TAMACHTILIS 46
Jehová kiyekijtoua ke kichiuas xochital itech taltikpak
“Akin kineki maj kitatiochiuikan nikan taltikpak, maj kitajtani akin yekmelauj Dios” (IS. 65:16).
NEKUIKATIL 3 Tinechyolchikaua uan motech nitakuaujtamati
TEIN MOITASa
1. ¿Toni tanauatijkej Isaías kinmatiltij israelitas?
TANAUATIJKEJ Isaías kijtoj ke Jehová yejua “akin yekmelauj Dios”. Itech Hebreo, tajtol “yekmelauj” kijtosneki “amén” (Is. 65:16; nota). Uan amén kijtosneki “maj ijkon mochiua” oso “mochiuas”. Itech Biblia, miakpa mokui nejin tajtol para kinextis ke tein kijtouaj Jehová oso Jesús yekmelauj mochiua. Yejua ika, tein Isaías kinekia kinajsikamatiltis israelitas yejua nejin: tein Jehová achtook kijtoua nochipa mochiua. Jehová ijkon kinextiani porin kichiuani nochi tein motenkauani.
2. ¿Keyej uelis tikneltokaskej ke Jehová yekmelauj kichiuas tein motenkaua? ¿Katiyejua netajtanilmej tiknankiliskej itech nejin tamachtilis?
2 ¿Uan tejuan? ¿Uelis tikneltokaskej ke Jehová kichiuas tein motenkaua? Kemej 800 xiujmej satepan ke nemik Isaías, tatitanil Pablo kimelauak keyej uelis tikneltokaskej ke yekmelauj mochiuas tein Jehová motenkaua. Kijtoj: “Dios amo keman takajkayaua” (Heb. 6:18). Maj tiknemilikan nejin: komo itech se ameyal kisa tsopekat, amo uelis kisas poyekat, ¿melauj? No ijkon, kemej Jehová nochipa kijtoua tein melauak, amo ueli takajkayaua. Yejua ika uelis senkis tikneltokaskej nochi tein kijtoua, uan no uelis tikneltokaskej tein kijtoua ke kichiuas satepan. Itech nejin tamachtilis tiknankiliskej nejin netajtanilmej: ¿toni motenkaua Jehová ke kichiuas amo uejkaua? uan ¿keniuj kinextiani ke tein motenkaua yekmelauj kichiuas?
¿TONI MOTENKAUANI JEHOVÁ?
3. 1) ¿Toni tein Jehová motenkaua semi tikpatiuitaj? (Apocalipsis 21:3, 4). 2) ¿Toni kijtouaj sekin keman tikiniluiaj tein Dios motenkaua?
3 Axkan ika titajtotij tein Jehová motenkaua uan nejin semi tikpatiuitaj tinochin akin tiktekitiliaj Dios noyampa taltikpak (xikonixtajtolti Apocalipsis 21:3, 4). Jehová motenkaua ke “amo akin momikilisok, nion tayokoyas nion chokas nion tajyouis”. Nejin versículos semi tikuij keman titanojnotsaj para tikinyolseuiskej oksekin uan tikiniluiskej keniuj tinemiskej itech xochital. ¿Toni kijtouaj sekin keman kikakij nejin? Yejuan xa kijtouaj: “Kuali mokaki, sayoj ke xa amo mochiuas”.
4. 1) ¿Toni ome taman kimatia Jehová? 2) Jehová motenkaua ke kichiuas se xochital, ¿toni okse taman no techiluia?
4 Keman Jehová kichiuak maj tatitanil Juan kijkuilo tein yejuatsin kichiuas itech xochital, kimatia ke axkan tikuiskiaj para ika titanojnotsaskej. Jehová no kimatia ke miakej ouij kinkisaskia kineltokaskej ke yekmelauj kipatas miak taman (Is. 42:9; 60:2; 2 Cor. 4:3, 4). Komo ijkon, ¿keniuj uelis tikinpaleuiskej oksekin maj kineltokakan ke yekmelauj mochiuas tein moijtoua itech Apocalipsis 21:3, 4? ¿Uan toni moneki tikchiuaskej para okachi titakuaujtamatiskej iuan Jehová uan tikneltokaskej ke kichiuas tein motenkaujtok? Jehová amo sayoj kijtoj tein kichiuas satepan, ta no kijtoj keyej uelis tikneltokaskej ke yekmelauj kichiuas tein motenkaua. ¿Toni kinextia ke uelis tikneltokaskej?
