TAMACHTILIS 45
¿Toni kijtosneki maj amo se mokalaki itech tein mochiua nikan taltikpak?
Jesús tamachtij ke imomachtijkauan amo pouij itech nejin taltikpak (Juan 15:19). Nejin kijtosneki ke amo akin kipaleuiaj itech política nion itech neteuilis. Sayoj ke kemansa xa ouij yeski se kichiuas nejin, uan xa hasta uelis techkejkeloskej. ¿Keniuj tiknextiskej ke amo timokalakiaj itech tein mochiua nikan taltikpak uan ke amo keman tikauaj Jiova?
1. ¿Keniuj tikinitaj tekiuanij akin yekmelauj tikchiuaj kemej Cristo?
Tejuan tikinpoujkaitaj tekiuanij. Jesús kijtoj: “Xikmaktilikan César ten kinamiki xikmaktikan César”. Uan yejua nejon tein tikchiuaj: tiktakamatij tanauatilmej tein kiixtaliaj itech altepet kemej tein kijtouaj maj se kiixtaua impuestos (Marcos 12:17). Biblia kijtoua ke tekiuanij taixyekantokej porin Jiova kinkaujtok (Romanos 13:1). Yejua ika tikmatij ke tekiuanij amo semi kipiaj tanauatil kemej Dios. Uan no, ke sayoj toDios uan iTekiuajyo uelis kiyektaliskej kuejmolmej tein tikpiaj.
2. ¿Keniuj tiknextiaj ke amo timokalakiaj itech tein mochiua nikan taltikpak?
Ijkon kemej Jesús, tejuan amo no timokalakiaj itech política. Keman miakej kiitakej ke Jesús kichiuak se ueyi tachiualis, kinekiaj kichiuaskej tekiuaj nikan taltikpak, sayoj ke yejua amo kinkauak (Juan 6:15). ¿Keyej amo? Yejua kijtoj satepan: “NoTekiuajyo amo moajsi nikan taltikpak” (Juan 18:36, TNM). Tiitatojtokakauan Jesús tiknextiaj ke amo timokalakiaj itech tein mochiua nikan taltikpak itech miak taman. Se taman yejua ke amo tiouij neteuilis (xikonita Miqueas 4:3). Maski tikpoujkaitaj tein kiixnextia se altepet kemej bandera, amo tikueyichiuaj (1 Juan 5:21). Uan amo tikpaleuiaj nion tikixnamikij se partido político oso akin kineki mochiuas tekiuaj. Ika nejin uan okseki taman tiknextiaj ke senkis tikpaleuiaj iTekiuajyo Dios, taixyekanalis tein yejuatsin kiixtalijya.
MAJ OKACHI TIMOMACHTIKAN
Maj tikitakan seki taman tein ueliskia kichiuas maj timokalakikan itech tein mochiua nikan taltikpak uan maj tikitakan keniuj uelis tiontaixpejpenas kemej kiyolpaktis Jiova.
3. Akin yekmelauj kichiuaj kemej Cristo amo mokalakiaj itech tein mochiua nikan taltikpak
Jesús uan imomachtijkauan technextilijkej toni tikchiuaskej. Xikitakan Romanos 13:1, 5-7 uan 1 Pedro 2:13, 14, no xikitakan VIDEO uan ika xitajtokan nejin:
¿Keyej moneki tikinpoujkaitaskej tekiuanij?
¿Keniuj uelis tiknextiskej ke tikintakamatij?
Keman mochiua neteuilis, miak altepemej kijtouaj ke amo mokalakiaj. Sayoj ke tapaleuiaj keman kinmakaj seki taman akin moteuitij, kemej tomin oso teposmej. Yejua ika, ¿toni yekmelauj kijtosneki amo se mokalakis itech tein mochiua nikan taltikpak? Xikitakan Juan 17:16, no xikitakan VIDEO uan ika xitajtokan nejin:
¿Toni kijtosneki amo se mokalakis itech tein mochiua nikan taltikpak?
¿Uan komo tekiuanij mitsoniluiaj xikonchiua teisa tein kiixnamiki itanauatiluan Dios? Xikitakan Hechos 5:28, 29, no xikitakan VIDEO uan ika xitajtokan nejin:
Komo se tanauatil tein kiixtalia tekiuaj kiixnamiki itanauatil Dios, ¿katiyejua moneki tiktakamatiskej?
¿Kemej itech toni amo kintakamatiskej tekiuanij akin kichiuaj kemej Cristo?
4. Tein tikonnemilia uan tein tikonchiua
Xikitakan 1 Juan 5:21, no xikitakan VIDEO uan ika xitajtokan nejin:
¿Keyej kiixtalij Ayenge amo mokalakis itech partido político nion kitajpalos bandera?
¿Tikonnemilia ke kuali tein kiixtalij?
¿Itech toni no ueliskia moitas ke timokalakijtokej itech tein mochiua nikan taltikpak? Xikitakan VIDEO uan ika xitajtokan nejin:
¿Keniuj tiknextiaj ke amo timokalakiaj itech tein mochiua nikan taltikpak keman mauiltiaj akin kayomej itech tataman altepemej?
¿Keniuj tiknextiaj ke amo timokalakiaj itech tein mochiua nikan taltikpak maski tein kiixtaliaj políticos uelis techpaleuis oso techijtakos?
¿Toni uelis panos komo semi tikakij uan tikitaj tanauatilmej oso tikakij tein oksekin techiluiaj?
¿Keniuj akin kichiua kemej Cristo kinextia ika tein kichiua uan kinemilia ke amo mokalakia itech tein mochiua nikan taltikpak?
TEIN SEKIN UELIS MITSONTAJTANISKEJ: “¿Keyej amo tikontajpaloua bandera nion tionkantaroua himno nacional?”.
¿Toni tiontanankiliskia?
TEIN TIKITAKEJ
Akin kichiuaj kemej Cristo mochikauaj amo mokalakiskej itech política, uan nejon kinextiaj ika tein kinemiliaj, kijtouaj uan kichiuaj.
Maj tikelnamikikan
¿Itech toni moneki tikintakamatiskej tekiuanij?
¿Keyej amo timokalakiaj itech política?
¿Itech toni ueliskia moitas ox timokalakijtokej itech tein mochiua nikan taltikpak?
NO XIKONITA NEJIN
¿Toni moneki xa tikauaskej para amo timokalakiskej itech tein mochiua nikan taltikpak?
¿Keniuj uelis momachtiskej kalyetouanij para kinextiskej ke amo mokalakiaj itech tein mochiua nikan taltikpak?
Maj amo tikpaleuikan nion se taltikpaktekiuajyot kampa miakej moajsij (4:25)
Miakej kinemiliaj ke kiixnextiskej ininaltepeuj yejua tein okachi kuali tein uelis kichiuaskej. Sayoj ke, ¿yekmelauj nejon?
¿Keniuj tiknextiaj ke amo tipouij nikan taltikpak keman tikixpejpenaj itech toni titekitiskej?
“Cada uno llevará su propia carga de responsabilidad” (La Atalaya, 15 de marzo de 2006)