1-3. 1) ¿Toni timotajtaniaj keman momikilia se taltikpaknenkej? 2) ¿Toni kijtouaj itech seki taneltokalismej ke techpanoua keman timomikiliaj?

BIBLIA kijtoua ke ejkos tonal keman “amo aken momikilis ok” (Apocalipsis 21:4). Itech tamachtilis 5 timomachtijkej ke kemej Jesús kitemakak inemilis uelis tinemiskej nochipaya. Sayoj ke tiksentokaj timomikiliaj (Eclesiastés 9:5). Yejua ika, se taman tein okachi timotajtanianij yejua nejin: “¿Toni techpanoua keman timomikiliaj?”.

² Okachi tiknekij tikmatiskej itanankilil nejin netajtanil keman momikilia se tochankauj oso se akin kuali iuan timouikayaj. Xa timotajtaniaj: “¿Kani yetok? ¿Tajyouijtok? ¿Uelis tikpaleuiskej? ¿Uelis techpaleuis? ¿Oksepa tikitaskej?”.

³ Itech taneltokalismej tataman kemej kinankiliaj nejin netajtanilmej. Itech seki tamachtiaj ke akin yolkualmej youij iluikak uan akin amo yolkualmej youij kampa nochipaya tajyouijtoskej itech tit. Itech okseki kijtouaj ke keman timomikiliaj timochiuaj espíritus uan timoajsitij iniuan tochankauan akin momikilijkejya. Uan itech okseki tamachtiaj ke keman timomikiliaj oksepa tinemij sayoj ke itech okse taltikpaknenkej oso hasta itech se tapial.

4. ¿Toni tamachtiaj itech miak taneltokalismej?

⁴ Itech nochi taneltokalismej tataman tein kijtouaj ke techpanoua keman timomikiliaj. Sayoj ke itech miakej tamachtiaj sayoj se taman: ke keman timomikiliaj, teisa kisa totech tein kisentoka yoltok. ¿Melauj nejon?

¿TONI TECHPANOUA KEMAN TIMOMIKILIAJ?

5, 6. ¿Toni techpanoua keman timomikiliaj?

⁵ Jiova kimati tein techpanoua keman timomikiliaj. Yejuatsin techmachtia itech Biblia ke keman timomikiliaj tami tonemilis. Keman timomikiliaj amo titachiajok, amo titakakijok, amo titanemiliajok nion tikelnamikijok nion teyi. Amo tikpiaj teisa tein kisentoka yoltok okseko.a

⁶ Biblia kijtoua ke “akin momikilijkejya amo teyi kimatijok”. Yejua ika amo tetasojtajok nion tetauelitajok. Biblia no kijtoua ke “amo onkak tekit nion teisa tein monemilia mochiuas nion taixmatilis nion tamatilis itech Miketekoch” (xikonixtajtolti Eclesiastés 9:5, 6, 10). Uan Salmo 146:4 kijtoua ke keman momikilia se taltikpaknenkej no momikiliaj “itanemililuan”.

¿TONI KIJTOJ JESÚS KE TECHPANOUA KEMAN TIMOMIKILIAJ?

7. ¿Toni kijtoj Jesús keman ika tajtoj mikilis?

⁷ Keman Lázaro momikilij, Jesús kiniluij imomachtijkauan: “Totasojikniu Lázaro, yejua axkan kochtok”. Sayoj ke yejuan kinemilijkej ke yekmelauj moseuijtoya. Yejua ika Jesús kijtoj: “Lázaro miyik ya” (Juan 11:11-14). Jesús kiteajsikamatiltij ke keman se momikilia kemej yeskia sayoj se kochtok. Yejua amo kijtoj ke Lázaro yetoya iluikak oso iniuan ichankauan akin momikilijkajya. Amo no kijtoj ke Lázaro tajyouijtoya itech tit nion ke oksepa yolka itech okse taltikpaknenkej oso itech se tapial, ta Lázaro kemej yeskia kuali kochtoya. Okse tonal Jesús no kiteajsikamatiltij ke keman se momikilia kemej yeskia sayoj se kochtok. Keman oksepa kimakak inemilis isiuapil Jairo, Jesús kijtoj: “Siuapiltsin amo miyik. Ta, sayo kochtok” (Lucas 8:52).

