José katka semej ikoneuan Jacob akin okachi nojnelmej. Iikniuan akin tayekanayaj kiitakej ke ininpopaj okachi kitasojtaya José. ¿Keniuj tiknemilia ke momachiliayaj? Yejuan kitelnexikoluiayaj uan kitauelitayaj. Se tonal, José kipiak seki takochitalis tein tel taman uan kintapouij iikniuan. Nejon takochitalismej kijtosnekiaj ke se tonal yejuan moixpiloskiaj iixpan. Yejua ika, okachiok kitauelitakej.

Se tonal, iikniuan José kintakualtijtoyaj ichkamej kampa ika moajsia xolal Siquem. Ompa, Jacob kititanik José maj kinitati iikniuan keniuj moajsiaj. Keman kiuejkaitakej, peuak kijtouaj: “Ne ualajtok ne takochitakej. ¡Maj tikmiktikan!”. Yejua ika kikitskijkej uan kipankajkaujkej itech se uejkatan talkoyok. Sayoj ke Judá, semej iikniuan, kijtoj: “Amo xikmiktikan. Okachi kuali maj tiknamakakan kemej takeual”. Uan yejua nejon kichiujkej. Kinnamakiltijkej ika 20 platajtomin seki tanamakanij kayomej Madián akin yayaj Egipto.

Satepan, iikniuan José kiajakijkej itilmaj itech iesyo se cabra, kiuikilijkej tilmaj ininpopaj uan kitajtanijkej: “¿Amo iaxka mokonetsin nejin?”. Jacob kinemilij ke se tapial kimiktij José uan moteltayokoltij. Amo akin uelia kiyolseuiaya.

Ompa Egipto, se takat ueyichiujkej akin monotsaya Potifar kikouak José kemej itakeual. Sayoj ke Jiova kipaleuiaya José. Potifar kiitak ke José kuali tekitia uan ke uelia iuan takuaujtamatia. Amo uejkauak, kiixtalij maj taixyekana itech nochi tein kipiaya.

Inamik Potifar kiitaya ke José kuakualtsin katka uan chikauak, uan mojmostaj kiluiaya maj iuan motekani. ¿Toni kichiuaya José? Kiixtopeuaya uan kiluiaya: “Amo, nejon amo kuali yetok. Noteko notech takuaujtamati, uan tejua tiinamik. Komo nimotekaskia mouan, nitajtakojtoskia iixpan Dios”.

Se tonal, inamik Potifar kitemoj kichikaujkauis José maj iuan motekani. Kikitskij ika itilmaj, sayoj ke José cholojteuak. Keman Potifar ajsik ichan, inamik kiluij ke José kinekia iuan motekas, sayoj ke nejon amo melauak katka. Potifar tel kualanik uan tanauatij maj kitsakuanij. Sayoj ke Jiova amo kielkauak José.

Keman José tsaktoya, faraón, akin tekiuajtia Egipto, kikochitak seki taman tein amo akin uelia kiajsikamatia. Se itekitikauj faraón kiluij ke José ueliskia kiluis toni kijtosnekia. Yejua ika faraón tanauatij maj niman kiuikilianij José.

Faraón kitajtanij: “¿Uelis tinechiluis toni kijtosneki tein nikochitak?”. José kinankilij: “Itech altepet Egipto onkas miak takual chikome xiuit, uan satepan onkas mayan chikome xiuit. Xikixpejpena aksa akin tamatkej maj kisentili takual uan ijkon taltikpakneminij amo momikiliskej”. Faraón kiluij: “¡Nimitsixpejpena tejua! Tejua tiyeski ojpatika takat akin okachi ueyichiujkej nikan Egipto”. Sayoj ke ¿keniuj kimatik José toni kijtosnekia tein kikochitak faraón? Jiova kipaleuij.

José kisentilij takual chikome xiuit. Satepan, peuak onka mayan itech nochi taltikpak, kemej kijtojka. Taltikpakneminij noyampa ualayaj kikouilikij takual. Ipopaj, Jacob, kimatik ke onkaya takual itech altepet Egipto uan yejua ika kintitanik ompa 10 ikoneuan maj no kikouatij.

Ikoneuan Jacob kiitatoj José, uan yejua niman kinixmatik. Sayoj ke iikniuan amo kiixmatkej. Moixpilojkej iixpan José, ijkon kemej yejua kikochitaka keman katka telpoch. Kemej kinekia kimatis ox kitauelitayajok, kiniluij: “Namejuan nantapijpianij uan nankiitakoj kanikauin uelis nankalakiskej itech toaltepeuj”. Yejuan kinankilijkej: “¡Amo titapijpianij! Tikayomej Canaán. Tikatkaj 12 tiiknimej, sayoj ke se momikilijya, uan xokoyot yetok iuan topopaj”. José kiniluij: “Xinechualkuilikan nanmokniuj akin xokoyot uan namechneltokilis”. Ompa, mokepkej ichan ininpopaj.

Ichankauan Jacob oksepa amo kipiayajok toni kikuaskej, uan yejua oksepa kintitanik ikoneuan maj yakan Egipto. Axkan kiuikakej Benjamín, ininikniuj akin xokoyot. Kemej José kinekia kimatis keniuj tanemiliayaj iikniuan, kitatij itatayiloni tachijchiuj ika plata itech ikoxtal Benjamín uan kinpantij ke kiichtekilijkej. Keman itakeualuan José kiajsikej itatayiloni itech ikoxtal Benjamín, iikniuan motelmoujtijkej. Kitataujtijkej José maj kintatsakuiltiani yejuan, uan amo Benjamín.

Ijkon José kiitak ke iikniuan mopatakaj. Yejua amo taxikojok, peuak choka uan kijtoj: “Nejua niJosé, nanmokniuj. ¿Yoltokok nopopaj?”. Iikniuan semi kimoujkakakkej. José kiniluij: “Amo ximotajtakoltikan tein nanechchiuilijkej. Dios nechualkuik nikan maj namechmakixti. Sayoj ke ¡ximoijsiuilikan!, xikualkuikan nopopaj”.

Iikniuan José yajkej ininchan kitapouitoj ininpopaj tein kinpanok uan kiuikakej Egipto. Satepan ke panokej miak xiujmej, José uan ipopaj oksepa moitakej.