Tein taixmatinij amo kimatij

Maski taixmatinij semi momachtianij nochi tein onkak itech iluikak uan taltikpak, onkakok miak netajtanilmej tein amo ueli kinankiliaj.

¿Kimatij taixmatinij keniuj peuak nochi tein onkak uan tein yoltok? Tein melauj amo. Kijtouaj ke taixmatinij akin momachtiaj nochi tein onkak itech iluikak uan taltikpak uelis kijtoskej keniuj peuak nochi. Sayoj ke Marcelo Gleiser, akin ika tamachtia sitalimej itech Universidad Dartmouth uan amo semi kineltoka Dios, kijtoua: “Amo uelini senkis tikmelauanij keniuj peuak nochi tein onkak”.

¿Kimelauanij keniuj peuak nochi tein yoltok? Se tajkuilol itech amaix Science News kijtoua: “Xa amo uelis senkis tikijtoskej keniuj peuak nochi tein yoltok nikan taltikpak. Miak temej uan omimej tein ueliskia kinextis tein panok keman nesik taltikpak ixpoliujkej uejkaujya”. Nejin tein kijtojkej kinextia ke taixmatinij ayamo kimatij keniuj peuak nochi tein onkak uan tein yoltok.

Xa tionmotajtania: “Komo taltikpak kichijchiujkej, ¿akoni kichijchiuak? Uan komo nemi se Tachijchiujkej akin yolkuali uan tamatkej, ¿keyej kikaua maj titajyouikan? ¿Keyej kikaua maj onka miak taneltokalismej? ¿Keyej kikaua maj miakej akin taneltokaj kichiuakan tein amo kuali?”.

Tein kiajsinij taixmatinij amo ueli kinankilia nejin netajtanilmej. Sayoj ke, nejin amo kijtosneki ke amo onkak tanankilil tein uelis se kineltokas, ta miakej kiajsinij itech Biblia.

Miakej taixmatinij kiixtalianij momachtiskej Biblia. ¿Tikonuelitaskia tikonmatis keyej axkan kineltokaj ke aksa tachijchiuak? Xikonita jw.org uan xikontemo “Tein kijtouaj sekin kemej peuak nemilis”.

Biblia uan tein kiajsinij taixmatinij kichiuak maj kineltokakan

Gueorgui Koidán, químico

Itech notekiuj moneki nikpepechos oso niksajsalos moléculas. Kemej yeskia se mauiltis ajedrez, moneki kuali se kinemilis tein se kiolinis. Komo amo tikchiua se taman, molécula uejueliui. Xa moitas ke notekiuj ouij, sayoj ke amo kemej tein mochiua ininijtik células keman kinchijchiuaj moléculas. Yejua ika niknemilia ke nemi se kuali químico, oso Akin tachijchiuak.

Keman nimomachtij Biblia, nikitak ke amo kemej okseki amatajkuilolmej. Maski motamiijkuiloj ajsitokya 2,000 xiujmej, nikyekmati ke tein tayolmajxitia kisentoka tapaleuia. Keman kijtoua keniuj tikmelauaskej se kuejmol iniuan tochankauan, iniuan akin titekitij uan iniuan akin nemij kampa ika tinemij, nochipa tapaleuia. Nikajsikamatik ke sayoj aksa akin okachi tamatkej uelis ijkon techyolmajxitis.

Yan-Der Hsuuw, embriólogo

Keman mochijchiua se embrión, nochi células sentekitij. Ijkon, sekin mochiuaskej taluamej, músculos, omimej, esti uan okseki taman hasta ke mochiua se konetsin. Ayamo senkis tikajsikamatij nochi tein panoua keman mochijchiua se konetsin. Nejua niknemilia ke tinemij porin techchijchiuak aksa akin tamatkej.

Itech Biblia, Salmo 139:15, 16 kimelaua keniuj mochijchiua se embrión iijtik imomaj. Nikitani ke no yejua kiajsinij taixmatinij itech xiujmej tein panouanij. ¿Keniuj uelik moijkuiloj nejon miak xiujmej achto? Akin tachijchiuak kimatiltij nejon akin kijkuiloj nejin salmo.

Xikonita video Rocío Picado Herrero: Se siuat akin tamachtia Química kijtoua keyej kineltoka Dios.a Tikonitas itech jw.org.

a Nejin video moajsi itech tajtol español.