8. ¿Keniuj tikmatij ke Dios amo kiixtalijka maj timomikilikan?

⁸ ¿Kiixtalijka Dios maj timomikilikan? Amo. Jiova kinchijchiujka Adán uan Eva maj neminij nochipaya uan maj amo keman kokolispeuanij. Uan no, kinchijchiuak kemej kinekiskiaj nemiskej nochipaya (Eclesiastés 3:11). Tetatmej kintayokoltia kiitaskej ke ininkoneuan kokolispeuaj uan momikiliaj. No ijkon, toTajtsin Jiova kitayokoltia kiitas ke tikokolispeuaj uan timomikiliaj. Sayoj ke, komo Dios techchijchiuak maj tinemikan nochipaya, ¿keyej timomikiliaj?

¿KEYEJ TIMOMIKILIAJ?

9. ¿Keyej Adán uan Eva amo ouij kinkisaskia kitakamatiskej tanauatil tein Dios kinmakaka?

⁹ Itech xochital tein moajsia Edén, Jiova kiluij Adán: “Uelis tikuas nochi itakilo koujmej tein moajsij itech xochital hasta tiixuis. Sayoj ke amo xikua itakilo kouit tein kiixnextia taixmatilis ika tein kuali uan tein amo kuali, porin itech tonal keman tikuas, timomikilis” (Génesis 2:9, 16, 17). Nejon tanauatil niman moajsikamatia uan amo ouij katka. Uan kemej Jiova kinchijchiujka, kinamikia kiniluis toni kuali uan toni amo kuali. Komo Adán uan Eva kitakamatiskiaj Jiova, kinextiskiaj ke mokauayaj maj kinixyekana uan ke kitasojkamatiaj nochi tein yejuatsin kinmakaka.

10, 11. 1) ¿Keniuj Satanás kichiuak maj Adán uan Eva amo kitakamatinij Dios? 2) ¿Keyej semi amo kuali tein kichiujkej Adán uan Eva?

¹⁰ Sayoj ke Adán uan Eva amo tatakamatkej. Satanás kitajtanij Eva: “¿Yekmelauj namechiluij Dios amo xikuakan itakilo nochi koujmej tein moajsij itech xochital?”. Uan Eva kinankilij: “Uelis tikuaskej itakilo koujmej tein moajsij itech xochital. Sayoj ke, itakilo kouit tein moajsi tatajko itech xochital, Dios kijtoj: ‘Amo xikuakan; amo, amo xikmatokakan, porin nanmikiskej’” (Génesis 3:1-3).

¹¹ Ompa, Satanás kiluij Eva: “Amo nanmikiskej. Dios kimati ke itech tonal keman nankikuaskej nanixtajtapouiskej uan nanmochiuaskej kemej Dios: nankiixmatiskej tein kuali uan tein amo kuali” (Génesis 3:4-6). Satanás kinekia maj Eva kinemiliani ke iselti ueliskia kiixtalis tein kuali uan tein amo kuali. Uan no kikajkayauak porin kiluij ke amo momikiliskia komo amo kitakamatia Dios. Yejua ika Eva kikuaj nejon takilot. Satepan no kimakak inamik uan yejua no kikuaj. Adán uan Eva kimatiaj ke Jiova kiniluijka maj amo kikuanij nejon takilot. Keman kikuajkej, amo kinekkej kitakamatiskej se tanauatil tein niman moajsikamatia uan tein taixejekol. Adán uan Eva kinextijkej ke amo kinekiaj maj kinixyekana ininTajtsin. ¡Semi amo kuali tein kichiujkej!

12. ¿Keyej semi kiyolkokoj Jiova tein kichiujkej Adán uan Eva?

