Watchtower BIBLIOTECA ITECH TEPOS
Watchtower
BIBLIOTECA ITECH TEPOS
náhuatl del norte de Puebla
  • BIBLIA
  • AMAIXMEJ
  • NECHIKOLMEJ
  • w22 junio págs. 14-19
  • Inetasojtalis Jiova techpaleuia maj amo timouikan

Amo moajsi nion se video ika tein tikonixpejpenak

Xitechontapojpolui, se taman kitsakuilij maj amo moita video.

  • Inetasojtalis Jiova techpaleuia maj amo timouikan
  • Tanejmachtijkej. Kiteixmatiltijtok iTekiuajyo Jiova (tein ika timomachtiaj)—2022
  • Subtítulos
  • Tamachtilis tein iuan mouika
  • KENIUJ TIKINIXPANOLTISKEJ TOCHANKAUAN
  • KEMAN SE KINMOUILIA OKSEKIN
  • KEMAN TIKMOUILIAJ TIMOMIKILISKEJ
  • MAJ AMO TIMOUIKANOK
  • Maj timoyekpiakan ika tein techixnamiki “kuoutajtekuani”
    Tanejmachtijkej. Kiteixmatiltijtok iTekiuajyo Jiova 2015
  • ¿Keniuj uelis kuali tionmouikas iuan Dios?
    ¿Toni techmachtia Biblia?
Tanejmachtijkej. Kiteixmatiltijtok iTekiuajyo Jiova (tein ika timomachtiaj)—2022
w22 junio págs. 14-19

TAMACHTILIS 26

Inetasojtalis Jiova techpaleuia maj amo timouikan

“Jiova nouan yetok, amo nimouis” (SAL. 118:6).

NEKUIKATIL 105 “Dios Yejuatsin tetasojtatinemi”

TEIN MOITASa

1. ¿Toni uelis tikmouiliskej?

MAJ itech titanemilikan tein kipanouanij seki tokniuan. Néstor uan inamik, María, kinekiaj tapaleuiskej kampa okachi monekia maj motanojnotsa.b Sayoj ke para kichiuaskej, monekia kipataskej kemej nemiaj uan kimouiliayaj nejon. Kinemiliayaj ke amo yekmelauj yolpakiskiaj komo amo kipiayaj miak taman. Biniam, se tokniuj takat akin nemi itech se altepet kampa kinixnamikij itaixpantijkauan Jiova. Keman moauij kiajsikamatik ke yejua no kiixnamikiskiaj. Maski kimouiliaya nejon, okachi kimouiliaya toni kichiuaskiaj ichankauan keman kimatiskiaj ke mochiujka itaixpantijkauj Jiova. Uan Valeria kiluijkej ke kipiaya cáncer. Ijkon kemej kijtoua Biblia, yejua amo kinekia maj kitalilikan esti uan semi ouij kikisak kiajsis se tapajtijkej akin amo kitaliliskia esti. Valeria kimouiliaya mikis.

2. ¿Keyej moneki timochikauaskej amo semi timouiskej?

2 ¿Kemansa tionmomachiliani kemej tokniuan akin ininka titajtojkej? Timiakej xa kemaj. Sayoj ke komo nochipa timoujtokej uelis tikixpejpenaskej teisa tein kichiuas maj amo kuali timouikakanok iuan Jiova. Uan yejua nejon tein Satanás kineki. Keman timouij, Satanás uelis kitemos maj amo tikchiuakan tein Jiova technauatia, kemej tikteixmatiltiskej iTajtol (Apoc. 12:17). Satanás chikauak uan semi amo yolkuali. Sayoj ke onkak se taman tein uelis techpaleuis maj tikixnamikikan. Maj tikitakan toni.

3. ¿Toni techpaleuis maj amo timouikanok?

3 Satanás amo uelis techmojmoujtis komo senkis tikneltokaj ke Jiova techtasojta uan techpaleuia (Sal. 118:6). Kemej neskayot, akin kijkuiloj Salmo 118 kipanok seki taman tein semi kitekipachouaya. Miakej kitauelitayaj, uan sekin katkaj ueyichiuanimej (versículo 9 uan 10). Kemansa kitajyouiltijkej (versículo 13). Uan no, Jiova kitakakiltij (versículo 18). Maski ijkon, kijtoj itech inekuikatil: “Amo nimouis”. Maski Jiova kitakakiltijka yejua amo mouia porin kimatia ke yejuatsin semi kitasojtaya. Nejin salmista kimatia ke Jiova nochipa kipaleuiskia (Sal. 118:29).

4. ¿Toni amo tikmouiliskejok komo tikneltokaj ke Jiova techtasojta?