JEHOVÁ KINEXTIA KE KICHIUAS TEIN MOTENKAUA
5. ¿Katiyejua versículos kinextiaj ke uelis titakuaujtamatiskej ke Jehová kichiuas tein motenkaua, uan toni kijtouaj?
5 Biblia kijtoua keyej uelis tikneltokaskej ke Jehová kichiuas xochital. Itech versículos tein tikitatij kijtoua: “Akin tokotsyetoya itech ueyi silla kijtoj: ‘¡Xikita! Nikchijchiujtok nochi yankuik’. No kijtoj: ‘Xikijkuilo nejin porin tein nikijtoua takuaujtamach uan melauak’. Uan nechiluij: ‘¡Motamichiuakya! Nejua nipeua uan nejua nitami’” (Apoc. 21:5, 6a).
6. ¿Keniuj tein kijtoua Apocalipsis 21:5, 6 techpaleuia maj okachi titakuaujtamatikan ke Jehová kichiuas tein motenkaua?
6 ¿Keyej nejin tajtolmej techpaleuia maj okachi titakuaujtamatikan ke Jehová kichiuas tein motenkaua? Itech nejin versículos tikitaj ke Jehová kemej yeskia kifirmaroskia se amat tein kinextia ke yekmelauj kichiuas tein motenkaua.b Itech Apocalipsis 21:3, 4 kijtoua toni motenkaua Jehová, uan itech versículos 5 uan 6 kemej yeskia kifirmarojya tein motenkaua, uan ijkon kinextia ke yekmelauj kichiuas. Maj tikitakan keniuj Jehová kinextia ke uelis iuan titakuaujtamatiskej.
7. ¿Akoni peua tajtoua itech versículo 5, uan keyej semi kualtsin?
7 Itech versículo 5 ijkon peua kijtoua: “Akin tokotsyetoya itech ueyi silla kijtoj” (Apoc. 21:5a). Itech amatajkuilol Apocalipsis moajsi sayoj exkan kampa tajtoua Jehová, yejua ika nejin tajtolmej amo kemej okseki. Nejin kijtosneki ke yejua Jehová akin motenkauak tein kichiuaskia uan amo se ángel nion Jesús. Nejin techpaleuia maj okachi tikneltokakan tein satepan ika tajtoua Apocalipsis porin Jehová “amo ueli takajkayaua” (Tito 1:2). Yejua ika uelis tikneltokaskej tein kijtoua Apocalipsis 21:5, 6.
“¡XIKITA! NIKCHIJCHIUJTOK NOCHI YANKUIK”
8. ¿Toni kijtoua Jehová para kinextis ke kichiuas tein motenkaujtok? (Isaías 46:10).
8 Axkan maj ika titajtokan tajtol “¡Xikita!” (Apoc. 21:5). Itech tajtol griego, miakpa mokuik tajtol “¡Xikita!” itech amatajkuilol Apocalipsis. Se amatajkuilol kijtoua ke nejin tajtolmej mokui para kiluis akin taixtajtoltia “maj okachi kuali kiixtajtolti tein kijtoti satepan”. ¿Uan toni kijtoua satepan? Dios kijtoua: “Nikchijchiujtok nochi yankuik”. Maski ayamo mochiua tein Jehová motenkaua, yejuatsin kijtoua ke kichiujtokya porin kimati ke yekmelauj kichiuas (xikonixtajtolti Isaías 46:10).
9. 1) ¿Toni kijtosneki tajtolmej “nikchijchiujtok nochi yankuik”? 2) ¿Toni kipanos “iluikak” uan “taltikpak” tein axkan moajsij?
