Moneki maj kinojtokaltikan

¿AKONI MONEKI KINOJTOKALTIS MOKONEUAN?

Konemej moneki kinojtokaltiskej uan kiniluiskej tein moneki kichiuaskej. Tetatmej yejuan akin okachi moneki ijkon kichiuaskej. Sayoj ke, oksekin no uelis kinpaleuiskej maj kuali moojtokaltikan.

¿KEYEJ MOTELNEKI MAJ AKSA KINOJTOKALTI?

Itech miak altepemej, telpochmej amo semi moajsij iniuan akin uejueykejya. Xikonnemili nejin:

• Konemej okachi moajsij kaltamachtiloyan, kampa moajsij okachi miakej konemej ke tamachtianij oso oksekin akin uejueykejya.

• Keman konemej mokepaj kalijtik, amo akin yetok porin inintatuan tekitij.

• Ompa Estados Unidos moijtoj ke konemej akin kipiaj 8 hasta 12 xiujmej, kemej seis horas mojmostaj moixpetaniaj ika teposmej kemej celular oso televisión.a

Itech se amatajkuilol moijtoua ke telpochmej uan ichpochmej amo moojtokaltiajok kemej inintatuan, tamachtianij oso oksekin akin uejueykejya, ta kitemouaj maj okseki telpochmej kinyolmajxitikan (Hold On to Your Kids).

¿KENIUJ TIKONMACHTIS MOKONEUAN MAJ KUALI MOOJTOKALTIKAN?

Iniuan xionyeto.

BIBLIA KIJTOUA: “Xikmachti okichpil itech ojti kampa moneki yas, uan keman ueuentsintias amo kikauas” (Proverbios 22:6).

Konemej akin nojnelmejok nochipa kitemouaj maj inintatuan kinojtokaltikan. Sekin akin motelmachtiaj kijtouaj ke keman konemej mochiuaj telpochmej, okachi kitemouaj maj inintatuan kinyolmajxitikan uan amo okseki telpochmej. Se tamachtijkej akin monotsa Laurence Steinberg, kijkuiloj itech se amatajkuilol ke keman telpochmej uejueyiaj kisentokaj okachi tanemiliaj uan kichiuaj kemej kinnextilijkej inintatuan. Yejua no kijkuiloj: “Motelpoch kineki kimatis tein tejuatsin tikonnemilia uan tein tikonneki tikonijtos, maski amo nochipa kijtos nion kiuelitas tein tikoniluis”.

Kemej mokoneuan akin nojnelmejok kinekij xikonojtokalti, xikonpaleui kemej moneki. Yejua ika, iniuan xionyeto uan xikonilui tein tikonnemilia, tein moneki kitayekanaltiskej uan tein tikonpanouani.

Xikonilui aksa akin takuaujtamach maj mitsonpaleui.

BIBLIA KIJTOUA: “Akin nentinemi iniuan akin tamatinij mochiuas tamatkej” (Proverbios 13:20).

¿Tikonixmati aksa akin tanemilia kemej tejuatsin akin uelis kipaleuis motelpoch oso moichpoch maj kuali moojtokalti? ¿Ueliskia tikonpaleuis mokoneuj maj iuan mouika? Maski ijkon tikonchiuas, tejuatsin no moneki tikonsentokas tikonpaleuis mokoneuj maj kuali moojtokalti. Sayoj ke, mokoneuj semi kipaleuis komo tikontemoua maj aksa akin takuaujtamach iuan mouika. Biblia kijtoua ke se telpoch akin monotsaya Timoteo semi kipaleuij mouikas iuan Pablo, se itatitanil Jesús. Keman Timoteo ueyiak, Pablo no kipaleuij mouikas iuan (Filipenses 2:20, 22).

Axkan, miakej amo nemij iniuan ininueyitatuan, inintíos oso oksekin ininchankauan, porin xa tel uejka nemij. Komo ijkon mitsonpanoua, xikonpaleui motelpochuan maj mouikakan iniuan sekin akin kuali monejnemiltiaj ijkon kemej tejuatsin tikonuelitaskia maj mokoneuan monejnemiltikan.