Dios kiixtalij keniuj techmakixtis

Dios motenkauak iuan itekitikauj, Abrahán, ke ‘tekonetsin’ akin moijtojka ualaskia, yeskia semej ikoneuan. Ika nejon konetsin, nochin taltikpakneminij kiseliskiaj tatiochiualismej (Génesis 22:18). Satepan, Jacob, iixuiuj Abrahán, mokaltalito Egipto kampa ichankauan momiakilijkej uan mochiujkej xolal Israel.

Satepan, ompa Egipto, se tekiuaj akin amo yolkuali kinteltekitiltij israelitas. Dios kinkixtij itech nejon altepet ijkuak kichiuak maj tanauatijkej Moisés kixelouani ueyiat Chichiltik. Satepan, Dios kinmakak israelitas tanauatilmej tein ika kinyekanak uan kinyekpiak. Ompa no yetoya Majtakti Tanauatilmej uan oksekiok tein kinextiaya ke monekia kitemakaskej netetayokolilmej uan ijkon Dios kintapojpoluiskia. Dios kichiuak maj Moisés kiniluiani israelitas ke yejuatsin kititaniskia okse tanauatijkej akin yeskia ‘tekonetsin’ tein moijtojka ke ualaskia.

Naui ciento xiuit satepan, Dios motenkauak iuan tekiuaj David ke ‘tekonetsin’ taixyekanaskia itech se tekiuajyot tein uejkauaskia nochipaya. Nejin ‘tekonetsin’ yejua Mesías, Temakixtijkej akin Dios kiixtalij maj kinmakixti taltikpakneminij uan maj kichiua se xochital nikan taltikpak.

Keman Dios kiitak ke monekia, kichiuak maj David uan okseki tanauatianij kitematiltianij miak taman ika Mesías. Yejuan kijtojkej ke yeskia yolyemanik uan kualtakat. Keman taixyekanaskia kitamiskia mayan, teikamauiltilis uan neteuilis. Nochin taltikpakneminij kualtsin mouikaskiaj se iuan okse uan hasta iuan tapialmej. Tamiskia tein Dios amo keman kinekik maj onkani, kemej kokolis, tajyouilis uan mikilis. Uan akin momikilijkejya oksepa nemiskiaj nikan taltikpak.

Dios kichiuak maj tanauatijkej Miqueas kitematiltiani ke Mesías yoliskia Belén uan maj tanauatijkej Daniel kinextiani ke kimiktiskiaj. Sayoj ke Dios oksepa kimakaskia nemilis uan kiixtaliskia kemej Tekiuaj ne iluikak. Daniel no kijtoj ke iTekiuajyo Mesías senkis kinixpoloskia nochi tekiuajyomej nikan taltikpak. ¿Yekmelauj nesiko Mesías kemej moijtojka?

(Mokixtia itech Génesis 22 hasta 50 uan itech Éxodo, Deuteronomio, 2 Samuel, Salmos, Isaías, Daniel, Miqueas uan Zacarías 9:9.)