TEIN TECHYOLSEUIS KEMAN SEMI TIMOTEKIPACHOUAJ

¿Toni techpanoua keman semi timotekipachouaj?

Keman tikpanouaj se ueyi ouijkayot semi timotekipachouaj. Yejua ika, tonakayo kichiua seki taman tein ika mopaleuia. Itech tokuatixyo peuaj momiakiliaj seki taman tein moixmatij kemej hormonas tein momoyauaj itech nochi tonakayo. Nejon kichiua maj toyolo okachi ijsiujka tekiti, maj okachi ijsiujka nejnemi esti, maj okachi ijsiujka timijyotikan uan maj takuauaya seki taman itech tonakayo. Achto ke tikmatiskej tein techpanoua, tonakayo kichiuakya seki taman tein ika mopaleuis. Keman amo timotekipachouajok, tonakayo amo kitemouaok mopaleuis uan kuali tekitia.

KEMANSA TECHPALEUIA KEMAN TIMOTEKIPACHOUAJ UAN KEMANSA AMO

Keman semi timotekipachouaj porin tikpanouaj ouijkayomej oso keman teisa uelis techijtakos, tonakayo kichiua seki taman tein ika mopaleuia. Yekinika, tokuatixyo kitemoua maj tonakayo mopaleui. Kemansa, techpaleuia keman timotekipachouaj porin kichiua maj niman tikchiuakan teisa oso maj tiijsiuikan. No techpaleuia maj tikchiuakan tein tikixtaliaj oso maj okachi kuali tikchiuakan teisa. Uelis ijkon techpanos keman tikchiuaj examen, keman titajtanij tekit oso keman timauiltiaj.

Sayoj ke, komo nochipa timotekipachouaj oso semi timotekipachouaj uelis semi techijtakos. Keman tonakayo nochipa kitemoua mopaleuis, uelis moijtakos uan xa amo kuali timomachiliskej. Xa no tikchiuaskej seki taman tein amo tikchiuayaj oso amo timouikaskejok iniuan oksekin kemej achto tikchiuayaj. Akin nochipa motekipachouaj peua tauanaj, kikuij droga, semi tayij pajti, semi takuaj, semi tachichinaj oso kichiuaj okseki taman tein amo kipaleuia ininnakayo. Sekin semi motayokoltiaj, semi siouij oso hasta kinemiliaj momiktiskej.

Amo nochin semi kinijtakoua keman semi motekipachouaj. Sayoj ke, kemansa uelis kichiuas maj tikokolispeuakan oso maj amo kuali tekiti seki taman itech tonakayo.

¿TONI TEPANOUA KEMAN SEMI SE MOTEKIPACHOUA?

Amo kuali se momachilia

Itech tonakayo peua momiakiliaj seki hormonas tein moixmatij kemej adrenalina uan cortisol. Nejon kichiua maj se iyolo ijsiujka tekiti uan maj esti ijsiujka nejnemi. Uan no, itech esti okachi momiakilia glucosa. Nochi nejin kichiua maj se ijsiui keman se kipanoua se ijsiujkayot. Yejua ika, keman semi se motekipachoua:

niman se kualani, semi se tanemilia, se motayokoltia, tekokoua se itsontekon uan amo se yekkochi

Amo kuali tekiti se inakayo uan se iomiyouan

Kemej se inakayo kitemoua maj amo se mokoko, peua takuauaya seki taman. Yejua ika, keman semi se motekipachoua:

tekokoua uan takuauaya seki taman itech se inakayo uan notekokoua se itsontekon

Amo kuali se mijyotia

Keman ijsiujka se mijyotia, okachi se kitilana ejekat. Yejua ika, keman semi se motekipachoua:

semi chikauak se mijyotia oso ouij tekisa se mijyotis. Akin ijkon kinpanoua peua momoujtiaj

Amo kuali tekiti se iyolo

Se iyolo peua ijsiujka tekiti porin kimoyaua esti itech nochi se inakayo. Esti okachi mosentilia kampa okachi moneki itech se inakayo. Yejua ika, keman semi se motekipachoua:

uelis moketsas se iyolo, uelis okachi ijsiujka tekitis uan uelis moijtakos se italuayo tein moajsi itech se ikuatixyo

Amo kuali tekiti se iijtik

Itech se iijtik momiakiliaj seki hormonas tein moixmatij kemej adrenalina uan cortisol. Ijkon mopaleuia se inakayo keman semi se motekipachoua. Hígado peua kimiakiltia azúcar itech esti. Nejon kichiua maj se kipia okachi chikaualis. Yejua ika, keman semi se motekipachoua:

uelis tekuis diabetes, niman se kokolispeua, niman se kualani uan niman se tomauaya

Amo kuali tekiti se ipox

Se ipox amo kuali tekiti keman ompa ajsi tein se kikua. Yejua ika, keman semi se motekipachoua:

xa se elmoyaui, se mijsota, tekui kalannemilis oso amo kuali se youi kalan

Moijtakoua se inakayo tein ika se taskaltia

Keman se takat oso se siuat semi motekipachoua uelis kichiuas maj amo kineki motekas iuan inamik oso maj amo kuali tekiti inakayo keman iuan motekas. Yejua ika, keman se takat oso se siuat semi motekipachoua:

uelis kichiuas maj amo kuali tekiti inakayo keman motekas iuan inamik oso maj kemansa siuat amo esmeyaok