4 Moneki tikneltokaskej ke Jiova techtasojta tisejsemej. Nejon techpaleuis maj amo tikmouilikanok nejin eyi taman: 1) keniuj tikinixpanoltiskej tochankauan, 2) keman se kinmouilia oksekin uan 3) keman tikmouiliaj timomikiliskej. Tokniuan akin ininka titajtojkej itech párrafo 1 amo moujkejok porin kineltokayaj ke Jiova kintasojta.

KENIUJ TIKINIXPANOLTISKEJ TOCHANKAUAN

Se tokniuj takat yetok iuan iokichpil kampa kinketsaj lanchas, uan kitamottok se atarraya.

Se tokniuj takat iuan iokichpil, kinkitskiaj pescados para ika kinixpanoltis ininchankauan. (Xikonita párrafo 5).

5. ¿Toni ueliskia kintekipachos tokniuan akin kinixyekanaj ininchankauan? (Xikonita taixkopin ipeujyan amaix).

5 Tokniuan takamej akin kinixyekanaj ininchankauan kintekipachoua keniuj kinixpanoltiskej (1 Tim. 5:8). Komo tejuatsin tikonixyekana mochankauan, ika kokolis COVID-19 xa tikonnemiliaya ke amo tikonpiaskiaok tekit. Xa mitsontekipachouaya ox ueliskia tikonixpanoltis mochankauan oso ox tikonpiaskia kani nannemiskej. Uan xa tikonnemiliaya ke komo mitsonkuiliayaj tekit tein tikonpia, xa amo tikonajsiskiaok okse. Oso ijkon kemej Néstor uan María, akin achto ininka titajtojkej, xa tikonnemiliaya ke amo mitsonajsiskia tomin. Miakej ijkon momachilianij, yejua ika Satanás kichiuani maj amo kitekitilikanok Jiova.

6. ¿Toni kineki Satanás maj tiknemilikan?

6 Satanás kineki maj tiknemilikan ke Jiova amo toka motekipachoua uan ke amo techpaleuis maj tikinixpanoltikan tochankauan. Komo peua tikneltokaj nejon, xa tiknemiliskej ke moneki tikchiuaskej tein yeski para amo techkuiliskej totekiuj, maski amo tikchiuaskejok tein Biblia kijtoua.

7. ¿Toni techiluia Jesús?

7 Sayoj Jesús kuali kiixmati Jiova. Yejua ika senkis techiluia nejin: “Namoueyitajtsin Dios ipa kuali kimatok ya toni namechpoloa achtopa ya ke [...] nankitajtaniskiaj” (Mat. 6:8). Uan Jesús no kimati ke Jiova techmakas tein monekis. Tejuan tiichankauan Jiova uan yejuatsin techixyekana. Yejua ika, senkis tikmatij ke kichiuas tein kiniluia maj kichiuakan itech 1 Timoteo 5:8 akin kinixyekanaj ininchankauan.

Se tokniuj siuat iuan isiuapiltsin tapaktokej. Se tokniuj uan inamik kiuikiliaj seki taman tein kikuaskej.

Jiova techmakas tein monekis. Xa kichiuas maj tokniuan techpaleuikan. (Xikonita párrafo 8).d

8. 1) ¿Toni techpaleuis maj amo techtekipacho keniuj tikinixpanoltiskej tochankauan? (Mateo 6:31-33). 2) ¿Keniuj uelis tikchiuaskej kemej tokniuj takat uan inamik akin nesij itech taixkopin?

8 Komo tikneltokaj ke Jiova techtasojta tejuan uan tochankauan, titakuaujtamatiskej ke yejuatsin techmakas tein monekis (xikonixtajtolti Mateo 6:31-33). Jiova kineki techmakas tein moneki uan techmaka semi miak. Keman kichijchiuak taltikpak, amo sayoj kichijchiuak tein ika tiyoltoskiaj, ta kichijchiuak miak taman tein kualtsin tein ika tiyolpakiskiaj (Gén. 2:9). Uan maski kemansa sayoj tikpiaskej tein ika timoixpanoltiskej nejon tonal, maj tiktasojkamatilikan Jiova porin yejuatsin techmaka (Mat. 6:11). Maj tikelnamikikan ke Jiova uelis techmakas axkan okachi ke tein tikauaj, uan satepan kichiuas maj tinemikan nochipaya. Yejua nejon tein kiitakej Néstor uan María (Is. 65:21, 22).

9. ¿Toni mitsonmachtia tein kichiujkej Néstor uan María?

