij israelitas amo kiuikakej takual tein onkaya Jericó porin Jiova kinnauatijka maj amo kiuikanij (Jos. 6:17, 18). Biblia no kijtoua ke moaxkatilijkej xolal kemej itech marzo oso abril itech nejon xiuit, tepitsin satepan ke kisentilijkaj tatet. Yejua ika onkaya miak tatet itech xolal keman israelitas moaxkatilijkej (Jos. 3:15-17; 5:10). Nochi tatet tein kisentilijkaj uan kiajsinij kampa moajsia Jericó kiyeknextia ke xolal moaxkatilijkej itech amo miak tonalmej, ijkon kemej kijtoua Biblia.