9 Maj tikitakan okse taman tein no ika tajtoua Apocalipsis 21:5: “Nikchijchiujtok nochi yankuik”. Itech nejin capítulo ika tajtoua ome taman tein Jehová kichiuas. Yekinika, Jehová kiixpolos nochi tein amo kuali. Ojpatika, kichiuas maj sayoj mochiua tein kuali. Apocalipsis 21:1 kijtoua: “Iluikak uan taltikpak tein achto yetoyaj ixpoliujkej”. ‘Iluikak tein achto yetoya’ kinixnextia tekiuanij akin Satanás uan amokuali ejekamej kinixyekanaj (Mat. 4:8, 9; 1 Juan 5:19). Keman Biblia kikui tajtol “taltikpak” miakpa kiteajsikamatiltia akin ompa nemij (Gén. 11:1; Sal. 96:1). Yejua ika, ‘taltikpak tein achto yetoya’ kinixnextia akin amo yolkualmej akin axkan nemij. Nejin kijtosneki ke Jehová amo kiyekchijchiuati “iluikak” uan “taltikpak”, ta senkis kiixpoloti uan kiixpatas ika se “yankuik iluikak uan se yankuik taltikpak”, oso ke se yankuik taixyekanalis kinixyekanas akin yolkualmej.
10. ¿Toni okse taman kichiuas Jehová para maj mochiua “nochi yankuik”?
10 ¿Toni okse taman kichiuas Jehová para maj mochiua “nochi yankuik”? (Apoc. 21:5). Jehová kichiuas maj itech taltikpak oksepa mochiua takualtsinkan, uan maj yolik kipolojtiakan tajtakol akin ompa nemiskej. Ijkon kemej kijtojka Isaías, nochi taltikpak mochiuas se xochital uan yeski tel takualtsinkan kemej katka xochital Edén. Uan yejuatsin kichiuas maj tisejsemej timochiuakan kemej yeskia tiyankuikej porin techpajtis. Jehová kinpajtis akin koxojmej, akin amo ueli tachiaj uan akin amo ueli takakij, uan hasta kichiuas maj oksepa nemikan akin momikilijkejya (Is. 25:8; 35:1-7).
“TAKUAUJTAMACH UAN MELAUAK” UAN “¡MOTAMICHIUAKYA!”
11. ¿Toni Jehová kinauatij Juan, uan keyej?
11 ¿Toni no kijtoj Jehová para tikneltokaskej ke kichiuas tein motenkaua? Yejuatsin kiluij Juan: “Xikijkuilo nejin porin tein nikijtoua takuaujtamach uan melauak” (Apoc. 21:5). Jehová amo sayoj kinauatij Juan maj kijkuilo, ta kiluij keyej monekia kijkuilos. Kiluij: “Takuaujtamach uan melauak”. Nejin kijtosneki ke tein Dios kijtoua takuaujtamach uan yekmelauj kichiuas. ¡Tel kuali porin Juan kitakamatik Jehová uan kijkuiloj tein kinauatij! Kemej kijkuiloj tein kiluijka, ueli tikixtajtoltiaj ke Dios motenkauak kichiuas se xochital, uan no ueli itech titanemiliaj nochi tatiochiualismej tein tikpiaskej satepan.
12. ¿Keyej Jehová ueli kijtoua ke “¡Motamichiuakya!”?
12 ¿Toni kijtoua Jehová satepan? “¡Motamichiuakya!” (Apoc. 21:6). Jehová tajtoua kemej yeskia mochiuakya nochi tein motenkaua itech xochital, ¿keyej? Porin nion teyi uelis kitsakuilis maj kichiua tein kiixtalijtok. Tein Jehová kisentoka kijtoua no techmatiltia ke yekmelauj kichiuas tein motenkaujtok. ¿Toni kijtoj?
“NIALFA UAN NIOMEGA”
13. ¿Keyej Jehová kijtoua “niAlfa uan niOmega”?
13 Kemej tikitakejya, Jehová expa tajtoj keman kichiuak maj Juan kiitani seki taman (Apoc. 1:8, nota; 21:5, 6; 22:13). Itech nochi, Jehová kijtoj: “NiAlfa uan niOmega”. Itech tajtol griego, alfa yejua letra tein ika peua abecedario uan omega tein ika tami. Keman Jehová kijtoj “niAlfa uan niOmega” kijtosneki ke matami keman kipeualtia teisa.
