TAMACHTILIS 36
Maj amo titakajkayauakan itech nion teyi
Nochin kinekij maj akin kuali iniuan mouikaj amo takajkayauakan, uan Jiova amo no kineki maj ijkon kichiuakan akin kuali iuan mouikaj. Sayoj ke, nejin semi ouij porin tinemij kampa miakej kinkajkayauaj oksekin. ¿Tapaleuia maj amo se takajkayaua itech nion teyi? ¿Keniuj?
1. ¿Keyej semi moneki maj amo titakajkayauakan?
Keman amo titakajkayauaj, tiknextiliaj Jiova ke tiktasojtaj uan tikpoujkaitaj. Xikonelnamiki ke Jiova kimati nochi tein tiknemiliaj uan tein tikchiuaj (Hebreos 4:13). Yejuatsin kiita keman tikixtaliaj amo titakajkayauaskej uan semi kipatiuita. ITajtol kijtoua: “Jiova amo kineki kinitas akin kinextiaj ke yolkualmej sayoj ke amo melauak, sayoj ke semi kuali mouika iniuan akin yolmelaujkej” (Proverbios 3:32).
2. ¿Itech toni tein tikchiuaj mojmostaj tiknextiaj ke amo titakajkayauaj?
Tikchiuaskej tein Jiova kineki no kijtosneki amo tikinkajkayauaskej oksekin (Zacarías 8:16, 17). ¿Keniuj tikchiuaj? Keman amo titakajkayauaj oso amo tikiniluiaj teisa tein amo melauj tochankauan, akin iniuan titekitij, tokniuan itech nechikol uan nion tekiuanij. Akin amo takajkayauaj, amo tachtekij nion kinkajkayauaj oksekin para kinichtekiliskej inintomin (xikonita Proverbios 24:28 uan Efesios 4:28). Uan no, kiixtauaj impuestos (Romanos 13:5-7). Itech nejin uan itech okseki taman, amo tiknekij titakajkayauaskej itech nion teyi (Hebreos 13:18).
3. ¿Keniuj tapaleuia komo amo titakajkayauaj?
Keman techixmatij ke amo titakajkayauaj, oksekin totech takuaujtamatij. Uan no titapaleuiaj maj itech nechikol nochin kuali momachilikan, kemej yeskia se kalyetouanij. Uan no tiyolpakij porin totanemilil amo techkuejmoloua. Komo amo titakajkayauaj, tikualnextiaj “in tanextililisme de Totajtsin Dios Totemakixtijkatsin”, uan xa uelis tikchiuaskej maj oksekin kinekikan kitekitiliskej Jiova (Tito 2:10).
MAJ OKACHI TIMOMACHTIKAN
Maj tikitakan keniuj komo amo titakajkayauaj techpaleuia maj kuali timouikakan iuan Jiova uan keniuj amo titakajkayauaskej itech nion teyi.
4. Akin amo takajkayauaj kiyolpaktiaj Jiova
Xikitakan Salmo 44:21 uan Malaquías 3:16, uan ika xitajtokan nejin:
¿Ueliskia tiknemiliskej ke uelis tiktatiskej tein melauj? ¿Keyej ijkon tikonnemilia?
Komo amo titakajkayauaj hasta keman ouij techkisas, ¿keniuj tikonnemilia ke momachilis Jiova?
Keman konemej amo takajkayauaj kinyolpaktiaj inintatuan. Keman tejuan amo titakajkayauaj tikyolpaktiaj Jiova.
5. Maj amo keman titakajkayauakan
Maski miakej kinemiliaj ke amo nochipa tapaleuia maj amo se takajkayaua, onkak okseki taman keyej amo keman tikchiuaskej. Xikonita keyej, xikitakan VIDEO.
Xikitakan Hebreos 13:18 uan ika xitajtokan keniuj amo titakajkayauaskej...
... tokalijtik.
... kampa titekitij oso kampa timomachtiaj.
... itech okseki taman.
6. Techpaleuia komo amo titakajkayauaj
Xa timokuejmolkalakiskej komo amo titakajkayauaj, sayoj ke yolik moitas ke yejua tein okachi kuali. Xikitakan Salmo 34:12-16 uan ika xitajtokan nejin:
¿Keyej okachi kuali tinemiskej komo amo titakajkayauaj?
Keman akin monamiktijkejya amo mokajkayauaj itech nion teyi, okachi kuali mouikaj.
Keman akin tetekitiliaj amo takajkayauaj, inintekouan inintech takuaujtamatij.
Keman akin nemij itech se altepet amo takajkayauaj, kuali kinitaj tekiuanij.
TEIN SEKIN KIJTOUAJ: “Uelis se takajkayauas komo amo akin kijtakoua”.
¿Tikonnemilia ke Jiova kitauelita nochi xolopijyot? ¿Keyej ijkon tikonijtoua?
TEIN TIKITAKEJ
Jiova kineki maj nochin akin kuali iuan mouikaj amo takajkayauakan ika tein kichiuaj uan kijtouaj.
Maj tikelnamikikan
¿Itech toni moneki amo titakajkayauaskej?
¿Keyej amo ueliskia tiknemiliskej ke uelis tiktatiskej tein melauj?
¿Keyej tejuatsin amo tikonneki tiontakajkayauas?
NO XIKONITA NEJIN
¿Keniuj tetatmej uelis kinpaleuiskej ininkoneuan maj amo takajkayauakan?
¿Toni tatiochiualismej kiseliskej akin kichiuaj tein kijtouaj?
Xikonchiua tein tikonijtoua uan tikonselis tatiochiualismej (9:09)
Xionmomachti ox moneki tikixtauaskej impuestos maski amo kuali motekitiltis tomin.
“¿Debe usted pagar impuestos?” (La Atalaya, 1 de septiembre de 2011)
¿Toni kipaleuij se takat akin takajkayauaya para kitanis tomin, maj kipata inemilis uan maj amo kichiuaok?
“Aprendí que Jehová es bueno y nos perdona” (La Atalaya, 1 de mayo de 2015)