9 Néstor uan María akin kayomej Colombia, semi kuali nemiaj. Yejuan kijtouaj: “Tiknekiaj tikauaskej seki taman tein tikpiayaj para ueliskia okachi titapaleuiskej itech tanojnotsalis, sayoj ke timouiaj. Tiknemiliayaj ke amo tiyolpakiskiaj”. ¿Toni kinpaleuij? Itech tanemilijkej keniuj Jiova kinnextilijka ke kintasojtaya. Kemej takuaujtamatkej ke Jiova kinpaleuiskia, kikaujkej inintekiuj kampa semi kuali kintaxtauiayaj. No kinamakakej ininchan uan yajkej nemitoj kampa okachi monekia maj motanojnotsa. ¿Keniuj momachiliaj ika tein kichiujkej? Néstor kijtoua: “Tikitanij ke yekmelauj mochiua tein kijtoua Mateo 6:33. Amo keman techpolouani teisa. Tein melauj, axkan okachi tiyolpakij”.

KEMAN SE KINMOUILIA OKSEKIN

10. ¿Keyej tikinmouiliaj oksekin?

10 Taltikpakneminij nochipa kinchiuilianij tein amo kuali oksekin (Ecl. 8:9). Kemej neskayot, miakej akin kipiaj tanauatil tetajyouiltiaj, sekin tateuiaj, kinuijuikaltiaj uan kinmojmoujtiaj akin iniuan momachtiaj oso kintajyouiltiaj hasta ininchankauan. Nochi nejin kichiua maj tikinmouilikan oksekin. ¿Toni kichiua Satanás keman kiita nejon?

11, 12. ¿Toni kitemoua kichiuas Satanás keman kiita ke tikinmouiliaj oksekin?

11 Keman tikinmouiliaj oksekin Satanás kitemoua maj amo titanojnotsakanok oso maj amo tikchiuakanok seki taman tein Jiova technauatia. Kichiuani maj seki tekiuanij amo techkauakan maj tikueyichiuakan Jiova kemej ipa tikchiuaj uan maj techtajyouiltikan (Luc. 21:12; Apoc. 2:10). Itech nejin taltikpak kampa taixyekana Satanás, miakej kintakajkayauiliaj itaixpantijkauan Jiova. Akin kineltokaskej nejon xa techtauelitaskej, techkejkeloskej oso techtajyouiltiskej (Mat. 10:36). Amo tikmoujkaitaj maj Satanás kichiua nejon porin ijkon kichiuaya itech yekinika siglo (Hech. 5:27, 28, 40).

Se tokniuj telpoch nejnentok calle, youi nechikol. Moita yolseujtok maski itatuan yetokej kaltenoj kitsajtsilijtokej.

Jiova kisentokas techtasojtas hasta keman tochankauan techixnamikiskej. (Xikonita párrafos 12 hasta 14).e

12 Sayoj ke, Satanás amo sayoj kitemoua maj timouikan keman techixnamikij tekiuanij. Sekin kimouiliaj keniuj kinitaskej ininchankauan komo mochiuaj itaixpantijkauan Jiova. Okachi kimouiliaj nejon ke maj kintajyouiltikan. Semi kintasojtaj ininchankauan uan kinekij maj kiixmatikan uan maj kitasojtakan Jiova, yejua ika kinyolkokoua keman kikakij ke amo kuali ika tajtouaj yejuatsin uan itekitikauan. Sayoj ke kemansa, akin achto kualaniaj satepan peuak momachtiaj Biblia. ¿Uan toni tikchiuaskej komo semej tochankauan techtauelita uan nion techitasnekiok?

13. ¿Keyej moneki maj tikneltokakan ke Jiova semi techtasojta keman oksekin techixnamikiskej? (Salmo 27:10).

13 ¡Semi kualtsin uan techyolchikaua tein kijtoua Salmo 27:10! (Xikonixtajtolti). Komo nochipa tikelnamikij ke Jiova semi techtasojta, amo timouiskej keman oksekin techixnamikiskej uan tikneltokaskej ke Jiova techtatiochiuis porin titaxikouaj. Jiova techmakas nochi tein techpaleuis maj tiyoltokan, techpaleuis maj tiyolseujtokan, maj tiyolpakikan uan maj kuali timouikakan iuan. Biniam, akin ika titajtojkej itech párrafo 1 kiitak ke melauj nejon.

14. ¿Toni mitsonmachtia tein kipanok Biniam?