Jehová matami tein kipeualtia. (Xikonita párrafo 14 uan 17).
14. 1) Xikonijto kemanian Jehová kemej yeskia kijtoj “Alfa” uan kemanian kemej yeskia kijtos “Omega”. 2) ¿Toni techmatiltia Jehová itech Génesis 2:1-3?
14 Satepan ke Jehová kinchijchiuak Adán uan Eva, kijtoj keniuj kinekia maj tinemikan uan toni kinekia maj mochiua nikan taltikpak. Biblia kijtoua: “Dios kintiochiuak uan kiniluij: ‘Xikinpiakan miakej namokoneuan, ximomiakilikan, ximomoyauakan itech nochi taltikpak uan xikyekpiakan’” (Gén. 1:28). Keman Jehová yekinika kijtoj tein kiixtalijtoya kemej yeskia kijtoskia “Alfa”. Keman mochiuasya tein kiixtalijtok uan ininkoneuan Adán uan Eva akin tatakamatij kipexontiskej taltikpak uan kichiuaskej se xochital, ijkuak kemej yeskia kijtos “Omega”. Keman Jehová kitamichijchiuak “iluikak, taltikpak uan nochi tein onkak”, kinextij ke yekmelauj kichiuas tein kiixtalijtok. ¿Keniuj kichiuak? Keman moxelouilij chikometika tonal (xikonixtajtolti Génesis 2:1-3). ¿Toni kijtosneki? Ke itech chikometika tonal Jehová kichiuak maj tinemikan kemej kiixtalijtoya uan maj nikan taltikpak mochiuani tein kinekia. Yejua ika keman moxelouilij chikometika tonal kemej yeskia kijtoskia ke tein motenkaujtok, mochiuas keman tamis nejon tonal.
15. ¿Keyej xa moitaya ke Jehová amo ueliskiaok kichiuas tein kiixtalijtoya?
15 Satepan ke Adán uan Eva kiixnamikkej Jehová, mochiujkej tajtakolejkej, uan ininkoneuan no mochiujkej tajtakolejkej uan peuak momikiliaj (Rom. 5:12). Yejua ika xa moitaya ke amo ueliskia kipexontiskej taltikpak akin kitakamatij Jehová uan amo tajtakolejkej. ¿Uelik Satanás kitsakuilij Jehová maj amo kichiua tein kiixtalijtok? Amokuali xa kinemilij ke Jehová amo ueliskiaok kichiuas tein motenkaujka. Xa no kinemilij ke Jehová ueliskia kinixpolos Adán uan Eva, uan kichijchiuas okse takat uan isiuatsin akin amo tajtakolejkej uan kichiuaskiaj tein yejuatsin kiixtalijka. Sayoj ke komo ijkon kichiuaskia, Amokuali kijtoskia ke Jehová takajkayaua. ¿Keyej? Porin itech Génesis 1:28, Jehová kiniluijka Adán uan Eva ke ininkoneuan kipexontiskiaj taltikpak.
16. ¿Keyej Satanás xa ueliskia kijtos ke Jehová amo ueli kichiua tein kiixtalia?
16 ¿Toni xa no kinemilij Amokuali ke ueliskia kichiuas Jehová? Xa kinemilij ke Jehová kikauaskia maj Adán uan Eva kinpianij konemej, sayoj ke nochipa tajtakolejkej yeskiaj (Ecl. 7:20; Rom. 3:23). Sayoj ke komo ijkon panoskia, Amokuali ueliskia kijtos ke Jehová amo ueli kichiua tein kiixtalia. ¿Keyej? Porin itech taltikpak amo nemiskiaj akin amo tajtakolejkej.
17. ¿Toni kichiuak Jehová keman Satanás, Adán uan Eva kiixnamikkej, uan toni mochiuas satepan? (No xikonita taixkopin).