¹² Tein kichiujkej Adán uan Eva semi kiyolkokoj Jiova. Yejuatsin katka ininTajtsin, uan yejuan kiixnamikkej. Xikonnemili ke tionmochikaua kuali tikoniskaltis mokoneuan, se okichpil uan se siuapil. Sayoj ke yejuan amo mitsontakamatij uan kichiuaj tein kinekij. ¿Melauj ke semi mitsonyolkokoskia?

13. ¿Toni kijtosnekia Jiova keman kiluij Adán ke oksepa mokepaskia talnex?

¹³ Kemej Adán uan Eva amo tatakamatkej, amo ueliskiajok nemiskej nochipaya. Jiova kiluij Adán: “Titalnex uan talnex timokepas” (xikonixtajtolti Génesis 3:19). Adán chijchiujtoya ika talnex, yejua ika Jiova kijtosnekia ke Adán oksepa mokepaskia talnex, kemej yeskia amo keman yolka (Génesis 2:7). Keman momikilij, senkis ixpoliuik.

14. ¿Keyej timomikiliaj?

¹⁴ Komo Adán uan Eva kitakamatiskiaj Dios, axkan yoltoskiajok. Sayoj ke, keman amo tatakamatkej, tajtakojkej uan satepan momikilijkej. Tajtakol kemej yeskia se ueyi kokolis oso kokoxkayot tein yejuan techpanoltilijkej. Tinochin tiyolij titajtakolejkejya, yejua ika timomikiliaj (Romanos 5:12). Sayoj ke Jiova amo kiixtalijka maj timomikilikan (1 Corintios 15:26).

TIKMATISKEJ TEIN TECHPANOUA KEMAN TIMOMIKILIAJ TECHPALEUIA

15. ¿Keniuj techpaleuia tikmatiskej tein yekmelauj techpanoua keman timomikiliaj?

¹⁵ Itech miak taneltokalismej tamachtiaj ke akin momikilijkejya kisentokaj nemij okseko uan ke tejuan uelis tikinpaleuiskej. Yejua ika, keman se taltikpaknenkej momikilia, kemansa ichankauan kintaxtauiaj akin taixyekanaj itech taneltokalis maj ika motataujtikan oso maj kichiuilikan se misa. Sayoj ke Biblia tamachtia ke mikemej amo tajyouijtokej nion motayokoltijtokej. Tejuan amo ueli tikinnojnotsaj nion tikinpaleuiaj. Yejuan amo no ueli technojnotsaj, amo ueli techpaleuiaj nion techchiuiliaj tein amo kuali. Yejua ika moneki amo tikinmouiliskej. Tikmatiskej tein yekmelauj techpanoua keman timomikiliaj techpaleuia maj amo tikneltokakan nochi nejon takajkayaualis.

16. ¿Toni takajkayaualis tamachtiaj itech miak taneltokalismej?

¹⁶ Ika taneltokalismej tein amo melaujkej, Satanás kineki techkajkayauas uan kitemoua maj tiknemilikan ke mikemej yoltokejok. Kemej neskayot, itech seki taneltokalismej tamachtiaj ke tikpiaj teisa tein kisentoka yoltok satepan ke timomikiliaj. ¿Yejua nejon tein tamachtiaj itech motaneltokalis, oso tamachtiaj tein kijtoua Biblia? Ika nejin takajkayaualis uan oksekiok, Satanás kitemoua kichiuas maj amo tikixmatikan Dios.

17. ¿Keyej kitakajkayauiliaj Jiova keman tamachtiaj ke akin amo yolkualmej nochipaya tatatoskej?

¹⁷ Itech miak taneltokalismej kitakajkayauiliaj Jiova ika tein kijtouaj ke techpanoua keman timomikiliaj. Kemej neskayot, itech seki tamachtiaj ke akin amo yolkualmej nochipaya tatatoskej. Sayoj ke nejon amo melauj. ¡Jiova amo keman ijkon tetajyouiltiskia! (Xikonixtajtolti 1 Juan 4:8.) ¿Keniuj tikonitaskia se takat akin kimatajtatia ikonetsin porin amo tatakamati? Xa tikonnemiliskia ke semi amo yolkuali uan amo tikonnekiskia tionmouikas iuan. Satanás kineki maj tiknemilikan ke Jiova tetajyouiltia.