14 Biniam mochiuak itaixpantijkauj Jiova maski kimatia ke tekiuanij semi kiixnamikiskiaj. Yejua kijtoua: “Tekiuanij semi kintajyouiltiayaj itaixpantijkauan Jiova, okachiok ke tein niknemiliaya. Sayoj ke okachi nikmouiliaya maj nechixnamikinij nochankauan. Nikmouiliaya maj nopopaj amo kuali nechitaniok uan maj nochankauan amo nechpoujkaitanijok porin nimochiuak itaixpantijkauj Jiova”. ¿Toni kipaleuij maj amo mouiniok? Kielnamikik ke Jiova kitasojta uan ke yejuatsin nochipa kinyekpia akin kitasojtaj. Biniam kijtoua: “Peuak itech nitanemilia keniuj Jiova kinpaleuiani akin taxikouanij maski amo semi kipiaj tomin, akin kinchikoitaj uan akin kintajyouiltianij. Nikmatia ke komo amo keman nikauaya Jiova, yejuatsin nechtatiochiuiskia. Miakpa nechtsakkej uan nechtajyouiltijkej. Senkis nikitak ke keman amo tikauaj Jiova, yejuatsin nochipa techpaleuia”. Biniam kiitak Jiova kemej ipopaj uan tokniuan kemej ichankauan.

KEMAN TIKMOUILIAJ TIMOMIKILISKEJ

15. ¿Keyej tikmouiliaj timomikiliskej?

15 Biblia kijtoua ke mikilis kemej yeskia aksa akin techixnamiki (1 Cor. 15:25, 26). Itech titanemiliskej mikilis uelis kichiuas maj semi timotekipachokan, okachiok komo tejuan oso semej tochankauan mokokoua. ¿Keyej tikmouiliaj timomikiliskej? Porin Jiova kichiuak maj tiknejnekikan tinemiskej nochipaya (Ecl. 3:11). Sayoj ke keman tikmouiliaj timomikiliskej no uelis techpaleuis, porin kichiuas maj tiknekikan tikuaskej tein tepaleuia, maj tikchiuakan ejercicio, maj amo tikchiuakan seki taman tein ika ueliskia timomikiliskej uan maj timopajtikan keman monekis.

16. Kemej tikmouiliaj timomikiliskej, ¿toni kichiua Satanás?

16 Satanás kimati ke tikpatiuitaj tonemilis uan amo tiknekij timomikiliskej. Yejua ika kijtoua ke tikauaskej tein yeski para amo timomikiliskej, hasta tikauaskej Jiova (Job 2:4, 5). ¡Sayoj ke nejon amo melauj! Yejua ueli kichiua maj timomikilikan uan kemej tikmouiliaj timomikiliskej ika kitemoua maj tikauakan Jiova (Heb. 2:14, 15). Kemansa, Satanás kichiua maj sekin techiluikan ke komo amo tikauaj Jiova, techmiktiskej. Oso keman ijsiujka tikokolispeuaj, no uelis kitemos maj tikauakan Jiova. Xa tapajtianij oso tochankauan akin amo itaixpantijkauan Jiova, techchikaujkauiskej maj tiktapanauilikan itanauatil Dios uan maj techtalilikan esti. Oso xa aksa techiluis maj timopajtikan ika seki taman tein kitapanauilia itanauatiluan Dios.

17. Kemej kijtoua Romanos 8:37-39, ¿keyej amo moneki tikmouiliskej timomikiliskej?

17 Amo akin kineki momikilis, sayoj ke tikmatij ke komo timomikiliaj Jiova kisentokas techtasojtas (xikonixtajtolti Romanos 8:37-39). Jiova kinelnamiki kemej yeskia yoltoskiajok akin kuali iuan mouikayaj uan momikilijkejya (Luc. 20:37, 38). Semi kineki kichiuas maj oksepa nemikan (Job 14:15). Jiova kitemakak se taman tein semi kipia ipatiuj porin kineki maj tinemikan nochipaya (Juan 3:16). Kuali tikmatij ke Jiova semi techtasojta uan techyekpia. Yejua ika keman timokokouaj oso techiluiaj ke techmiktiskej amo tikauaj, ta tiktajtaniaj maj techyolseui, maj techmaka tamatilis uan maj techpaleui maj titaxikokan. Yejua nejon tein kichiujkej Valeria uan inamik (Sal. 41:3).

18. ¿Toni mitsonmachtia tein kipanok Valeria?

