Tein techpaleuis maj kuali timouikakan iniuan oksekin

Xiontetapojpolui

“Ximotapojpoluijtiyakan se uan okse, ijkon keme kuak se aksa kiyolxokolia” (COLOSENSES 3:13).

Xa uelis aksa techyolxokolis oso tejuan tikyolxokoliskej aksa porin tinochin timopolouaj. Yejua ika moneki titetapojpoluiskej uan maj techtapojpoluikan. Keman titetapojpoluiaj, amo tikchikoitajok akin techyolxokolij. Amo no tikchiuiliaj “ten amo kuali” nion tikelnamiktiaj tein techchiuilij (Romanos 12:17). ¿Uan komo semi techtajyoluiltiani uan amo ueli tikelkauaj? Maj iuan titajtokan ika poujkaitalis. Tiknekij tikyektaliskej kuejmol, amo tiknextiskej ke yejua akin mopoloj (Romanos 12:18).

Xionyolyemanik uan xiontepoujkaita

“Ika ne yolyemanalis [...] xikpouakan in oksekin tokniuan [...] ke yejuan kachi ueyi chiuanime uan ke namejuan” (FILIPENSES 2:3).

Oksekin kiuelitaskej yetoskej touan komo tiyolyemankej uan tikinpoujkaitaj. Yejuan kimatij ke tikualtakamej uan inintech titanemiliaj uan ke amo tiknekij tikinchiuiliskej tein amo kuali. Sayoj ke, komo timoueyinekij uan tiknekij maj mochiua tein tejuan tiknemiliaj, sayoj tikpeualtiskej kuejmol uan timotajtolteuiskej. Amo touan motokiskej uan amo akin kinekis touan mouikasok.

Amo xiontechikoita

“Dios amo kinchichikojtasojta in tagayot. Ta, Yejuatsin kiniknelia [...] komo yejuan kimouistiliaj [...] uan chipaukanentinemij” (HECHOS 10:34, 35).

Dios Akin techchijchiuak techtasojta tinochin maski seseko tikayomej, tataman kemej titajtouaj, tikpiaskej tomin oso amo, oso tataman kemej tiixtamatij. “Yejuatsin kichijchiuak sanse tagat san uan nojon tagat nochi tejuan timochiuakoj tiixuiuan” (Hechos 17:26). Nejin kijtosneki ke tinochin tiiknimej. Keman tikinpoujkaitaj nochin uan tikualtakamej, yejuan yolpakij, tejuan tiyolpakij uan Dios Akin techchijchiuak no yolpaki.

Amo niman xionkualani

“Xiknextikan ke [...] nanyolnejmachmej” (COLOSENSES 3:12, TNM).

Keman tiyolnejmachmej uan amo niman tikualanij, oksekin kuali momachiliskej touan, totech takuaujtamatiskej uan kimatij ke uelis techyolmajxitiskej komo moneki, porin amo tikualaniskej. Komo aksa kualani touan, uan titanankiliaj ika nejmachkayot kipaleuis maj yolseui. Proverbios 15:1 kijtoua: “Tanankilil tein motemaka ika yolseuilis kijkuania kualanyot, sayoj ke se tajtol tein teyolxokolia kipeualtia kualanyot”.

Xikonuelita tikontemakas tein tikonpia uan xionmotasojkamati

“Kachi yolpaktok [...] ten tapaleuijtinemi [...] ke ne tagat ten sayo kiselia tapaleuilis” (HECHOS 20:35).

Miakej sayoj inintech tanemiliaj uan kitemouaj kipiaskej miak taman. Sayoj ke komo tiktemakaj tein tikpiaj, yekmelauj tiyolpakiskej (Lucas 6:38). Akin kiuelitaj kitemakaskej tein kipiaj yolpakij porin okachi kintasojtaj oksekin ke tein kipiaj, nejon kinpaleuia maj kinextikan ke motasojkamatij keman oksekin kinmakaj teisa (Colosenses 3:15). Xionmotajtani: “¿Akoni iuan nikuelitaskia nietos? ¿Aksa akin sayoj itech tanemilia uan amo motasojkamati, oso iuan aksa akin kiuelita kitemakas tein kipia uan motasojkamati?”. Nejin techmachtia ke: moneki tikchiuaskej tein kuali ijkon kemej tiknekij maj oksekin kichiuakan (Mateo 7:12).