18. ¿Keyej moneki amo tikinmouiliskej mikemej?

¹⁸ Itech seki taneltokalismej tamachtiaj ke keman timomikiliaj timokepaj espíritus. No kijtouaj ke moneki amo tikinkualantiskej uan ke hasta moneki tikinmouiliskej nejon espíritus, porin uelis techpaleuiskej oso semi techtajyouiltiskej. Kemej miakej kineltokaj nejin takajkayaualis, kinmouiliaj mikemej. Yejua ika kinueyichiuaj yejuan uan amo Jiova. Sayoj ke xikonelnamiki ke mikemej amo teyi kimachiliaj uan amo teyi ueli kichiuaj. Yejua ika, maj amo tikinmouilikan. Jiova yejua akin techchijchiuak uan yejua yekmelauj Dios. Sayoj yejuatsin moneki tikueyichiuaskej (Apocalipsis 4:11).

19. ¿Keniuj techpaleuia tikmatiskej tein techpanoua keman timomikiliaj?

¹⁹ Tikmatiskej tein techpanoua keman timomikiliaj techpaleuia maj amo tikneltokakan takajkayaualis tein tamachtiaj itech miak taneltokalismej. No techpaleuia maj tikneltokakan ke yekmelauj mochiuas tein Dios kiixtalijtok.

20. ¿Toni netajtanil tiknankiliskej itech okse tamachtilis?

²⁰ Ne uejkauj, se itekitikauj Dios akin monotsaya Job tajtanik: “Komo se taltikpaknenkej momikilia, ¿uelis oksepa nemis?” (Job 14:14). Itech okse tamachtilis tikitaskej kualtsin tanankilil tein kitemaka Biblia.

1-3. 1) ¿Toni kemej yeskia techtsaktok? 2) ¿Keniuj Jiova techmakixtis?

XIKONNEMILI ke mitsonpantiaj teisa tein amo tikonchiuak uan mitsontsakuatij. Amo keman uelis tionkisas. Tikonnemilia ke amo teyi uelis mochiuasok. Sayoj ke, ijkuak tikonnemilia nejon, tikonmati ke se takat uelis mitsonkixtis uan ke kijtojya ke mitsonpaleuis. ¿Keniuj tionmomachiliskia?

² Tinochin kemej yeskia techtsaktok mikilis. Amo ueli tikcholuiaj. Sayoj ke Jiova kemaj ueli techmakixtia. ¿Keniuj kichiuas? Yejuatsin kijtojya ke senkis kiixpolos mikilis (1 Corintios 15:26).

³ ¿Melauj ke semi tiyolseuiskej keman amo akin momikilisok? Sayoj ke Jiova amo sayoj kichiuas maj amo akin momikiliok, ta no kichiuas maj oksepa nemikan akin momikilijkejya. Yejuatsin kijtoua ke mikemej oksepa nemiskej (Isaías 26:19). Xikonnemili keniuj mitsonpaleuis nejin tein Dios kijtoj.

KEMAN MOMIKILIA SE AKIN TIKTASOJTAJ

4. 1) ¿Toni uelis techyolseuis keman momikilia se tochankauj oso se akin kuali iuan timouikaj? 2) ¿Akonimej kuali iuan mouikayaj Jesús?

⁴ Keman momikilia se tochankauj oso se akin kuali iuan timouikaj, semi titayokoyaj, porin amo ueli tikchiuaj maj oksepa nemi. Sayoj ke tein Biblia kijtoua yekmelauj techyolseuia (xikonixtajtolti 2 Corintios 1:3, 4). Maj tikitakan se taman tein kinextia ke Jiova uan Jesús kinekij maj oksepa nemikan tochankauan uan akin kuali iniuan timouikayaj. Keman Jesús nemia nikan taltikpak, kinkalpanouaya Lázaro uan iikniuan, Marta uan María. Nochin eyin semi kuali mouikayaj iuan Jesús. Biblia kijtoua: “Jesús semi iuan motasojtaya in Marta uan iikniu María uan iikniu Lázaro” (Juan 11:3-5).