17 Satanás xa amo keman kinemilij tein Jehová kichiuaskia. Jehová kimatia keniuj kichiuas tein kiixtalijtoya maski Satanás, Adán uan Eva kiixnamikkej (Sal. 92:5). Keman kikauak maj Adán uan Eva kinpianij ininkoneuan, kinextij ke amo takajkayaua, ta ke nochipa mochiua tein kijtoua. No kinextij ke komo kijtoua ke kichiuas teisa, amo teyi kitsakuilis. Para kichiuas tein kiixtalijtok, kichiuak maj se ‘tekoneuj’ kinmakixti ininkoneuan Adán uan Eva akin tatakamatiskiaj (Gén. 3:15; 22:18). Satanás amo keman kinemilij ke Jehová techmakixtiskia keman kitemakaskia iKonetsin maj toka momikili. ¿Keyej? Porin ijkon kinextij ke yekmelauj techtasojta (Mat. 20:28; Juan 3:16). Satanás amo techtasojta, ta sayoj yejua itech tanemilia. Uan, ¿keniuj tapaleuij maj Jesús toka momikiliani? Keman tamis mil xiujmej, ininkoneuan Adán uan Eva akin tatakamatiskej uan amo tajtakolejkejok yeskij, nemiskej itech se xochital nikan taltikpak ijkon kemej Jehová kinekia maj mochiua. Ijkuak Jehová kemej yeskia kijtos “Omega”.
¿KENIUJ UELIS OKACHI TIKNELTOKASKEJ KE MOCHIUAS XOCHITAL?
18. ¿Toni eyi taman kinextia ke Jehová kichiuas tein motenkaujtok? (No xikonita recuadro “Eyi taman tein techpaleuia maj tikneltokakan ke Jehová kichiuas tein motenkaujtok”).
18 Itech nejin tamachtilis tikitakej toni kinextia ke taltikpak yekmelauj mochiuas se xochital. ¿Toni uelis tikiniluiskej oksekin para maj kineltokakan ke Dios yekmelauj kichiuas tein motenkaujtok? Yekinika, ke yejua Jehová akin motenkaua kichiuas. Amatajkuilol Apocalipsis kijtoua: “Akin tokotsyetoya itech ueyi silla kijtoj: ‘¡Xikita! Nikchijchiujtok nochi yankuik’”. Yejuatsin tamattok, chikauak uan kinejneki kichiuas tein kiixtalijtok. Ojpatika, ke Jehová kimattok ke yekmelauj mochiuas tein motenkaujtok uan kijtoua kemej yeskia kichiuakya. Yejua ika kijtoua: “Takuaujtamach uan melauak”. Uan no kijtoua: “¡Motamichiuakya!”. Expatika, ke Jehová matami keman kipeualtia teisa. Yejua ika kijtoj “niAlfa uan niOmega”. Jehová kinextis ke Satanás takajkayaua uan ke amo uelis kitsakuilis tein kiixtalijtok.
19. ¿Toni uelis tikoniluis aksa akin amo kineltoka ke nikan taltikpak mochiuas xochital?
19 Xikonelnamiki ke keman tikontapouia oksekin keniuj Jehová kinextiani ke yekmelauj kichiuas tein kiixtalijtok, no mitsonpaleuia okachi xikonneltoka ke yekmelauj kichiuas tein motenkaua. Yejua ika komo aksa tikonixtajtoltilia Apocalipsis 21:4 kampa kijtoua tein Dios motenkaua, uan yejua mitsoniluia “Kuali mokaki sayoj ke xa amo yekmelauj mochiuas”, ¿toni uelis tikoniluis? Ueliskia tikonixtajtoltilis tein kijtoua versículo 5 uan 6 uan tikonmelauilis. Xikonnextili ke Jehová kemej yeskia kifirmarojya tein motenkaua para kinextis ke yekmelauj kichiuas (Is. 65:16).
NEKUIKATIL 145 Dios motenkauak kichiuas se xochital
a Itech nejin tamachtilis tikitaskej keniuj kinextiani Jehová ke yekmelauj kichiuas se xochital. Keman tikintapouiaj oksekin nejin, no techpaleuia tejuan maj okachi tikneltokakan.