NETAJTANILMEJ TEIN KISAJ ITECH BIBLIA
¿Kiueyitaliaj Dios nochi taneltokalismej?
Keman tikonkaki tanauatilmej xa tikonitani ke kemansa mochiua tein tel amo kuali uan ika mopaleuiaj taneltokalis. Sayoj ke tein melauj, amo nochin taneltokalismej kipiaj itatiochiualis Dios (Mateo 7:15). Nejin kijtosneki ke tel miakej taltikpakneminij sayoj kinkajkayauaj. (Xikonixtajtolti 1 Juan 5:19.)
Sayoj ke, Dios kimati ke moajsij taltikpakneminij akin yolmelaujkej, akin kitasojtaj tein kuali uan tein melauak (Juan 4:23). Yejua ika kinyoleua maj kitemokan tein yekmelauj tamachtia iTajtol, Biblia. (Xikonixtajtolti 1 Timoteo 2:3-5.)
¿Keniuj uelis tikonmatis katiyejua taneltokalis tein melauak?
Jiova kichiujtok maj taltikpakneminij akin tataman taneltokalis kipiayaj axkan senyetokan. ¿Keniuj? Keman kinmachtia tein melauak uan maj motasojtakan se uan okse (Miqueas 4:2, 3). Tejuatsin uelis tikonmatis akonimej pouij itech taneltokalis tein melauak komo tikonita netasojtalis tein mopialiaj se uan okse. (Xikonixtajtolti Juan 13:35.)
Ika taneltokalis tein melauak, Jiova kinsentilia nochi tataman taltikpakneminij (Salmo 133:1)
Itekitikauan Dios tein melaujkej kineltokaj tein Biblia kijtoua uan kitakamatij itanauatiluan (2 Timoteo 3:16). Kipoujkaitaj itokay Dios (Salmo 83:18). Uan no kiteixmatiltiaj ke sayoj iTekiuajyo Dios kinualkuilis tein kuali taltikpakneminij (Daniel 2:44). Uan keman kinpaleuiaj oksekin, kikauaj maj kemej yeskia petanikan, ijkon kemej kichiuak Jesús (Mateo 5:16). Tein melauj, amo teouijmaka se kimatis akonimej porin kinkalpanouaj oksekin uan kinmatiltiaj nochi tein kuali tein kichiuas nejin Tekiuajyot. (Xikonixtajtolti Mateo 24:14; Hechos 5:42 uan 20:20.)