5, 6. 1) ¿Keniuj momachilij Jesús keman kiitak ke kichokilijtoyaj Lázaro, uan toni kichiuak? 2) ¿Keyej techyolseuia tayokol tein kimachilij Jesús?

⁵ Se tonal, Lázaro momikilij. Yejua ika, Jesús kinyolseuito Marta uan María. Keman Marta kimatik ke Jesús ajsitoyaya, kinamikito. Yolpakik kiitas Jesús, sayoj ke kiluij: “Tajkon Tejuatsin tiyetoskia nikan tochan, ijkuakon ne noknitsin Lázaro amo momikiliskia”. Marta kinemilij ke Jesús amo uelia kichiuayaok nion teyi. Satepan, Jesús no kiitak ke María chokatoya. Keman kiitak ke ichankauan Lázaro uan akin kuali iuan mouikayaj chokatoyaj, semi tayokoyak uan no chokak (Juan 11:21, 33, 35). Jesús kimachilij ueyi tayokol tein tikmachiliaj keman momikilia se akin tiktasojtaj.

⁶ Tayokol tein kimachilij Jesús techyolseuia. Techmachtia ke yejua uan Jiova kimachiliaj tayokol tein tikmachiliaj keman momikilia se akin tiktasojtaj (Juan 14:9). Uan no, Jiova kipia chikaualis tein ika kiixpolos mikilis uan amo uejkaua ijkon kichiuas.

“LÁZARO, XIUALKALANKISA”

7, 8. 1) ¿Keyej Marta amo kinekia maj kiajchiuanij tet kampa kitalijkaj Lázaro? 2) ¿Toni kichiuak Jesús?

⁷ Jesús yajki itech tekoyok kampa kitalijkaj Lázaro, tein tentsaktoya ika se ueyi tet. Ompa, Jesús kijtoj: “Xikajchiuakan ne tet”. Sayoj ke Marta amo kinekia maj kiajchiuanij, porin Lázaro naui tonal achtoya momikilijka (Juan 11:39). Sayoj ke Marta amo kimatia tein Jesús yaya kichiuati.

⁸ Satepan ke kiajchiujkej tet, Jesús chikauak kijtoj: “Lázaro, xiualkalankisa”. Ompa, Marta uan María semi yolpakkej keman kiitakej tein panok: “Nimantsin in Lázaro ten mikka ya ual kalankisak, nochi matsijtsikautok uan metstsijtsikautok ika tilma” (Juan 11:43, 44). ¡Lázaro oksepa yoltoya! Oksepa yetoya iniuan ichankauan uan akin kuali iniuan mouikaya. Nochin uelia kinauayaj uan iuan tajtouayaj. ¡Jesús kichiujka maj Lázaro oksepa nemini!

“SUAPILTSIN, TEJUA NIMITSILIA XIMEUA”

9, 10. 1) ¿Akoni kimakak chikaualis Jesús tein ika kichiuak maj oksepa neminij akin momikilijkajya? 2) ¿Keniuj techpaleuia kampa ininka motajtoua akin oksepa nenkej?

