¿Katka melauak uan amo techikouiaya Tanauatil tein Dios kimakak xolal Israel?

PANOUAYA veinte xiujmej, tekiuanij itech se altepet kiixtalijkej maj kinmiktikan ome takamej akin kinpantijkej ke temiktijkaj. Keman kiitstoyaj tein sejse kinamikia kiselis, nochi tein ika kinteiluiliayaj amo melauak katka. Ijkuak kiitakej ke mopolojtoyaj, uan satepan ke tel tekitikej abogados oso tetajtouianij, kichiujkej maj kikajkauakan semej. Sayoj ke nion okachi kuali tetajtouianij ueliskiaj kipaleuiskej okse takat, porin kimiktijkajya.

Nepololmej kemej nejin uelis mochiuas itech tein yeski altepet. Yejua ika, Biblia tanauatia: “Melaujkayot moneki tiktojtokas” (Deuteronomio 16:20). Keman akin tamelauaj tekitij ika melaujkayot, tinochin tikmachiliaj ke tikpiaj nepaleuil. Dios kimakak xolal Israel se Tanauatil tein amo techikouiaya uan katka melauak. Maj tikitakan uan ijkon tikajsikamatiskej ox melauj itech “iojuan [Dios] moajsi melaujkayot” (Deuteronomio 32:4).

TAMELAUANIJ AKIN KIPIAJ TAMATILIS, TAIXEJEKOLIS UAN KIMATIJ TEKITISKEJ

Komo jueces oso tamelauanij kuali tamachtilmej, melaujkej uan amo mokauaj maj kinkouakan kinpaleuiaj taltikpakneminij. ITanauatil Dios kijtoua ke tamelauanij monekia ijkon yeskij. Tein melauj, keman israelitas peujkej ojtokaj itech taluakyan, Dios kiluij Moisés maj kinixpejpena “takamej tamatinij, akin kimoujkatokaj Dios, takamej akin takuaujtamachmej, akin kitauelitaj motomintiskej ika oksekin” (Éxodo 18:21, 22). Cuarenta xiujmej satepan, Moisés oksepa kiyekijtoj ke monekia maj kintemokan “takamej akin kipiaj tamatilis, kuali taixejekolis uan akin kimatij tekitiskej” akin yeskiaj tamelauanij (Deuteronomio 1:13-17).

Miak xiujmej satepan, Jehosafat,a akin tekiuajtia Judá, kinnauatij tamelauanij: “Xikitakan tein nankichiuaj, porin amo nantamelauaj inintokaykopa takamej, ta itokaykopa Jiova; uan yejua namouan yetok keman nankiixtaliaj se taman. Uan axkan, xikmoujkatokakan Jiova. Xiknejmachpiakan tein nankichiuaj, porin Jiova toDios amo kipia nion tepitsin tein amo melauak nion techikoita nion mokaua maj kikouakan” (2 Crónicas 19:6, 7). Ijkon, tekiuaj kinelnamiktij ke komo kikauayaj maj kinyekana xijxikuiyot uan tachikoitalis, tanankiliskiaj iixpan Dios komo kijtakoskiaj aksa.

Keman tamelauanij kitakamatiaj nejin tanauatilmej, nochi xolal kuali momachiliaya. Uan amo sayoj kipiayaj tanauatilmej tein monekia kitakamatiskej, ta iTanauatil Dios no kipiaya tamachtilismej tein kinpaleuiskia maj kiixpejpenakan tein melauak, hasta keman se taman yeskia semi ouij. Maj tikitakan seki.

KUALI TAMACHTILISMEJ TEIN TAPALEUIJKEJ MAJ MOIXTALI TEIN MELAUAK

Maski tamelauanij monekia kipiaskej tamatilis uan kuali kichiuaskej inintekiuj, amo moixyekanayaj sayoj ika tein yejuan ueliaj kichiuayaj uan inintamatilis; Jiova Dios kinmakak tamachtilismej tein kinyekanaskia uan ijkon amo mopoloskiaj keman kiixtaliskiaj se taman. Kemej neskayot:

Kitemoskej tein yekmelauj panok itech sejse taman. Jiova kiluij Moisés maj kinnauati tamelauanij itech xolal Israel: “Keman nankikakiskej teisa tein ika moteiliuiliaj nanmoikniuan, moneki nantamelauaskej ika melaujkayot” (Deuteronomio 1:16). Se tamelaujkej uelis kiixtalis tein melauak sayoj komo achto kimati tein yekmelauj panok. Yejua ika, Dios kinnauatij tamelauanij ke monekia maj achto kuali kitemokan tein yekmelauj panok. Monekia achto kiyekitaskej ox tein ika kiteiluiliayaj aksa katka melauak, ijkon ueliskia kisentokaskej kiitaskej (Deuteronomio 13:14; 17:4).