18 Keman Valeria kipiaya 35 xiujmej kiluijkej ke kipiaya se cáncer tein semi tetajyouiltia uan tein amo semi miakej kinkui. Maj tikitakan keniuj inetasojtalis Jiova kipaleuij maj amo kimouili momikilis. Yejua kijtoua: “Nochi mopatak keman nechiluijkej toni nikpiaya. Monekia maj nechtekikan. Nikinitato miakej tapajtianij, sayoj ke nochin kinekiaj kikuiskej esti. Nimouia, sayoj ke kemej niknekia niktakamatis Dios ¡amo nikauaskia maj nechtalilikan esti! Jiova miakpaya nechnextilijka ke nechtasojta, uan axkan nejua ueliskia niknextilis ke no niktasojtaya. Keman nechmatiltiayaj teisa tein amo kuali, okachi nikixtaliaya nikyolpaktis Jiova uan amo Satanás. Satepan uelik nechtekkej uan amo monekik esti. Nimokokouaok sayoj ke Jiova kisentoka techmaka tein moneki. Kemej neskayot, seki tonalmej achto ke nechiluiskiaj ke nikpiaya cáncer, itech nechikol tikitakej tamachtilis ‘Maj tikixnamikikan ouijkayomej ika yolchikaualis’.c Semi techpaleuij ijkuak. Miakpa tikixtajtoltijkej. Nonamik uan nejua tiyolseujtoyaj uan kuali titaixpejpenkej porin semi techpaleuijkej tamachtilismej kemej nejin, uan no porin timochikaujkej tiksentokaskej tiaskej nechikolmej uan titanojnotsaskej”.

MAJ AMO TIMOUIKANOK

19. ¿Toni panos amo uejkaua?

19 Ika inepaleuil Jiova, tokniuan itech nochi taltikpak taxikouanij keman kipanouanij uejueyi ouijkayomej uan kiixnamikinij Satanás (1 Ped. 5:8, 9). Tejuatsin no uelis ijkon tikonchiuas. Amo uejkaua, Jiova kiniluis Jesús uan akin iuan tekiuajtiskej maj kiixpolokan “in chikaualisme den amokuali” (1 Juan 3:8). Satepan, itekitikauan Dios nikan taltikpak kiitaskej keniuj mochiua nejin: “Amo teyi tikmouilis uan nion teyi kichiuas ximomoujti” (Is. 54:14; Miq. 4:4). Kemej nejon tonal ayamo ejko, maj timochikauakan amo timouiskejok.

20. ¿Toni techpaleuis maj amo timouikanok?

20 Moneki okachi tikneltokaskej ke Jiova kintasojta uan kinyekpia itekitikauan. ¿Toni uelis techpaleuis? Maj itech titanemilikan keniuj Jiova kinyekpiani itekitikauan uan maj tikintapouikan oksekin. Maj no tikelnamikikan keniuj techpaleuiani tejuan keman tikpanouanij ouijkayomej. Jiova techpaleuis maj amo timouikanok (Sal. 34:4).

¿KENIUJ INETASOJTALIS JIOVA UELIS TECHPALEUIS...

  • ... keman tikmouiliaj keniuj tikinixpanoltiskej tochankauan?

  • ... keman se kinmouilia oksekin?

  • ... keman tikmouiliaj timomikiliskej?

NEKUIKATIL 129 Maj tiksentokakan titaxikokan

a Kemansa kuali yetok maj timouikan porin ijkon amo techpanoua tein amo kuali. Sayoj ke kemansa amo techpaleuia. ¿Keyej? Porin keman timouij, Satanás uelis kichiuas maj tikixpejpenakan teisa tein amo kuali. Yejua ika, moneki timochikauaskej amo semi timouiskej. Kemej tikitaskej itech nejin tamachtilis, techpaleuis komo tikneltokaj ke Jiova techpaleuia uan ke techtasojta.

b Mopatakej seki tokaymej.

c Xikonita amaix Tanejmachtijkej 1 metsti octubre xiuit 2012, páginas 11 hasta 15.

d TEIN NESI ITECH TAIXKOPIMEJ: Se tokniuj takat uan inamik kiuikiliaj seki taman tein kikuaskej se tokniuj siuat akin semi tekiti uan ichankauan.

e TEIN NESI ITECH TAIXKOPIMEJ: Itatuan se telpoch amo kiuelitaj maj kitekitili Jiova, sayoj ke telpoch takuaujtamati ke Jiova kipaleuia.

    Amaixmej itech Náhuatl (norte de Puebla) (2003-2025)
    Kampa se kisa
    Kampa se kalaki
    • náhuatl del norte de Puebla
    • Maj se kipanoltili okse
    • Kampa se kipata kemej se kineki
    • Copyright © 2025 Watch Tower Bible and Tract Society of Pennsylvania
    • Kemej kinamiki motekitiltis
    • Keniuj tikyekpiaj tein tikseliaj
    • Kampa mopata seki taman
    • JW.ORG
    • Kampa se kalaki
    Maj se kipanoltili okse