⁹ ¿Akoni kimakak Jesús chikaualis tein ika uelia oksepa kinmakaya ininnemilis akin momikilijkajya? Achto ke kichiuaskia maj Lázaro oksepa nemi, Jesús kitataujtij Jiova. Ompa, Jiova kimakak ichikaualis (xikonixtajtolti Juan 11:41, 42). Sayoj ke amo sayoj Lázaro oksepa nemik.a Kemej neskayot, Biblia no ika tajtoua se siuapiltsin akin kipiaya 12 xiujmej uan semi mokokouaya. Ipopaj oso itat monotsaya Jairo uan amo kinpiaya okseki ikoneuan. Jairo amo kimatiaok toni kichiuas uan kitataujtij Jesús maj kipajtiani isiuapiltsin. Keman tajtojtoya iuan Jesús, ajsikej seki takamej uan kiluijkej Jairo: “Mosuapil mikik ya. ¿Para toni ok tikuejsojtok in Tamachtijke?”. Sayoj ke Jesús kiluij: “Amo ximomouti. Ta, sayo xitakuautamati”. Ompa, senyajkej ichan Jairo. Keman ajsitiyayaj ichan, Jesús kiitak ke nochin chokatoyaj. Jesús kiniluij: “¿Keye [...] nanchokatokke? In siuapiltsin amo miyik. Ta, sayo kochtok”. Itatuan xa amo kiajsikamatkej tein Jesús kijtosnekia. Satepan, Jesús kiniluij nochin maj kisanij uan kinuikak tetatmej kampa moajsia ininsiuapiltsin. Jesús kimakitskij uan kiluij: “Suapiltsin, tejua nimitsilia ximeua”. Itatuan siuapiltsin semi yolpakkej keman kiitakej ke meuak uan peuak nejnemi. ¡Jesús kichiuak maj siuapiltsin oksepa nemini! (Marcos 5:22-24, 35-42; Lucas 8:49-56.) Nochipa keman Jairo uan inamik kiitaskiaj ininsiuapiltsin, kielnamikiskiaj keniuj Jiova kinpaleuijka itechkopa Jesús.

¹⁰ Melauj ke akin Jesús kichiuak maj oksepa neminij satepan oksepa momikilijkej. ¿Kijtosneki nejin ke nenkaj tein Jesús kichiuak? Amo. Kampa Biblia ininka tajtoua akin oksepa nenkej techpaleuia maj senkis tikneltokakan ke Jiova kineki oksepa kinmakas ininnemilis akin momikilijkejya, uan ke ijkon kichiuas.

¿TONI TECHMACHTIA KAMPA MOIJTOUA KE SEKIN OKSEPA NENKEJ?

11. Ika tein kijtoua Eclesiastés 9:5, ¿toni kipanok Lázaro keman momikilij?

¹¹ Biblia kijtoua ke mikemej senkis “amo teyi kimatijok” (Eclesiastés 9:5). Yejua nejon tein kipanok Lázaro. Keman moajsia itech miketekoch, amo kimatia toni mochiujtoya. Ijkon kemej kijtoj Jesús, Lázaro kemej yeskia kochtoya (Juan 11:11).

12. ¿Keniuj tikmatij ke Lázaro yekmelauj oksepa nemik?

¹² Miakej kiitakej ke Jesús kichiuak maj Lázaro oksepa nemini. Hasta akin kitauelitayaj Jesús kimatiaj nejon. Amo akin uelia kijtouaya ke amo melauj katka, porin Lázaro yoltoya (Juan 11:47). Uan no, miakej kiitatoj Lázaro uan peuak kineltokaj ke Dios kiualtitanka Jesús. Nejin amo kiuelitakej akin kitauelitayaj Jesús, yejua ika kiixtalijkej kinmiktiskej Jesús uan Lázaro (Juan 11:53; 12:9-11).

13. ¿Keyej titakuaujtamatij ke Jiova kichiuas maj oksepa nemikan akin momikilijkejya?

¹³ Jesús kijtoj ke “nochi in animajme” oksepa nemiskej (Juan 5:28). Sayoj ke Jiova uelis kichiuas maj oksepa nemikan komo kielnamiki keniuj katkaj uan nochi tein kipanokej. ¿Ueli Jiova kichiua nejon? Xikonnemili nejin: ne iluikak moajsij miak millones sitalimej, uan Biblia kijtoua ke Dios kimati inintokay sejsemej (xikonixtajtolti Isaías 40:26). Komo Jiova ueli kielnamiki itokay sejse sitalij, tikyekmatij ke amo ouij kikisas kielnamikis keniuj katkaj uan nochi tein kipanokej akin oksepa nemiskej. Tein melauj, Jiova kichijchiuak nochi tein onkak, yejua ika tikmatij ke uelis oksepa kinmakas ininnemilis akin momikilijkejya.