Kinkakiskej akin kiitakej tein mochiuak. Tein kijtoskiaj akin kiitakej tein mochiuak semi monekia keman kitemojtoyaj tein panok. Tanauatil kijtouaya: “Nion se akin taixpanti moneki iselti kiteiliuilis se takat ika tein yeski nepolol oso tein yeski tajtakol tein yejua kichiuak. Ika tein kijtoskej ome taixpantinij oso tein kijtoskej eyi taixpantinij moneki momelauas teisa” (Deuteronomio 19:15). Itech iTanauatil Dios kijtouaya ke akin kiitakej tein mochiuak monekia amo kiajxitiliskej nion motenkauaskej iniuan akin amo yolkualmej kitakajkayauiliskej aksa ininixpan tamelauanij (Éxodo 23:1).

Kijtoskej tein melauak. Tatsakuiltilis tein kiseliaya akin tetakajkayauiliaya kinnejmachtiaya nochin akin moajsiaj ininixpan tamelauanij. Tanauatil kijtouaya: “Tamelauanij senkis kiyektemoskej tein panok, uan komo akin taixpanti takajkayaujtok uan kijtouilia tein amo melauak iikniuj, namejuan moneki nankichiuiliskej ijkon kemej yejua kinemilijka kichiuilis iikniuj, uan moneki tikijkuanis tein amo kuali kampa tinemi” (Deuteronomio 19:18, 19). Kemej neskayot, komo se takat kitakajkayauiliaya aksa uan ijkon ueliskia moaxkatilis tein kikauilijkaj itatuan, kichiualtiayaj maj kiixtaua ipatiuj nochi tein kinekia moaxkatilis. Uan komo kitakajkayauiliaya aksa akin amo teyi tauikaya porin kinekia maj kimiktikan, yejua monekia kimiktiskej. Nejin Tanauatil senkis tapaleuiaya maj kijtokan tein melauak.

Tamelauaskej ika melaujkayot. Keman kipiayaj nochi taman tein ika kiteiluiliayaj aksa, tamelauanij kiyekitayaj uan kiixtaliayaj tein kiseliskia. Keman mochiujtoya nejon monekia kiyekitaskej nejin tein motemakak itech iTanauatil Dios: “Moneki amo tikchikotasojtas akin amo teyi kipia oso tikchiuas tein kineki akin ueyichiujkej. Ika melaujkayot moneki [tita]melauas” (Levítico 19:15). Itech nochi kuejmolmej, tamelauanij monekia kitemoskej tein mochiuak uan ika kiixtaliskiaj tein monekia kiselis aksa, amo kemej moitaya oso porin katka ueyichiujkej.

Nejin tamachtilismej, tein moyeknextijkej ne uejkauj itech iTanauatil Dios tein kimakak xolal Israel, uelis semi kinpaleuis tekiuanij keman kimelauaskej se kuejmol itech totonaluan. Komo kitakamatij, kuali tamelauaskej uan amo kitatsakuiltiskej akin amo teyi tauika.

XOLAL KAMPA ONKAYA YEKMELAUJ MELAUJKAYOT

Moisés kinchiuilij israelitas nejin netajtanil: “¿Uan katiyejua ueyi altepet kipia tajtolmej tein kinextia keniuj mochiuas teisa uan tajtolmej tein kinextia tatsakuiltilis tein melauak kemej nochi nejin tanauatil tein niktalijtok nanmoixpan axkan?” (Deuteronomio 4:8). Tein melauj, nion se altepet kiselij tein kuali porin kipiak tanauatilmej kemej nejon. Keman tekiuajtik Salomón, akin ijkuak katka telpoch kitemoj kitakamatis itanauatiluan Jiova, israelitas yeknemiaj, yolseujtoyaj uan kuali kinyaya; nochin “takuayaj uan tatayiayaj uan yolpakiaj” (1 Reyes 4:20, 25).

Tetayokoltij tikijtoskej ke satepan israelitas kikaujkej Jiova. Itenkopa Jeremías, Dios kijtoj: “Yejuan kiixtopeuanij itajtol Jiova, uan ¿toni tamatilis kipiaj?” (Jeremías 8:9). Nejon kichiuak maj Jerusalén mokepani se “altepet tein itajtakol maj toyauini esti”, uan ompa senkis mochiuaya “tein tel amo kuali”. Ika tamik kiixpolojkej uan kisenkaujkej setenta xiujmej (Ezequiel 22:2; Jeremías 25:11).

Isaías nemik itech seki xiujmej keman xolal Israel kipanotoya uejueyi ouijkayomej. Keman kielnamikia tein mochiujka achto, kiolinij maj kiajsikamati se taman tein melauak ika Jiova uan iTanauatil: “Keman motech ualeua tamelaualis ika taltikpak, akin moajsij nikan taltikpak kiajsikamatij melaujkayot” (Isaías 26:9).

Isaías no kijtoj tein kichiuaskia akin Dios kiixtali maj mochiua Tekiuaj, Jesucristo: “Amo tamelauas sayoj ika tein kiitas tapani nion tetatsakuiltis sayoj ika tein kikakis. Ika melaujkayot kinmelauas akin yolyemankej” (Isaías 11:3, 4). ¡Se tel kualtsin nemilis kipiaskej akin kinixyekanas iTekiuajyo Dios uan akin yejuatsin kiixtalij maj taixyekana! (Mateo 6:10.)