“Tikajsikke ya ne Mesías”

Chikome ciento xiuit satepan ke nochi tajkuilol hebreo yetoyaya, mochiuak tein Miqueas achtook kijtojka: Jesús, Mesías, yolik ompa Belén. Kemej treinta xiujmej satepan, itech xiuit 29 itech totonaluan, tein achtook kijtojka Daniel ika Mesías no ijkon mochiuak. Jesús moauij uan Dios kiixpejpenak ika iespíritu. Kemej tikitaj, itech tonalmej tein ixyetoya, nesik Mesías, ‘tekonetsin’ akin miak xiujmej kichixtoyaj.

Jesús niman peuak ‘kiteixmatiltia kuali tanauatilmej ika itekiuajyo Dios’ (Lucas 8:1, TNM). Ijkon kemej moijtojka, Jesús katka kualtakat, teiknelijkej uan yekmelauj kitekipachouaya tein kinpanouaya oksekin. Tein tamachtij ika netasojtalis semi tapaleuiaya, uan no kinpajtij nochi tein “kinkokoaya in tagayot”, uan ijkon kinextij ke kipiaya inepaleuil Dios (Mateo 4:23). Akin kitojtokayaj, tein tataman xiujmej kipiayaj, no ijkon kijtouayaj kemej semej imomachtijkauan: “Tikajsikke ya ne Mesías” (Juan 1:41).

Jesús kijtoj ke tepitsin achto ke iTekiuajyo senkis taixyekanaskia nikan taltikpak, onkaskia uejueyi neteuilis, talolinilis uan okseki kuejmolmej. Yejua ika tayolchikauak maj ‘ixpetantokan’ (Marcos 13:37).

Jesús amo katka tajtakojkej uan nochipa kitakamatik Dios, sayoj ke akin kitauelitayaj kimiktijkej. Kemej amo kipiaya tajtakol, ika imikilis uelik kichiuak maj oksepa tikajsikan tein Adán uan Eva kipolojkej: maj ueli tikpiakan nemilis nochipaya itech se xochital.

Keman Jesús kimiktijkej uan eyi tonal satepan Dios oksepa kimakak nemilis kemej se ángel tein kipia ueyi chikaualis, mochiuak ijkon kemej moijtojka. Satepan Jesús monextij ininixpan panoua quinientos imomachtijkauan. Achto ke yaskia iluikak, kinnauatij itatojtokakauan maj kinmatiltianij “nochi in taltikpakuani” tein Jesús uan iTekiuajyo kichiujtokej (Mateo 28:19). ¿Keniuj kichiujkej yejuan nejon tekit?

(Mokixtia itech Mateo, Marcos, Lucas, Juan uan 1 Corintios.)