14, 15. ¿Toni techmachtiaj itajtoluan Job?

¹⁴ Ne uejkauj, se itekitikauj Dios akin monotsaya Job kineltokaya ke akin momikilijkejya oksepa nemiskej. Se tonal, yejua tajtanik: “Komo se taltikpaknenkej momikilia, ¿uelis oksepa nemis?”. Ompa Job kiluij Jiova: “Tejua titanotsas uan nejua nimitsnankilis. Semi tiknekis oksepa tikitas tein momauan kichijchiujkej”. Nejin tein Job kijtoj techmachtia ke Jiova semi kineki kichiuas maj oksepa nemikan akin momikilijkejya (Job 14:13-15).

¹⁵ ¿Keniuj tionmomachilia keman tikonnemilia ke akin momikilijkejya oksepa nemiskej? Semi techyolseuia tikmatiskej ke Jiova kineki oksepa kinmakas ininnemilis akin momikilijkejya. Sayoj ke xa tionmotajtanis: “¿Oksepa nemiskej nochankauan uan akin iniuan kuali nimouikaya?”. Maj tikitakan akonimej kijtoua Biblia ke oksepa nemiskej uan kani nemiskej.

“NECHKAKILISKE NOTAJTOLIS. IKA YA NOJON [...] UAL KISASKE”

16. ¿Keniuj yeski ininnemilis akin oksepa nemiskej nikan taltikpak?

¹⁶ Akin ne uejkauj oksepa nenkej moajsikej nikan taltikpak iniuan ininchankauan uan akin kuali iniuan mouikayaj. No yejua nejon panos satepan, sayoj ke okachi kuali yeski. ¿Keyej? Yekinika, porin akin Dios oksepa kinmakas ininnemilis uelis nemiskej nochipaya nikan taltikpak. Uan ojpatika, porin amo mochiujtosok tein axkan mochiujtok. Amo onkasok neteuilismej, amo mochiuasok tein amo kuali nion tikokolispeuaskej.

17. ¿Akonimej oksepa nemiskej?

¹⁷ ¿Akonimej oksepa nemiskej? Jesús kijtoj: “Nochi in animajme [oso mikemej] nechkakiliske notajtolis. Ika ya nojon [...] ual kisaske” (Juan 5:28, 29). Uan Biblia no kijtoua: “Dios kinmakak nemilis oksepa nochi nekes ten momikilijke tech at. Uan [...] ten tsaktokke ya kampa animajme” (Apocalipsis 20:13). Miak millones taltikpakneminij oksepa nemiskej. Pablo kijtoj ke “Dios kinpankixtis yoltokke nochi in animajme, amo sayo in yolkualime. Ta, no nekes ten amo yolkualime” (xikonixtajtolti Hechos 24:15).

18. ¿Akonimej “yolkualime” akin oksepa nemiskej?

¹⁸ ¿Akonimej “yolkualime”? Sekin yejuan itekitikauan Jiova akin kitakamatkej uan nenkej achto ke Jesús ualaskia nikan taltikpak, kemej Noé, Abrahán, Sara, Moisés, Rut uan Ester. Yejuan oksepa nemiskej nikan taltikpak. Itech amatajkuilol Hebreos capítulo 11 ininka motajtoua seki nejin takamej uan siuamej. Sayoj ke ¿toni kinpanos itekitikauan Dios akin momikiliaj itech nejin tonalmej? Yejuan no moajsij iniuan “yolkualime” uan oksepa nemiskej.

19. 1) ¿Akonimej “amo yolkualime”? 2) ¿Toni uelis kichiuaskej keman Dios oksepa kinmakas ininnemilis?

¹⁹ ¿Akonimej “amo yolkualime”? Sekin yejuan miak millones akin amo uelik kiixmatkej Jiova. Maski momikilijkejya, Jiova amo kinelkaua. Yejuatsin oksepa kinmakas ininnemilis uan kinpaleuis maj kiixmatikan uan maj kitekitilikan.

20. ¿Akonimej amo oksepa nemiskej?

²⁰ ¿Kijtosneki nejon ke nochin akin momikilijkejya oksepa nemiskej? Amo. Jesús kijtoj ke amo nochin (Lucas 12:5, TNM). ¿Akonimej amo oksepa nemiskej? Akin amo yolkualmej uan amo keman kinekkej kitakamatiskej Dios. Sayoj ke ¿akoni kiixtalis akonimej oksepa nemiskej oso amo? Jiova, porin yejuatsin kipia okachi ueyi tanauatil. Sayoj ke no kimakak tanauatil Jesús uan ijkon yejua “techixkomakas nochi tejuan ten tiyoltinemij uan nochi ten ipa mikke ya” (Hechos 10:42). (Xikonita tajtolmelaualis 18.)

AKIN YASKEJ ILUIKAK

21, 22. 1) ¿Toni panoua iniuan akin youij iluikak keman oksepa nemij? 2) ¿Akoni yekinika yajki iluikak?

²¹ Biblia no kijtoua ke sekin yaskej iluikak. Keman yejuan oksepa nemij, amo ueli se kinitaok.

²² Jesús yejua akin yekinika yajki iluikak satepan ke oksepa nemik (Juan 3:13). Jiova oksepa kimakak inemilis eyi tonal satepan ke kimiktijkej, sayoj ke amo kemej se taltikpaknenkej (Salmo 16:10; Hechos 13:34, 35). Tatitanil Pedro kijtoj ke Jesús “kimiktijkej inakayo, sayoj ke oksepa nemik kemej ángel” (1 Pedro 3:18, TNM). Jesús oksepa nemik kemej se ángel akin semi chikauak (1 Corintios 15:3-6). Sayoj ke Biblia kijtoua ke amo sayoj Jesús yaskia iluikak satepan ke oksepa nemiskia.

23, 24. ¿Akonimej “amo ueyi oloch ichkamej”, uan kanachimej?

²³ Tepitsin achto ke momikiliskia, Jesús kiniluij imomachtijkauan: “Kampa ichantsin de Totajtsin Dios ongak [...] kampa namejuan no kuali nankalyetotiue” (Juan 14:2). Nejin kijtosneki ke seki imomachtijkauan oksepa nemiskiaj uan yetoskiaj iuan ne iluikak. Jesús kijtoj ke yejuan yeskiaj kemej se “amo ueyi oloch ichkamej”, porin amo miakej yeskiaj (Lucas 12:32, TNM). Tatitanil Juan kijtoj kanachin yeskij keman Dios kichiuak maj kiitani se taman. Juan kiitak Jesús ne iluikak “metsijkatok ipan ne tepetsin ten kiliaj Sión. Uan ompa iuan Yejuatsin yetoyaj se ciento uan omepoal uan naui mil” (Apocalipsis 14:1).

²⁴ ¿Kemanian oksepa nemiskiaj 144,000? Biblia kijtoua ke mochiuaskia satepan ke Cristo peuaskia tekiuajtiskia ne iluikak (1 Corintios 15:23). Jesús tekiuajtitokya, uan miakej nejon 144,000 iuan yetokejya ne iluikak. Sayoj ke sekin yetokejok nikan taltikpak. Keman momikiliaj, Dios niman oksepa kinmaka ininnemilis uan youij iluikak. Sayoj ke, okachi miakej oksepa nemiskej satepan nikan taltikpak itech Xochital.

25. ¿Toni tikitaskej itech okse tamachtilis?

²⁵ Amo uejkaua, Jiova kichiuas maj amo akin momikiliok (xikonixtajtolti Apocalipsis 21:4). Sayoj ke ¿toni kichiuaskej 144,000 ne iluikak? Biblia kijtoua ke tekiuajtiskej iuan Jesús. Itech okse tamachtilis okachi ika titajtoskej nejin tekiuajyot oso taixyekanalis.